Published:Updated:

ஒவ்வோர் ஆண்டும் பட்ஜெட் தாக்கல் செய்ய வேண்டியது அவசியமா? - ஓர் அலசல்!

பட்ஜெட் 2020
பட்ஜெட் 2020

கால இடைவெளி என்பது சங்கீதத்தில் மட்டுமல்ல, நாட்டின் பட்ஜெட், நிதிக்கொள்கை, பணவியல் கொள்கைகளிலும் உண்டு.

பட்ஜெட் ஒவ்வோர் ஆண்டும் தாக்கல் செய்ய வேண்டுமா?

இது என்ன அபத்தமான கேள்வி, ஒவ்வோர் ஆண்டும் பட்ஜெட் தாக்கல் செய்யாமல் எப்படி ஒரு நாட்டின் அரசாங்கத்தின் வரவு செலவுக் கணக்குகளைத் தெரிந்துகொள்வது என்ற கேள்வி எழலாம். வரவு செலவுக் கணக்குகளை அறிந்துகொள்வது என்று மட்டும் இருந்தால் பரவாயில்லை. நாட்டின் நிதிக் கொள்கையிலும் (Fiscal Policy), வரிச் சலுகைகளிலும், வரி விகிதங்களிலும் ஒவ்வோர் ஆண்டும் மாற்றம் செய்யப்பட வேண்டுமா என்பதுதான் பல சமயங்களில் பல பொருளாதார வல்லுநர்கள் எழுப்பிக்கொண்டிருக்கும் கேள்வியாகும்.

வி.தியாகராஜன்
வி.தியாகராஜன்

இரண்டு ஆண்டுகளுக்கு ஒருமுறை நிதிக் கொள்கையில் வரிச்சலுகைகளில் வரி விகிதங்களில் மாற்றம் கொண்டுவந்தால் ஒரு நாட்டின் பொருளாதாரத்தில் பல்வேறு நிறுவனங்களும் ஒரு நிலையான முடிவை மேற்கொண்டு அதற்கேற்ப வர்த்தகத்தில் ஈடுபட ஏதுவாக அமையும். ஆண்டுதோறும் பட்ஜெட் தாக்கல் செய்யும்போது அதில் என்ன வரிச்சலுகைகள் கொடுக்கப்படுகின்றன, வரி விகிதங்களில் என்ன மாற்றம் வருகிறது என்பதைப் பார்த்து, அதற்கேற்ப தங்களது முதலீட்டு முடிவுகளைத் தள்ளிப்போடும் நிறுவனங்களும் தனிநபர்களும் இருக்கத்தான் செய்கிறார்கள்.

ஏறக்குறைய பட்ஜெட் போடுவதற்கு ஒரு மாதம் முன்புவரை இந்த முதலீட்டு முடிவுகளைத் தள்ளிப்போடுவது என்பது ஆரம்பமாகிறது. ஓர் ஆண்டில் 12 மாதங்களில் ஒரு மாதம் எந்த முதலீட்டு முடிவையும் மேற்கொள்ளாமல், ஒரு நாட்டின் பொருளாதாரம் செயல்படுவது என்பது அந்த நாட்டின் பொருளாதார முன்னேற்றத்துக்கு எந்த விதத்திலும் பயனளிக்காது.

உதாரணமாக, பங்குச் சந்தையில் நீண்ட கால மூலதன ஆதாயம் ரூ.1,00,000-க்கும் அதிகமாக இருந்தால், ஒரு லட்சத்துக்கும் மேற்பட்ட தொகைக்கு நீண்ட கால மூலதன ஆதாய வரி தற்போது 10 சதவிகிதமாக உள்ளது. இதுதவிர, 4% செஸ் வரி விதிக்கப்படுகிறது. இதில் பிப்ரவரி 1 அன்று தாக்கல் செய்யப்படும் பட்ஜெட்டில் வரிச் சலுகைகள் கிடைக்கும் என்ற நம்பிக்கையில், பல முதலீட்டாளர்கள் பங்குச் சந்தையில் நீண்டகாலம் வைத்திருக்கும் பங்குகளை விற்பனை செய்வதைத் தள்ளிப்போடுகிறார்கள். அவ்வாறு தள்ளிப்போடுவது பங்குச் சந்தையில் சுணக்கத்தை ஏற்படுத்துவதுடன், பணச்சுழற்சியையும் தடுக்கிறது.

Reserve Bank of India
Reserve Bank of India
வருமான வரி மூலம் இந்திய அரசுக்கு கிடைத்த வருவாய் எவ்வளவு? #Budget2020

இதேபோல், தொலைத்தொடர்புத் துறை, ரியல் எஸ்டேட், வாகன உற்பத்தித் துறை போன்ற பல துறையில் இருக்கும் நிறுவனங்கள், பட்ஜெட்டில் தங்கள் துறைக்கு என்னென்ன சலுகைகள் கிடைக்கும் என்று பார்த்துவிட்டு அதற்கேற்ப முடிவு எடுக்கலாம் என்று முதலீட்டு முடிவுகளைத் தள்ளிப் போடுகிறார்கள். இது நாட்டின் பொருளாதார வளர்ச்சியில் மந்தநிலையை ஏற்படுத்தும். இதனால்தான் பல பொருளாதார வல்லுநர்கள் ஒவ்வொரு வருடமும் வரவு செலவுக் கணக்குகளை மட்டும் தாக்கல் செய்துவிட்டு, இரண்டு வருடத்துக்கு ஒருமுறை நிதிக் கொள்கையிலும், வரிச் சலுகைகளிலும், வரி விகிதங்களில் மாற்றம் செய்தால் போதுமானது என்று கூறுகிறார்கள்.

நமது நாட்டின் பணவியல் கொள்கை (Monetary Policy) ரிசர்வ் வங்கியால் இரண்டு மாதத்துக்கு ஒரு முறை நிர்ணயிக்கப்படுகின்றது. இவ்வாறு இரண்டு மாதத்துக்கு ஒருமுறை பணவியல் கொள்கை நிர்ணயிக்கப்படுவது சரியல்ல என்று சொல்லும் பொருளாதார வல்லுநர்கள் இருக்கிறார்கள்.

budget 2020
budget 2020
பட்ஜெட்டில் சொல்லப்படும் நிதிப் பற்றாக்குறை என்றால் என்ன? #Budget2020

பணவியல் கொள்கை அறிவிப்பின்போது ரிசர்வ் வங்கி வட்டி விகிதத்தைக் குறைக்கும் என்ற எதிர்பார்ப்பில், வீடு வாங்குவது, வாகனம் வாங்குவதைத் தள்ளிப்போடும் தனிநபர்கள் இருக்கிறார்கள். ஆனால், அவ்வாறு ரிசர்வ் வங்கி வட்டி விகிதத்தைக் குறைக்காவிட்டால், மேலும் இரண்டு மாதங்களுக்கு வீடு மற்றும் வாகனம் வாங்கும் முடிவைத் தள்ளிப்போடுகிறார்கள். இது ஒரு நாட்டின் பொருளாதார வளர்ச்சிக்கு ஏற்றதல்ல. மேலும், ரிசர்வ் வங்கி வட்டியைக் குறைத்தாலும், வங்கிகள் அதற்கேற்ப பொதுமக்களுக்கு வழங்கும் சில்லறைக் கடன்கள் (Retail Loans) வட்டி விகிதத்தைக் குறைக்கின்றனவா என்பது மிகப் பெரிய கேள்விக்குறியாகும். அவ்வாறு குறைக்கப்படாத காரணத்தினால்தான் வங்கிகள் தங்களது வாடிக்கையாளர்களுக்கு வழங்குகிற வட்டி விகிதத்தை எவ்வாறு நிர்ணயிக்க வேண்டும் என்று ரிசர்வ் வங்கி வரையறை செய்துள்ளது. தற்போது இந்த வட்டி விகிதம் ரெப்போ வட்டி விகிதத்துடன் அல்லது அரசாங்கப் பத்திர வட்டி விகிதத்துடன் இணைந்து நிர்ணயிக்கப்பட வேண்டும் என்று ரிசர்வ் வங்கி சமீபத்தில் வரையறை செய்துள்ளது.

நிதி கொள்கையும் (Fiscal Policy), பணவியல் கொள்கையும் (Monetary Policy) ஒன்றையொன்று சார்ந்துள்ளன. நிதிக்கொள்கை அரசாங்கத்தால் நிர்ணயிக்கப்பட்டுக் கடைப்பிடிக்கப்பட வேண்டிய ஒன்றாகும். பணவியல் கொள்கை ரிசர்வ் வங்கியால் நிர்ணயிக்கப்பட வேண்டிய ஒன்றாகும். நிதிப் பற்றாக்குறை அதிகரிக்கும் சமயங்களில் ரிசர்வ் வங்கி வட்டி விகிதத்தைக் குறைத்து, அரசாங்கம் குறைந்த வட்டியில் புதிய கடன்கள் வாங்க வழிவகை செய்கிறது அல்லது செய்ய வேண்டும் அல்லது செய்ய வற்புறுத்தப்படுகிறது. இதற்கேற்ப ரிசர்வ் வங்கி ரெப்போ வட்டி விகிதத்தில் மாற்றங்கள் செய்கிறது. இத்தகைய காரணங்களினால், இரண்டு மாதத்துக்கு ஒருமுறை பணவியல் கொள்கை நிர்ணயிக்கப்பட வேண்டுமா என்று வாதம் நடந்தபடிதான் உள்ளது.

Fiscal Deficit
Fiscal Deficit

செபி வகுத்துள்ள நெறிமுறைகளின்படி, பங்குச் சந்தையில் பட்டியலிடப்பட்டுள்ள நிறுவனங்கள் தங்களின் தணிக்கை செய்யப்படாத நிதிக் கணக்குகளை ஒவ்வொரு காலாண்டும் பொதுமக்களுக்குத் தெரிவிக்க வேண்டும் என்று விதிமுறை உள்ளது. இந்தக் காலாண்டு விதிமுறை சரிதானா என்ற விவாதமும் இப்போது எழுப்பப்படுகிறது. ஏனெனில் ஒவ்வொரு காலாண்டின் லாப நஷ்டத்துக்கு ஏற்ப, நிறுவனங்களின் பங்கு விலைகளில் மிகப் பெரிய ஏற்றத்தாழ்வுகள் ஏற்பட்டு, நிறுவனங்களின் சந்தை மதிப்பில் மிகப்பெரும் உயர்வுகளும், தாழ்வுகளும் நிகழ்ந்துவிடுகின்றன. ஒரு துறையில் பல ஆண்டுகளாகக் கோலோச்சிவரும் ஒரு நிறுவனம், ஒரே ஒரு காலாண்டில் நஷ்டக் கணக்கைக் காண்பிப்பதாலோ அல்லது லாபத்தைக் குறைத்துக் காண்பிப்பதாலோ, அந்த நிறுவனம் அதன் சந்தை மதிப்பில் மிகப்பெரும் தாக்கத்தை எதிர்கொள்ள வேண்டியிருக்கிறது.

கால இடைவெளி என்பது சங்கீதத்தில் மட்டுமல்ல, நாட்டின் பட்ஜெட், நிதிக்கொள்கை, பணவியல் கொள்கைகளிலும் உண்டு.

அடுத்த கட்டுரைக்கு