‘ஜீரோ பட்ஜெட் விவசாயத்துக்கு ஊக்கம் தரப்படும்!’

-மத்திய நிதி அமைச்சர் நிர்மலா சீதாராமன், தற்போதைய பட்ஜெட்டில் வெளியிட்டிருக்கும் இந்த அறிவிப்பு, லட்சக்கணக்கான இயற்கை விவசாயிகளை மகிழ்ச்சியில் ஆழ்த்தியுள்ளது. பாரம்பர்ய வேளாண்மைக்குக் கைகொடுத்திருக்கும் பி.ஜே.பி அரசுக்குப் பாராட்டுகள்!

2007-ம் ஆண்டுப் பசுமை விகடன் தொடங்கப்பட்டது முதல், உங்கள் கைகளில் தற்போது தவழ்ந்து கொண்டிருக்கும் 300-வது இதழ் வரை, ஜீரோ பட்ஜெட் இயற்கை வழி வேளாண்மை முறை பற்றித் தொடர்ந்து எழுதிவருகிறோம்.

மகாராஷ்டிராவைச் சேர்ந்த ‘வேளாண் வித்தகர்’ சுபாஷ் பாலேக்கர் கண்டறிந்ததுதான் ஜீரோ பட்ஜெட் சாகுபடி முறை. அடிப்படையில் வேளாண் பட்டதாரியான சுபாஷ் பாலேக்கர், தனது சித்தாந்தத்தை இந்தியாவின் பல மாநிலங்களில் பரப்பி வருபவர். ‘சுபாஷ் பாலேக்கரின் ஜீரோ பட்ஜெட் முறையைப் பயன்படுத்திவரும் கர்நாடக விவசாயிகள், வறண்ட நிலங்களை வளமாக்கி வருகின்றனர். இதையெல்லாம் நேரடியாகத் தெரிந்துகொண்டு, அந்தப் பசுமையைத் தமிழ்நாட்டுப் பக்கமும் திருப்புவதற்காக 12 ஆண்டுகளுக்கு முன் விதைபோட்டது உங்கள் பசுமை விகடன். இன்று, ஜீரோ பட்ஜெட் வேளாண்மையில் இந்திய அளவில் குறிப்பிடத்தக்க இடத்தில் இருக்கிறது தமிழ்நாடு!

செலவு குறைந்த இந்த விவசாய முறையின் மூலம், விளைச்சல் கூடும், தண்ணீர் மிச்சமாகும், நஞ்சில்லா உணவு கிடைக்கும், கடன் இல்லாமல் போகும். இப்படிப் பலவிதமான நன்மைகள் கொண்ட இந்த அற்புதத் தொழில்நுட்பம் நாட்டில் முழுமையாகப் பரவவேண்டும் என்று மாநில அரசையும் மத்திய அரசையும் தொடர்ந்து வலியுறுத்திவருகிறது பசுமை விகடன். ‘சுதேசி பேசும் பி.ஜே.பி அரசு, நம்முடைய பாரம்பர்யம் மிக்க ஜீரோ பட்ஜெட் விவசாயத்தை நாடு முழுக்கப் பரப்பவேண்டும்’ என்று கடந்த ஐந்தாண்டுகளில் பலதடவை எடுத்துச்சொல்லியிருக்கிறது பசுமை விகடன்.

இதோ, காலம் கனிந்திருக்கிறது. ‘இனியெல்லாம் இயற்கையே’ என்று நாடே இனி இயற்கைக்குத் திரும்பட்டும்!