“கோலமிடுவது கலாசார உரிமை... கமிஷனரே அவதூறு பரப்பலாமா?”

‘‘கோலம் போடும் போராட்டத்தில் ஈடுபட்ட பெண் ஒருவருக்கு, பாகிஸ்தானுடன் தொடர்பு’’ - இப்படியொரு பகீர் குண்டை வீசியிருக்கிறார், சென்னை போலீஸ் கமிஷனர் ஏ.கே.விஸ்வநாதன். அதையடுத்து, ‘‘போராடத் துணிபவர்களை ஒடுக்க எடுக்கப்படும் பயமுறுத்தும் நடவடிக்கைதான் இது’’ என்ற விமர்சனங்கள் கிளம்பியிருக்கின்றன.

குடியுரிமை திருத்தச் சட்டத்தை நாடாளுமன்றத்தில் பா.ஜ.க அரசு அமல்படுத்தியபோது, அதற்கு எதிராக நாடு முழுவதும் போராட்டம் வெடித்தது. கட்சித் தலைவர்கள் முதல் கல்லூரி மாணவர்கள் வரை அனைவரும் வீதியில் இறங்கிப் போராடத் தொடங்கினர். இதன் ஒரு பகுதியாக, ‘வேண்டாம் CAA, வேண்டாம் NRC’ என்ற வாசகத்தை வீட்டுவாசலில் கோலமிட்டு, குடியுரிமை திருத்தச் சட்டத்துக்கு எதிரான போராட்டத்தை சிலர் முன்னெடுத்தனர்.

டிசம்பர் 29-ம் தேதி, சென்னை பெசன்ட்நகரில் தங்கள் வீடுகளிலும் பொது இடங்களிலும் இப்படிக் கோலமிட்டு போராட்டம் நடத்தியவர்களை உடனடியாக அப்புறப்படுத்த முயன்றது போலீஸ். எவ்வளவோ முயன்றும் போராட்டக்காரர்கள் கலையாததால், இறுதியில் அவர்களைக் கைதுசெய்தது போலீஸ்.

கைதுசெய்யப்பட்டவர்கள் சில மணி நேரங்களிலேயே விடுவிக்கப்பட்டாலும், அவர்கள் பற்றவைத்த ‘கோல நெருப்பு’ தமிழகமெங்கும் காட்டுத்தீயாகப் பரவியது. போராட்டக்காரர் களை அறிவாலயத்துக்கே அழைத்து தன் ஆதரவைத் தெரிவித்தார் தி.மு.க தலைவர் மு.க.ஸ்டாலின். `தி.மு.க மகளிரணியினர் அனைவரும் தங்கள் வீடுகளில் குடியுரிமை திருத்தச் சட்டத்துக்கு எதிராகக் கோலமிட வேண்டும்’ என்று, தி.மு.க மகளிரணிச் செயலாளர் கனிமொழி உத்தரவிட்டார். தி.மு.க தலைவர்களின் வீடுகளில் குடியுரிமை திருத்தச் சட்டத்துக்கு எதிரான கோலங்கள் பளிச்சிட்டன. வி.சி.க தலைவர் தொல்.திருமாவளவன், தானே களமிறங்கி வேளச்சேரி வி.சி.க அலுவலகத்தில் கோலமிட்டார்.

பெசன்ட்நகர் பீச்சோடு முடிந்திருக்கக்கூடிய இந்தப் போராட்டத்தை தமிழகமெங்கும் பரவவைத்த பெருமை, சென்னை போலீஸைத்தான் சாரும். போராட்டக்காரர்களை அவர்கள் கைதுசெய்த பிறகே, தமிழகமெங்கும் கோலப்போராட்டம் விஸ்வரூபமெடுத்தது. தி.மு.க-வினர் மட்டுமல்லாது, இதற்கு முன்பு தங்கள் வீடுகளில் கோலம் போட்டு பழக்கமே இல்லாத முஸ்லிம்களும் தங்கள் வீட்டு வாசலில் குடியுரிமை திருத்தச் சட்டத்துக்கு எதிராகக் கோலமிட்டு தங்கள் எதிர்ப்பைத் தெரிவித்தனர்.

இந்த நிலையில், புத்தாண்டு அன்று பத்திரிகையாளர்களைச் சந்தித்த சென்னை போலீஸ் கமிஷனர் ஏ.கே.விஸ்வநாதன், ‘‘கோலம் போடும் போராட்டத்தில் ஈடுபட்டவர்களின் விவரங்கள் சேகரிக்கப்பட்டன. அவர்களில் காயத்ரி கந்தாதை என்கிற பெண்ணின் ஃபேஸ்புக் பக்கத்தில், அந்தப் பெண் ‘பைட்ஸ் ஃபார் ஆல்’ என்ற பாகிஸ்தான் நிறுவனத்தில் ஆராய்ச்சியாளராக உள்ளார் எனக் குறிப்பிடப்பட்டுள்ளது. அந்த நிறுவனம், ‘அசோசியேஷன் ஆஃப் ஆல் பாகிஸ்தான் சிட்டிசன் ஜர்னலிஸ்ட்’ என்ற அமைப்பைச் சேர்ந்ததாக இருக்கிறது. காயத்ரி எந்த அளவுக்கு பாகிஸ்தானுடன் தொடர்பில் உள்ளார், இவருக்கும் அந்த அமைப்புக்கும் என்ன தொடர்பு என விசாரித்துவருகிறோம். அறப்போர் இயக்கம், ‘வெல்ஃபேர் பார்ட்டி ஆஃப் இந்தியா’ என இங்கு இருக்கும் சில அமைப்புகளும் அவருக்கு ஆதரவாக உள்ளன.

கோலம் போடும் போராட்டத்துக்கு போலீஸ் அனுமதி கொடுக்கவில்லை. அதையும் மீறி பெசன்ட்நகரில் சிலர் கோலம் போட்டனர். அதை யாரும் தடுக்கவில்லை. ஆனால், ஒருவர் வீட்டில் ஏற்கெனவே போட்டிருந்த கோலத்தில் `NO TO CAA, NRC’ என எழுதினார்கள். அந்த வீட்டில் இருந்த 92 வயது முதியவர், `யாருடைய அனுமதி பெற்று இப்படிச் செய்கிறீர்கள்?’ எனக் கேட்க, இரு தரப்புக்கும் வாக்குவாதம் ஏற்பட்டுள்ளது. போலீஸுக்கு தகவல் கிடைத்தவுடன், போராட்டம் நடத்தியவர்களை அங்கேயிருந்து கிளம்புமாறு அறிவுறுத்தி, வேறு இடத்துக்கு அழைத்துச் சென்றோம். பொதுமக்களிடம் பிரச்னை செய்ததால்தான் இந்த விவகாரத்தில் போலீஸ் தலையிட்டது. கோலம் போட்டதால் யாரும் கைதுசெய்யப்படவில்லை” என விளக்கமளித்தார்.