Published:Updated:

`கேரள போலீஸின் கடிதம் வந்தது; அமலாபால் மீது நடவடிக்கை எடுக்கப்படும்!'-புதுச்சேரி போக்குவரத்து ஆணையர்

ஜெ.முருகன்
அ.குரூஸ்தனம்

``நடிகை அமலாபால் மீது நடவடிக்கை எடுங்கள்” என்று புதுச்சேரி அரசுக்கு கேரள காவல்துறை கடிதம் எழுதியிருப்பது பரபரப்பை ஏற்படுத்தியிருக்கிறது.

Amala Paul
Amala Paul

கேரளாவைச் சேர்ந்த நடிகை அமலாபால் கடந்த 2017-ம் ஆண்டு 1 கோடி ரூபாய் மதிப்புள்ள `மெர்சிடஸ் எஸ்’ ரக காரை வாங்கினார். அதைக் கேரளாவில் பதிவு செய்தால் 20 லட்சம் ரூபாய் வரை வரி கட்ட வேண்டுமென்பதால், புதுச்சேரியில் வசிப்பதாகப் போலி முகவரி கொடுத்து 1.75 லட்சம் ரூபாய் மட்டும் வரி செலுத்தி புதுச்சேரியில் பதிவு செய்தார். புதுச்சேரியைச் சேர்ந்தவர்கள் மட்டுமே அங்கு வாகனங்களை பதிவு செய்ய முடியும் என்ற நிலையில், நடிகை அமலாபால் வரி ஏய்ப்பு செய்ததாக எழுந்த புகார் புதுச்சேரி அரசியலில் பரபரப்பை ஏற்படுத்தியது.

Actress Amala Paul
Actress Amala Paul

நடிகை அமலாபால் மீது வழக்கு பதிவு செய்ய வேண்டும் என்று வற்புறுத்திய ஆளுநர் கிரண் பேடி, இது சட்டரீதியிலான மோசடி என்று விமர்சித்திருந்தார்.

அதேபோல நடிகை அமலாபால் காரை பதிவு செய்த விவகாரத்தில் எந்த முறைகேடும் நடக்கவில்லை என்று அப்போது கிரண் பேடிக்கு பதிலடி கொடுத்தார் போக்குவரத்துத்துறை அமைச்சர் ஷாஜகான். அதையடுத்து போலி முகவரி கொடுத்து வரி ஏய்ப்பு செய்ததால் கேரள அரசுக்கு 20 லட்சம் ரூபாய் வரை வரி இழப்பு ஏற்பட்டதாகக் கூறி அமலாபால் மீது வழக்கு பதிவு செய்தது கேரள மாநிலக் காவல்துறை.

Amala Paul
Amala Paul

அதை எதிர்த்து கேரள உயர் நீதிமன்றத்தில் முன்ஜாமீன் மனுத்தாக்கல் செய்தார் அமலாபால். மனுவை விசாரித்த நீதிமன்றம், காவல் நிலையத்தில் நேரில் ஆஜராகி விளக்கத்தைத் தர வேண்டும் உள்ளிட்ட நிபந்தனைகளுடன் அவருக்கு நிபந்தனை ஜாமீன் வழங்கியது.

அதன்படி படப்பிடிப்புக்காகப் புதுச்சேரியில் அடுக்குமாடி குடியிருப்பு ஒன்றை வாடகைக்கு எடுத்திருப்பதாகவும், தான் வசித்துக்கொண்டிருந்த அந்த முகவரியில்தான் காரை பதிவு செய்ததாகவும் காவல்நிலையத்தில் தெரிவித்திருந்தார் அமலாபால். ஆனால், அமலாபால் வசித்ததாகக் கூறியிருக்கும் அந்த முகவரியில் ஏற்கெனவே பல சொகுசுக் கார்கள் பதிவு செய்திருப்பதால் அமலாபால் கூறுவது ஏற்கும்படி இல்லை என்று தெரிவித்தது கேரள மாநிலக் காவல்துறை. கேரள உயர் நீதி மன்றத்தில் நடைபெற்று வந்த இந்த வழக்கில், ``நடிகை அமலாபால் போலி முகவரி கொடுத்து புதுச்சேரியில் காரை பதிவு செய்து வரி ஏய்ப்பு செய்தது கண்டுபிடிக்கப்பட்டிருக்கிறது” என்று கேரள குற்றப்பிரிவு காவல்துறையினர் நேற்று நீதிமன்றத்தில் அறிக்கை சமர்ப்பித்தனர்.

Puducherry Transport Commissioner Sivakumar
Puducherry Transport Commissioner Sivakumar

அதைத்தொடர்ந்து, கார் பதிவு செய்யப்பட்டது புதுச்சேரியில் என்பதால் ``நடிகை அமலாபால் மீது நடவடிக்கை எடுங்கள்” என்று கேரள காவல்துறை சார்பில் புதுச்சேரி போக்குவரத்துத் துறைக்குக் கடிதம் அனுப்பப்பட்டிருக்கிறது. இது குறித்து விளக்கம் கேட்க புதுச்சேரி போக்குவரத்துத் துறையின் ஆணையர் சிவக்குமாரைத் தொடர்புகொண்டபோது, “கடந்த சில நாள்களுக்கு முன்பு கேரள காவல்துறை தரப்பிலிருந்து நடிகை அமலாபால் சொகுசு கார் பதிவு செய்த விவகாரம் தொடர்பான கடிதம் புதுச்சேரி அரசுக்கு வந்திருக்கிறது. தற்போது அதன் மீது நடவடிக்கை எடுக்க மாநில சட்டத்துறை வல்லுநர்களிடம் ஆலோசனை கேட்டிருக்கிறோம். அதன் அடிப்படையில் அவர் மீது நடவடிக்கை எடுக்கப்படும்” என்று தெரிவித்தார்.