Published:Updated:

வடமாநிலங்களைப் பீதியில் வைத்திருக்கும் புல்டோசர், ஒலிபெருக்கி - தமிழகத்தில் தாக்கத்தை ஏற்படுத்துமா?!

புல்டோசர் அரசியல் ( AP )

2022-ம் தொடக்கத்திலிருந்தே நாடு முழுவதும் மதம் சார்ந்த பல்வேறு விவகாரங்கள் பூதாகரமாகிக்கொண்டே இருக்கின்றன.

வடமாநிலங்களைப் பீதியில் வைத்திருக்கும் புல்டோசர், ஒலிபெருக்கி - தமிழகத்தில் தாக்கத்தை ஏற்படுத்துமா?!

2022-ம் தொடக்கத்திலிருந்தே நாடு முழுவதும் மதம் சார்ந்த பல்வேறு விவகாரங்கள் பூதாகரமாகிக்கொண்டே இருக்கின்றன.

Published:Updated:
புல்டோசர் அரசியல் ( AP )

பிப்ரவரி மாத இறுதியில் கர்நாடக மாநிலம், உடுப்பியிலுள்ள குந்தாப்பூர் அரசு பியூ கல்லூரியில், ஹிஜாப் அணிந்து வந்த ஆறு இஸ்லாமிய மாணவிகள் வகுப்பறைக்குள் நுழைய அனுமதி மறுக்கப்பட்டது. இதனால், `ஹிஜாப் அணிவது எங்கள் உரிமை’ எனக் கூறி அந்த ஆறு மாணவிகளும் தர்ணா போராட்டத்தில் ஈடுபட்டனர். இஸ்லாமிய மாணவர்களுக்கு எதிராகச் சில இந்து அமைப்பினர், மாணவர்களுக்குக் காவித்துண்டு அணிந்து போராட்டத்தில் ஈடுபடவைத்ததால் விவகாரம் பெரிதானது. சில நாள்களிலேயே இந்தப் பிரச்னை கர்நாடகாவில் சட்டம்-ஒழுங்கை பாதித்தது.

ஹிஜாப் சர்ச்சை
ஹிஜாப் சர்ச்சை

இதன் தாக்கம் அண்டை மாநிலமான கேரளா, தமிழகம், ஆந்திரா உள்ளிட்ட மாநிலங்களில் எதிரொலிக்கத் தொடங்கியதும், மாநில அரசுகள் சுதாரித்துச் சமாளித்ததால், பிரச்னைகள் ஏதும் ஏற்படவில்லை. ஆனால், வடமாநிலங்களில் ஹிஜாப் விவகாரம் இன்றளவும் சர்ச்சையை ஏற்படுத்திக்கொண்டேயிருக்கிறது.

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

இதைத் தொடர்ந்து, ராமநவமி விழா நாடு முழுவதும் ஏப்ரல் 10-ம் தேதி கோலாகலமாகக் கொண்டாடப்பட்டது. அப்போது, இஸ்லாமிய மக்கள் குடியிருக்கும் பகுதிகளில் இந்து மத அமைப்பினர் ஆயுதங்களுடன் ஊர்வலம் சென்றும், கோஷங்கள் எழுப்பியும், மசூதிகளில் காவிக்கொடியை ஏற்றியதாலும் வன்முறை வெடித்ததாகச் சொல்லப்பட்டது. இஸ்லாமியர்கள் தரப்பில் கற்கள் வீசியதாகவும் அதனாலேயே கலவரம் வெடித்ததாகவும் எதிர்த்தரப்பில் சொல்லப்பட்டது.

ராம நவமி ஊர்வலத்தில் கலவரம்
ராம நவமி ஊர்வலத்தில் கலவரம்
ட்விட்டர்

இதையடுத்து குஜராத், மத்தியப் பிரதேசம், மேற்கு வங்கம், ஜார்கண்ட் ஆகிய நான்கு மாநிலங்களில் கலவரம் வெடித்தது. இதை அடக்க காவல்துறை மேற்கொண்ட நடவடிக்கையில் ஏராளமானோர் காயமடைந்தனர். அதேபோல, நான்குக்கும் மேற்பட்ட நபர்கள் பலியாகினர். நூற்றுக்கும் மேற்பட்டவர்கள் கைதுசெய்யப்பட்டு சிறையில் அடைக்கப்பட்டனர். இந்த விவகாரம் அடங்குவதற்குள் சட்டவிதிகளை மீறி ஆக்கிரமிப்பு செய்ததாக வடமாநிலங்களில் இஸ்லாமியர்களின் வீடுகள், கடைகள் புல்டோசர் மூலம் குறிவைத்து இடிக்கப்பட்டன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

குறிப்பாக, மத்தியப் பிரதேசத்தில் கர்கோனின் காஸ்கஸ்வாடி பகுதியில் ராம நவமி ஊர்வலத்தின்போது ஏற்பட்ட வன்முறையில், ஈடுபட்டதாக பிரதான் மந்திரி ஆவாஸ் யோஜனா திட்டத்தின் கீழ் கட்டப்பட்ட ஒரு வீடு முதற்கொண்டு, 16 வீடுகள் 29 கடைகள் இடிக்கப்பட்டன. அதேபோல உத்தரகாண்ட் மாநிலத்தில் ஹரித்வார், உதம் சிங் நகர், ஹல்த்வானி ஆகிய மூன்று இடங்களில் இஸ்லாமியர்களின் வீடுகள், கடைகள் இடிக்கப்பட்டன. இதற்கு அம்மாநில முதல்வர் புஷ்கர் சிங் தாமி 'சட்டவிரோதமான கட்டடங்கள் எங்கு காணப்பட்டாலும் புல்டோசர்கள் பயன்படுத்தப்படும்' என்று தெரிவித்துள்ளார்.

புல்டோசர் அரசியல்
புல்டோசர் அரசியல்
AP

மேலும், ஏப்ரல் 16-ம் தேதியில் டெல்லி ஜஹாங்கீர்புரி பகுதியில் உள்ள இஸ்லாமியர்களின் வீடுகள், கடைகள் இடித்துத் தரைமட்டமாக்கப்பட்டன. அப்பகுதியில் உள்ள வீடுகளை இடிக்கக் கூடாது என்று உச்ச நீதிமன்றம் உத்தரவிட்ட பிறகும் டெல்லி முனிசிபாலிட்டி கார்ப்பரேஷன் பல வீடுகள், கடைகளைச் சட்டவிரோதமாக இடித்தது. சிபிஎம் தலைவர் பிருந்தா காரத் உள்ளிட்ட கட்சியினர் புல்டோசர் முன் போராட்டத்தில் ஈடுபட்டனர்.

இந்த விவகாரம் முடிந்துவிட்டது என்று பெருமூச்சுவிடுவதற்குள், மகாராஷ்டிராவில் அடுத்த பூதம் கிளம்பியது. அதாவது, மகாராஷ்டிரா மாநில முதல்வர் உத்தவ் தாக்கரேவின் சித்தப்பா மகனும், நவநிர்மாண் சேனா (எம்என்எஸ்) தலைவருமான ராஜ் தாக்கரே மாநிலத்திலுள்ள மசூதிகளில் ஒலிபெருக்கிகளை மே 4-ம் தேதிக்குள் அகற்ற வேண்டும் என்றும், இல்லையென்றால், மசூதி முன்பாக அனுமன் பாடல்கள் ஒலிக்கப்படும் என்றும் பொதுக்கூட்டம் ஒன்றில் பேசினார். இதனால், நீண்ட நாள்களுக்குப் பிறகு மகாராஷ்டிராவில் பதற்றமான சூழல் ஏற்பட்டது. இதையடுத்து, டெல்லியில் மசூதிகளில் ஒலிபெருக்கிகள் அகற்றப்பட வேண்டும் என டெல்லி பாஜக பேசத் தொடங்கியது. அதேபோல, உத்தரப்பிரதேசத்தில் எந்த வழிபாட்டுத் தலத்திலும் ஒலிபெருக்கியைப் பயன்படுத்தக் கூடாது என்று உத்தரவிடப்பட்டது.

ராஜ் தாக்கரே
ராஜ் தாக்கரே

ராஜ் தாக்கரேவின் அறிவிப்பு காரணமாக மாநிலம் முழுவதும் பாதுகாப்பு அதிகரிக்கப்பட்டது. மேலும், மசூதி அருகே அனுமன் பாடலை ஒலிபரப்ப முயன்ற ஒரு சிலரும், முன்னெச்சரிக்கை நடவடிக்கையாக எம்என்எஸ் கட்சியின் நிர்வாகிகளும் கைதுசெய்யப்பட்டனர்.

அதேபோல, “ஒலிபெருக்கிகளை அகற்றும் போராட்டத்தை நிறுத்த மாட்டோம்" என்று ராஜ் தாக்கரே கூறியிருப்பது பெரும் பதற்ற சூழலை உருவாக்கியுள்ளது. சமூக விரோதிகள், ரெளடிகளாகக் கருதப்படும் நபர்களின் வீடுகளை புல்டோசர்வைத்து இடிக்கும் கலாசாரத்தை உ.பி முதல்வர் யோகி கடந்த சில ஆண்டுகளுக்கு முன்பாகத் தொடங்கிவைத்தார். அது தற்போது, கலவரத்தில் ஈடுபட்டதாகவும், ஆக்கிரமிப்பில் இருப்பதாகவும் கூறி, இஸ்லாமியர்களைக் குறிவைத்து அடிக்க பயன்படுவதாகக் கூறப்படுகிறது.

ஹிஜாப் விவகாரத்தில் பெரும் தாக்கத்தைச் சந்திக்காத தமிழகம், ஒலிபெருக்கி, புல்டோசரில் சிக்குமா என்பது குறித்து அரசியல் கட்சித் தலைவர்களிடம் பேசினோம்.

பாஜக செய்தி தொடர்பாளர் நாராயணன் திருப்பதி, " பாஜக ஆளும் மாநிலங்களில்தான் புல்டோசர், ஒலிபெருக்கி விவகாரம் இருப்பது என்பதே தவறாகும். டெல்லி, மகாராஷ்டிராவில் பாஜக ஆளவில்லை. இஸ்லாமிய மக்களுக்கு எதிரான கட்சி பாஜக என்று கூறுவது, மத நல்லிணத்தைச் சீரழிக்க நினைக்கும் நபர்களின் உள்நோக்கக் கருத்தாகும். பாஜக., இஸ்லாமிய மக்களின் விரோதி என்றால், தமிழகத்தில் ஆக்கிரமிப்பு என்று கூறி ஏராளமான கோயில்கள் தொடர்ந்து இடிக்கப்பட்டுவருகின்றன. அப்படியென்றால், திமுக இந்துக்களின் விரோதியா?

நாராயணன் திருப்பதி
நாராயணன் திருப்பதி

பிரதமர் மோடி குஜராத் முதல்வராக இருந்தபோது, ஆக்கிரமிப்பில் இருந்த 800 கோயில்களை சட்டரீதியாக அகற்றினார். அதேபோல, தற்போது உ.பி-யில் பள்ளிகள், மருத்துவமனைகளுக்கு அருகே இருக்கும் அனைத்து வழிபாட்டுத் தலங்களில் உள்ள ஒலிபெருக்கிகள் அகற்றப்பட்டுள்ளன. பாஜக-வைப் பொறுத்தவரை ஆக்கிரமிப்புகள், இடையூறுகள் அனைத்தும் அகற்றப்பட வேண்டும். அதன்படி, தமிழகத்தில் பொதுமக்களுக்கு இடையூறாக இருக்கும் ஒலிபெருக்கிகளையும், ஆக்கிரமிப்புகளையும் அகற்றும் பணியில் பாஜக இறங்கும்" என்றார்.

சிபிஎம் மாநிலச் செயலாளர் கே.பாலகிருஷ்ணனிடம் பேசினோம் "மதக் கலவரம் மூலமாக பாஜக நாட்டைத் துண்டாட நினைக்கிறது. தமிழகத்தில் ஹிஜாப் விவகாரத்தை எடுத்து பெரிய அடியைத்தான் வாங்கியது. தற்போது ஆதீன பல்லக்கு விவகாரத்தைக் கையில் எடுத்துள்ளது. இதுவும் எடுபடாது. காலங்காலமாக பிரார்த்தனையின்போது மசூதிகளில் ஒலிபெருக்கி பயன்படுத்தப்படுகிறது. ஏதோ நேற்றுதான் ஒலிபெருக்கி மாட்டியதுபோல நாடு முழுவதும் பின்புலத்திலிருந்து பிரச்னையை பாஜக உருவாக்குகிறது. இந்த விவகாரத்தைத் தமிழகத்தில் விரைவில் கிளப்புவார்கள். ஆனால், தமிழகத்தில் மதச்சார்பற்ற கூட்டணி வலுவாக இருப்பதால், பாஜக-வின் சித்து வேலைகளை முறியடிக்கும். அதேபோல, மத வெறுப்பு அரசியலை தமிழக மக்கள் ஒருபோதும் ஏற்க மாட்டார்கள்" என்றார் அதீத நம்பிக்கையுடன்.

கே.பாலகிருஷ்ணன்
கே.பாலகிருஷ்ணன்

ஆக்கிரமிப்பு விவகாரத்தில் தமிழக அரசு கடுமையான முடிவுகளை சில நேரம் எடுத்துள்ளது. ஆனால், மத அடிப்படையில் ஆக்கிரமிப்புகள் அகற்றம் செய்யப்பட்டதில்லை. இந்த விவகாரத்தில் பிரச்னை ஏற்படவில்லையென்றாலும், கூம்பு வடிவ ஒலிபெருக்கியைப் பயன்படுத்த தமிழக அரசு ஏற்கனவே தடைவிதித்துள்ளது. இருந்தபோதிலும் சட்டத்துக்குப் புறம்பாக சில வழிபாட்டுத் தலங்களில் கூம்பு ஒலிபெருக்கி பயன்படுத்தப்பட்டுவருகிறது. மேலும், மசூதிகளில் ஒலிபெருக்கி பயன்படுத்துவது குறித்து ஆங்காங்கே சில பிரச்னைகள் வெடித்துக்கொண்டுதான் இருக்கின்றன. எனவே, ஒலிபெருக்கி விவகாரத்தில் மதச் சாயம் பூச வாய்ப்பு இருக்கிறது என்பதே அரசியல் நோக்கர்களின் கருத்தாக இருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism