Published:Updated:

40 கோடி ரூபாய் நன்கொடை... தேர்தல் செலவா, லஞ்சமா?

தி.மு.க கூட்டணி
பிரீமியம் ஸ்டோரி
தி.மு.க கூட்டணி

தி.மு.க கூட்டணியை சுழற்றியடிக்கும் சர்ச்சை!

40 கோடி ரூபாய் நன்கொடை... தேர்தல் செலவா, லஞ்சமா?

தி.மு.க கூட்டணியை சுழற்றியடிக்கும் சர்ச்சை!

Published:Updated:
தி.மு.க கூட்டணி
பிரீமியம் ஸ்டோரி
தி.மு.க கூட்டணி

‘அது மக்கள் நலக் கூட்டணியல்ல... பண நலக் கூட்டணி’ - கடந்த பிப்ரவரி மாதம் அ.தி.மு.க – பா.ம.க கூட்டணி அமைத்துக்கொண்டபோது, தி.மு.க தலைவர் ஸ்டாலின் உதிர்த்த வார்த்தைகள் இவை. ஆனால், தேர்தல் செலவுகளுக்காக கம்யூனிஸ்ட்கள், கொ.ம.தே.க உள்ளிட்ட தன் கூட்டணிக் கட்சிகளுக்கு 40 கோடி ரூபாயை அள்ளிக் கொடுத்திருக்கிறது அதே தி.மு.க. தேர்தல் ஆணையத்திடம் தி.மு.க சமர்ப்பித்திருக்கும் பிரமாணப் பத்திரம் மூலம் இந்தத் தகவல்கள் வெளிச்சத்துக்கு வந்துள்ளன. பிரமாணப் பத்திரத்தை விரிவாகப் புரட்டினோம்.

இந்திய கம்யூனிஸ்ட் கட்சிக்கு 15 கோடி ரூபாய், மார்க்சிஸ்ட் கம்யூனிஸ்ட் கட்சிக்கு 10 கோடி ரூபாய், கொங்குநாடு மக்கள் தேசிய கட்சிக்கு 15 கோடி ரூபாய் தேர்தல் செலவுகளுக்காகக் கொடுத்ததாக பிரமாணப் பத்திரத்தில் குறிப்பிட்டுள்ளது தி.மு.க. அதேபோல, தி.மு.க வேட்பாளர்கள் 23 பேருக்கு தலா 50 லட்சம் ரூபாய், ஸ்டாலின் பிரசாரத்துக்கு 58,93,000 ரூபாய் உட்பட சுமார் 79 கோடி ரூபாயை, தேர்தல் செலவாகக் காட்டியுள்ளது தி.மு.க.

வேட்பாளருக்கு ஓகே... கட்சிக்கு எதற்கு?

தற்போது நாமக்கல் எம்.பி-யாக இருக்கும் கொ.ம.தே.க-வின் ஏ.கே.பி.சின்ராஜ், உதயசூரியன் சின்னத்தில்தான் போட்டியிட்டார். அதன் காரணமாகவே சின்ராஜுக்கு 50 லட்சம் ரூபாய் கொடுத்ததாக தி.மு.க கூறியுள்ளது. தி.மு.க கூட்டணியில் கொ.ம.தே.க-வுக்கு ஒதுக்கப்பட்டது நாமக்கல் தொகுதி மட்டுமே. இதை தவிர்த்து கொ.ம.தே.க-வுக்கு 15 கோடி ரூபாயை வழங்கியுள்ளது தி.மு.க. இதைத்தான் “சொந்த சின்னத்தில் தேர்தலில் போட்டியிடாத ஒரு கட்சிக்கு எதற்காக தி.மு.க 15 கோடி ரூபாயைத் தர வேண்டும்?” என்று கேள்வி எழுப்புகின்றனர் சமூக ஆர்வலர்கள்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

விடுதலைச் சிறுத்தைகள் கட்சியைச் சேர்ந்த ரவிக்குமாரும் உதயசூரியன் சின்னத்தில்தான் போட்டியிட்டார். அவருக்கும் 50 லட்சம் ரூபாய் வழங்கியதாக தி.மு.க கூறியுள்ளது. ஆனால், ரவிக்குமார் தாக்கல் செய்துள்ள பிரமாணப் பத்திரத்தில், தி.மு.க-விடமிருந்து 10 லட்சம் ரூபாயும், விடுதலைச் சிறுத்தைகளிடமிருந்து 50 லட்சம் ரூபாயும் பெற்றதாகக் கூறியுள்ளார். ஒரே வேட்பாளருக்கு தி.மு.க ஒரு கணக்கையும், சம்பந்தப்பட்ட வேட்பாளர் வேறு கணக்கையும் காட்டியுள்ளது முரண்பாடாக இருக்கிறது.

இன்னொரு பக்கம் மார்க்சிஸ்ட் கம்யூனிஸ்ட் தாக்கல் செய்துள்ள பிரமாணப் பத்திரத்தில், இந்தியா முழுவதுமே எட்டு கோடி ரூபாய்தான் தேர்தல் செலவு செய்ததாகக் கூறியுள்ளது. தமிழகத்தில் கோவை நாடாளுமன்றத் தொகுதியில் போட்டியிட்ட பி.ஆர்.நடராஜன், மதுரை நாடாளுமன்றத் தொகுதியில் போட்டியிட்ட சு.வெங்கடேசன் இருவரின் ஒட்டுமொத்த செலவே 81 லட்சம் ரூபாய்தான் என்று கூறப்பட்டுள்ளது. ஆனால், தி.மு.க கொடுத்ததாகச் சொல்லும் 10 கோடி ரூபாய்குறித்து எந்தத் தகவலும் அதில் இல்லை. கோவை, மதுரை என இரண்டு தொகுதிகளுக்கு 81 லட்சம் ரூபாய் செலவழித்தார்கள் என்றால், மீதம் உள்ள ஒன்பது கோடி ரூபாய் எங்கே என்று கேள்வி எழுகிறது.

இந்திய கம்யூனிஸ்ட் கட்சி, செலவு விவரங்களை இன்னும் தாக்கல் செய்யவில்லை. ஆனால், அதன் வேட்பாளர்கள் தங்கள் செலவுகளை தாக்கல் செய்துவிட்டனர். அந்தக் கட்சியின் திருப்பூர் வேட்பாளர் சுப்பராயன், தி.மு.க-விடமிருந்து நான்கு லட்சம் ரூபாய் பெற்றதாகத் தெரிவித்துள்ளார். ஆனால், இந்திய கம்யூனிஸ்ட் கட்சிக்கு தி.மு.க கொடுத்தது 15 கோடி ரூபாய். ஜனநாயகம், பணநாயகமாக மாறிவரும் தேர்தல் கலாசாரத்தில், ஆளும் அ.தி.மு.க., பா.ஜ.க அரசுகளை எந்த விஷயத்தில் தி.மு.க-வினர் தாக்கிப் பேசினார்களோ... அதே வழிமுறையை தி.மு.க-வும் பின்பற்றியிருப்பது சர்ச்சையைக் கிளப்பியிருக்கிறது.

லோகநாதன்
லோகநாதன்

லஞ்சமா, நன்கொடையா?

கோவையைச் சேர்ந்த மூத்த வழக்கறிஞர் லோகநாதன் இதுகுறித்துக் கூறுகையில், ‘‘வேட்புமனுத் தாக்கல் செய்ததிலிருந்து வாக்கு எண்ணிக்கை வரையிலான செலவுகளை, சம்பந்தப்பட்ட வேட்பாளர் மற்றும் அந்தக் கட்சியினர் தேர்தல் ஆணையத்தில் சமர்ப்பிக்க வேண்டும் என்று 2011-ம் ஆண்டு உச்ச நீதிமன்றம் உத்தரவிட்டுள்ளது. ஆனால், தங்கள் சின்னத்தில் தேர்தலிலேயே போட்டியிடாத கொ.ம.தே.க-வுக்கு எதற்காக தி.மு.க 15 கோடி ரூபாயைக் கொடுத்தது, தங்கள் கூட்டணியில் இணைவதற்காக லஞ்சமாகக் கொடுத்தார்களா?

நாடாளுமன்றத் தொகுதியில் ஒரு வேட்பாளர் 70 லட்சம் ரூபாய் வரைதான் செலவு செய்ய முடியும். அந்த வகையில், அதிகபட்சமாக நான்கு தொகுதிகளில் இரண்டு கம்யூனிஸ்ட் கட்சிகளும் இரண்டு கோடியே 80 லட்சம் ரூபாய் மட்டுமே செலவு செய்ய முடியும். ஆனால், கம்யூனிஸ்ட் கட்சிகள் 25 கோடி ரூபாயைப் பெற்றுள்ளன. இடத்தைப் பகிர்த்துகொள்வதற்குத்தானே கூட்டணி... பணத்தைப் பகிர்ந்துகொள்வதற் காகவா கூட்டணி? வாக்காளருக்குப் பணம் கொடுப்பது எப்படி சட்டப்படி தவறோ, அப்படித்தான் கூட்டணிக் கட்சிகளுக்குப் பணம் கொடுப்பதும். எனவே, இதை லஞ்சக் குற்றமாகத்தான் பார்க்க வேண்டும்” என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கொ.ம.தே.க சொல்வது என்ன?

நாமக்கல் எம்.பி சின்ராஜிடம் பேசினோம். “சில விஷயங்களை வெளியே சொல்ல முடியாது. குறிப்பாக, பத்திரிகையாளர்களிடம் சொல்ல முடியாது. தி.மு.க-வும் நாங்களும் ஒரே தகவலைத்தான் சொல்லியிருக்கிறோம். எதுவாக இருந்தாலும் ஆடிட்டரிடம்தான் பேச வேண்டும்” என்றார் பதற்றத்துடன்.

40 கோடி ரூபாய் நன்கொடை... தேர்தல் செலவா, லஞ்சமா?

கொ.ம.தே.க பொதுச்செயலாளர் ஈஸ்வரனிடம் பேசினோம். “நாங்கள் நாமக்கல் தொகுதியைத் தவிர்த்து தேர்தலில் போட்டியிடவில்லை என்கிறார்கள். ஆனால், நாங்கள் தமிழகம் முழுக்க கூட்டணிக் கட்சிகளுக்காக வேலை செய்திருக் கிறோம். அரசியல் கட்சிகளுக்கு நன்கொடை வருவது இயல்புதான். வருமானவரி தாக்கல் செய்யும்போது, தி.மு.க கொடுத்த மொத்த பணத்துக்கான செலவுகளைக் குறிப்பிடுவோம்” என்றார்.

சி.பி.ஐ சொல்வது என்ன?

இந்திய கம்யூனிஸ்ட் கட்சியின் திருப்பூர் எம்.பியான சுப்பராயனிடம் பேசினோம். “என்னுடைய பிரமாணப் பத்திரத்தில் வரவு-செலவுகளை தெளிவாகக் குறிப்பிட்டுள்ளேன். மற்ற விவரங்களை நீங்கள் மாநிலச் செயலாளரிடம்தான் கேட்க வேண்டும்” என்றார். இந்திய கம்யூனிஸ்ட் கட்சியின் மாநிலச் செயலாளர் முத்தரசனோ, “வேட்பாளர்கள் சமர்ப்பிக்கும் பிரமாணப் பத்திரம் வேறு... கட்சிகள் சமர்ப்பிக்கும் பிரமாணப் பத்திரம் வேறு. எங்கள் கட்சியின் செலவுகள் குறித்த பிரமாணப் பத்திரத்தை விரைவில் தாக்கல் செய்ய உள்ளோம். அதில், தி.மு.க உட்பட நாங்கள் பெற்றுள்ள அனைத்து நன்கொடை விவரங்களையும் குறிப்பிடுவோம். இதில் எந்த ரகசியமும் இல்லை. தவிர, இது எப்போதும் இருக்கும் நடைமுறைதான்” என்றார்.

சுப்பராயன்
சுப்பராயன்

சி.பி.எம் சொல்வது என்ன?

மார்க்சிஸ்ட் கம்யூனிஸ்ட் கட்சியின் மாநிலச் செயலாளர் கே.பாலகிருஷ்ணனிடம் பேசினோம். “தமிழகம் முழுவதும் நாங்கள் மொத்தமாக சுமார் 14 கோடி ரூபாய் நன்கொடை பெற்றுள்ளோம். அந்த விவரங்களை, எங்கள் தலைமைக்கு அனுப்பிவிட்டோம். கட்சித் தலைமை தரப்பில் அனைத்து மாநிலங்களின் செலவு விவரங்களையும் சேர்த்து, தேர்தல் ஆணையத்தில் சமர்ப்பித்துள்ளனர். ஆனால், தேர்தல் ஆணையம் அந்த விவரங்களை முழுமையாகப் பதிவேற்றவில்லை. அனைத்து மாநிலங்களையும் சேர்த்து மொத்தம் 40 கோடி ரூபாய் வரை செலவு செய்யப்பட்டுள்ளது. நாங்கள் கொடுத்த தகவல்களைப் பதிவேற்றாதது தேர்தல் ஆணையத்தின் தவறுதான்’’ என்றார்.

வி.சி-கள் சொல்வது என்ன?

விழுப்புரம் எம்.பி ரவிக்குமார், “தி.மு.க-விடமிருந்து 50 லட்சம் ரூபாயும், விடுதலைச் சிறுத்தைகளிடமிருந்து 10 லட்சம் ரூபாயும்தான் பெற்றேன். ஆனால், நான் தாக்கல் செய்த ஆவணத்தில் ஒரு பிழையாகிவிட்டது. அதனால், ஏற்பட்ட குழப்பம்தான் இது” என்றார்.

என்ன சொல்கிறது தி.மு.க?

இதுகுறித்து தி.மு.க அமைப்புச் செயலாளர் ஆர்.எஸ்.பாரதியிடம் கேட்டோம். “நாங்கள் கணக்கு வழக்குகளைத் தெளிவாகக் கடைப்பிடித்துவருகிறோம். தேர்தல் ஆணையம் கேட்ட விவரங்களைத் தந்துள்ளோம். அந்தத் தொகை எதற்காகக் கொடுக்கப்பட்டது என்று தேர்தல் ஆணையம் கேட்கவில்லை. எனவே, அதுகுறித்து மற்றவர்களுக்கு பதில் சொல்ல வேண்டிய அவசியமும் தி.மு.க-வுக்கு இல்லை. எங்களிடம் உதவி கேட்ட கட்சியினருக்கு உதவி செய்துள்ளோம். அவ்வளவுதான். இதை தேவையில்லாமல் சர்ச்சையாக்குகிறார்கள்” என்றார்.

இதுகுறித்து முன்னாள் தலைமைத் தேர்தல் ஆணையர் ஒருவரிடம் கேட்டதற்கு, “வேட்பாளருக்குத்தான் செலவு செய்ய கட்டுப்பாடு இருக்கிறது. அரசியல் கட்சிகளுக்கு அப்படி எதுவுமில்லை. ஆனாலும், செலவுத் தொகையை பிரமாணப் பத்திரத்தில் குறிப்பிட வேண்டும். தற்போது, தி.மு.க கூட்டணிக் கட்சிகள் தாக்கல் செய்துள்ள பிரமாணப் பத்திரத்தில் ஏராளமான முரண்கள் இருக்கின்றன. நிச்சயமாக, தேர்தல் ஆணையம் அவர்களிடம் கேள்வி கேட்கும். அவர்கள் சொல்லும் பதிலைப் பொறுத்துதான் தவறு நடந்திருக்கிறதா என்பதை உறுதிப்படுத்த முடியும்” என்றார்.

பழைய நடைமுறைதான்!

1971-ம் ஆண்டு தி.மு.க - கம்யூனிஸ்ட் கூட்டணி, தேர்தலில் வெற்றிபெற்று ஆட்சியைப் பிடித்தது. கருணாநிதி முதல்வர் ஆனார். ஆனால், 1972-ம் ஆண்டு விவசாயிகள்மீது நடத்தப்பட்ட துப்பாக்கிச்சூட்டைக் கண்டித்து, கம்யூனிஸ்ட் கட்சி சட்டசபையில் தி.மு.க மீது நம்பிக்கையில்லாத் தீர்மானம் கொண்டுவந்தது. அப்போது, கம்யூனிஸ்ட் எம்.எல்.ஏ க.சுப்புவுக்கும் கருணாநிதிக்கும் காரசாரமான விவாதம் நடந்தது.

‘‘கம்யூனிஸ்ட் கட்சிக்கு ஆதரவு மட்டுமல்ல... பணமும் சேர்த்தே கொடுத்தோம்’’ என்றார் கருணாநிதி. கடுப்பான சுப்பு, ‘‘இதை நான் ஆட்சேபிக்கிறேன். ஆதாரம் இல்லாவிட்டால் இதை வாபஸ் வாங்க வேண்டும்’’ என்று வெடித்தார். தொடர்ந்து புதுக்கோட்டை எம்.எல்.ஏ சுப்பையாவுக்கு 5,000 ரூபாய் வழங்கிய ஆவணத்தைக் காட்டினார் கருணாநிதி. அன்று அமைதியாகச் சென்ற கம்யூனிஸ்ட் கட்சியினர், மறுநாள் தேர்தலுக்காக பெரு நிறுவனங்களிடம் தி.மு.க வாங்கிய நன்கொடை விவரங்களை சட்டசபையில் பட்டியலிட்டு பதிலடி கொடுத்தனர்.

தி.மு.க-வின் மாஸ்டர் பிளான்!

`தேர்தலுக்காக கோடிக்கணக்கில் குவிந்த பணத்தை, இப்படி கணக்குக் காண்பித்து பணத்தை வெள்ளையாக்கிவிட்டது தி.மு.க’ என்ற பேச்சு, அரசியல் வட்டாரத்தில் நிலவுகிறது. தவிர, தேர்தலில் தி.மு.க-வின் பலம் தெரிந்துவிட்டதால், கூட்டணிக் கட்சிகளைக் கழற்றிவிடுவதற்காகவும் இப்படிச் செய்திருக்கலாம் என்றும் ஒருசாரார் கூறுகின்றனர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism