Published:Updated:

`ரூ.70 கோடி செலவு; வந்தது பிரமாண்ட மணல் அள்ளும் கப்பல்!'- ராமேஸ்வரத்தை அச்சுறுத்தும் கடல் அரிப்பு

கப்பல் மூலம் கடலில் தோண்டும் மணலை குழாய்கள் மூலம் கடற்கரை பகுதிக்குக் கொண்டுவந்து பின்னர் அவற்றை வாகனங்கள் மூலம் குந்துகால் துறைமுகத்துக்கு கொண்டு செல்லவும் திட்டமிட்டுள்ளனர்.

கடலில் மணல் அள்ள பயன்படுத்தப்பட உள்ள கப்பல்.
கடலில் மணல் அள்ள பயன்படுத்தப்பட உள்ள கப்பல். ( உ.பாண்டி )

ராமேஸ்வரம் கோயில் மற்றும் குடியிருப்பு பகுதிகளுக்கு சேதம் விளைவிக்கும் வகையில் ராமேஸ்வரம் கடலில் இருந்து மணல் எடுப்பதற்கு பொதுமக்கள், மீனவர்கள் எதிர்ப்பு தெரிவித்துள்ளனர்.

கடலில் மணல் அள்ள பயன்படுத்தப்பட உள்ள கப்பல்.
கடலில் மணல் அள்ள பயன்படுத்தப்பட உள்ள கப்பல்.
உ.பாண்டி

பாம்பன் அருகே உள்ள குந்துகாலில் 70 கோடி ரூபாய் செலவில் புதிதாக துறைமுகம் கட்டப்பட்டு வருகிறது. இந்தத் துறைமுகத்தின் பணிகளுக்கு தரமற்ற மணலை பயன்படுத்துவதாக மீனவர்கள் குற்றச்சாட்டு கூறிவந்தனர். மேலும், ஒப்பந்தக்காரர் பணிகளுக்குத் தேவையான மணலை வெளியிலிருந்து கொண்டுவராமல் குந்துகால் பகுதியில் உள்ள அரசுக்குச் சொந்தமான புறம்போக்கு நிலங்களிலிருந்து எடுப்பதாகவும், இதனால் குந்துகால் பகுதியில் கடல் அரிப்பு ஏற்படும் நிலை உருவாகும் எனவும் கூறப்பட்டது.

இந்த நிலையில், கடற்கரையிலிருந்து துறைமுக பாலம் வரை வாகனங்கள் சென்று வரும் பகுதியானது பள்ளமாக உள்ளது. இந்தப் பள்ளத்தை நிரப்ப கடற்கரையிலிருந்து பாலம் வரை மணல் கொட்டப்பட வேண்டும். இதற்காக ராமேஸ்வரம் கடலிலிருந்து மணலை எடுத்துச் செல்ல ஒப்பந்தக்காரர்கள் திட்டமிட்டுள்ளனர்.

கடல் மணல் எடுக்க பயன்படும் குழாய்கள்
கடல் மணல் எடுக்க பயன்படும் குழாய்கள்
உ.பாண்டி

ராமேஸ்வரம் மீன்பிடி துறைமுகத்தின் வடக்குப் பகுதியில் ஆழம் குறைந்த நிலையில் காணப்படும் கடல் பகுதியிலிருந்து மண் தோண்டும் கப்பல் மூலம் மணல் எடுக்கத் திட்டமிட்டுள்ளனர் அவர்கள். கப்பல் மூலம் கடலில் தோண்டும் மணலை குழாய்கள் மூலம் கடற்கரை பகுதிக்குக் கொண்டுவந்து பின்னர் அவற்றை வாகனங்கள் மூலம் குந்துகால் துறைமுகத்துக்குக் கொண்டு செல்லவும் திட்டமிட்டுள்ளனர். இதற்கான பணிகளை மேற்கொள்ள மண் தோண்டும் கப்பல், மணல் அள்ளும் வாகனம், கடலிலிருந்து மணலை கரைக்குக் கொண்டுவர பயன்படும் இரும்புக் குழாய்கள் ஆகியன ராமேஸ்வரம் கடற்கரைக்குக் கொண்டு வரப்பட்டுள்ளது.

துறைமுகத்தின் வடக்குப் பகுதியிலிருந்து சில நூறு அடிகளில் ராமநாதசுவாமி கோயிலும், கடற்கரையின் அருகில் ஏராளமான வீடுகளும், தங்கும் விடுதிகளும் உள்ளன. கடல் அரிப்பினால் இவற்றுக்குப் பாதிப்பு ஏற்படாமல் இருக்க ராட்சஷ பாறைகள் மூலம் தடுப்பு ஏற்படுத்தப்பட்டுள்ளது. இந்த நிலையில், இந்தக் கடல் பகுதியிலிருந்து பல நூறு டன் அளவில் மணல் அள்ள திட்டமிட்டிருப்பதால் இந்தப் பகுதியில் கடல் அரிப்பு ஏற்படும் அபாயம் உள்ளது.

இதனால் கடற்கரையையொட்டி அமைந்துள்ள கோயில் உள்ளிட்ட நகர் பகுதி முழுமையும் கடல் கொந்தளிப்பில் சிக்கும் ஆபத்தும் உள்ளது. கடலிலிருந்து எடுக்கப்படும் மணலை கரையோரம் கொட்டி கடல் அரிப்பைத் தடுப்பதற்குப் பதிலாக, கடலில் பள்ளம் தோண்டி அதன் மூலம் கடல் நீர் ஊருக்குள் புகும் நிலையை ஒப்பந்ததாரர்கள் ஏற்படுத்த உள்ளனர். இதற்கு துறைமுகத் துறை அதிகாரிகளும் அனுமதி அளித்து துணை போயுள்ளனர் எனக் குற்றச்சாட்டு எழுந்துள்ளது.

ராமேஸ்வரம் கோயில்
ராமேஸ்வரம் கோயில்
உ.பாண்டி

``கரைப்பகுதியிலிருந்து 15 கி.மீ தூரம் உள்ள கடல் பகுதியில் சேது சமுத்திரம் திட்டத்துக்காக கடலைத் தோண்டத் தொடங்கியபோது ராமேஸ்வரம் கோயில் மற்றும் பவளப்பாறைகள் பாதிக்கப்படும் எனக் கூறப்பட்டு தடை விதிக்கப்பட்டது. இந்த நிலையில், வெறும் 300 மீட்டருக்கும் குறைவான தூரத்தில் ஆளும் கட்சியினரின் ஆதரவுடன் பல நூறு டன் அளவிலான கடல் மணல் எடுத்து குந்துகால் துறைமுகத்துக்குக் கொண்டுசெல்வதால் ராமேஸ்வரம் நகரும் கோயிலும் கடல் அரிப்பால் பாதிக்கப்படும். எனவே, ராமேஸ்வரம் கடலிலிருந்து மணல் எடுப்பதை தடுக்க அரசு நடவடிக்கை எடுக்க வேண்டும்'' என சி.ஐ.டி.யு கடல் தொழிலாளர் சங்க மாவட்ட செயலாளர் கருணாமூர்த்தி கோரியுள்ளார்.