Published:Updated:

RTI: `இரண்டு கடிதங்களும் இந்தியில்..!'- கொதிக்கும் பெ.மணியரசன்

பெ.மணியரசன்
பெ.மணியரசன்

``தமிழ்நாட்டில், மாநில அரசின் அலுவல் மொழியாகத் தமிழும் ஆங்கிலமும் இருக்கின்றன. தமிழ்நாட்டிலிருந்து நான் தகவல் அறியும் உரிமைச் சட்டத்தின்படி ஆங்கிலத்தில் கேட்ட கேள்விகளுக்கு, முழுக்க முழுக்க இந்தியில் விடையளிப்பது சட்ட விரோதச் செயல்.''

மத்திய அரசின் நீராற்றல்துறை, காவிரி உரிமை மீட்புக்குழு ஒருங்கிணைப்பாளரான பெ.மணியரசனுக்கு இந்தியில் அனுப்பியுள்ள பதில்கள் சர்ச்சையை ஏற்படுத்தியுள்ளன. `இது அரசியலமைப்புச் சட்டத்துக்கு விரோதமானது’ என அவர் கொந்தளிக்கிறார். காவிரி நீர் திறப்பு, மேலாண்மை ஆணையத்தின் செயல்பாடுகள் உட்பட இன்னும் சில தகவல்களைப் பெறுவதற்காக, தகவல் அறியும் உரிமை சட்டத்தின் கீழ் அந்தத் துறைக்கு பெ.மணியரசன் சில கேள்விகளை அனுப்பியிருக்கிறார். அந்தக் கேள்விகளுக்கு இந்தியில் கிடைத்துள்ள பதில்களால், கடும் எதிர்ப்புக் குரல் எழுப்புகிறார் பெ.மணியசரன்.

இது குறித்து நம்மிடம் பேசிய பெ.மணியரசன்,``காவிரி வழக்கில் உச்ச நீதிமன்றம் அளித்த தீர்ப்பின்படி காவிரி மேலாண்மை ஆணையம், காவிரி ஒழுங்காற்றுக்குழு ஆகியவை அமைக்கப்பட்டிருக்கின்றனவா என்று அறிந்துகொள்ளவும், நடப்பு சாகுபடி ஆண்டில் ஜூன் – ஜூலை மாதங்களுக்குரிய தண்ணீரை கர்நாடகம் திறந்துவிட்டிருக்கிறதா எனத் தெரிந்துகொள்ளவும் எண்ணினேன். இதற்காக, மத்திய அரசின் நீராற்றல் துறைக்கு, கடந்த 16.07.2020 அன்று, தகவல் அறியும் உரிமைச் சட்டப்படி எட்டு வினாக்கள்கொண்ட கடிதத்தை அனுப்பியிருந்தேன். இதற்கு விடையளித்து மத்திய நீராற்றல் துறையிலிருந்து வந்த இரண்டு கடிதங்கள், முழுக்க முழுக்க இந்தியில் மட்டுமே இருக்கின்றன. தமிழ்நாட்டில் இந்தி மொழி, கல்வி மொழியோ அல்லது மாநில அலுவல் மொழியோ அல்ல. தமிழ்நாட்டில் தமிழும் ஆங்கிலமும் அலுவல் மொழியாக இருக்கின்றன.

இந்தியில் வந்த பதில்
இந்தியில் வந்த பதில்

இந்திய அரசமைப்புச் சட்டம் உறுப்பு 343 ( 2 )-ன்படி இந்திய அரசின் அலுவல் மொழியாக ஆங்கிலம் தொடர்கிறது. உறுப்பு 343 ( 3 )-ன்கீழ் 1963-ல் இயற்றப்பட்ட இந்திய அரசின் அலுவல் மொழிச் சட்டத்தில் செய்த திருத்தத்தின்படி, ஆங்கிலம் நடுவண் அரசுக்கும், மாநில அரசுக்கும் இடையே தொடர்ந்து தொடர்பு மொழியாக நீடிக்கிறது. தமிழ்நாட்டில், மாநில அரசின் அலுவல் மொழியாக தமிழும் ஆங்கிலமும் இருக்கின்றன. சட்டங்கள் இவ்வாறு இருக்கும் நிலையில், தமிழ்நாட்டிலிருந்து நான் தகவல் அறியும் உரிமைச் சட்டத்தின்படி ஆங்கிலத்தில் கேட்ட கேள்விகளுக்கு, முழுக்க முழுக்க இந்தியில் விடையளிப்பது சட்ட விரோதச் செயல். அரசமைப்புச் சட்டம், இந்திய அலுவல் மொழிச் சட்டம், தமிழ்நாடு அலுவல் மொழிச் சட்டம் ஆகிய மூன்றுக்கும் எதிரான செயல்.

பெ.மணியரசன்
பெ.மணியரசன்

தமிழ்நாட்டில் 25 மாவட்டங்களுக்குக் குடிநீராகவும், 25 லட்சம் ஏக்கர் நிலங்களுக்குப் பாசன நீராகவும் மக்களுக்கு வாழ்வளித்துக்கொண்டிருக்கும் காவிரி நீர், கர்நாடகத்திலிருந்து உச்ச நீதிமன்றத் தீர்ப்பின்படி வருகிறதா என்று அறிந்துகொள்வதற்கும், 2018-ல் உச்ச நீதிமன்றம் அளித்த தீர்ப்பின்படி காவிரி மேலாண்மை ஆணையமும் ஒழுங்காற்றுக் குழுவும் செயல்படுகின்றவா எனத் தெரிந்துகொள்வதற்கும், கோடிக்கணக்கான மக்கள் வாழ்க்கையில் அக்கறைகொண்டு கவலையோடு நான் கேட்ட கேள்விகளுக்கு, எனக்குத் தெரியாத மொழி மட்டுமன்றி, ஒற்றை ஆட்சிமொழியாக எந்தச் சட்டத்தின் கீழும் இல்லாத இந்தி மொழியில் மத்திய அரசின் நீராற்றல் துறை விடையளித்திருப்பது மிகவும் கண்டனத்துக்குரிய செயல்.

கோதாவரி - காவிரி நீர்ப்பங்கீடு... தமிழிசையால் தமிழகத்துக்கு வரப்போகும் புதுத் திட்டம்!

காவிரி மேலாண்மை ஆணையத்தின் தலைமையகம், தனக்கு சொந்தமாக அலுவலகம் கொண்டிருக்கிறதா, காவிரி மேலாண்மை ஆணையத்தின் தலைவர் இப்பணியில் முழுநேர அதிகாரியாக இருக்கிறாரா அல்லது வேறொரு பணியில் இருந்துகொண்டு கூடுதலாக இப்பொறுப்பில் இருக்கிறாரா, காவிரி மேலாண்மை ஆணையம் மற்றும் காவிரி ஒழுங்காற்றுக் குழு ஆகியவற்றுக்கு அமர்த்தப்பட்ட முழுநேர அதிகாரிகள் எத்தனை பேர், உச்ச நீதிமன்ற தீர்ப்பு வரையறுத்த அளவின்படி நடப்பு சாகுபடி ஆண்டில் ஜூன் – ஜூலை மாதங்களுக்குரிய காவிரி நீரை கர்நாடக அரசு திறந்துவிட்டிருக்கிறதா என்பவை உள்ளிட்ட எட்டு கேள்விகளைக் கேட்டிருந்தேன்.

இவற்றில் சிலவற்றுக்கு நீராற்றல் துறையின் டெல்லி தலைமையகமும், பெங்களுருவிலுள்ள அதன் தென்னகக் கண்காணிப்பகமும் எனக்கு அளித்த பதில் கடிதங்கள் முழுக்க முழுக்க இந்தியில் இருக்கின்றன. இது குறித்த எதிர்ப்பு கடிதத்தை மத்திய ஜல்சக்தி துறைக்கு அனுப்பியுள்ளேன். இதுபோல், தொடர்ந்து மோடி அரசு திட்டமிட்டு தமிழ்நாட்டின் மீது இந்தியைத் திணித்துக்கொண்டிருக்கிறது.

காவிரி நீர்
காவிரி நீர்

அண்மையில், மத்திய அரசின் ஆயுஷ் அமைச்சகம் நடத்திய யோகா காணொலி பயிலரங்கில், முழுக்க முழுக்க இந்தியில் மட்டுமே டெல்லியிலிருந்து பேசினார்கள். தமிழ்நாட்டிலிருந்து கலந்துகொண்ட மருத்துவர்கள், தங்களுக்கு இந்தி தெரியாது ஆங்கிலத்தில் பேசுங்கள் எனக் கூறியபோது, அத்துறையின் செயலாளர்,`இந்தி தெரியாவிட்டால் வெளியேறுங்கள்' என்று கூறினார். நாடாளுமன்ற உறுப்பினர் கனிமொழி அவர்கள், விமான நிலையத்தில் மத்திய தொழிற்காவல்படை அதிகாரியிடம் ஆங்கிலத்தில் ஒரு விவரம் கேட்டபோது, அவர் இந்தியில் விடையளித்திருக்கிறார். கனிமொழி, தனக்கு இந்தி தெரியாது என்று கூறியதற்கு, `இந்தி தெரியாத நீங்கள் இந்தியரா?' என எதிர் வினா கேட்டிருக்கிறார் அந்த அதிகாரி.

இவையெல்லாம் தற்செயலான நிகழ்வுகள் அல்ல. தமிழ்நாட்டைக் குறிவைத்துத் தாக்கும் செயல்கள். தமிழை நீக்கிவிட்டு, இந்தியையும் சம்ஸ்கிருதத்தையும் கொண்டு வந்து நிலைநாட்ட வேண்டும் என்ற மோடி அரசின் வேலைத் திட்டத்தின் ஒரு பகுதி என்றே கருத வேண்டியுள்ளது. தமிழ்நாடு அரசு, இதை யாருக்கோ ஏற்பட்ட பாதிப்பு என்று எண்ணாமல், தனது மக்களுக்கும் மொழிக்கும் ஏற்பட்டுள்ள ஆபத்து என்பதை உணர்ந்து, மத்திய அரசிடம் உரிய முறையில் எதிர்ப்பு தெரிவித்து, தமிழ்நாட்டில் தமிழ், மத்திய அரசுடன் செய்தித் தொடர்புக்கு ஆங்கிலம் என்ற சட்டப்படியான உரிமையை நிலைநாட்ட வேண்டும்” என்று பெ.மணியரசன் வலியுறுத்தினார்.

அடுத்த கட்டுரைக்கு