Published:Updated:

`டெஸ்ட் வேண்டாம்; நெகட்டிவ்னு போட்டுக்க!’- தூத்துக்குடி மருத்துவக் கல்லூரி டீன் மாற்றப்பட்ட பின்னணி

தூத்துக்குடி மருத்துவக் கல்லூரி
தூத்துக்குடி மருத்துவக் கல்லூரி

தூத்துக்குடி அரசு மருத்துவக் கல்லூரி மருத்துவமனையில் பயிற்சி முடித்த மருத்துவரிடம் டீன் திருவாசகமணி, கொரோனா பரிசோதனை குறித்து அலட்சியமாகப் பேசிய வீடியோ சமூக வலைதளங்களில் வைரலானதை அடுத்து விருதுநகர் மருத்துவக்கல்லூரிக்கு அதிரடியாகப் பணிமாற்றம் செய்யப்பட்டுள்ளார்.

தூத்துக்குடி அரசு மருத்துமனையில் பயிற்சி மருத்துவர்களின் தங்கும் விடுதியைக் கொரோனா வார்டாக மாற்ற டீன் திருவாசகமணி முடிவு செய்ததை அடுத்து, அதற்கான முயற்சிகள் தொடங்கின. இதற்கு எதிர்ப்பு தெரிவித்தும், கொரோனா வார்டை வேறு கட்டடத்திற்கு மாற்றிடக்கோரியும் பயிற்சி மருத்துவர்கள், மருத்துவமனை நிர்வாகத்திடம் முறையிட்டனர்.

கொரோனா வார்டு  பகுதி
கொரோனா வார்டு பகுதி

ஆனால், டீன் திருவாசகமணி, கொரோனா வார்டை இங்குதான் மாற்ற வேண்டும் எனவும், பயிற்சி மருத்துவர்களை தங்கும் விடுதியை விட்டு வெளியேறச் சொன்னதாகவும் சொல்லப்படுகிறது. இந்நிலையில், 2014-ம் ஆண்டு மருத்துவப் படிப்பில் சேர்ந்த 150 மருத்து மாணவர்களில், 130 பயிற்சி மருத்துவர்கள் கடந்த ஏப்ரல் 30-ம் தேதியுடன் பயிற்சியை நிறைவு செய்துள்ளனர். பயிற்சியை முடித்த மருத்துவர்களுக்குப் பயிற்சி நிறைவுச் சான்றிதழ் வழங்கிடாமல் டீன் திருவாசகமணி காலம் தாழ்த்தியதாக மாணவர்கள் புகார் கூறுகிறார்கள்.

இந்நிலையில்தான், ``விடுதியை விட்டு நீங்கள் வெளியேறாவிட்டால், போலீஸ் மூலம் உங்களை வெளியேற்றுவேன்” என திருவாசகமணி பேசுவது போலவும், பயிற்சி மாணவர் ஒருவர் பயிற்சி நிறைவுச் சான்றிதழுடன் கொரோனா இல்லையெனச் சான்றிதழ் குறித்து திருவாசகமணியிடம் பேசும்போது,``அவ்வளவு பேருக்கும் ரேப்பிட் டெஸ்ட் எடுக்க முடியாது. நீங்களே நெகட்டிவ்னு போட்டுக்கோங்க” எனச் சொல்வது போன்ற வீடியோவும் சமூக வலைதளங்களில் வைரலானது.

திருவாசகமணி (பணி மாற்றம் செய்யப்பட்டவர்) - ரேவதி (புதிய டீன்)
திருவாசகமணி (பணி மாற்றம் செய்யப்பட்டவர்) - ரேவதி (புதிய டீன்)

இதையடுத்து திருவாசகமணி, விருதுநகர் அரசு மருத்துவமனைக்குப் பணிமாற்றம் செய்யப்பட்டுள்ளார். விருதுநகர் அரசு மருத்துவமனை டீன் ரேவதிபாலன் தூத்துக்குடிக்குப் பணிமாற்றம் செய்யப்பட்டுள்ளார்.

தற்போதைய கொரோனா வைரஸ் பரவல்காலத்தில் ஏற்கெனவே சென்னை ஸ்டான்லி, கோவை, திருச்சி மருத்துவக் கல்லூரி டீன்கள் பணியிட மாற்றம் செய்யப்பட்டதை தொடர்ந்து, தூத்துக்குடி டீன் 4வது முறையாகப் பணிமாற்றம் செய்யப்பட்டுள்ளார். சென்னை உள்ளிட்ட சில மாவட்டங்களில் நாளுக்குநாள் கொரோனாவால் பாதிக்கப்பட்டவர்களின் எண்ணிக்கை நாளுக்குநாள் அதிகரித்து வருகிறது. இதையடுத்து, கொரோனா அறிகுறி ஆரம்ப நிலையாக இருந்தால் மருத்துவமனைக்கு வரவேண்டாம் என அரசு அறிவித்தபோதே சர்ச்சையானது.

கொரோனாவால் குணமடைந்தவர் வழி அனுப்பு நிகழ்வில் திருவாசகமணி
கொரோனாவால் குணமடைந்தவர் வழி அனுப்பு நிகழ்வில் திருவாசகமணி

இந்நிலையில், கொரோனா பரிசோதனை செய்யாமலேயே நெகட்டிவ் ரிசல்டாகப் போட்டுக்கொள் என ஒரு மருத்துவக் கல்லூரி டீனே கூறியுள்ளது மேலும் சர்ச்சையை ஏற்படுத்தியுள்ளது. இதனால், அரசு மருத்துவமனைகளில் உண்மையிலேயே கொரோனா பரிசோதனை நடைபெறுகிறதா என்ற கேள்வியும் மக்கள் மத்தியில் எழுந்துள்ளது.

இதுகுறித்து விளக்கம் கேட்பதற்காக டீன் திருவாசகமணியைப் பலமுறை செல்போனில் தொடர்புகொள்ள முயற்சி செய்தோம். அவர் நமது அழைப்பை ஏற்கவில்லை. இதுகுறித்து RMO சைலேஷிடம் பேசினோம். ``அந்த வீடியோவைப் பற்றியெல்லாம் எனக்கு ஒன்றும் தெரியாது’’ என்று சொன்ன அவர், ``தூத்துக்குடி அரசு மருத்துவக் கல்லூரி மருத்துவமனையில் யாருக்கும் சோதனை செய்யாமல் நெகட்டிவ் என ரிசல்ட் கொடுப்பதில்லை என்பது மட்டும் உறுதி’’ என்பதோடு முடித்துக் கொண்டார்.

அடுத்த கட்டுரைக்கு