2,000 கோடி ரூபாய் ஊழல்? - மத்திய அமைச்சருக்கு எதிராக திரளும் இயக்கங்கள்!

நா ன்குவழிச்சாலை உள்ளிட்ட வளர்ச்சித் திட்டங்களில் 2,000 கோடி ரூபாய்க்கு ஊழல் நடந்துள்ளது என்று கிளம்பியுள்ள குற்றச்சாட்டால் கன்னியாகுமரி மாவட்டம் பரபரக்கிறது.

கன்னியாகுமரி மாவட்டத்தில் நான்கு வழிச்சாலை அமைப்பது உள்ளிட்ட வளர்ச்சித் திட்டங்களில் மிகப்பெரிய ஊழல் நடந்திருப்பதாக ‘மீண்டெழும் குமரி’ இயக்கம் குற்றம்சாட்டியுள்ளது. இந்த ஊழல் குற்றச்சாட்டுடன், மீண்டெழும் குமரி இயக்கத்தைச் சேர்ந்த தாமஸ் பிராங்கோ, ஓய்வுபெற்ற ஐ.ஏ.எஸ் அதிகாரி எம்.ஜி.தேவசகாயம் உள்ளிட்டோர் களமிறங்கியுள்ளனர். இதையடுத்து, மத்திய இணை அமைச்சர் பொன்.ராதாகிருஷ்ணன் உள்ளிட்ட பி.ஜே.பி-யினருக்கும் மீண்டெழும் குமரி இயக்கத்தினருக்கும் இடையிலான மோதலாக இந்த விவகாரம் மாறியிருக்கிறது.

இந்தக் குற்றச்சாட்டு குமரி மாவட்டத்தில் பெரும் அதிர்வை ஏற்படுத்தியது. இந்த விவகாரம், மத்திய இணை அமைச்சர் பொன்.ராதாகிருஷ்ணனுடன் இணைத்துப் பேசப்பட்டது. அதைத் தொடர்ந்து, தேவசகாயத்திற்கு வக்கீல் நோட்டீஸ் அனுப்பினார் பொன்.ராதாகிருஷ்ணன். தேவசகாயத்தின் உருவபொம்மையை பி.ஜே.பி-யினர் கொளுத்தினர். அதையடுத்து, பொன்.ராதாகிருஷ்ணன் உட்பட பி.ஜே.பி நிர்வாகிகள் 10 பேர் மீது மீண்டெழும் குமரி இயக்கத்தினர் போலீஸில் புகார் அளித்தனர்.

. இந்த விவகாரம் குறித்து தாமஸ் பிராங்கோவிடம் பேசினோம். “ஒகி புயல் நிவாரணப் பணியில் பல அமைப்புகள் சார்பில் மேற்கொள்ளப்பட்ட பணிகளை ஒருங்கிணைக்க ஏதுவாக, மீண்டெழும் குமரி இயக்கம் ஏற்படுத்தப்பட்டது. மீனவர் அமைப்புகள், தொண்டு நிறுவனங்கள், முன்னாள் கல்லூரி முதல்வர்கள், விஞ்ஞானிகள், சமூக ஆர்வலர்கள் உட்படப் பல்வேறு தரப்பினர் இந்த இயக்கத்தில் உள்ளனர். குமரி மாவட்டத்தில் 33 சதவிகிதம் காடுகள், 46 சதவிகித இடங்கள் விளைநிலங்கள். மீதமுள்ள இடத்தில் பெரிய தொழிற்சாலைகளோ, துறைமுகங்களோ கொண்டுவர வாய்ப்பு இல்லை. தேங்காய், மீன் உள்ளிட்ட உணவுகள் மற்றும் சுற்றுலா சம்பந்தமான தொழில்களை ஊக்குவிக்க வேண்டும். அதை நோக்கி, பல தொழில் பயிற்சிகளை மக்களுக்கு அளித்துவருகிறோம். அதேநேரத்தில், அரசு செய்யும் தவறுகளையும் சுட்டிக்காட்டுகிறோம். மேலும், வாக்குப்பதிவு இயந்திரங்களில் முறைகேடு நடக்க வாய்ப்பு உள்ளது என்று உச்ச நீதிமன்றத்தில் வழக்கு தொடர்ந்துள்ளோம். இதனால் எரிச்சலடைந்த பி.ஜே.பி-யினர் எங்களுக்கு எதிராகப் போராட்டம் நடத்துகிறார்கள்” என்றார்.

தேவசகாயத்திடம் பேசியபோது, “நான்குவழிச்சாலை, மார்த்தாண்டம் மேம்பாலம், பார்வதிபுரம் மேம்பாலம் உள்ளிட்ட திட்டங்களில் 2,000 கோடி ரூபாய் அளவுக்கு ஊழல் நடந்துள்ளது. நான்குவழிச்சாலை நூற்றுக்கு நூறு சதவிகிதம் ஏமாற்று வேலை. ஏற்கெனவே இருக்கும் சாலையை விரிவாக்கம் செய்து, தேவையானால் மேம்பாலம் அமைத்துச் சரிசெய்வதற்கு 2003-ல் மத்திய அரசு அனுமதி அளித்தது. அதை மாற்றி, புதிய சாலை அமைத்து விட்டார்கள். புதிய சாலைக்கு மத்திய அரசு அனுமதி அளிக்கவில்லை.

36 குளங்களின் மேலே பாலம் அமைக்க வேண்டும் என உத்தரவு இருக்கிறது. ஆனால், குளங்களை நிரப்பி அவற்றின்மீது ரோடு போடுகிறார்கள். இதுகுறித்து ஓர் ஆண்டுக்கு முன்பே அந்தத் துறை செயலருக்குப் புகார் அனுப்பினோம். நிலம் வழங்கியதால் வாழ்வாதாரத்தை இழந்த 22 பேர், சி.பி.ஐ-க்கு புகார் அனுப்பியுள்ளனர். இதுவரை எந்த நடவடிக்கையும் இல்லை. எனக்கு எதிராகப் பேசும் பி.ஜே.பி-யினர், முதலில் நாங்கள் சொல்லும் குற்றச்சாட்டுகளுக்குப் பதில் சொல்லட்டும்” என்றார் ஆவேசமாக.

. பொன்.ராதாகிருஷ்ணன் அனுப்பிய வக்கீல் நோட்டீஸ் பற்றி தேவசகாயத்திடம் கேட்டதற்கு, “எனக்கு வக்கீல் நோட்டீஸ் அனுப்பியது தவறு. திட்டங்களில் ஊழல் நடந்ததாகத்தான் கூறியிருக்கிறேன். ஓர் இடத்தில்கூட அவரது பெயரை நான் கூறவில்லை” என்றார்.

இது குறித்து பொன்.ராதாகிருஷ்ணனிடம் கேட்டபோது, “இது என் வாழ்நாளில் இல்லாத ஒரு விஷயம். அது சம்பந்தமாக, வக்கீல் நோட்டீஸ் அனுப்பியுள்ளோம். எதுவாக இருந்தாலும் நீதிமன்றத்தில் பார்த்துக்கொள்ளலாம்” என முடித்துக்கொண்டார்.

கன்னியாகுமரி மாவட்ட மக்களால் தீவிரமாக விவாதிக்கப்படும் மிகப்பெரிய பிரச்னையாக இது மாறியிருக்கிறது. - ஆர்.சிந்து, படங்கள்: ர.ராம்குமார்

. பிரான்ஸ் உளவாளிகள்?

க ன்னியாகுமரி மாவட்டம், மணவாளக்குறிச்சி மணல் ஆலையில் பிரான்ஸ் நாட்டைச் சேர்ந்த இருவர் அனுமதியின்றிப் புகைப்படம் எடுத்ததாக இரு வாரங்களுக்கு முன்பு வழக்குப் பதிவு செய்யப்பட்டது. ஆர்தர் ரொலாண்ட் ரெனே, ஜூலியஸ் டெமின் ஆகிய இருவரும் பிரான்ஸ் நாட்டுப் பத்திரிகையாளர்கள் என்று சொல்லப்படுகிறது. ஆனால், அவர்கள் உளவாளிகள் என்றும், அவர்களால் கன்னியாகுமரி மக்களுக்கு ஆபத்து என்றும் பி.ஜே.பி தரப்பினர் கூறினர். அந்த பிரான்ஸ் நாட்டினருடன் எம்.ஜி.தேவசகாயம் உள்ளிட்ட சிலரைத் தொடர்புபடுத்தி, குமரி மாவட்டத்தில் பி.ஜே.பி சார்பில் போஸ்டர்கள் ஒட்டப்பட்டன. தேவசகாயத்தின் உருவபொம்மையும் எரிக்கப்பட்டது. இதைத் தொடர்ந்து, ரூ.2,000 கோடி ஊழல் குற்றச்சாட்டை மீண்டெழும் குமரி இயக்கம் கிளப்பியது.

2,000 கோடி ரூபாய் ஊழல்? - மத்திய அமைச்சருக்கு எதிராக திரளும் இயக்கங்கள்!

சிந்து ஆர்Follow