Published:Updated:

ஜெயலலிதாவுக்குக் களங்கம்... பூங்குன்றன் அழுகை!

ஒட்டுமொத்த விகடனுக்கும் ஒரே ஷார்ட்கட்

Use App
ஜெயலலிதாவுக்குக் களங்கம்... பூங்குன்றன் அழுகை!
ஜெயலலிதாவுக்குக் களங்கம்... பூங்குன்றன் அழுகை!

ஜெயலலிதாவுக்குக் களங்கம்... பூங்குன்றன் அழுகை!

பிரீமியம் ஸ்டோரி

‘‘ஜெயலலிதாவின் மரண மர்மம் குறித்து விசாரணை நடத்த வேண்டிய ஆறுமுகசாமி ஆணையம், ஜெயலலிதாவைக் களங்கப்படுத்தும் விதத்தில் நடந்துகொள்கிறது” என்று சசிகலா தரப்பு வழக்கறிஞர் ராஜா செந்தூர் பாண்டியன் குற்றம்சாட்டியுள்ளார். “ஜெயலலிதாவைக் களங்கப்படுத்தும் கேள்விகள் வேண்டாம்” என, ஜெயலலிதாவின் உதவியாளராக இருந்த பூங்குன்றன் கண்ணீர்விட்ட சம்பவமும் ஆறுமுகசாமி ஆணையத்தில் நடைபெற்றுள்ளது.

பூங்குன்றன் இரு முறை ஆணையத்தில் சாட்சியம் அளித்தபிறகு, சசிகலா தரப்பால் குறுக்கு விசாரணை செய்யப்பட்டார். அதன்பிறகு, மறுவிசாரணைக்காகக் கடந்த வாரம் ஆறுமுகசாமி ஆணையத்தில் அவர் ஆஜரானார். அப்போது அவரிடம் சசிகலா தரப்பு வழக்கறிஞர் ராஜா செந்தூர் பாண்டியன், ஆணையத்தின் வழக்கறிஞர்கள் பார்த்தசாரதி, நிரஞ்சன் உள்ளிட்டோர் விசாரணை நடத்தினர். அப்போது ஆணையத்தின் வழக்கறிஞர்கள், “கார்டனைப் பகைத்துக்கொள்பவர்கள்மீது வழக்குகள் பாயும் என்பதும், உயிருக்கே ஆபத்து என்று சொல்லப்படுவது பற்றியும் தெரியுமா?’’ என்று கேட்டனர்.

ஜெயலலிதாவுக்குக் களங்கம்... பூங்குன்றன் அழுகை!

‘‘எனக்கு அதுபற்றி தெரியாது. நான் கேள்விப்பட்டதில்லை’’ என்று பூங்குன்றன் பதில் அளித்துள்ளார். அதன்பிறகு ராஜா செந்தூர் பாண்டியன், ‘கார்டன் என்றால் யாரைக் குறிக்கும்’ என்று கேள்வி எழுப்ப, “கார்டன் என்றால் அம்மாவை மட்டுமே குறிக்கும்’’ என்றார் பூங்குன்றன்.

ஆணையத்தின் வழக்கறிஞர்கள், கொடநாடு எஸ்டேட்டில் பத்திரப்பதிவு அலுவலரை வீட்டுக்கு வரச்சொல்லி பத்திரம் பதிவுசெய்தது உண்மையா என்று கேள்வி எழுப்பியுள்ளார்கள். அதற்கு பூங்குன்றன், ‘‘அதுபற்றி எனக்குத் தெரியாது’’ என்று பதில் சொல்லியுள்ளார். ‘சசிகலாவின் உதவியாளர் கார்த்திகேயன் 2016-ல், அம்மாவைப் பார்த்துவிட்டுத்தான் வேலைக்குச் சேர்ந்தாரா?’ என்ற கேள்விக்கு, ‘‘எனக்கு நினைவில்லை’’ என்று பதில் சொன்னாராம் பூங்குன்றன்.

ஆணையத்தின் வழக்கறிஞர்கள், “அம்மா உயிருடன் இருந்த காலத்தில் கார்டனில் ஆடிட்டர் தாக்கப்பட்டது, வழக்கறிஞர் விஜயன் தாக்கப்பட்டது, சந்திரலேகாமீது திராவகம் வீசப்பட்டது குறித்த செய்திகள் தெரியுமா?’’ என்று கேள்வி எழுப்பினர். அதற்கு பூங்குன்றன், தான் 95-ம் ஆண்டுக்குப் பிறகுதான் பணியில் சேர்ந்ததைச் சுட்டிக்காட்டி, ‘‘இந்தக் கேள்வி எனக்கு மிகவும் வருத்தமளிக்கிறது’’ என்று இறுக்கமான முகத்துடன் சொல்லியிருக்கிறார். அதன்பிறகு, ஜெயலலிதாவின் பணிகள் குறித்த ஒரு கேள்வியை எழுப்பினார்கள். “ஜெயலலிதா என் தாய்க்கு நிகரானவர்’’ என்று சொன்ன பூங்குன்றன், முகத்தைப் பொத்திக்கொண்டு அழுதுள்ளார். இதனால், ஆணையத்தில் சிறிது நேரம் அமைதி நிலவியுள்ளது. ஜெயலலிதாவின் வீட்டில் வேலைசெய்த பணிப்பெண்கள் குறித்த கேள்விக்கு, “அம்மாவுக்கு அடிப்படை வசதிகள் செய்து கொடுக்கவும், அவருக்குத் துணிகளை எடுத்துக்கொடுத்து உதவி செய்யவும் மட்டுமே அவர்கள் இருந்தார்கள்” என்று சொல்லியுள்ளார்.

ஜெயலலிதாவுக்குக் களங்கம்... பூங்குன்றன் அழுகை!

அதேநாளில், சசிகலாவின் உதவியாளரான கார்த்திகேயனிடமும் மறுவிசாரணை நடத்தப்பட்டது. “பூங்குன்றன் வீட்டில் வருமானவரித் துறை சோதனை நடத்தியது. பூங்குன்றன் பெயரில் நிறைய சொத்துகள் வாங்கப்பட்டிருப்பதாகத் தெரிந்ததால்தான் பூங்குன்றனை சசிகலா ஒதுக்கி வைத்தாரா?’’ என்ற கேள்விக்கு, “இல்லை” என்று கார்த்திகேயன் சொன்னாராம்.  சசிகலா சிறைக்குச் சென்றபிறகே பூங்குன்றன் வீட்டில் ரெய்டு நடத்தப்பட்டது. அதற்கு முன்பே பூங்குன்றன் யாரையும் சந்திக்காமல் ஒதுங்கியிருந்தார் என்பது குறிப்பிடத்தக்கது. சசிகலாவை இரு முறை சிறைக்குச் சென்று பார்த்ததாக கார்த்திகேயன் சாட்சியம் அளித்துள்ளார். ‘‘கார்டன் என்று சொன்னால் பொதுமக்களுக்கும், கட்சிக்காரர்களுக்கும் பயமா?’’ என்ற கேள்விக்கு ‘‘பயமில்லை. ஆனால், அம்மாவின் முன் நடிப்பவர்களுக்குத்தான் பயம்’’ என்று கார்த்திகேயன் ஆணித்தரமாகச் சொன்னாராம். ‘‘2016-ல் நான் பணிக்குச் சேர்ந்த பிறகு அம்மா, கட்சியின் பொறுப்புகளை விட்டு விலக்கியவர் களுக்கு மீண்டும் பொறுப்பு வழங்கவில்லை’’ என ஒரு பட்டியலைச் சொல்லி உறுதிசெய்துள்ளார். அதில் (கே.பி.முனுசாமி, மனோஜ் பாண்டியன், ஓ.பி.எஸ்ஸின் மகன் ரவீந்திரநாத்குமார்,  அமைச்சர் சி.விஜயபாஸ்கர் உள்பட 38 பெயர்கள் இருந்துள்ளன). ஜெயலலிதாவால் பொறுப்புகள் பிடுங்கப்பட்ட பலர், இப்போது அ.தி.மு.க-வில் பொறுப்புகளில் இருப்பது குறிப்பிடத்தக்கது.

‘‘2011-ல் சசிகலா குடும்பத்தைக் கட்சியைவிட்டு நீக்கியபிறகு, சசிகலாவைத் தவிர வேறு யாரையும் சேர்க்கவில்லை. ஆனால், நீக்கம் செய்யப்பட்ட சசிகலாவின் உறவினர்கள் மருத்துவமனையில் அம்மாவைப் பார்த்தனர்’’ என்றும் கார்த்திகேயன் சொல்லியுள்ளார்.

பூங்குன்றனிடம் ஆணையத் தரப்பு வழக்கறிஞர்கள் கேட்ட கேள்விகளுக்குக் கடும் ஆட்சேபணை தெரிவித்திருந்தார் ராஜா செந்தூர் பாண்டியன். அவர் நம்மிடம், ‘‘ஜெயலலிதாவின் மரணம் குறித்து விசாரிக்க அமைக்கப்பட்ட ஆணையத்தின் வழக்கறிஞர்கள், இப்போது ஜெயலலிதா பற்றிய அடிப்படை ஆதாரம் இல்லாத கேள்விகளை எழுப்பிக் களங்கம் ஏற்படுத்த முயற்சி செய்கிறார்கள். கொடநாடு எஸ்டேட், சிறுதாவூர் வீடு போன்றவற்றை வாங்கியதற்கும் ஜெயலலிதாவின் இறப்புக்கும் என்ன தொடர்பு? இதுபோன்ற பல கேள்விகளை எழுப்பி, சாட்சிகளுக்கு மன உளைச்சலை ஆணையத்தின் வழக்கறிஞர்கள் ஏற்படுத்து கின்றனர். சட்டத்துக்கு உள்பட்ட வகையில், ஆணையத்தின் செயல்பாடு இனி இருக்க வேண்டும் என நாங்கள் வலியுறுத்தியுள்ளோம்” என்றார்.

- அ.சையது அபுதாஹிர்
படங்கள்: வெ.நரேஷ்குமார்

குரூமூர்த்திக்கு நெருக்கடி!

ணையத்தில் ஆஜராவதற்கு விலக்குக் கேட்டு துக்ளக் ஆசிரியர் குரூமூர்த்தி சார்பில் வழக்கறிஞர்கள் மனு தாக்கல் செய்திருந்தனர். அதற்கு, சசிகலா தரப்பு கடும் எதிர்ப்பு தெரிவித்துள்ளது. ‘ஜெயலலிதா மரண மர்மம் குறித்து விசாரிக்க ஆணையம் அமைக்க வேண்டும்’ என்று தனியார் தொலைக்காட்சிப் பேட்டி ஒன்றில் குரூமூர்த்தி சொன்னார். எனவே, அவரை விசாரணைக்கு அழைக்க வேண்டும் என்று வலியுறுத்தியுள்ளனர். இதனால், ஆணையத்தில் ஆஜராக வேண்டிய நெருக்கடி குரூமூர்த்திக்கு ஏற்பட்டுள்ளது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு