Published:Updated:

“பன்னீரும் தம்பிதுரையும் எங்கே இருந்தார்கள்?

“பன்னீரும் தம்பிதுரையும் எங்கே இருந்தார்கள்?
பிரீமியம் ஸ்டோரி
“பன்னீரும் தம்பிதுரையும் எங்கே இருந்தார்கள்?

அப்போலோவில் ஆறுமுகசாமி ஆணையம்

“பன்னீரும் தம்பிதுரையும் எங்கே இருந்தார்கள்?

அப்போலோவில் ஆறுமுகசாமி ஆணையம்

Published:Updated:
“பன்னீரும் தம்பிதுரையும் எங்கே இருந்தார்கள்?
பிரீமியம் ஸ்டோரி
“பன்னீரும் தம்பிதுரையும் எங்கே இருந்தார்கள்?

ஜெயலலிதா மரண மர்மம் தொடர்பான ஆறுமுகசாமி ஆணைய விசாரணைக்கு துணை முதல்வர் ஓ.பன்னீர்செல்வமும், மக்களவை துணை சபாநாயகர் தம்பிதுரையும் அழைக்கப்படுவார்களா என்ற புதிய சர்ச்சை எழுந்துள்ளது.

ஆறுமுகசாமி ஆணையம் இதுவரை 50-க்கும் மேற்பட்ட நபர்களை விசாரித்துள்ளது. இந்நிலையில், ஜெயலலிதா சிகிச்சை பெற்ற அப்போலோ மருத்துவமனையை ஆய்வுசெய்யச் சென்றது ஆணையக் குழு. ஜூலை 29 மாலை அப்போலோ மருத்துவமனைக்குக் குழு சென்றது. ஆணையத்தின் செயலாளர் கோமளா, ஆணைய வழக்கறிஞர்கள் பார்த்தசாரதி, நிரஞ்சன், சசிகலா தரப்பு வழக்கறிஞர்கள் ராஜா செந்தூர்பாண்டியன், அரவிந்தன், ஜெ.தீபா சார்பில் அவரின் வழக்கறிஞர் சுப்பிரமணியன் ஆகியோர் இந்தக் குழுவில் இடம்பெற்றிருந்தனர்.

அப்போலோவில் ஒவ்வோர் இடத்தைப் பற்றியும் கோமளா கேட்கக் கேட்க, அப்போலோ மருத்துவமனையின் சி.இ.ஓ சுப்பையா விளக்கம் கொடுத்தார். முதலில், அப்போலோ இரண்டாவது தளத்தில் ஜெயலலிதா அனுமதிக்கப்பட்டிருந்த MDCCU அறைக்கு அழைத்துச் சென்றுள்ளனர். முதலில் ஓர் அறையைத் திறந்து, அதன் பிறகு மற்றொரு கதவைத் திறந்தால் மட்டுமே ஜெயலலிதா இருந்த இடத்தை அடையும் வகையில் அந்த அறை அமைக்கப்பட்டுள்ளது. இதுதான் ஜெயலலிதா முதலில் இருந்த 2008-ம் எண் கொண்ட அறை. இங்குதான் ஜெயலலிதா 2016-ம் ஆண்டு செப்டம்பர் 22-ம் தேதி நள்ளிரவு முதல் நவம்பர் 19-ம் தேதி வரை இருந்துள்ளார்.

“பன்னீரும் தம்பிதுரையும் எங்கே இருந்தார்கள்?

இந்த அறையின் இருபுறமும் திரைச்சீலை அமைக்கப் பட்டிருந்தது. இந்த அறைக்குப் பக்கத்தில் ஜெயலலிதாவின் உடைமைகள் வைக்கப்பட்டிருந்தன. இதே அறையில் ஜெயலலிதாவுக்கு என்று புதிதாக வாங்கிய வென்டிலேட்டர் ஒன்றையும் வைத்திருந்தார்கள். ஜெயலலிதா தீவிரக் கண்காணிப்பில் இருக்க வேண்டும் என்பதற்காக MDCCU அறையில் வைத்திருந்தாக டாக்டர் ரமேஷ் வெங்கட்ராமன் சொல்லியிருக்கிறார். அப்போது, ‘‘எய்ம்ஸ் மருத்துவர்கள் மற்றும் ரிச்சர்ட் பியெல் உள்ளிட்டவர்கள் எந்த அறையில் இருந்து ஆலோசனை நடத்தினார்கள்’’ என்று கோமளா கேட்டதற்கு, ‘‘ஜெயலலிதா இருந்த அறைக்கு வெளியில் உள்ள ஆன்டி ரூமில்தான் ஆலோசனை நடத்தினார்கள். பக்கத்து அறையில் ஜெயலலிதா இருந்ததால் அவரது உடல்நிலையைப் பரிசோதித்துவிட்டு, இங்குவந்து ஆலோசனை நடத்துவார்கள்” என்று பதில் சொல்லியிருக்கிறார் டாக்டர்.

திரைச்சீலைக்கு அருகில் ஓர் இடத்தைக் காட்டி, ‘‘இந்த இடத்தில் ஜெயலலிதாவின் பாதுகாவலர் நிற்பார்’’ என்ற அப்போலோ நிர்வாகத்தினர், அடுத்த சில அறைகளைக் காட்டி, ‘‘இங்கு அமைச்சர்கள் மற்றும் அதிகாரிகள் அமர்ந்திருந்தனர்’’ என்று சொன்னார்கள். ஜெயலலிதா அனுமதிக்கப்பட்டிருந்த அறையின் வாசலில் மேரி சிலை அருகே ஓர் இடத்தைக் காட்டி, ‘‘இங்குதான் தம்பிதுரையும் பன்னீர்செல்வமும் பல நேரங்களில் உட்கார்ந்திருந்தனர்’’ என்று சொல்லியிருக்கிறார்கள். எல்லா இடங்களையும் ஆணையத்தின் குழுவுடன் சென்ற ஒரு புகைப்படக்காரர் போட்டோ எடுத்தார். ‘‘ஜெயலலிதாவை கவர்னர் எந்த இடத்திலிருந்து பார்த்தார்’’ என்ற கேள்விக்கு, டாக்டர் ரமேஷ் வெங்கட்ராமன் கவர்னர் நின்ற இடத்தில் நின்றுகொண்டு, ‘‘இங்கிருந்து கண்ணாடி வழியாகப் பார்த்தார்’’ என்று டெமோ செய்து காண்பித்தார்.

2016 நவம்பரில் ஜெயலலிதா மாற்றம் செய்யப்பட்ட சாதாரண அறைக்கு அதன்பின் குழு சென்றது. இந்த அறையில் ஜெயலலிதா இருப்பது போன்ற வீடியோதான் ஆர்.கே.நகர் இடைத்தேர்தலின்போது வெளியாகிப் பரபரப்பு ஏற்படுத்தியது. அந்த அறையை, கடந்த ஆண்டு அறுவை சிகிச்சை அரங்காக மாற்றிவிட்டார்கள். ‘எப்போது மாற்றப்பட்டது, ஏன் இப்படி மாற்றினீர்கள்’ என்றெல்லாம் ஆணையக் குழு கேட்டது. ‘எங்கள் தேவைக்காகக் கடந்த ஆண்டு மார்ச் மாதமே மாற்றினோம்’ என அப்போலோ தரப்பில் சொன்னார்களாம். இப்படி மாற்றம் செய்த பொறியாளர் சேஷாத்திரி அங்கே இருந்தார். அவர் ஆணையத்தின் குழுவிடம், ‘அறையை எவ்வாறு மாற்றம் செய்தோம்’ என்று விளக்கியுள்ளார். ‘ஜெயலலிதா படுத்திருந்தது எங்கே, டி.வி எங்கே இருந்தது, வீடியோவில் தெரிந்த ஜன்னல் எந்தப் பக்கம் இருந்தது, ஜன்னலுக்கு வெளியே தெரிந்த செடி உண்மையானதா அல்லது பிளாஸ்டிக் செடியா’ என்று ஆணையத்தின் செயலாளர் கோமளா வரிசையாகக் கேள்விகள் எழுப்பியுள்ளார். எல்லாவற்றுக்கும் மருத்துவமனை நிர்வாகத்தினர் விளக்கம் கொடுத்தனர். 

ஒட்டுமொத்த விகடனுக்கும் ஒரே ஷார்ட்கட்!

“பன்னீரும் தம்பிதுரையும் எங்கே இருந்தார்கள்?

ஜெயலலிதா அப்போலோவில் இருந்தபோது, மூன்றாவது மாடியில் நான்கு அறைகள் சசிகலாவால் பயன்படுத்தப்பட்டன. அதில் ஓர் அறை, சோபா, பெட் உள்ளிட்ட வசதிகள் கொண்ட ‘சூட்’ அறையாகும். இந்த அறையில் பெரும்பாலும் சசிகலா தங்கியிருந்தாக மருத்துவமனைச் செயல் அதிகாரி சுப்பையா தெரிவித்துள்ளார். ‘‘இவ்வளவு வசதியான அறைக்கு ஏன் ஜெயலலிதாவை மாற்றம் செய்யவில்லை’’ என ஆணையத்தின் வழக்கறிஞர்கள் கேட்டனர். ‘‘இரண்டாவது தளத்தில் உள்ள சாதாரண அறைக்கு அருகில்தான் அவசர காலச் சிகிச்சை அறை உள்ளது. அதனால் அங்கு ஜெயலலிதா இருந்தார்” என்று விளக்கியுள்ளனர். அதன்பின்பு ஆம்புலன்ஸ் நிறுத்தப்பட்ட இடம், ஜெயலலிதாவுக்கான உணவு தயாரான அறை உள்ளிட்டவற்றையும் ஆணையத்தின் குழுவினர் பார்வையிட்டனர்.

ஆணைய ஆய்வு முடிந்த பிறகு, ‘அப்போலோ ஆய்வு’ என்ற பெயரில் வாட்ஸ்அப் குழு ஒன்றை ஆணையத்தின் வழக்கறிஞர் நிரஞ்சன் உருவாக்கினார். அப்போலோவில் எடுக்கப்பட்ட புகைப்படங்களை அதில் ஷேர் செய்துள்ளார். ஆனால், பன்னீர்செல்வமும் தம்பிதுரையும் அமர்ந்திருந்ததாகச் சொல்லப்படும் இடத்தை எடுத்த புகைப்படம் அதில் இல்லை. அந்தப் படம் வெளியானால், பன்னீரையும் தம்பிதுரையையும் விசாரணைக்கு அழைக்க முடியும் என்பதால் அவற்றைத் தவிர்த்திருப்பதாகப் புதிய சர்ச்சை கிளம்பியுள்ளது. சசிகலா தரப்பு வழக்கறிஞர் ராஜா செந்தூர்பாண்டியன் நம்மிடம், ‘‘இதுகுறித்து ஆணையத்தில் முறையிட உள்ளோம்’’ என்றார். ஆணையத்தின் வழக்கறிஞர் நிரஞ்சனிடம் கேட்டபோது, ‘‘ஆணையத்தின் தரப்பிலிருந்து எந்தப் படங்கள் வெளியிடப்பட வேண்டும் என்று சொல்லப்பட்டதோ, அவற்றை மட்டுமே வெளியிட்டோம். எல்லாப் படங்களையும் வெளியிட வேண்டிய அவசியம் இல்லை’’ என்றார்.

இந்த ஆய்வு பன்னீரையும் தம்பிதுரையையும் விசாரணைக்கு இழுக்குமா என்று பார்ப்போம்!

- அ.சையது அபுதாஹிர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism