Published:Updated:

மரணத்தின் மர்மங்கள்... ஜெ. பிறந்தநாளிலாவது முடிவு கிடைக்குமா?

ஒட்டுமொத்த விகடனுக்கும் ஒரே ஷார்ட்கட்

Use App
மரணத்தின் மர்மங்கள்... ஜெ. பிறந்தநாளிலாவது முடிவு கிடைக்குமா?
மரணத்தின் மர்மங்கள்... ஜெ. பிறந்தநாளிலாவது முடிவு கிடைக்குமா?

மரணத்தின் மர்மங்கள்... ஜெ. பிறந்தநாளிலாவது முடிவு கிடைக்குமா?

பிரீமியம் ஸ்டோரி

‘சதத்தைக் கடந்த சாட்சியங்கள்... ஓர் ஆண்டைக் கடந்தும் விசாரணை’ எனப் போய்க் கொண்டிருக்கும் ஜெயலலிதா மரண மர்மம் தொடர்பான ஆறுமுகசாமி ஆணையத்தின் ஆயுள்காலம் மூன்றாவது முறையாக மீண்டும் இப்போது நான்கு மாதங்கள் நீட்டிக்கப்பட்டுள்ளது. வரும் பிப்ரவரி மாதம்வரை காலக்கெடு நீட்டிக்கப்பட்டுள்ள நிலையில் பிப்ரவரி 24-ம் தேதி ஜெயலலிதாவின் பிறந்தநாளிலாவது அவரது மரணம் தொடர்பான மர்மங்களுக்கு விடை கிடைக்குமா என்பதே அ.தி.மு.க தொண்டர்களின் எதிர்பார்ப்பாக இருக்கிறது.

ஆறுமுகசாமி ஆணையம் கடந்த 2017-ம் ஆண்டு செப்டம்பர் இறுதியில் விசாரணையை ஆரம்பித்தது. இதுவரை 110-க்கும் அதிகமான சாட்சிகள் ஆணையத்தால் பதிவு செய்யப்பட்டுள்ளன. அவர்களில் 95-க்கும் மேற்பட்ட சாட்சிகளிடம் சசிகலா தரப்பும் குறுக்கு விசாரணையை முடித்துள்ளது. துணை முதல்வர் ஓ.பன்னீர்செல்வம் இன்னும் விசாரணைக்கு அழைக்கப்படவில்லை. ‘ஜெயலலிதாவுக்கு அளிக்கப்பட்ட சிகிச்சைகள் குறித்த முழுவிவரங்களும் சுகாதாரத் துறை அமைச்சர் விஜயபாஸ்கர், செயலாளர் ராதாகிருஷ்ணன் ஆகியோருக்குத் தெரியும் என்பதால் அவர்களையும் விசாரணைக்கு அழைக்க வேண்டும்’ என சசிகலா தரப்பில் கோரிக்கை வைக்கப்பட்டுள்ளது. ஆணையத்தின் தரப்பில் லண்டன் மருத்துவர் ரிச்சர்ட் பீலேவிடமும் வீடியோ கான்ஃபரன்ஸ் மூலம் விசாரணை நடத்த முடிவாகியுள்ளது. இதற்காகவே இந்த காலநீட்டிப்பு என்றும் கூறப்படுகிறது.

மரணத்தின் மர்மங்கள்... ஜெ. பிறந்தநாளிலாவது முடிவு கிடைக்குமா?

“எம்.ஜி.ஆரை வெளிநாட்டுக்கு அழைத்துச் சென்று சிகிச்சை அளித்ததுபோல ஜெயலலிதாவை வெளிநாட்டுக்கு அழைத்துச் சென்று சிகிச்சை அளிப்பது குறித்து ஏன் முடிவு செய்யவில்லை?” என்ற கேள்வி கடந்த வாரம் முக்கியமாக வைக்கப்பட்டது. இதற்குப் பதில் அளித்த அப்போலோ மருத்துவமனை மருத்துவர் பாபு ஆப்ரகாம், “1983-ம் ஆண்டுதான் அப்போலோ ஆரம்பிக்கப்பட்டது. அப்போது போதிய நவீன வசதிகள் இல்லாமல் இருந்திருக்கலாம். அதனால், எம்.ஜி.ஆர் வெளிநாடு அழைத்துச் செல்லப்பட்டிருக்கலாம். இப்போது அப்போலோவில் உலகத் தரம் வாய்ந்த சிகிச்சை வசதிகள் இருப்பதால் இங்கேயே அவருக்குச் சிகிச்சை அளிக்கப்பட்டது” என்று தெரிவித்திருக்கிறார்.

ஜெயலலிதா முதல்வராக இருந்தபோது தலைமைச் செயலாளராக இருந்த ராம மோகன ராவ் இரண்டாவது முறையாக ஆணையத்தில் ஆஜராகிச் சாட்சியம் அளித்துள்ளார். கிட்டத்தட்ட நான்கு மணி நேரம் அவரை ஆணையத்தின் தரப்பிலும் சசிகலா தரப்பிலும் விசாரணை செய்துள்ளனர். அப்போது அவர், “ஜெயலலிதாவுக்கு அளிக்கப்பட்ட சிகிச்சைகள் குறித்து அமைச்சர்கள் பலருக்கும் தெரியும். அப்போது கவர்னராக இருந்த வித்யாசாகர் ராவைச் சந்தித்த பன்னீர்செல்வம், எடப்பாடி பழனிசாமி ஆகியோர் சிகிச்சைகள் குறித்து அவரிடம் விளக்கியது உண்மை. தர்மயுத்தம் தொடங்கும்வரை பன்னீர்செல்வம், ஜெயலலிதா மரணம் தொடர்பாக எந்தச் சந்தேகத்தையும் கிளப்பவில்லை.

2006-11-ம் ஆண்டு கால தி.மு.க ஆட்சியில் பன்னீர்செல்வத்தின்மீது ஊழல் வழக்குப் பதியப்பட்டது. அ.தி.மு.க ஆட்சி மீண்டும் வந்தவுடன் ஊழல் தடுப்பு மற்றும் கண்காணிப்புத் துறை அந்த வழக்கை முடிக்க நடவடிக்கை எடுக்க வேண்டும் என  ஜெயலலிதாவுக்கு பன்னீர்செல்வம் கடிதம் எழுதினார். அந்தக் கடிதம் என் மூலமாகவே ஜெயலலிதா விடம் அளிக்கப் பட்டது” என்று பதிவு செய்துள்ளார். “ஜெயலலிதாவை வெளிநாட்டுக்கு அழைத்துச்சென்று சிகிச்சை கொடுக்காதது ஏன்?” என்ற கேள்விக்கு “அவரை வெளிநாட்டுக்குக் கூட்டிச் செல்வதற்கான அறிக்கை, தமிழக அமைச்சரவைக் கூட்டத்தில் விவாதிக்கப் பட்டது. ஆனால், அதற்கான தேவை ஏற்படவில்லை. அதே நேரத்தில் வெளிநாட்டிற்குக் கொண்டு செல்வதற்கான ஏற்பாடுகளைத் தயாராகச் செய்துவைத்திருந்தோம்” என்று சாட்சியம் அளித்துள்ளார் ராம மோகன ராவ்.

2017-ம் ஆண்டு செப்டம்பரில் ஆணையம் அமைக்கப்பட்டபோது மூன்று மாதங்கள் அவகாசம் அளிக்கப்பட்டது. மூன்று மாதங்கள் முடிவடைந்ததும் ஆறு மாதங்கள் கால நீட்டிப்பு செய்யப்பட்டது. அதன்பிறகும் ஆணையம் தரப்பில் கால நீட்டிப்புக் கேட்டதால் இரண்டாவது முறையாக நான்கு மாதங்கள் நீட்டிக்கப்பட்டது. இப்போது மூன்றாவது முறையாக நான்கு மாதங்கள் நீட்டிப்பு வழங்கவேண்டும் என்று ஆணையம் கேட்டதால், அரசு கால அவகாசம் வழங்கியுள்ளது. கால நீட்டிப்பு குறித்துக் கூறும் ஆணையத்தின் வழக்கறிஞர் நிரஞ்சன், “நான்கு மாதங்கள் நீட்டிப்பு என்பது விசாரணைக்காக மட்டுமல்ல, அறிக்கையைத் தயார் செய்வதற்கும் சேர்த்துத்தான் இந்த அவகாசம். தமிழ், ஆங்கிலம் என இரு மொழிகளிலும் அறிக்கையைத் தயார் செய்யவேண்டியுள்ளது. அதேபோல் அரசுத் தரப்பில் சிலரிடமும், அமைச்சர்கள் சிலரிடமும் விசாரணை நடத்தும் வாய்ப்புகள் இருக்கின்றன. அதன் பின்னர் எங்கள் விசாரணைகள் விரைவில் முடிவுக்கு வந்து விடும்” என்றார்.

ஜெயலலிதா மரணத்தில் எழுந்த சர்ச்சைகளைவிட, மரணம் குறித்து விசாரிக்க அமைக்கப்பட்ட ஆணையத்தின் மீதான சர்ச்சைகள் அதிகமாகிவிட்டன. ஆணையத்தில் நடக்கும் விசாரணைகள் பற்றி அவ்வப்போது கசியும் தகவல்கள், நம்பிக்கை தருவனவாகவும் இல்லை. ஜெயலலிதாவின் பிறந்த நாளான வரும் பிப்ரவரி 24-ம் தேதிக்குள் அவரது மரணத்தின் மர்ம முடிச்சுகள் அவிழ்க்கப்படுமா என்பதே தொண்டர்களின் எதிர்பார்ப்பாக இருக்கிறது!

- அ.சையது அபுதாஹிர்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு