கொரோனா பறித்துக்கொண்ட அன்பு!

‘‘அன்பு... அன்பு என்று நான் எப்போதும் அழைக்கும் என் அன்பிற்கினிய சகோதரன் அன்பழகனை இழந்து தவிக்கிறேன்’’ என்று உருக்கமான ஒரு காணொளிப் பதிவை ஜெ.அன்பழகன் மறைவையொட்டி வெளியிட்டிருக்கிறார் தி.மு.க தலைவர் ஸ்டாலின். . ஸ்டாலினுக்கு மட்டுமல்ல... கருணாநிதி குடும்பத்துக்கே நெருக்கமானவர் சேப்பாக்கம் - திருவல்லிக்கேணி தொகுதி எம்.எல்.ஏ ஜெ.அன்பழகன். ‘எனக்கு ஐந்தாவது மகன் அன்பழகன்’ என்று கருணாநிதியால் கொண்டாடப்பட்டவர். ‘கருணாநிதிக்கு ஒரு கிட்டுபோல், ஸ்டாலினுக்கு அன்பழகன்’ என்று சக நிர்வாகிகள் சொல்வார்கள்.

. கருணாநிதியைப் பற்றியோ, அவரின் குடும்பத்தைப் பற்றியோ சட்டசபையில் யாரேனும் குற்றச்சாட்டைக் கிளப்பினால் அனல்பறக்க பதிலடி கொடுப்பார் அன்பழகன். . அரசியல் களத்தில் பல ஆண்டுகளாக இருந்தாலும், அன்பழகனின் பேச்சுகள் பெரும்பாலும் மேடைப்பேச்சாக இல்லாமல் வெகுஜன தமிழ்ப் பேச்சாகவே இருக்கும்.

இவரின் அப்பா ஜெயராமன், தி.நகர் ரங்கநாதன் தெருவில் பழக்கடை வைத்திருந்தவர். அவரை ‘பழக்கடை ஜெயராமன்’ என்றே அழைப்பார்கள். அவர், பழங்களாலேயே மேடைபோட்டு கருணாநிதியை அசத்துவார். செங்கோட்டை, அறிவாலயம், தலைமைச் செயலகம், கோபாலபுரம் வீடு என்று பல மாதிரிகளில் பிரமாண்ட மேடை அமைத்து அசத்தியவர் அன்பழகன்.

. தி.மு.க வர்த்தகர் அணிச் செயலாளரான கவிஞர் காசிமுத்து மாணிக்கம் அன்பழகனைப் பற்றி ஒரு தகவலைப் பகிர்ந்துகொண்டார். “எம்.ஜி.ஆர் முதல்வராக இருந்தபோது, அன்பழகன் கல்லூரி மாணவர். எம்.ஜி.ஆர் ஆட்சியை எதிர்த்து தி.மு.க சார்பில் கோட்டைக்கு அருகே போராட்டம் நடைபெற்றது. அப்போது எம்.ஜி.ஆரின் வாகனமும் வந்துவிட்டது. அன்பழகன் அருகே காரை நிறுத்திய எம்.ஜி.ஆர்., அவரிடம் கோரிக்கை மனுவைப் பெற்றுக்கொண்டு வாகனத்தில் ஏறச் சொல்லியிருக்கிறார். ‘ஜெயராமன் மகன்தானே நீ?’ என்று கேட்ட எம்.ஜி.ஆர்., ‘படித்து முடித்துவிட்டுத்தான் அரசியல் செய்ய வேண்டும். அதுவரை எந்தக் கூட்டத்திலும் உன்னை நான் பார்க்கக் கூடாது’ என்று அன்புக் கட்டளை போட்டு, தி.நகரிலுள்ள அன்பழகன் வீட்டுக்கு அருகே இறக்கிவிட்டுச் சென்றிருக்கிறார். கட்சி பேதம் மறந்து எம்.ஜி.ஆர்கூட அவர்மீது அன்புவைத்திருந்தார்’’ என்கிறார் அவர்.

. உறுப்பு மாற்று அறுவை சிகிச்சை செய்துகொண்டவர் என்பதால் இரவில் மாத்திரைகள் எடுத்துவந்தார் அன்பழகன். அவை அதிக தூக்கத்தை ஏற்படுத்துவதால், பெரும்பாலும் அதிகாலையில் எந்த நிகழ்ச்சியிலும் அன்பழகன் தலைகாட்ட மாட்டார். ஆனால், கருணாநிதி இருந்தவரை அதிகாலை

4 மணிக்கெல்லாம் அவரது வீட்டு வாசலில் ஆஜராகிவிடுவார்.

அன்பழகனின் தம்பியின் இல்லத் திருமணவிழாவை கருணாநிதி நடத்திவைத்தார். அந்த விழாவில், ‘‘என் அப்பா தி.மு.க. நான் தி.மு.க. எனது குடும்பமே தி.மு.க. என்னுடைய ஆசை, என் உடல்மீது என் தலைவர் கலைஞரின் கண்ணீர் பட வேண்டும் என்பதுதான்” என்று அன்பழகன் பேசிய உருக்கமான பேச்சை இப்போது சுட்டிக்காட்டும் தி.மு.க நிர்வாகிகள், ‘‘கருணாநிதியின் இந்த ஆண்டு பிறந்தநாளுக்கான நலத்திட்ட ஏற்பாடுகள் குறித்த ஆலோசனைக் கூட்டம்தான் அவருடைய கடைசி கட்சி நிகழ்ச்சி’’ என்று சொல்லிக் கண்ணீர் சிந்துகிறார்கள்.

கொரோனா பறித்துக்கொண்ட அன்பு!

அ.சையது அபுதாஹிர்Follow