Published:Updated:

RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!

ஒட்டுமொத்த விகடனுக்கும் ஒரே ஷார்ட்கட்

Use App
RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!
RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!

RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!

பிரீமியம் ஸ்டோரி

நீட் தேர்வு தோல்வியால் தற்கொலை செய்துகொண்ட விழுப்புரம் பிரதீபாவின் தந்தை சண்முகத்துக்கு, தன் மகளை நீட் தனிப் பயிற்சிக்கு அனுப்பும் அளவுக்கெல்லாம் வசதி இல்லை. வீட்டில் இருந்தபடியே தேர்வுக்கு மகள் தயாராகட்டும் என்று 12 செட் பயிற்சிப் புத்தகங்கள் வாங்கிக்கொடுத்திருக்கிறார். ஒரு செட் புத்தகத்தின் விலை, 3,000 ரூபாய். நீட் தேர்வுக்குப் பயிற்சிதரும் எல்லாத் தனியார் நிறுவனங்களும் தலா ரூ.40,000 முதல் ரூ.60,000 வரை கட்டணம் வசூலிக்கின்றன. இப்படியான செலவுகள் செய்து பயிற்சி பெற்றுக்கொண்டு தேர்வெழுதத் தயாரானால், அங்கேயும் நம் மாணவர்களுக்குக் காத்திருக்கிறது ஒரு செக் பாய்ன்ட். நீட் தகுதித் தேர்வுக்கான விண்ணப்பப் படிவம் 1,500 ரூபாய்.

RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!

தகவல் அறியும் உரிமைச் சட்டத்தின் மூலம் அண்மையில் விகடன் பெற்ற தகவல்கள் இங்கே... 2017-ம் ஆண்டில் நீட் விண்ணப்பங்களை விற்பனை செய்ததன் மூலம் மத்திய அரசின் சி.பி.எஸ்.இ ஈட்டிய வருமானம், 145 கோடி ரூபாய். அந்த ஆண்டில் நீட் தேர்வுக்காகச் செலவு செய்த 40 கோடி ரூபாயைக் கழித்தால், மத்திய அரசுக்கு ரூ.100 கோடிக்கு மேல் லாபம். 2018-ம் ஆண்டில் மட்டும் விண்ணப்பப் படிவம் விற்பனை செய்ததன் வழியாக ரூ.168 கோடி வரை வருமானம் ஈட்டியுள்ளது மத்திய அரசு. செலவுக்கணக்கு இன்னும் முழுமையாக வரவில்லை எனப் பதில் கொடுத்திருக்கிறார்கள். எப்படிப் பார்த்தாலும், 100 கோடி ரூபாயைவிட அதிக லாபம் கிடைத்திருக்கும்.

‘‘தரமான மருத்துவர்களை உருவாக்குவதற்கும், தனியார் மருத்துவக் கல்லூரிகளின் கல்விக்கொள்ளையைத் தடுக்கவும், மருத்துவப் படிப்புக்காக இருக்கும் பல்வேறு நுழைவுத்தேர்வுக் குளறுபடிகளைச் சரிசெய்யவுமே நீட் தகுதித் தேர்வு முறை கொண்டுவரப்பட்டது. கடந்த மூன்று ஆண்டுகளாக நடத்தப்பட்ட நீட் தேர்வினால் இவை அனைத்தும் சரி செய்யப்பட்டதா என்றால், இல்லை’’ என்கிறார் மருத்துவர் எழிலன்.

‘‘நீட் தேர்வு வந்தபிறகும் புதுச்சேரி ஜிப்மர், கேரளாவின் சித்திரைத் திருநாள் மருத்துவக் கல்விக்கழகம் ஆகியவற்றுக்குத் தனித்தனியே தேர்வு எழுத வேண்டியுள்ளது. ஆக, ஒரே தகுதித் தேர்வு முறையும் பொய்த்துவிட்டது. மருத்துவக் கல்லூரிகள் முன்பு கேபிடேஷன் கட்டணம் என்று வாங்கிய கறுப்புப் பணத்தை, பணமதிப்பு நீக்க நடவடிக்கைக்குப் பிறகு நேரடிக் கட்டணமாகவே வசூலிக்கத் தொடங்கியுள்ளார்கள்.

மருத்துவப் படிப்புக்கு 195/200 மதிப்பெண் எடுத்தால் தகுதி என்கிற முந்தைய கட் ஆஃப் முறையை மாற்றி, பெர்சென்டைல் முறையை நீட் தேர்வு அறிமுகப்படுத்தியது. மிகக் குறைவான மதிப்பெண் வாங்கியிருந்தால் கூட மருத்துவராகலாம் என்கிற சூழ்நிலையையே இந்த முறை உருவாக்கி வைத்துள்ளது. ஆக, நீட் தகுதித் தேர்வைக் கொண்டுவந்ததற்கான அத்தனை காரணங்களும் தோல்வி அடைந்துவிட்டன.

நீட் தேர்வுக்கான அப்ளிகேஷன்களை விநியோகம் செய்ததன் வழியாக, வருடத்துக்கு நூறு கோடி ரூபாய்க்கும் மேல் அரசு வருமானம் ஈட்டியிருக்கும் நிலையில், அந்த அளவுக்குத் தரத்துடன் நீட் தேர்வு நடத்தப்பட்டதா? வெவ்வேறு மாநிலங்களில் தேர்வு மையங்கள், பரிசோதனை என்கிற பெயரில் பதற்றத்துக்கு உள்ளாக்கப்பட்ட மாணவர்கள், வினாத்தாள் பிழைகள், உச்சகட்டமாக உயிர்பலிகள்... என அத்தனை குளறுபடிகளையும் அரசு அரங்கேற்றியது. மக்களிடமிருந்து பெறப்பட்ட ரூ. 100 கோடியையும் தனியார் ஏஜென்ஸிகளுக்கு அரசு அவுட்சோர்ஸிங் செய்துவிடும். சமூகப் படிநிலையில் பின்தங்கியுள்ள அனிதா, பிரதீபா குடும்பங்களின் மருத்துவப் படிப்புக் கனவை இன்னும் கேள்விக்குறியாக்கி இருப்பதுதான் நீட் செய்திருக்கும் சாதனை” என்றார்.

RTI அம்பலம்: நீட் தேர்வு... அப்ளிகேஷன் மூலம் அரசுக்கு லாபம் 100 கோடி ரூபாய்!

‘‘நீட் மட்டுமல்ல... அரசு நடத்தும் எல்லாப் போட்டித் தேர்வுகளுமே இந்த அளவுக்கான லாபத்தை ஈட்டித்தருகின்றன’’ என்கிறார், சமூக ஆர்வலர் ‘பாடம்’ நாராயணன். தேர்வுகளுக்காக அரசு செய்யும் செலவைவிட, அவர்கள் ஈட்டும் லாபம் பல மடங்காகத் தான் இருக்கிறது. யாரும் கேள்வி கேட்க முடியாத சூழலால், இப்படியான கொள்ளைகள் தொடர்கின்றன. இவ்வளவு நிதி வாங்கியும் நீட் மூலமாக ஏகப்பட்ட குளறுபடிகள் நிகழ்ந்துள்ளன. தொடக்கத்தில் நீட்டுக்கு ஆதரவாக இருந்த நாங்களே, தற்போது அது தேவையில்லை என்கிற நிலைப்பாட்டில் இருக்கிறோம். எந்த ஒரு நல்ல முன்னெடுப்பையும் மிக மோசமாக நிகழ்த்திக்காட்ட முடியும் என்பதற்கு நீட் சிறந்த உதாரணம். 60,000-க்கும் மேற்பட்ட மருத்துவ இடங்களுக்கு ஒரு லட்சத்துக்கும் மேற்பட்டவர்கள் போட்டியிடும் சூழலில், அவர்களில் தகுதியானவர்களைத் தேர்ந்தெடுப்பது வெளிப்படைத் தன்மையுடன் நடக்கவேண்டும்’’ என்றார்.

அரசே ஒரு விண்ணப்பத்துக்கு ரூ.1,500 எனக் கட்டணம் நிர்ணயம் செய்யலாமா? தங்கள் பிள்ளைகளின் மருத்துவக் கனவை நனவாக்கத் துடிக்கும் பிரதீபாவின் தந்தை சண்முகம் போன்ற தினக்கூலிகளால், இந்தக் கட்டணத்தைச் செலுத்தமுடியுமா? இப்படி விண்ணப்பத்திலிருந்து ஈட்டப்பட்ட 100 கோடி ரூபாய்க்கும் அதிகமான லாபம் உண்மையில் எதற்காகப் பயன்படுத்தப்படுகிறது போன்ற கேள்விகளுடன் நீட் இயக்குநர் சன்யம் பரத்வாஜுக்கு மின்னஞ்சல் அனுப்பிவிட்டுப் பதிலுக்காகக் காத்துக்கொண்டிருக்கிறோம்.

கற்பிப்பதில் லாபம் தேடுவது, சமூக அநீதியிலும் அநீதி!

- ஐஷ்வர்யா

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு