Published:Updated:

Higher Education: தமிழ் வழியில் மருத்துவம் மற்றும் பொறியியல் படிப்புகள்; சாதக பாதகங்கள் என்ன?

Higher Education

தமிழ் மொழியில் மருத்துவ பாடத்திட்டம் கொண்டு வரும் முயற்சியை 20, 25 ஆண்டுகளுக்கு முன்பே செய்திருக்க வேண்டும்.

Higher Education: தமிழ் வழியில் மருத்துவம் மற்றும் பொறியியல் படிப்புகள்; சாதக பாதகங்கள் என்ன?

தமிழ் மொழியில் மருத்துவ பாடத்திட்டம் கொண்டு வரும் முயற்சியை 20, 25 ஆண்டுகளுக்கு முன்பே செய்திருக்க வேண்டும்.

Published:Updated:
Higher Education
தமிழ்வழியில் மருத்துவப் படிப்புகளை அமல்படுத்தவும் விரைவில் தமிழ் வழி மருத்துவ கல்லூரி தொடங்கிடவும் முனைப்புடன் செயல்பட்டுவருவதாக சமீபத்தில் தெரிவித்திருந்தார் தமிழக சுகாதாரத் துறை அமைச்சர் ம.சுப்ரமணியன்.

இந்நிலையில் கடந்த சனிக்கிழமை சென்னையில் பேசிய மத்திய உள்துறை அமைச்சர் அமித்ஷா “ தமிழ்வழி மாணவர்கள் பயன்பெறவும்,  தாய்மொழியில் ஆராய்ச்சியை மேற்கொள்ளவும், தமிழ் மொழியில் மருத்துவம் மற்றும் தொழில்நுட்பக் கல்வியை வழங்க தமிழக அரசைக் கேட்டுக்கொள்கிறேன். அதற்கு வேண்டிய உதவிகளை மத்திய அரசு வழங்கிடும்” என்று தெரிவித்திருந்தார்.

மாணவர்கள் | மாதிரி படம்
மாணவர்கள் | மாதிரி படம்

தமிழ் மொழியில் மருத்துவப் படிப்பு சாத்தியமா? அதிலுள்ள சாதக பாதகங்கள் என்ன. தமிழ்வழியில் பொறியியல் படிப்புகள் ஏற்கனவே உள்ள நிலையில் அதன் தற்போதைய நிலை என்ன என்பது குறித்து கல்வியாளர்கள் சிலரிடம் பேசினோம்.

“ தமிழ் மொழியில் மருத்துவப் படிப்பை கொண்டு வரும் முயற்சி வரவேற்கத்தக்க ஒன்று என்றாலும் அதில் சில சிக்கல்கள் இருக்கின்றன ” என்கிறார் மருத்துவர் ரவீந்திரநாத். “ தமிழ் மொழியில் பாடத் திட்டம் கொண்டுவரப்பட்டாலும், ஆங்கில வழிப் பாடத்தையும் கற்றுக்கொள்ள மாணவர்கள் கற்க வேண்டும். ஏனெனில், உலக நாடுகள் பலவற்றில் ஆங்கில வழி பாடத்திட்டமே பின்பற்றப்படுகிறது. தமிழ் மொழியில் மருத்துவப் படிப்பை முடித்த பின்னர், இந்தியாவில் உள்ள பிற மாநிலங்களில் சென்று பணியாற்றும் போது சிரமம் உண்டாகும். இந்தியாவின் பல மாநிலங்களிலும்  தாய்மொழியில் மருத்துவப் பாடத்திட்டதை கொண்டு வருகையில் இதுபோன்ற சிக்கல்கள் உள்ளது. பல மாநிலங்களில் இந்தி மொழியில் பாடங்கள் கொண்டுவரக்கூடும்.

மருத்துவர் ரவீந்திரநாத்
மருத்துவர் ரவீந்திரநாத்

இது மறைமுக இந்தி திணிப்பாக அமைய வாய்ப்பிருக்கிறது. இதனால், தமிழ் மொழியில் மருத்துவம் படிக்கும் மாணவர்கள் இந்திய அளவில் வேலைக்கு செல்ல முடியாத சூழ்நிலையும் உருவாக வாய்ப்பு உள்ளது. அதே நேரத்தில், தமிழ் வழியில் படித்த மாணவர்கள், உயர்கல்வி மற்றும் ஆராய்ச்சி படிப்பு மேற்கொள்ளவும் சிக்கல் உண்டாகும். அரசு பள்ளியில் தமிழ் வழியில் படித்த மாணவர்கள், மருத்துவம் மற்றும் பொறியியல் படிப்புகளை ஆங்கிலத்தில் படிக்க சிரமப்படுகின்றனர். இதன் காரணமாக தமிழ் வழியில் மருத்துவப் படிப்பு கொண்டு வருவது ஏற்றுக்கொள்ளக் கூடிய ஒன்றாக நான் கூறுவேன். ஆனால் ஆங்கிலம் என்பது உலகளவில் தவிர்க்க முடியாத ஒன்றாக இருக்கிறது. ஆதலால்  மாணவர்களுக்கு ஆங்கில அறிவை அதிகப்படுத்தும் நடவடிக்கையில் ஈடுபட வேண்டும்”  என்று கூறினார்.

கல்வியாளர் நெடுஞ்செழியன்
கல்வியாளர் நெடுஞ்செழியன்

கல்வியியலாளர் நெடுஞ்செழியன் பேசுகையில் “ மருத்துவப் படிப்பை தமிழ் வழியில் கொண்டுவருவது சவாலானது ஒன்று. காரணம், இன்றைய சூழலில் மருத்துவம் அறிந்த மொழிபெயர்ப்பாளர்கள் மிகவும் குறைவு. மேலும் தமிழ் வழியில் மாணவர்களுக்கு புரியும் படியான பாடத்தைக் கொண்டு வருவதே சிக்கலான காரியம் என்று நான் கருதுகிறேன். அது மிகவும் முக்கியம். வேலைவாய்ப்பு ரீதியாக, தாய்மொழியில் மருத்துவம் படித்த மாணவர்கள் ஒரு மாநிலத்திற்குள்ளேயே பணியாற்றும் சூழல் உண்டாகும். ஆங்கில மொழியில் படிக்கும் மாணவர்களுக்கு உலகளாவிய வாய்ப்புகள் இருக்கின்றன. தமிழ் மொழியில் மருத்துவ பாடத்திட்டம் கொண்டு வரும் முயற்சியை 20, 25 ஆண்டுகளுக்கு முன்பே செய்திருக்க வேண்டும். ஆனால், இதைப்பற்றி நாம் இப்போதுதான் பேசத் தொடங்கியிருக்கிறோம். இது இன்னும் நடைமுறைக்கு கொண்டு வர பல ஆண்டுகள் ஆகலாம். அரசியல்வாதிகள் இதை மேலோட்டமாக பேசிவிட முடியாது, நடைமுறைப்படுத்துவதற்கு சாத்திய கூறுகள் உள்ளதா என்பதை ஆராய்ந்த பின்னரே இதை முடிவெடுக்க வேண்டும். கல்வி என்பது அரசியலுக்கு அப்பாற்பட்ட ஒன்று. கல்வியை அரசியலில் கலக்க கூடாது” என்றார்.

இத்தொடர்ந்து தமிழ்வழி பொறியியல் கல்வியில் உள்ள அம்சங்களைப் பற்றி கல்வியாளர் ராஜராஜனிடம் பேசினோம் “ தாய் மொழியில் கல்வி அளித்து அதில் சிறந்த வெற்றியை அடைந்த நாடுகளாக ஜப்பான், ஜெர்மனி ஆகியவற்றைக் கூறலாம். ஒரு துறையில் சிறந்து விளங்க அதுகுறித்த ஆழ்ந்த அறிவுதான் அவசியமே தவிர அதைத் தீர்மானிப்பது மொழியறிவு கிடையாது. நான் சொன்ன நாடுகள் அனைத்தும் சிந்தனை சக்தியை வலுப்படுத்த தங்கள் தாய்மொழியை பயன்படுத்திக்கொண்டு அதைத் தொடர்ந்து ஆங்கில மொழியில் மாற்றிக் கொள்ளலாம் என்பதுபோல தங்கள் கொள்கையை வைத்துக்கொண்டார்கள்.

கல்வியாளர் ராஜராஜன்
கல்வியாளர் ராஜராஜன்

அதன் விளைவாகவே அவர்களுக்கு அத்தகைய வெற்றி சாத்தியமானது. இதே பல நூறு ஆண்டுகளாக அடிமைப்பட்டு கிடந்த நம் நாட்டில் ஆங்கில மொழி பழகிப்போன ஒன்றாகிவிட்டது. தமிழ் மொழியில் அனைத்தும் வர வேண்டும் என்று கூறும் அரசியல்வாதிகள் மற்றும் கல்வியாளர்கள் கூடவே ஒரு வார்த்தையை சேர்த்து இணைப்பு மொழியாக ஆங்கிலத்தை வைத்துக்கொள்ளலாம் என்று கூறுவதை நீங்கள் கவனிக்கலாம். இதே நேரத்தில் தமிழ் மொழியில் இதற்கான வளமும் பன்மையும் உண்டா என்பதில் எந்த சந்தேமும் தேவையில்லை.

தமிழை நிராகரித்து ஆங்கிலமும், ஆங்கிலத்தை நிராகரித்து தமிழும் வைத்து கல்வி திட்டத்தை அமைப்பது வெற்றி பெறாது. இரண்டையும் இணைத்து அமைக்கும் பாலமே சிறந்த பலனை கொடுக்கும் என்பது என் கருத்து. அதேபோல, 7.5% உள் ஒதுக்கீடு போல தமிழ் வழியில் கல்வி கற்பவர்களுக்கும் தனியே திட்டங்கள் கொண்டு வர வேண்டியது அவசியம். தமிழ்வழியில் பள்ளிப்படிப்பை முடிக்கும் ஒரு மாணவன் உயர்கல்வியில் சேருகையில் கஷ்டப்பட்டாவது ஆங்கிலத்தில் படித்துவிட வேண்டும் என்று நினைக்கிறான். காரணம், தமிழில் படித்தால் போதிய அளவிலான வாய்ப்புகள் கிடைக்குமா என்ற ஐயம். எனவே, தமிழில் பாடத் திட்டம் அமைப்பது நிச்சயம் சாத்தியமான ஒன்று. ஆனால் அதற்கான உப காரணிகளையும் கூடவே செய்வது மிகவும் முக்கியம்.” என்று கூறினார்.