64 வயதில் மெடிக்கல் சீட் வாங்கிய ஜெய் கிஷோர் பிரதான்... இது சரியான முன்னுதாரணம்தானா?

சில விஷயங்கள் மேலோட்டமாகப் பார்ப்பதற்கு பாசிட்டிவ்வாகத் தெரிந்தாலும், நுட்பமாகக் கவனிக்கும்போதுதான் அவற்றின் நெகட்டிவ் பக்கமும் நமக்குப் புலப்படும். அப்படிப்பட்ட ஒரு விஷயம்தான் இது.

ஓய்வுபெற்ற வங்கி அதிகாரி ஜெய் கிஷோர் பிரதான் தன்னுடைய 64-வது வயதில் நீட் தேர்வில் வெற்றி பெற்றிருக்கிறார். ஒடிசாவின் பர்கர் மாவட்டத்தைச் சேர்ந்த இவர், எம்.பி.பி.எஸ் படிப்பிலும் சேர்ந்துள்ளார். இளம்வயதில் மருத்துவம் படிக்க ஆசைப்பட்ட ஜெய், அதற்கான நுழைவுத்தேர்வில் தோல்வியடைந்ததால் பி.எஸ்ஸி முடித்துவிட்டு வங்கிப் பணியில் சேர்ந்திருக்கிறார். திருமணமாகி இவருக்கு இரட்டைப் பெண் குழந்தைகள் இருக்கிறார்கள். மகள்கள் இருவரும் நீட் தேர்வுக்குத் தயாராக, அவர்களுக்கு உதவ ஆரம்பித்திருக்கிறார் ஜெய் கிஷோர் பிரதான். அப்பாவின் ஆர்வத்தைப் பார்த்த மகள்கள் அவரையும் நீட் தேர்வு எழுதும்படி வற்புறுத்த, இளம் வயதில் தொலைத்த கனவை முதுமையில் நிறைவேற்றிக்கொள்ள நீட் தேர்வுக்குத் தயாராகியிருக்கிறார்.

சென்ற வருடம் (2019) உச்ச நீதிமன்றம் மருத்துவம் படிப்பதற்கான வயது வரம்பை நீக்கியது இவருக்கு வசதியாகப் போய்விட்டது. நீட் தேர்வில் தேர்ச்சிபெற்றதோடு, மாற்றுத்திறனாளிகளுக்கான இட ஒதுக்கீட்டில் அரசு மருத்துவக் கல்லூரியில் சேர்ந்தும்விட்டார். அதாவது, இளம் தலைமுறைக்கான ஒரு மெடிக்கல் சீட் 64 வயதான ஜெய் கிஷோர் பிரதானுக்குக் கிடைத்திருக்கிறது. இது தொடர்பாக சமூக சமத்துவத்துக்கான மருத்துவர்கள் சங்கத்தின் பொதுச் செயலாளர் டாக்டர் ரவீந்திரநாத்திடம் கருத்து கேட்டோம்.

``படிப்புக்கு வயதில்லை என்ற கருத்தைப் பொதுவாகப் பார்த்தால் நல்ல விஷயம்தான். ஆனால், சமூகத்துக்கு சர்வீஸ் செய்கிற மருத்துவப் பணிக்கான படிப்பில் 64 வயதான ஒருவர் சேர்வது என்பது நல்ல விஷயம் கிடையாது. இத்தனை வயதுக்கு மேல் படித்து, இவர் எப்படி பிராக்டிஸ் செய்து சமூகத்துக்குப் பயன்பட முடியும்? இதுவே 18 வயது மாணவர் ஒருவருக்கு அரசு மருத்துவக் கல்லூரியில் சீட் கிடைத்திருந்தால் சமூகத்துக்கு நீண்ட காலம் உதவியாக இருந்திருப்பார்.