Published:Updated:

19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!
பிரீமியம் ஸ்டோரி
News
19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

ள்ளாட்சி அமைப்புகளை நிர்வகிக்கும் தனி அலுவலர்களின் பதவிக் காலத்தை நான்காவது முறையாக மேலும் ஆறு மாத காலத்துக்குத் தமிழக அரசு நீட்டித்திருக்கிறது. இதன்மூலம் அடுத்த ஆறு மாதங்களுக்குத் தேர்தல் நடைபெற வாய்ப்பில்லை என்று தமிழக அரசு அதிகாரப்பூர்வமாகச் சொல்லிவிட்டது. எப்போதும் மோடியையே ட்விட்டரில் திட்டிக் கொண்டிருந்த ப.சிதம்பரம்கூட, முதல்முறையாக இதற்காகத் தமிழக அரசைக் கிண்டல் செய்துள்ளார். ‘உள்ளாட்சி அமைப்புகளுக்கு மக்கள் பிரதிநிதிகள் தேவையில்லை... தனி அதிகாரிகளே போதும் என்றால், தமிழக அரசை ஏன் மக்கள் பிரதிநிதிகள் நடத்த வேண்டும்? அமைச்சர்கள் பதவி விலகிக் குடியரசுத் தலைவரிடம் ஆட்சியை ஒப்படைக்கலாமே?’ என விளாசியிருந்தார் சிதம்பரம்.

2016 அக்டோபருடன் தமிழக உள்ளாட்சி அமைப்புகளின் பதவிக்காலம் முடிந்துவிட்டது.  ‘இதோ நடத்துகிறோம்’, ‘விரைவில் நடத்துகிறோம்’, ‘நவம்பர் மாதத்துக்குள் நடத்துகிறோம்’, ‘பிப்ரவரி மாதத்துக்குள் நடத்திவிடுகிறோம்’ என முதல்வர் எடப்பாடி பழனிசாமியும், உள்ளாட்சித் துறை அமைச்சர் எஸ்.பி.வேலுமணியும் மாறி மாறிச் சொல்லிவருகின்றனர். இன்னும் உள்ளாட்சித் தேர்தல் வந்தபாடில்லை.

19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

‘‘உள்ளாட்சித் தேர்தல் நடைபெறாததால் பல பணிகள் பாதிக்கப் பட்டுள்ளன. 2017-ல், தமிழகம் முழுக்க டெங்கு காய்ச்சல் பரவியதைத் தடுக்க முடியவில்லை. சென்னையில் பெய்த சிறு மழையைக்கூட சமாளிக்க முடியவில்லை’’ என்று தி.மு.க கடுமையான குற்றச்சாட்டுகளைச் சொன்னது. ஆனால், ‘‘உள்ளாட்சித் தேர்தல் நடத்தாதபோதும், வளர்ச்சிப் பணிகள் எதுவும் பாதிக்கப்படவில்லை’’ என அமைச்சர் எஸ்.பி.வேலுமணி 2018 மே 1-ம் தேதி செய்தியாளர்களிடம் சொன்னார். ஆனால், இதே வேலுமணி ஜூன் 20-ம் தேதி டெல்லி சென்று மத்திய நிதி அமைச்சர் பொறுப்பு வகிக்கும் பியூஷ் கோயல், மத்திய பஞ்சாயத்து ராஜ் அமைச்சர் புருஷோத்தம் ரூபலா ஆகியோரைச் சந்தித்து ஒரு மனு கொடுத்தார். அதில், ‘உள்ளாட்சித் தேர்தல் நடத்தாததைக் காரணம் காட்டி, மத்திய அரசு போதுமான நிதி தரவில்லை. எனவே, உள்ளாட்சி அமைப்புகளில் அடிப்படை வசதிகளை மேற்கொள்வது பாதிக்கப்படுகிறது. இதனால், எதிர்க் கட்சிகள் மத்திய அரசையும், மாநில அரசையும் விமர்சனம் செய்கின்றன’ என்று கூறியிருந்தார்.

‘உள்ளாட்சித் தேர்தலை நடத்தாமல் தமிழகத்தின் ஊரக உள்ளாட்சி அமைப்புகளுக்கு 14-வது மத்திய நிதி ஆணையத்தின் 2017-18 நிதியாண்டுக்கான இரண்டாம் தவணை மானியம், செயலாக்க மானியம், 2018-19 நிதியாண்டுக்கான முதல் தவணை அடிப்படை மானியம் உள்ளிட்ட 5,000 கோடி ரூபாய் நிதியைத் தர வாய்ப்பில்லை’ என்று மத்திய அரசு வட்டாரங்கள் சொல்கின்றன. ‘ஒரு மாநிலத்துக்கு இப்படி விதிமுறையை மீறிக் கொடுத்துவிட்டால், பிற மாநிலங்களும் தேர்தல் நடத்தாமல் நிதியைக் கேட்க ஆரம்பித்து விடும்’ என்று மத்திய அரசு சொல்கிறது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

ஏறக்குறைய 19 மாதங்களாக உள்ளாட்சித் தேர்தல் நடத்தப்படவில்லை. உள்ளாட்சித் தேர்தல் குறித்து சென்னை உயர் நீதிமன்றத்தில் தி.மு.க சார்பில், அந்தக் கட்சியின் மாநிலங்களவை உறுப்பினர்
ஆர்.எஸ்.பாரதி வழக்குத் தொடர்ந்தார். அவரிடம் இதுகுறித்துக் கேட்டோம். “முன்னாள் முதல்வர் ஜெயலலிதா மருத்துவமனையில் அனுமதிக்கப்பட்டிருந்த போது, உள்ளாட்சித் தேர்தலுக்கான தேதியை இந்த அரசு அறிவித்தது. அப்போது, ‘சென்னை மாநகராட்சித் தேர்தலில் தாழ்த்தப்பட்டோர் மற்றும் பழங்குடியினர் போட்டியிடும் வகையில் இட ஒதுக்கீடு தர வேண்டும்’ என்று கேட்டு வழக்குத் தொடுத்தோம். அதற்கு உரிய வழிமுறைகளைச் செய்து 2016-ம் ஆண்டு டிசம்பருக்குள் தேர்தலை நடத்த வேண்டும் என நீதிமன்றம் சொன்னது. ஆனால், இந்த அரசு உள்ளாட்சித் தேர்தலை நடத்தத் தயாராக இல்லை. மக்கள் ஓட்டுப் போட மாட்டார்கள் என்று தெரிந்துகொண்டு, வேண்டு மென்றே தேர்தலைத் தள்ளிப்போடுகிறார்கள்.

கடைசியாக, ‘தொகுதி மறுவரையறை செய்யப் போகிறோம்’ என்று நீதிமன்றத்தில் சொல்லி உள்ளாட்சித் தேர்தலை நடத்தாமல் இருக்க அவகாசம் பெற்றிருக் கிறார்கள். அதற்கு ஏன் இவ்வளவு காலம் ஆகிறது? 1996-ல் தி.மு.க ஆட்சி வந்தபோது, மே மாதம் முதல் அக்டோபர் மாதத்துக்குள் மறுவரையறைப் பணிகளை முடித்து உள்ளாட்சித் தேர்தல் நடத்தினோம். அந்த உள்ளாட்சித் தேர்தலில் பெண்களுக்கு 33 சதவிகித இடஒதுக்கீடும் கொடுத்தோம்.

உள்ளாட்சித் தேர்தலை நடத்தாததால், நகராட்சிப் பகுதியில் தெருவிளக்குகள் எரியவில்லை, குழாயில் தண்ணீர் வரவில்லை என்றால்கூட யாரை அணுகுவது என்று புரியாமல் மக்கள் திண்டாடுகின்றனர். மக்கள் இதனால் ஆளும் கட்சிமீது கடும் கோபத்தில் இருக்கின்றனர். எனவே, தேர்தலை நடத்தாமல் தவிர்க்கின்றனர். இதனால், யாருமே கவனிப்பாரற்று தமிழக மக்கள் அநாதைகளாக இருக்கின்றனர். உள்ளாட்சித் தேர்தலை நடத்தவில்லை என்பதால், மத்திய அரசின் நிதி கிடைக்கவில்லை. இதைச் சுட்டிக் காட்டி, உள்ளாட்சித் தேர்தலை நடத்த உத்தரவிடக் கோரி மீண்டும் தி.மு.க சார்பில் நீதிமன்றத்தில் முறையிட உள்ளோம்” என்றார்.

சட்டப் பஞ்சாயத்து இயக்கத்தின் தலைவர் சிவ இளங்கோ, “அ.தி.மு.க-வின் இரட்டை இலை சின்னத்துக்கு தினகரன் தரப்பும் உரிமை கோரியதால், அந்த வழக்கு முடியும் வரை உள்ளாட்சித் தேர்தலை ஆளும்கட்சி தள்ளிப்போட்டது. இப்போது இரட்டை இலை கிடைத்தபிறகும், இன்னும் தேர்தல் நடத்தவில்லை. தனி அதிகாரிகளின் பதவிக்காலத்தை நான்காவது முறையாக நீட்டித்திருக்கின்றனர். ‘மக்களிடம் நமக்கு என்ன செல்வாக்கு இருக்கிறது’ என்பது எடப்பாடி அரசுக்குத் தெரிந்துவிட்டது. அதனால்தான், தேர்தலை எதிர்கொள்ள அவர்கள் அச்சப்படுகின்றனர். உள்ளாட்சித் தேர்தலை நடத்தவில்லை என்பதால், 5,000 கோடி ரூபாய் வரை மத்திய அரசின் ஒதுக்கீடு தமிழகத்துக்குக் கிடைக்கவில்லை. தேர்தல் நடந்த பின்னரும் இந்த நிதி கிடைக்காது. உள்ளாட்சி அமைப்புகளில் மக்களால் தேர்ந்தெடுக்கப்பட்ட பிரதிநிதி இருந்தால்தான் நிதியைப் பெற முடியும் என்று சட்டத்தில் இருக்கிறது. எப்போது தேர்தல் நடந்து மக்கள் பிரதிநிதிகள் வருகிறார்களோ, அந்த வருடத்திலிருந்துதான் நிதி கிடைக்கும். நிலுவைத் தொகை என்று முந்தைய ஆண்டுக்கான நிதி கிடைக்காது. 

பல உள்ளாட்சி அமைப்புகளில் கமிஷனர் பதவிகள் காலியாக உள்ளன. அங்கெல்லாம் பொறுப்பு கமிஷனர் என்று சிறப்பு அதிகாரிகளைப் போட்டிருக்கிறார்கள். நெல்லையில் மாநகராட்சி கமிஷனர் இல்லை. கமிஷனரை நியமிக்கக் கோரி கலெக்டரிடம் மனு கொடுத்தோம். ‘அரசிடம் சொல்லிவிட்டோம். பதில் வரவில்லை’ என்று கலெக்டர் அலுவலகத்தில் சொல்கிறார்கள். 

தூத்துக்குடியில் ஒரு குடம் தண்ணீர் பத்து ரூபாய்க்கு வாங்குகின்றனர். தமிழகத்தின் பல இடங்களில் இதுதான் நிலைமை. டெங்கு அதிக மாகப் பரவியதற்கு, உள்ளாட்சி அமைப்புகளின் சுகாதாரப் பணிகள் பாதிக்கப்பட்டதுதான் காரணம். பல இடங்களில் வெளி மாவட்டங்களைச் சேர்ந்தவர்களைத்தான் சிறப்பு அதிகாரிகளாக நியமித்திருக்கின்றனர். அவர்கள் மக்களின் குறைகளை அக்கறையுடன் அணுகுவதில்லை. 

ஜனநாயகத்தில் மத்திய அரசு, மாநில அரசு என இரண்டு அமைப்புகளுக்குப் பிறகு மூன்றாவது அரசு என்பது உள்ளாட்சி அரசாங்கம்தான். மாநில சுயாட்சி பற்றிப் பேசுகிறார்கள். ஆனால், உள்ளாட்சி அமைப்புகளுக்கு அதிகாரம் கொடுக்க இவர்கள் தயாராக இல்லை. இது ஜனநாயகத்துக்கு விரோதமான போக்கு. உள்ளாட்சி அமைப்புகளின் தொகுதி மறுவரையறை செய்வதாக மாநில அரசு ஒரு தந்திரத்துடன் நீதிமன்றத்தில் சொன்னது. 2018 பிப்ரவரி மாதத்துக்குள் முடிப்பதாகச் சொன்னார்கள். அதற்கு மேல் ஐந்து மாதங்கள் ஆகவிட்டன. தேர்தல் நடந்தால், எதிர்க்கட்சிகளின் கைகளுக்கு உள்ளாட்சி அமைப்புகள் போய்விடும். பிறகு, கான்ட்ராக்ட் பணிகளில் சம்பாதிக்க முடியாது என ஆளும் கட்சியினர் நினைக்கிறார்கள். எனவே, தேர்தலை எவ்வளவு காலத்துக்கு தள்ளிப்போட முடியுமோ அவ்வளவு காலத்துக்குத் தள்ளிப்போடலாம் என்று தமிழக அரசு கருதுகிறது” என்றார்.

19 மாதங்களாக நடக்கவில்லை உள்ளாட்சித் தேர்தல்... மக்களைச் சந்திக்க அச்சப்படும் எடப்பாடி அரசு!

இதுகுறித்து அமைச்சர் ஜெயக்குமாரிடம் கேட்டோம். ‘‘உள்ளாட்சித் தொகுதிகள் மறுவரையறை செய்யும் பணிகள் முடிந்த பின்னர், வழக்குகள் முடிந்த பின்னர், தேர்தல் நடத்தப்படும் என்று உள்ளாட்சித் துறை அமைச்சர் தெளிவாகச் சொல்லியிருக்கிறார். நாங்கள் உள்ளாட்சித் தேர்தல், அடுத்த ஆண்டு நடக்க உள்ள நாடாளுமன்றத் தேர்தல், 2021-ம் ஆண்டு நடக்கவுள்ள சட்டமன்றத் தேர்தல் என மூன்றையும் எதிர்கொள்ளத் தயாராகவே உள்ளோம். தேர்தலை எதிர்கொள்வதிலும், மக்களைச் சந்திப்பதிலும் எங்களுக்கு எந்த அச்சமும் இல்லை. 

உள்ளாட்சி அமைப்புகளில் மக்கள் பிரதிநிதிகள் இல்லாவிட்டாலும் அதிகாரிகள் சிறப்பாகச் செயல்படுகின்றனர். மக்கள் பிரதிநிதிகள் இருந்தாலும்கூட, உத்தரவுகளைச் செயல்படுத்துவது அலுவலர்கள்தான். தெருவிளக்கு எரியாவிட்டால், அதைச் சரிசெய்வது அலுவலர்கள்தானே? தனி அதிகாரிகள் சிறப்பாகச் செயல்படுகிறார்கள் என்று சட்டப்பேரவையிலேயே புள்ளி விவரங்களுடன் உள்ளாட்சித்துறை அமைச்சர் சொல்லியிருக்கிறார். எனவே, உள்ளாட்சி அமைப்புகளில் எந்தப் பணிகளிலும் தொய்வு இல்லை; திட்டங்களும் முடங்கவில்லை. ஏற்கெனவே இருந்த மேயர், நகராட்சித் தலைவர் ஆகியோர் இப்போது உள்ளாட்சி அமைப்புகளில் ஆதிக்கம் செலுத்துவதாகக் கூறுவது சரியல்ல. வரையறுக்கப்பட்ட விதிகளுக்கு ஏற்பத்தான் அதிகாரிகள் செயல்படுகின்றனர். யாரும் ஆதிக்கம் செலுத்த முடியாது. உள்ளாட்சி அமைப்புகளில் மக்கள் பிரதிநிதிகள்தான் பதவியில் இருக்க வேண்டும் என்பதே எங்கள் ஆசை. அதிகாரிகள் ஆட்சி செய்ய வேண்டும் என்று நாங்கள் விரும்பவில்லை’’ என்றார்.

‘உள்ளாட்சித் தேர்தலை நடத்தாமல் இருப்பது மக்களின் நலனுக்கு எதிரானது’ என்று எப்போது அரசுக்குப் புரியும்?

- கே.பாலசுப்பிரமணி

ஆளும்கட்சியின் கட்டுப்பாட்டில் உள்ளாட்சிகள்!

கராட்சி நிர்வாகத் துறை உயரதிகாரி ஒருவரிடம் பேசினோம். ‘‘உள்ளாட்சி அமைப்புகளுக்கான தேர்தல் நடக்கவில்லையே தவிர, ஆளும்கட்சியின் கட்டுப்பாட்டில்தான் இன்னும் உள்ளாட்சி அமைப்புகள் இருக்கின்றன. உள்ளாட்சி அமைப்புகளில் கடைசியாக மேயராக, நகராட்சித் தலைவராக, பஞ்சாயத்துத் தலைவராக, வார்டுகளில் கவுன்சிலர்களாக இருந்தவர்களில் ஆளும்கட்சியைச் சேர்ந்தவர்கள் (எடப்பாடி-ஓ.பி.எஸ் அணியைச் சேர்ந்தவர்கள்) இன்னும் ஆதிக்கம் செலுத்துகின்றனர். இவர்கள் சட்டப்படி உள்ளாட்சி அமைப்புகளின் எந்தச் செயல்பாடுகளிலும் கையெழுத்துப் போட முடியாது. ஆனால், நிர்வாகரீதியிலான முடிவுகளை எடுப்பது இன்னும் அவர்கள்தான். டி.டி.வி.தினகரன் அணியின் வசம் அல்லது தி.மு.க-வின் கைவசம் இருந்த உள்ளாட்சி அமைப்புகளில், அந்தந்த தொகுதிகளின் அ.தி.மு.க எம்.எல்.ஏ-க்கள் அல்லது மாவட்ட அமைச்சர்கள் அதிகாரம் செலுத்துகின்றனர். இவர்கள் சொல்வதைத்தான் தனி அதிகாரிகள் கேட்கின்றனர். தனி அதிகாரிகள் தன்னிச்சையாகச் செயல்பட்டால், அவர்கள் பதவியில் நீடிக்க முடியாது. உடனே தூக்கியடிக்கப்படுகிறார்கள்.

உள்ளாட்சி அமைப்புகளுக்கு மத்திய அரசு நிதி வரவில்லை. வேறு வழியின்றி வீட்டு வரி உள்ளிட்ட உள்ளாட்சி அமைப்புகளின் சொந்த நிதியில் இருக்கும் பணத்தை எடுத்துச் செலவுசெய்து வருகின்றனர். இதனால், சில உள்ளாட்சி அமைப்புகள் கடனில் தத்தளிக்கின்றன. சென்னை மாநகராட்சி உள்ளிட்ட மாநகராட்சிகளுக்கு உலக வங்கி நிதி, ஜப்பான் நாட்டு வங்கியின் உதவி எனப் பல்வேறு நிதியுதவிகள் அவ்வப்போது வருகின்றன. இதை வைத்து மழைநீர் வடிகால் பணிகள் மற்றும் சாலைப்பணிகளைச் செய்கிறார்கள். ஆளும்கட்சிக்கு ஆதரவான கான்ட்ராக்டர்கள் இதில் வழக்கம்போல கல்லா கட்டுகிறார்கள்” என்று கூறி அதிர வைத்தார் அவர்.