Published:Updated:

அடிச்சுத் தூக்கு - தில் யுத்தம் 2019

அடிச்சுத் தூக்கு - தில் யுத்தம் 2019
பிரீமியம் ஸ்டோரி
அடிச்சுத் தூக்கு - தில் யுத்தம் 2019

அடிச்சுத் தூக்கு - தில் யுத்தம் 2019

அடிச்சுத் தூக்கு - தில் யுத்தம் 2019

அடிச்சுத் தூக்கு - தில் யுத்தம் 2019

Published:Updated:
அடிச்சுத் தூக்கு - தில் யுத்தம் 2019
பிரீமியம் ஸ்டோரி
அடிச்சுத் தூக்கு - தில் யுத்தம் 2019

தொடங்கிவிட்டது, உலகின் மிகப்பெரிய ஜனநாயகத் திருவிழா. இந்தியாவின் 17-வது நாடாளுமன்றத் தேர்தலுக்கான தேதியை அறிவித்து, பந்தக்கால் நட்டுவிட்டது, தேர்தல் ஆணையம். இனி அடுத்த இரு மாதங்களிலும் கொண்டாட்டங்களுக்கும் கோலாகலங்களுக்கும் பஞ்சமிருக்காது. தமிழகத்தைப் பொறுத்தவரை 18 சட்டமன்றத் தொகுதிகளுக்கும் இடைத் தேர்தல் என்பது இன்னும் விறுவிறுப்பைக் கூட்டியுள்ளது.

மே 23 அன்று விடை தெரியும் வரை, 130 கோடி மக்களின் அன்றாடப் பேச்சுகளையும், செயல் களையும் தேர்தலே ஆக்கிரமிக்கும். பா.ஜ.க-வைப் பொறுத்தவரை மோடியின் ஐந்தாண்டுக்கால ஆட்சிக்கு மக்கள் அளிக்கப்போகும் மதிப்பெண் என்ன என்ற எதிர் பார்ப்பு, எதிர்க் கட்சிகளுக்கு மோடியை வீழ்த்தும் வாய்ப்பு, தமிழகத்தில் தி.மு.க-வுக்கும் அ.தி.மு.க-வுக்கும்  தங்கள் பலத்தை நிரூபிக்கும் களம், தினகரன், கமல்ஹாசன் போன்றோருக்குத் தங்கள் அரசியல் எதிர்காலத்தை நிரூபிக்க வேண்டிய நிர்பந்தம் என்று இந்த ஜனநாயக மல்யுத்தம், எல்லாக் கட்சிகளுக்குமான ‘தில் யுத்தம்’தான்!

அடிச்சுத் தூக்கு - தில் யுத்தம் 2019

இது ‘வேற லெவல்’ தேர்தல்..!

தேசம் இதுவரை சந்தித்துள்ள 16 தேர்தல்களுக்கும், இந்தத் தேர்தலுக்கும் இடையில் பெரிதான வித்தியாசம் எதையும் வெளிப்படையாகக் கண்டுபிடிக்க முடியாது. உன்னிப்பாய்க் கவனித்தால் ஒரு விஷயம் தெளிவாய்த் தெரியவரும். இந்தத் தேர்தலில் ஏழை வேட்பாளர் யாருக்கும் இடமே இல்லை. வாக்களிப்பது மட்டுமே, ஏழை மற்றும் நடுத்தட்டு மக்கள். முடிவெடுப்பதும், முடி சூடுவதும் தொழிற் குடும்பங்களும், கார்ப்பரேட் நிறுவனங்களும்தான். அதாவது பணக்காரர்கள் மட்டுமே.

தொழிற்குடும்பம் என்பதில், காங்கிரஸ் உள்ளிட்ட பல்வேறு தேசியக் கட்சிகளின் தலைவர்கள் வந்துவிடுவார்கள் என்றால், கார்ப்பரேட்டுகளின் விருப்பப்பட்டியலில் பா.ஜ.க வேட்பாளர்கள் இருப்பார்கள்.

இனிமேல், போஸ்டர் ஒட்டி, கொடிகட்டி, கொள்கையை முழங்கி, படிப்படியாகப் பதவிக்கு வந்த எந்தத் தொண்டனும் நாடாளு மன்றத்தின் படிகளைக் கூட மிதிக்க முடியாது என்ற அவலநிலை உருவாகியுள்ளது.

இந்தியாவில், ஏழே ஏழு தேசியக்கட்சிகள் மற்றும் அங்கீகாரம் பெற்ற 51 மாநிலக்கட்சிகள் உள்ளன.  தேசிய மற்றும் மாநிலக்கட்சிகள் மட்டும்தான், நாடாளுமன்றத் தேர்தலில் பங்கேற்கின்றன. சிறிய கட்சிகள், ஏதாவது ஒரு கூட்டணிக்கு ஆதரவு அளிக்கின்றன அல்லது ஒதுங்கிக்கொள்கின்றன.

பெரிய கட்சிகளில், நாடாளுமன்றத் தொகுதி வேட்பாளர்களுக்கான நேர்காணலில் கேட்கப்படும் மிக முக்கியமான கேள்வி, ‘உங்களால் எவ்வளவு செலவழிக்க முடியும்?’ என்பதுதான். கட்சிக்கும், சமூகத்துக்கும் செய்த பணிகள் என்னென்ன என்பதெல்லாம் ‘சும்மனாச்சுக்கும்’ கேட்கப்படும் கேள்விகள். இன்றைய நிலையில், ஒரு நாடாளுமன்றத் தேர்தல் வேட்பாளர், குறைந்தபட்சம் 30 கோடி ரூபாய் செலவழித்தே தீர வேண்டும். இதுவே வி.ஐ.பி–க்கள் மோதும் தொகுதியாக இருந்தால், 50 கோடி ரூபாயைத் தாண்டும்.

ஒட்டுமொத்த விகடனுக்கும் ஒரே ஷார்ட்கட்!

அடிச்சுத் தூக்கு - தில் யுத்தம் 2019

செலவு... 60,000 கோடி ரூபாய்!

டெல்லியைத் தலைமை யிடமாகக் கொண்டு இயங்கி வரும் Centre for Media Studies (CMS) என்ற ஆய்வு நிறுவனம், கடந்த 2014 நாடாளுமன்றத் தேர்தலில், நாடு முழுவதும் 35,000 கோடி ரூபாய் செலவிடப்பட்டுள்ளதாகக் கணக்கிட்டுள்ளது. ஆனால், தேர்தல் ஆணையம், அலுவலகரீதியாகக் கணக்கிட்டுள்ள தொகை, 7,000 கோடி ரூபாயிலிருந்து 8,000 கோடி ரூபாய்க்குள் மட்டுமே. இதே ஆய்வு நிறுவனம், இந்த நாடாளுமன்றத் தேர்தலில், 50,000 கோடி ரூபாயிலிருந்து 60,000 கோடி ரூபாய் வரை செலவிடப்படும் என்று கணித்துள்ளது. இத்தனைக்கும் இந்த நிறுவனம், தொகுதிக்கு 12 கோடி ரூபாய் என்றுதான் சராசரிக்கணக்கு போட்டுள்ளது.

இத்தனை கோடி ரூபாய் செலவிடப்படுவது தெரிந்தாலும், இன்று வரையிலும் ஒரு நாடாளுமன்றத் தொகுதியில் ஒரு வேட்பாளர், அதிகபட்சமாய் எவ்வளவு செலவிட வேண்டுமென்று தேர்தல் ஆணையம் வைத்துள்ள வரம்பு எவ்வளவு தெரியுமா... 70 லட்ச ரூபாய். இதிலும் பெரிய கேலிக்கூத்து நிகழ்ந்துள்ளது. கடந்த 2014 நாடாளுமன்றத் தேர்தலில், தேர்தல் செலவுக்கணக்கைக் காண்பித்துள்ள 176 நாடாளுமன்ற உறுப்பினர்கள், தேர்தல் ஆணையம் நிர்ணயித்துள்ள தேர்தல் செலவு வரம்பில் 50 சதவிகிதத்துக்கும் குறைவான தொகையை மட்டுமே செலவிட்டுள்ளதாகக் கூறியுள்ளனர். அதைத் தேர்தல் ஆணையமும் ஏற்றுக்கொண்டுள்ளது. மக்கள் பிரதிநிதித்துவச் சட்டம் 1951 பிரிவு 10 ‘ஏ’–யின் படி, தேர்தல் செலவுக்கணக்கைக் காட்டாத வேட்பாளர்கள் அல்லது சரியான கணக்கைக் காட்டாதவர்ளுக்கு மூன்று ஆண்டுகள் வரை தேர்தலில் நிற்கத் தடைவிதிக்க முடியும். அதுவும் மூன்று ஆண்டுகளுக்கு மட்டும்தான். தேர்தல் நடப்பதே ஐந்தாண்டுகளுக்கு ஒரு முறைதான். ஆனால் இதுவரை எந்தக் கட்சி வேட்பாளரின் மனுவும் இதைக் காரணம் காட்டித் தள்ளுபடி செய்யப்பட்டதாகத் தகவல் இல்லை.

இந்தத் துணிச்சலில்தான், பெரிய கட்சிகளின் வேட்பாளர்கள் எல்லோருமே, தாறுமாறாக செலவு செய்கின்றனர். திருமங்கலம் ‘பார்முலா’க்கள், ஆர்.கே.நகர் டோக்கன்களைக் கண்டுபிடித்து, நமது தமிழகம் மற்ற மாநிலங்களைப் பின்னுக்குத் தள்ளி, முதலிடத்தில் இருக்கிறது. ஒரு சட்டமன்றத் தொகுதியில், வேட்பாளர் ஒருவர் அதிகபட்சமாக 28 லட்ச ரூபாய் மட்டுமே செலவழிக்க வேண்டுமென்று சொல்கிறது, தேர்தல் ஆணையத்தின் விதிமுறை. ஆனால் ஆர்.கே. நகரில் ஒரு நாளுக்கு மூன்று கோடி ரூபாய் வரை செலவழிக்கப்பட்டது அனைவரும் அறிந்த ரகசியம்.

முகமறியா நன்கொடையாளர்கள்!

இந்தத் தேர்தலிலும் கறுப்புப்பணம் விளையாடப்போகிறது. கட்சிகள் அதற்குக் கணக்கு காண்பிக்கவும் சட்டம் வழியமைத்துக் கொடுத்துள்ளது. நன்கொடையாகக் கிடைத்த கட்சி நிதியைத்தான் இதற்குச் செலவிட்டதாய், கட்சிகள் கணக்கு காண்பிக்கும். இதற்காகவே, எல்லாப் பெரிய கட்சிகளும் நிதி திரட்டுவதை ஓர் இயக்கமாகவே நடத்திவருகின்றன. கடந்த 2016–2017 நிதியாண்டில் மட்டும், ஆறு தேசியக்கட்சிகளுக்கு, 1559 கோடி ரூபாய், வருவாய் கிடைத்திருக்கிறது. அதில், 711 கோடி ரூபாய், அதாவது 46 சதவிகிதத்தொகை, அடையாளம் இல்லாத நன்கொடையாளர்களால் வழங்கப்பட்டுள்ளதாக Association for Democratic Reforms (ADR) அறிக்கை கூறுகிறது. இதில், பா.ஜ.க–வுக்கு மட்டும், 1194 நன்கொடையாளர்களிடமிருந்து, 532 கோடி ரூபாய் வந்துள்ளது. காங்கிரஸுக்கு 599 நன்கொடையாளர்களிடமிருந்து 41 கோடியே 90 லட்ச ரூபாய் கிடைத்துள்ளது.

ஆட்சியால் பணம்; பணத்தால் ஆட்சி!

நடக்கவிருக்கின்ற நாடாளுமன்றத் தேர்தலில், வாக்குக்கு 500 ரூபாய் தருவது என்று ஒரு கட்சியும், 250 ரூபாய் என்று இன்னொரு கட்சியும் திட்டம் தீட்டியுள்ளதாகத் தகவல்கள் வெளியாகின்றன. இடைத்தேர்தல் நடக்கவுள்ள 18 சட்டமன்றத் தொகுதிகளில், இந்தத் தொகை இன்னும் பல மடங்கு அதிகமாகும் என்பதை யாரும் சொல்லித் தெரிய வேண்டியதில்லை. ஏனெனில், நாடாளுமன்றத் தேர்தலில் ஜெயிப்பதைவிட, இந்தத் தொகுதிகளைக் கைப்பற்றுவதில் தான், தமிழகத்தில் ஆட்சி மாற்றம், காட்சி மாற்றங்கள் நடக்கும். அந்த வகையில், தமிழகம் இன்னும் பல திருமங்கலங்களையும், ஆர்.கே.நகர்களையும், சங்கரன் கோவில்களையும், சாத்தான் குளங்களையும் பார்க்கப் போகிறது.

ஆகமொத்தத்தில், ‘பணத்தைக் கொண்டு ஆட்சி: ஆட்சியைக் கொண்டு பணம்’ என்கிற பழ.கருப்பையாவின் கூற்று, மீண்டும் ஒரு முறை நிரூபிக்கப் படப்போகிறது. ஜெயலலிதா இருந்தவரையிலும், அவருக்காகவும், அவரது கையில் இருந்த இரட்டைஇலைச் சின்னத்துக்காகவும் ஒரு வாக்குவங்கி இருந்தது. அது இப்போது மறைந்துவிட்டது அல்லது குறைந்துவிட்டது. அதை மீட்டெடுக்க இப்போதுள்ள ஆட்சியாளர் களிடம் இருக்கின்ற ஒரே ஆயுதம், பணம் மட்டுமே. எனவே, பணத்தைக் கொண்டு, இந்தத் தேர்தலில் வாக்காளர்களை விலைக்கு வாங்குவதற்கான உத்திகள், இப்போதிலிருந்தே சூடுபிடிக்கத் தொடங்கி விடும்.

கூட்டணிக் கட்சிகளுக்குக் கொடுக்கவும், வாக்காளர்களுக்கு வாரியிறைக்கவும் கறுப்புப் பணத்தை வெளியே எடுக்கவும் முடியாமல், ஐ.டி ரெய்டுகளால் எதிர்க் கட்சிகளை முடக்கிப் போட்டுவிட்டது மத்திய பா.ஜ.க அரசு. அதனால், இந்தத் தேர்தலை எதிர்க் கட்சிகள் எதிர்கொள்வது பெரும் சிரமமாகவே இருக்கப்போகிறது. எப்படியும் இந்தத் தேர்தலில், வேட்பாளர்களையும், தேர்தல் முடிவுகளையும் நிர்ணயிக்கப் போவது கொள்கையோ, வாக்குறுதிகளோ, நிறைவேற்றிய திட்டங்களோ இல்லை. வெறும் பணம் மட்டுமே என்பது உறுதியானால் அது நம் ஜனநாயகத்துக்கும் அரசியலமைப்புச் சட்டத்துக்கும் இழைக்கப்படும் அவமானம்.

- சே.சேவியர் செல்வகுமார்,  படம்: வெ.நரேஷ்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism