Published:Updated:

ஆம்பூர் ‘பிரியாணி’ யாருக்கு?

ஆம்பூர் ‘பிரியாணி’ யாருக்கு?
பிரீமியம் ஸ்டோரி
News
ஆம்பூர் ‘பிரியாணி’ யாருக்கு?

- ஆம்பூர்

ஆம்பூர் ‘பிரியாணி’ யாருக்கு?

ம்பூரில் அ.தி.மு.க சார்பில் ஜோதி ராமலிங்க ராஜா, தி.மு.க சார்பில் வில்வநாதன் போட்டியிடுகின்றனர். கடந்த சட்டமன்றத் தேர்தலில் அ.தி.மு.க சார்பில் இங்கு வெற்றிபெற்று, தினகரன் அணிக்குச் சென்றதால் தகுதி நீக்கம் செய்யப்பட்ட பாலசுப்பிரமணியே அ.ம.மு.க சார்பில் போட்டியிடுகிறார்.

தொகுதியில் வன்னியர் சமூக, இஸ்லாமிய மக்கள் அதிகம் வசிக்கின்றனர். அ.தி.மு.க வேட்பாளரான ஜோதி ராமலிங்க ராஜா மாதனூர் ஒன்றியச் செயலாளர். அமைச்சர் வீரமணியின் தீவிர ஆதரவாளர். தொழிற்சாலை நகரமான ஆம்பூரில் சுற்றுச்சூழல் பிரச்னை, ஜி.எஸ்.டி வரிவிதிப்பு ஆகிய காரணங்களால் ஆட்சியாளர்கள் மீதான அதிருப்தி அதிகம். பணத்தை வாரியிறைத்து வாக்காளர்களைச் சரிக்கட்ட நினைக்கிறது ஆளும்கட்சி. எனினும்கூட அதிருப்தியைச் சரிக்கட்ட முடியவில்லை. நம்மிடம் பேசிய ஜோதி ராமலிங்க ராஜா, ‘‘ஆளும்கட்சி என்பதால் எளிதில் வெற்றிபெறுவேன். தி.மு.க-வை மக்கள் விரும்பவில்லை’’ என்றார்.

ஆம்பூர் ‘பிரியாணி’ யாருக்கு?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

தி.மு.க வேட்பாளரான வில்வநாதன் பேரணாம்பட்டு தெற்கு ஒன்றியச் செயலாளராக இருக்கிறார். சிக்கனமானவர் என்பதுதான் வில்வநாதனின் மைனஸ். அதிர்ஷ்டவசமாக, வேலூர் நாடாளுமன்றத் தொகுதியில் போட்டியிடும் தன் மகன் கதிர்ஆனந்தின் வெற்றிக்காக துரைமுருகன் எடுக்கும் ஒவ்வொரு முயற்சியும், வில்வநாதனுக்குச் சாதகமாக அமைவது இவரது பிளஸ். நம்மிடம் பேசிய வில்வநாதன், ‘‘ஆளும்கட்சிமீது மக்கள் அதிருப்தியில் இருக்கிறார்கள். கூட்டணிக் கட்சிகளின் ஆதரவு பலமாக உள்ளது. அ.ம.மு.க நிர்வாகிகள் பலர் எனக்கு மறைமுகமாக ஆதரவு தந்துள்ளனர்’’ என்று போட்டுஉடைத்தார்.

ஆம்பூர் ‘பிரியாணி’ யாருக்கு?

கொடுத்த வாய்ப்பைத் தவறவிட்டதாக அ.ம.மு.க வேட்பாளர் பாலசுப்பிரமணிமீது அதிருப்தியில் இருக்கிறார்கள் மக்கள். அதனாலேயே பெரிதாகத் தீவிரம் காட்டாமல் அமைதியாக இருக்கிறார் பாலசுப்பிரமணி. அவரிடம் பேசினோம். ‘‘பணம் கொடுத்து ஓட்டு வாங்கிவிடலாம் என்று ஆளும் கட்சி, எதிர்க்கட்சிகள் நினைக்கின்றன. அ.தி.மு.க வேட்பாளர் ஜோதி ராமலிங்க ராஜா, வேலை வாங்கித்தருவதாகப் பொதுமக்களிடம் பணம் வாங்கி மோசடி செய்தவர். தி.மு.க வேட்பாளர், மக்களுக்கு அறிமுகம் இல்லாதவர். மக்கள் எனக்குத்தான் வாய்ப்பளிப்பார்கள்’’ என்றார். மொத்தத்தில் ஆம்பூரில் வெற்றி என்னும் ‘பிரியாணி’யை ஒருகட்டு கட்டிவிடலாம் என்று உற்சாகமாக இருக்கிறார்கள் உடன்பிறப்புகள்!

- லோகேஸ்வரன், படங்கள்: ச.வெங்கடேசன்