Published:Updated:

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?
பிரீமியம் ஸ்டோரி
கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

அலட்சியத்தின் உச்சத்தில் தேர்தல் ஆணையம்

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

அலட்சியத்தின் உச்சத்தில் தேர்தல் ஆணையம்

Published:Updated:
கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?
பிரீமியம் ஸ்டோரி
கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

ஒரு சிறு உதாரணத்தைப் பார்ப்போம். நூறு மதிப்பெண்களுக்கு ஒரு தேர்வு நடக்கிறது. பலரும் தேர்வு எழுதுகின்றனர். தேர்வுத்தாள்கள் திருத்தப்பட்டு, முடிவுகள் வெளியாகின்றன. அதைப் பார்த்தவர்களுக்கு ஆச்சர்யம், அதிர்ச்சி, ஆத்திரம்... மொத்தமே நூறு மதிப்பெண்கள்தான். ஆனால், பலரும் 120... 130 என தாறுமாறாக மதிப்பெண்களை வாங்கியிருக்கிறார்கள். சிலருக்கு எதிர் பார்த்ததைவிட மதிப்பெண் எக்கச்சக்கமாகக் குறைந்திருக்கிறது. உலகிலேயே மிகப் பெரிய ஜனநாயகத் திருவிழாவான 2019 இந்தியத் பொதுத்தேர்தல் முடிவுகள் இப்படித்தான் வெளியாகியிருக்கின்றன. இந்தியத் தேர்தல் ஆணையம் மற்றும் தமிழக தேர்தல் ஆணையத்தின் தரவுகளை ஆய்வு செய்ததன் மூலம் இந்த உண்மைகளை வெளிக்கொண்டு வந்திருக்கிறது ஜூனியர் விகடன்.  

மக்களவைத் தேர்தல் முடிந்து பிரதமர் மற்றும் அமைச்சரவையில் இடம்பெறப் போகிறவர்களின் பதவிப் பிரமாணமும் நடந்து முடிந்துவிட்டது. இந்தியத் தேர்தல் ஆணையத்தின் மீதும் மின்னணு வாக்குப்பதிவு இயந்திரத்தின் மீதும் ஏற்கெனவே பல்வேறு குற்றச்சாட்டுகளும் சர்ச்சைகளும் எழுந்தவண்ணம் இருக்கின்றன. தேர்தல் ஆணையமும் தொடர்ச்சியாக அவற்றை மறுத்துக் கொண்டேயிருக்கிறது. இந்த நிலையில்தான் இந்தச் சர்ச்சைகளின் உண்மைத் தன்மையை அறிய சில ஆய்வுகளை மேற்கொள்ள முடிவு செய்தோம். அதன்படி, தேர்தல் ஆணைய இணையத்திலிருந்து தமிழகத்தில் எண்ணப்பட்ட வாக்குகளின் தரவுகளை எடுத்தோம். ஏற்கெனவே வாக்குப்பதிவு குறித்து நம்மிடமிருந்த தரவுகளோடு அதை ஒப்பிட்டோம். பயங்கர அதிர்ச்சியாக இருந்தது. தேர்தல் நாளில் பதிவான வாக்குகளைவிட, எண்ணப்பட்ட வாக்குகளின் எண்ணிக்கை ஏகத்துக்கும் அதிகரித்திருந்தது. இந்தக் கட்டுரையின் தொடக்கத்தில் 100-க்கு 120... 130 மதிப்பெண்கள் என்று ஓர் உதாரணத்தைப் பார்த்தோமே... அப்படி இருந்தன அந்த எண்ணிக்கை வேறுபாடுகள். நாடு முழுவதும் சுமார் 370 தொகுதிகளில் இதுபோன்ற குளறுபடிகள் தொடர்ந்து, தமிழகத் தலைமைத் தேர்தல் அதிகாரி பத்திரிகையாளர்களுக்கு அளித்த வாக்குப்பதிவு தரவுகளின் அடிப்படையிலும் இதுகுறித்து மேலும் ஆழமாக ஆய்வு செய்தோம். இவை விகடன் டாட் காமிலும் வெளியிடப்பட்டன. விவரங்கள் இதோ...

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

அதிகரித்த வாக்கு எண்ணிக்கை!

 தேனி நாடாளுமன்றத் தொகுதியில் மொத்தம் 11,61,687 வாக்குகள் பதிவாகியுள்ளன. ஆனால், எண்ணப்பட்ட வாக்குகளின் எண்ணிக்கை 11,73,489. பதிவான வாக்குகளை விட, 11,802 வாக்குகள் அதிகமாகியிருக்கின்றன. இதேபோல திருவண்ணாமலை, சேலம், சென்னை தெற்கு தொகுதிகளிலும் எண்ணப்பட்ட வாக்குகளின் எண்ணிக்கை அதிகரித்திருக்கிறது. (பார்க்க இன்ஃபோகிராபிக்) தமிழகம் மட்டுமல்ல... நாடு முழுவதுமே 370-க்கும் மேற்பட்ட தொகுதிகளில் இந்தக் குளறுபடி ஏற்பட்டுள்ளது.

தபால் ஓட்டு ஆய்வு

ஒருவேளை இதில், பதிவான வாக்குகளின் எண்ணிக்கையில் தபால் வாக்குகளின் எண்ணிக்கை சேர்க்கப்படாமல் இருந்திருக்கலாம். எண்ணப்படும் நேரத்தில் அவற்றையும் சேர்த்ததால் வாக்குகள் இப்படியாக அதிகரித்திருக்கலாம் என்ற சந்தேகமும் ஏற்பட்டது. அந்தச் சந்தேகத்துக்கு விடை காண பதிவான தபால் வாக்குகளின் எண்ணிக்கை தொடர்பான தரவுகளைச் சேகரித்து, ஆய்வுக்கு உட்படுத்தினோம். அப்போதும் பொருந்தி வரவில்லை. அவற்றின் விவரங்கள் இதோ...
  தேனியில் மின்னணு வாக்குப்பதிவு இயந்திரத்தில் பதிவான வாக்குகளின் எண்ணிக்கை 11,61,687. அதுவே எண்ணப்படும்போது 11,73,489 வாக்குகளாக அதிகமாகியிருக்கின்றன. தேனி தொகுதியில் பதிவான தபால் வாக்குகளின் எண்ணிக்கை 5,570. தபால் வாக்குகளைக் கழித்துவிட்டுப் பார்த்தால்கூட பதிவான வாக்கு களைவிட 6,232 வாக்குகள் அதிகமாகியிருக்கின்றன.

 கடலூரில் தேர்தலின்போது பதிவான வாக்குகளின் எண்ணிக்கை, 10,04,184. அதுவே எண்ணப்படும்போது 10,38,741 வாக்குகளாக அதிகமாகியிருக்கின்றன. இங்கு பதிவான தபால் வாக்குகளின் எண்ணிக்கை 4,461. ஆனால், எண்ணப்பட்ட வாக்குகளில் தபால் வாக்குகள் தவிர்த்து 30,096 வாக்குகள் கூடுதலாகப் பதிவாகியிருக்கின்றன.

ஒட்டுமொத்த விகடனுக்கும் ஒரே ஷார்ட்கட்!

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

இடைத்தேர்தல்களில் இதே குளறுபடி!

மக்களவைத் தேர்தலில் மட்டும்தான் இப்படி நடந்துள்ளது என்று சொல்ல முடியாது. இடைத்தேர்தல் நடந்த 22 தொகுதிகளில் சிலவற்றிலும் இதுபோன்ற வித்தியாசங்கள் இருக்கின்றன. நாடாளுமன்றத் தேர்தலில் வாக்குகள் அதிகமானது என்றால், இடைத்தேர்தலில் ஏராளமான வாக்குகள் எண்ணப்படாமலே போயுள்ளன. வாக்குகளை எண்ணும்போது செல்லாத வாக்குகளை ஒதுக்குவார்கள்.

 சாத்தூர் தொகுதியில் பதிவான வாக்குகளின் எண்ணிக்கை, 1,86,861. ஆனால், எண்ணப்படும் போது 1,81,630 வாக்குகளே இருந்துள்ளன. இங்குக் குறிப்பிட வேண்டிய இன்னொரு விஷயம் இந்தத் தொகுதியில் ஒரு தபால் வாக்குகூட விழவில்லை. இது தமிழகத் தேர்தல் ஆணையத்திலேயே குறிப்பிடப்பட்டுள்ளது. அப்படி இருக்கும்போது எண்ணப்படும்போது பதிவான வாக்குகளிலிருந்து 5,231 வாக்குகள் குறைந்திருந்தன. இந்தத் தொகுதியில் அ.தி.மு.க வேட்பாளராக நின்றவர் வெறும் 1,101 வாக்குகள் வித்தியாசத்தில் வெற்றிபெற்றுள்ளார். எண்ணப்படாமல் போன 5,231 வாக்குகள் ஒருவேளை சேர்க்கப் பட்டிருந்தால் தேர்தல் முடிவே மாறியிருக்கும் என்பதும் குறிப்பிடத்தக்கது.

எண்ணிக்கையின்போது செல்லாத வாக்குகளைத் தனியாகப் பிரித்துவிடுவார்கள். அப்படியே இருந்தாலும் ஐயாயிரத்து சொச்சம் அளவுக்குச் செல்லாத ஓட்டுகள் விழுமா என்ற கேள்வியும் எழுகிறது. சரி, இந்தக் கேள்விக்கும் விடை காணலாம் என்று ‘வாக்கு எண்ணிக்கையின்போது எத்தனை செல்லாத வாக்குகள் ஒதுக்கப் பட்டன?’ என்ற விவரத்தைத் தேர்தல் ஆணையம் வெளியிடும் படிவம் 20 என்ற சட்டமன்றத் தொகுதிவாரியான வாக்குப்பதிவு விவரங்கள் அடங்கிய படிவத்தை ஆராய்ந்தோம். அதில் சாத்தூர் சட்டமன்றத் தொகுதியில் பதிவான வாக்குகளில் செல்லாதவை என்று அவர்கள் பிரித்தது வெறும் 97 வாக்குகளைத்தான். அப்படி யென்றால், மிச்சம் 5,134 வாக்குகள் எங்கே போயின?
இவை தமிழ்நாட்டின் தலைமைத் தேர்தல் அதிகாரி, பத்திரிகையாளர் களுக்கு அனுப்பிய தரவுகளின் அடிப்படையில் மேற்கொள்ளப்பட்ட ஆய்வின் முடிவுகள். இதே ஆய்வை மக்களவைத் தேர்தலின் தரவுகளிலும் செய்துபார்த்தபோது 39 தொகுதிகளிலும் ஒரு செல்லாத வாக்குகூட விழவில்லை என்று தமிழகத் தலைமைத் தேர்தல் அதிகாரி கொடுத்த தரவுகள் கூறுகின்றன. வாக்குப்பதிவு குறித்த அவரின் தரவுகள் இந்தியத் தேர்தல் ஆணைய இணையத்திலிருந்து வேறுபடுகின்றன. 

இரண்டையும் ஒப்பிட்டுப் பார்த்தோம். சில தொகுதிகளில் தரவுகள் இரண்டிலும் வேறுபடுகின்றன. தர்மபுரி, காஞ்சிபுரம், ஸ்ரீபெரும்புதூர், தென் சென்னை ஆகிய தொகுதிகளில் தரவுகள் ஒத்துப்போகின்றன. ஆனால் ஆரணி, நீலகிரி, கரூர், கடலூர் ஆகிய தொகுதிகளில் தரவுகள் முற்றிலுமாக வேறுபடுகின்றன. உதாரணமாக, கடலூரில் இந்தியத் தேர்தல் ஆணைய தரவுப்படி எண்ணப்பட்ட பிறகு அதிகமான வாக்குகளின் எண்ணிக்கை 629. அதுவே, தமிழகத் தலைமைத் தேர்தல் ஆணைய அதிகாரி கொடுத்த தரவுப்படி அதிகமான வாக்குகளின் எண்ணிக்கை 30,096. ஒரே தொகுதியில் எப்படி இரண்டு விதமான தரவுகள் வரும் என்ற கேள்வி எழுகிறது. இந்த இரண்டு தரவுகளில் எது சரியானது!

கூட்டிக்கழிச்சுப்பாரு... கணக்கு சரியா வராது! - மோசடியா... குளறுபடியா?

இதுகுறித்து இந்தியத் தேர்தல் ஆணையத்திடம் கேட்டவுடன் பதிவான வாக்குகளின் எண்ணிக்கையைத் தேர்தல் ஆணைய இணையதளத்திலிருந்து நீக்கிவிட்டார்கள். ஆனால், முன் எச்சரிக்கை நடவடிக்கையாக நமது குழு அனைத்துத் தொகுதிகளிலும் பதிவான வாக்குகள் பற்றி இரண்டு தரப்பிலும் வெளியான தகவல்களையும் ஏற்கெனவே சேகரித்து வைத்திருந்தோம். அதுவே இந்த வேறுபாடு குறித்துத் தெரிந்துகொள்ள உதவியது.

இந்தக் குளறுபடிகள் பற்றி இந்தியத் தலைமைத் தேர்தல் ஆணையரான சுனில் அரோராவிடம் கேட்பதற்காக அழைத்தோம். அழைப்பை அவர் ஏற்கவில்லை. தொடர்ந்து இதுகுறித்து சந்தேகங்களை கேட்டு, அவருக்குக் குறுந்தகவல் அனுப்பினோம். அதற்கு பதில் வந்தது. அதில், ‘நாங்கள் இதுதொடர்பாகச் செய்திக் குறிப்பை வெளியிட்டுள்ளோம். அதில் விரிவாக விளக்கம் அளிக்கப்பட்டுள்ளது. மின்னணு வாக்குப்பதிவு இயந்திரங்களை முன்வைத்து எழுந்துள்ள சர்ச்சைகள் உண்மை அல்ல. சிலர் உள்நோக்கத்துடன் இதுபோன்ற சர்ச்சைகளைக் கிளப்பியுள்ளனர்” எனத் தகவல் அனுப்பினார்.

நாட்டின் தலையெழுத்தையே நிர்ணயிக்கும் பொதுத் தேர்தலில் இவ்வாறான தவறுகளை எந்த விதத்திலும் நியாயப்படுத்த முடியாது. இவை அலட்சியத்தால் ஏற்பட்ட பிழைகளா... அல்லது திட்டமிட்டு நடத்தப்பட்ட மோசடிகளா என்பதை விரிவான விசாரணை நடத்தி, உண்மைகளை வெளிக்கொண்டு வர வேண்டும்.

- க.சுபகுணம், ர.முகமது இல்யாஸ்
படம்: உ.பாண்டி

தோராயமானவைதான்!

துதொடர்பாகத் தேர்தல் ஆணையம் வெளியிட்டிருக்கும் செய்திக் குறிப்பில், ‘தங்களின் தரவுகள் துல்லியமானவை அல்ல; தோராயமானவைதான்’ என்று சொல்லியிருப்பதன் மூலம் கிட்டத்தட்ட தவறுகள் நேர்ந்தது உண்மைதான் ஒன்று ஒப்புக்கொண்டுள்ளது இந்தியத் தேர்தல் ஆணையம். அந்த அறிக்கையில், ‘ஒவ்வொரு பிராந்திய அதிகாரியும் தங்கள் பிராந்தியத்தில் பதிவான வாக்குகளின் எண்ணிக்கையைப் பதிவுசெய்வார்கள். அந்தத் தரவுகள் தோராயமானதாக இருக்கும். அவற்றையெல்லாம் சேர்த்து முதலில் விகிதாச்சார அடிப்படையில், தோராயமான தரவுகளை மக்கள் பார்வைக்காக இணையத்தில் பதிவேற்றி வைப்போம். தேர்தல் ஆணைய அதிகாரிகள் பிறகு அந்தத் தரவுகளைச் சரிபார்த்து பதிவான மற்றும் எண்ணப்பட்ட வாக்குகளின் எண்ணிகையைத் துல்லியமாகப் பதிவேற்றுவார்கள். 2019-ம் ஆண்டின் மக்களவைத் தேர்தல் முடிந்து 15 நாள்களுக்குள் இந்த வேலைகளை முடித்துவிட வேண்டுமென்று மார்ச் மாதம் 26-ம் தேதியே அறிவிக்கப்பட்டுவிட்டது. அந்தத் தரவுகள் விரைவில் கிடைத்துவிடும். அதன்பிறகு துல்லியமாகப் பதிவேற்றப்படும்’ என்று கூறப்பட்டுள்ளது.