Published:Updated:

`பர்தாவில் பிட்டு; ஜோசப் விஜய்; தேசத் துரோகி!’ - சிவகங்கையை வெல்வாரா ஹெச்.ராஜா?

மத்திய மாநில அரசுகள் மீதான எதிர்ப்பு, சிறுபான்மையினர் மீதான ஹெச்.ராஜாவின் விமர்சனங்கள் போன்றவை கார்த்தி சிதம்பரத்தின் பலமாக இருக்கிறது. இருப்பினும், ஹெச்.ராஜாவின் தாமரையை மலரவிடாமல் கை தடுக்குமா?

`பர்தாவில் பிட்டு; ஜோசப் விஜய்; தேசத் துரோகி!’ - சிவகங்கையை வெல்வாரா ஹெச்.ராஜா?
`பர்தாவில் பிட்டு; ஜோசப் விஜய்; தேசத் துரோகி!’ - சிவகங்கையை வெல்வாரா ஹெச்.ராஜா?

நட்சத்திர வேட்பாளர் : ஹெச்.ராஜா (சிவகங்கை) 

ஹரிஹர ராஜ சர்மா!

தஞ்சாவூரை அடுத்த மெலட்டூர் கிராமத்தில் ஹரிஹரன் சர்மா என்பவருக்கு மகனாக 1957-ம் ஆண்டு மே 1-ம் தேதி பிறந்தார். வணிகவியலில் இளங்கலை பட்டமும் சட்டப்படிப்பையும் முடித்தவர். வழக்கறிஞராகவும் ஆடிட்டராகவும் இருப்பது ஸ்பெஷல். மனைவி லலிதா. இவர்களுக்கு இரண்டு பெண் குழந்தைகள். தமிழ், இந்தி, ஆங்கிலம் என மூன்று மொழிகளிலும் சரளமாகப் பேசக்கூடியவர். ஆர்.எஸ்.எஸ் அமைப்பின் மீதுள்ள ஈடுபட்டால், அதில் தீவிரமாக இயங்கியவர். பின்னர் பா.ஜ.க-வில் தன்னை ஐக்கியப்படுத்திக் கொண்டார். தமிழகத்தில் பா.ஜ.க-வை வளர்த்தெடுத்ததில் இவருக்குப் பெரும் பங்கு உண்டு. 

அரசியல் குரு:

சிவகங்கை மாவட்டத்தில் தனக்கென ஒரு வட்டத்தை வைத்துக்கொண்டு இயங்கி வருகிறார். இவரது அரசியல் குரு இல.கணேசன். ஒரு கட்டத்தில் அவரை எதிர்க்கவும் தொடங்கினார். மாவட்டத்தில் இருந்த முக்கியமான நிர்வாகிகள் எல்லாம் ஒரு காலகட்டத்தில் ராஜாவால் ஓரங்கங்கட்டப்பட்டனர். அவர்கள் அனைவரும் மாற்றுக்கட்சிகளில் செட்டில் ஆகிவிட்டதால், இப்போது தேர்தல் வேலை பார்ப்பதற்குக்கூட சீனியர்கள் இல்லாமல் அவதிப்படும் நிலைக்குத் தள்ளப்பட்டிருக்கிறார். சிவகங்கையில் பொன்னார் அணியும் ராஜா அணியும் அவ்வப்போது மோதிக்கொள்வது வழக்கம். பெயருக்குத் தேசியச் செயலாளராக இருந்தாலும் காரைக்குடியில் ஒரு கூட்டத்தைக்கூட ஹெச்.ராஜா நடத்த முடியாத அளவுக்குப் பொன்னார் தரப்பினர் அரசியல் செய்து வருகின்றனர். 

காரைக்குடி எம்.எல்.ஏ:

இவருக்குத் தேர்தல் களம் புதிதல்ல. சட்டமன்றம், நாடாளுமன்றம் என 5 முறை போட்டியிட்டார். இதில் ஒருமுறை மட்டுமே வெற்றிக்கனியைப் பறித்துள்ளார். 1999-ம் ஆண்டு நடைபெற்ற நாடாளுமன்றத் தேர்தல் தி.மு.க - பா.ஜ.க கூட்டணியில் சிவகங்கைத் தொகுதியில் போட்டியிட்டுத் தோற்றார். அடுத்து, 2001-ம் ஆண்டு நடந்த சட்டமன்றத் தேர்தலில் தி.மு.க - பா.ஜ.க கூட்டணியில் போட்டியிட்டார். இந்த முறை காரைக்குடி சட்டமன்றத் தொகுதியிலிருந்து தேர்ந்தெடுக்கப்பட்டார். 2006 சட்டமன்றத் தேர்தலில் ஆலந்தூர் தொகுதியில் தோல்வி. 2014-ல் மோடி அலை வீசியது. பா.ஜ.க, தே.மு.தி.க அணியில் சிவகங்கை தொகுதியில் களம் கண்டார். 1,33,763 வாக்குகள் கிடைத்தாலும் மூன்றாவது இடத்தை மட்டுமே பெற முடிந்தது. 2016 சட்டமன்றத் தேர்தலில் தி.நகரில் போட்டியிட்டுத் தோற்றார். இப்போது மீண்டும் சிவகங்கைத் தொகுதியைத் தேர்வு செய்திருக்கிறார். 

டாப் 5 சுவாரஸ்யங்கள்: 

1. மனதில் பட்டதை எந்தவித தயக்கமும் இல்லாமல் வெளிப்படுத்துவது.

2. விவசாயப் பணிகளில் ஆர்வம் காட்டுவது.

3. ஆதரவாளர்களுக்கு ஏதாவது உதவி தேவைப்பட்டால், அதை எப்படியாவது செய்து கொடுப்பது.

4. எந்தப் பிரச்னையாக இருந்தாலும், அதை முழுமையாகக் காது கொடுத்துக் கேட்பது.

5. `ராஜா கெட்டவர் அல்ல, அவர் ஒரு குழந்தையைப் போன்றவர்' என ஆதரவாளர்கள் உருகுவது.

டாப் 10 சர்ச்சைகள்: 

1. பெரியார், சிறுபான்மை மக்களுக்கு எதிராக அவதூறாகப் பேசியதால் 2014 அக்டோபரில் வழக்குப் பதிவு (அக்டோபர் 2014).

2. இஸ்லாமிய மாணவிகள் பர்தா அணிவதால் தேர்வுகளில் காப்பியடிக்க முடிகிறது. எனவே, பர்தாவைத் தடை செய்ய வேண்டும் என சர்ச்சைப் பேச்சு (ஜூன் 2015). 

3. ஜே.என்.யு. போராட்டத்தில் ஈடுபட்ட கம்யூனிஸ்ட் கட்சியின் தேசியச் செயலாளர் டி.ராஜாவின் மகளைச் சுட்டுக் கொல்ல வேண்டும் என்ற சர்ச்சைப் பேச்சு (அக்டோபர் 2017).

4. பிரதமர் மோடி குறித்துக் கேள்வி கேட்ட பத்திரிகையாளரை தேசத் துரோகி என விமர்சனம் செய்தது (மார்ச் 2017).

5. 'மெர்சல் படம்' வெளியானபோது நடிகர் விஜய்யை, `ஜோசப்' என்ற அடைமொழியில் அழைத்தது (அக்டோபர் 2017).

6. சாதி வெறியர் ஈ.வெ.ரா சிலை உடைக்கப்படும் எனச் சமூக வலைதளத்தில் பதிவிட்டது (மார்ச் 2018).

7. விநாயகர் சதுர்த்தி ஊர்வலத்தில் உயர் நீதிமன்றத்தையும் காவல்துறை அதிகாரிகளையும் தரக்குறைவாக விமர்சித்தது (செப்டம்பர் 2018).

8. தன்னுடைய கருத்து சர்ச்சையை ஏற்படுத்தினால், அதை நான் செய்யவில்லை, என்னுடைய குரல் எடிட் செய்யப்பட்டுவிட்டது எனக் கூறுவது. ஃபேஸ்புக்கில் அட்மின் போஸ்ட் செய்துவிட்டார் எனக் கூறுவது.

9. உயர் நீதிமன்றத்தை விமர்சித்துவிட்டு, பகிரங்கமாக மன்னிப்பு கேட்டது.

10. எம்.எல்.ஏ-வாக இருந்த காலகட்டத்தில் அரசு சார்பில் தனக்கு வழங்கிய உதவியாளர் பதவிக்கான இடத்தை மனைவிக்குக் கொடுத்துவிட்டு, அந்த சம்பளத்தை எடுத்துக்கொண்டது.

சக போட்டியாளர்களின் ப்ளஸ், மைனஸ்: 

தி.மு.க கூட்டணியில் போட்டியிடுவது காங்கிரஸ் வேட்பாளர் கார்த்தி சிதம்பரத்துக்குப் ப்ளஸ். சொந்தக்கட்சியின் செல்வாக்கைவிட கூட்டணிக்கட்சிகளான தி.மு.க கம்யூனிஸ்ட்கள், விடுதலைச் சிறுத்தைகள், முஸ்லிம் லீக் ஆகிய கட்சிகளின் வாக்குகளை நம்புவது பலம். அதேநேரம், அமலாக்கத்துறை வழக்குகள், ஐ.என்.எக்ஸ் வழக்குகள் என நீதிமன்றம் நெருக்கிக்கொண்டிருப்பது கார்த்தியின் மிகப் பெரிய மைனஸ். 

அ.தி.மு.க கூட்டணியில் பா.ஜ.க சார்பில் போட்டியிடுவது ஹெச்.ராஜாவுக்குப் ப்ளஸ்ஸாக இருந்தாலும், அ.தி.மு.க இந்த முறை போட்டியிடாததில் உள்ளூர் அ.தி.மு.க-வினர் சோர்வடைந்திருப்பது ராஜாவுக்கான மைனஸ். உள்கட்சி கோஷ்டி பூசல்களைத் தாண்டி, நம்பிக்கையாகத் தேர்தல் வேலை பார்த்து வருகிறார். 

அ.தி.மு.க வாக்குகள், ஹெச்.ராஜாவின் சர்ச்சைக்குரிய நடவடிக்கைகளால் அதிருப்தியில் இருக்கும் மக்களின் வாக்குகள் ஆகியவற்றை அ.ம.மு.க வேட்பாளர் தேர்போகி பாண்டி பிரிப்பதற்கான வாய்ப்புகள் அதிகம் உள்ளன. 

கார்த்தி சிதம்பரமும் ராஜாவும் மைனாரிட்டி சமூகத்தைச் சேர்ந்தவர்கள் என்பதால், சொந்த சமூகமான முக்குலத்தோர் வாக்குகளை நம்பிக் களமிறங்கியிருக்கிறார் தேர்போகி பாண்டி. இவர் பிரிக்கும் வாக்குகள் இரண்டு பிரதானக் கட்சிகளின் வெற்றியையும் பாதிக்கும் என்பதே களநிலவரம். மத்திய மாநில அரசுகள் மீதான எதிர்ப்பு, சிறுபான்மையினர் மீதான ஹெச்.ராஜாவின் விமர்சனங்கள் போன்றவை கார்த்தி சிதம்பரத்தின் பலமாக இருக்கிறது. இருப்பினும், தாமரையை மலரவிடாமல் கை தடுக்குமா என்பதற்கான விடை, வாக்கு எண்ணிக்கை நாளில் தெரிந்துவிடும்.