“முதல்வர் பதவிக்கான தகுதி அவருக்கில்லை...” - சர்ச்சை வளையத்தில் இயற்கை மருத்துவக் கல்லூரி!

பரபரப்பான சென்னை அண்ணாநகர் சிக்னலில், ஓர் ஓரமாக அமைந்திருக்கிறது அரசு யோகா மற்றும் இயற்கை மருத்துவக் கல்லூரி. இங்கே ஒரு கல்லூரி இருக்கிறதா என்று எண்ணும் அளவுக்கு வெளியே சலனமில்லாமல் இயங்கும் அந்தக் கல்லூரியில், முதல்வர் பதவியைக் குறிவைத்து வெடித்திருக்கின்றன பல சர்ச்சைகள். இது தொடர்பாக நமது ஜூ.வி அலுவலகத்துக்குக் கத்தையான ஆவணங்களுடன் வந்தது ஒரு புகார்க் கடிதம்.

“அரசு யோகா மற்றும் இயற்கை மருத்துவக் கல்லூரியின் முதல்வர் மணவாளன் கோடிக்கணக்கில் முறைகேடு செய்திருக்கிறார். இந்திய மருத்துவம் மற்றும் ஹோமியோபதி துறை நடத்திய தணிக்கையில், அவர்மீதான குற்றச்சாட்டு நிரூபணம் ஆகியிருக்கிறது. கடந்த அக்டோபர் 11, 12 ஆகிய தேதிகளில் ஆடிட்டர் ஜெனரல் அதிகாரிகள் நடத்திய தணிக்கையிலும் குற்றச்சாட்டு உறுதியாகியிருக்கிறது. ஆனால், மேல் நடவடிக்கைதான் ஏதுமில்லை” என்று குமுறியிருந்தது அந்தக் கடிதம். இது குறித்து விசாரணையில் இறங்கினோம்.

நம்மிடையே பேசிய இந்திய மருத்துவம் மற்றும் ஹோமியோபதி துறையின் சீனியர் அதிகாரிகள் சிலர், “அக்டோபர் 1997-ல், மருத்துவ அதிகாரியாக, தொகுப்பூதியத்தில் பணியில் சேர்ந்தவர் மணவாளன். டிப்ளோமா மட்டும்தான் படித்திருக்கிறார். யு.ஜி.சி விதிப்படி ஒரு கல்லூரியின் முதல்வர், பேராசிரியர், விரிவுரையாளர், ரீடர் பதவிகளுக்குத் தேர்வாகக் கூடியவர்கள், முதுநிலை பட்டப்படிப்பை முடித்திருக்க வேண்டும். ஆனால், விதிகளுக்குப் புறம்பாக, 12 பேருக்கு ‘உதவி மருத்துவ அதிகாரிகள்’ அந்தஸ்தை இயற்கை மருத்துவக் கல்லூரி நிர்வாகம் வழங்கியிருக்கிறது. பேராசிரியர் பதவிக்கு நிகரானதுதான் ‘உதவி மருத்துவ அதிகாரிகள்’ பதவி. இப்படி முறைகேடாகப் பதவி பெற்றவர்களில் மணவாளனும் அடக்கம். டிசம்பர் 2008-ல், கல்லூரியின் முதல்வர் பொறுப்புக்குத் தற்காலிகமாக நியமிக்கப்பட்ட மணவாளன், இன்றுவரை அந்தப் பதவியில் தொடர்கிறார். ‘வெறும் டிப்ளோமா படித்தவர், முதல்வர் பதவியில் இடைக்காலமாகக்கூட தொடர அனுமதிக்கப்பட்டது ஏன்?’ என்பதுதான் முதல் கேள்வி.

கடந்த அக்டோபர் மாதம் தணிக்கைத்துறை நடத்திய ஆய்வில், 2008 முதல் 2022 வரை, முதல்வர் பதவிக்கான சம்பளத்தையே மணவாளன் பெற்றிருந்தது தெரியவந்திருக்கிறது. விதிப்படி, அவர் தன்னுடைய ‘உதவி மருத்துவ அதிகாரி’ சம்பளத்தைத்தான் பெற்றிருக்க வேண்டும். தற்காலிக முதல்வராக பணியிலிருப்பதால், முதல்வருக்கான சம்பளத்தில் 20 சதவிகிதம் பெறலாம். ஆனால், மணவாளன் முழுச் சம்பளத்தையும் பெற்று, அரசுக்கு நிதியிழப்பை ஏற்படுத்தியிருக்கிறார். இப்படி 14 வருடங்களில் மொத்தமாக 1.03 கோடி ரூபாய் கூடுதல் சம்பளம் பெற்றிருக்கிறார் மணவாளன். பிஹெச்.டி., எம்.டி படித்த பலபேர் முதல்வர் பதவிக்கான தகுதியிருந்தும் மணவாளனின் ஆதிக்கத்தால் ஒடுங்கிப்போயிருக்கிறார்கள். அரசுக்குப் பலமுறை புகார்கள் அனுப்பியும், ஒருவரும் கண்டுகொள்வதில்லை” என்றவர்கள், தணிக்கைத்துறை சார்பில் அக்டோபர் 19-ம் தேதியிட்டு, மருத்துவத்துறை முதன்மைச் செயலாளர் செந்தில் குமார் ஐ.ஏ.எஸ்-ஸுக்கு அனுப்பப்பட்ட கடிதத்தை நம்மிடம் அளித்தார்கள். ‘சட்டத்துக்குப் புறம்பாக மணவாளன் கூடுதல் சம்பளம் பெற்றிருக்கிறார். அவர் முதல்வர் பதவிக்குத் தகுதியானவர் அல்ல’ என தெளிவாகக் குறிப்பிட்டிருந்தது தணிக்கைத்துறை அறிக்கை.