Published:Updated:

டெல்லி: `கொரோனா வைரஸின் இரண்டாம் அலை; பாதிப்பில் புதிய உச்சம்!’ - அரவிந்த் கெஜ்ரிவால்

அரவிந்த் கெஜ்ரிவால்
அரவிந்த் கெஜ்ரிவால்

`கொரோனா வைரஸின் இரண்டாம் அலையின் தாக்கம் தலைநகர் டெல்லியில் உச்சத்தை எட்டியிருக்கிறது. இது வரும் நாள்களில் குறையக்கூடும் என்று நிபுணர்கள் கூறுகிறார்கள்’ என்று அரவிந்த் கெஜ்ரிவால் தெரிவித்திருக்கிறார்.

டாக்டர் ராஜேந்திர பிரசாத் மத்திய வேளாண் பல்கலைக்கழகத்தின் நிகழ்ச்சியில் கலந்துகொண்டு பேசிய டெல்லி மாநில முதல்வர் கெஜ்ரிவால், ``கொரோனா வைரஸ் தொற்றின் இரண்டாம் அலையின் தாக்கம் தலைநகர் டெல்லியின் நிலையை மாற்றிக்கொண்டிருக்கிறது. திடீரென இந்த மாதத் தொடக்கத்தில் புதிய பாதிப்புகளின் எண்ணிக்கை 4,000-ஐ கடந்திருக்கிறது. இது இரண்டாம் அலையின் தாக்கமாக இருக்கக்கூடும் என்று நிபுணர்கள் கருதுகின்றனர்" என்றார்.

கோவிட்-19 கொரோனா வைரஸ்
கோவிட்-19 கொரோனா வைரஸ்

இந்தியாவில் முதன்முறையாக கொரோனா தொற்றின் இரண்டாம் அலை ஏற்பட்டிருக்கும் மாநிலமாக டெல்லி அறிவிக்கப்ப்ட்டிருக்கிறது. இந்த நோயின் அதிக பாதிப்பாக மகாராஷ்டிராவில் மொத்தம் 12,63,799 நபர்கள் பாதிக்கப்பட்டிருக்கிறார்கள். டெல்லியில் 2,56,789 நபர்கள் பாதிக்கப்பட்டு, இந்திய அளவில் கொரோனா பாதிப்பில் ஐந்தாவது இடத்தில் டெல்லி இருக்கிறது.

``கடந்த ஆகஸ்ட் மாதத் தொடக்கத்தில் தினசரி பாதிப்பு 550 என்ற எண்ணிக்கையில்தான் இருந்தது. ஜூலை 1-ம் தேதி முதல் ஆகஸ்ட் 17-ம் தேதி வரை டெல்லியில் கொரோனா பாதிப்பு கட்டுக்குள் இருந்தது. சராசரியாக 1,100 முதல் 1,200 வரை புதிய பாதிப்புகள் பதிவாகின. இந்நிலையில், ஆகஸ்ட் 17-ம் தேதி வாக்கில் பாதிப்புகள் திடீரென 1,100 முதல் 1,500 வரை அதிகரித்தன. இதனால் நாங்கள் உடனடியாக நாளொன்றுக்குச் செய்யப்படும் சராசரி கொரோனா பரிசோதனையை 20,000 -லிருந்து 60,000-ஆக உயர்த்தினோம்” என்றார் முதல்வர்.

கொரோனாவைக் கட்டுப்படுத்த சிறந்த வழி, தொடர்ந்து அதிகப்படியான பரிசோதனைகள் மூலம் பாதிக்கப்பட்டவர்களைக் கண்டறிந்து தனிமைப்படுத்துவதே ஆகும்.
அரவிந்த் கெஜ்ரிவால்

தொடர்ந்து, ``அதிகரித்துவந்த பாதிப்பு செப்டம்பர் 9-ம் தேதி முதன்முறையாக 4,000-ஐ தாண்டியது. மொத்த பாதிப்பு இரண்டு லட்சத்தைத் தாண்டியது. அன்று மட்டும் பதிவான இறப்புகளின் எண்ணிக்கை 20. மொத்த இறப்புகளின் எண்ணிக்கை 4,638. செப்டம்பர் 16-ம் தேதி பதிவான பாதிப்பின் எண்ணிக்கை 4,473. இதுதான் டெல்லியில் பதிவான அதிகப்படியான பாதிப்பு எண்ணிக்கை. இதற்குப் பின்னர் பாதிப்பு எண்ணிக்கை படிப்படியாகக் குறைத்துவருகிறது. கடந்த 24 மணி நேரத்தில் டெல்லியில் பதிவான கொரோனா பாதிப்பின் எண்ணிக்கை 3,700” என்றார். மேலும், வரும் நாள்களில் இந்த எண்ணிக்கை தொடர்ந்து குறையும் என நம்புவதாக அவர் தெரிவித்தார்.

அடுத்த கட்டுரைக்கு