Published:Updated:

கொரோனா உச்சம்... ஊரடங்கு அச்சம்... கட்டுப்பாடுகள் தீவிரம்..!

ராஜ் பிரகாஷ்
பிரீமியம் ஸ்டோரி
ராஜ் பிரகாஷ்

நிறுவனங்களும் பணியாளர்களும் என்ன செய்ய வேண்டும்..? -P U B L I C H E A L T H

கொரோனா உச்சம்... ஊரடங்கு அச்சம்... கட்டுப்பாடுகள் தீவிரம்..!

நிறுவனங்களும் பணியாளர்களும் என்ன செய்ய வேண்டும்..? -P U B L I C H E A L T H

Published:Updated:
ராஜ் பிரகாஷ்
பிரீமியம் ஸ்டோரி
ராஜ் பிரகாஷ்

கடந்த ஆண்டைப் போலவே மீண்டும் கொரோனா பரவல் அதிகரித்து வருகிறது. தினமும் ஒரு லட்சத்துக்கும் மேலானவர்கள் இந்த நோய்த் தொற்றால் பாதிக்கப்பட்டு வருகிறார்கள். அதனால் மீண்டும் ஊரடங்கு என்னும் அச்சமும் பொது மக்களிடையே எழுந்திருக்கிறது. கடந்த ஆண்டைப் போல நிச்சயமற்ற சூழல் இல்லை என்றாலும், அச்சம் அப்படியே இருக்கிறது. இந்தச் சூழலில் பரவல் வேகம், தடுப்பூசி, தொழில் மற்றும் பொருளாதாரம் எனப் பல விஷயங்கள் குறித்து ஜிஃபோ ஆர்.என்.டி சொல்யூஷன்ஸ் நிறுவனத்தின் தலைமைச் செயல் அதிகாரி ராஜ் பிரகாஷுடன் பேசினோம்.

ராஜ் பிரகாஷ்
ராஜ் பிரகாஷ்

கொரோனா இரண்டாம் அலை, மூன்றாம் அலை என்று சொல்வதைக் கேட்கிறோம். கொரோனா பரவல் எப்படிக் குறைந்து, மீண்டும் உயர்கிறது? கொஞ்சம் புரியும்படி விளக்குங்களேன்.

“அதற்கு முன்பாக முக்கியமான ஒரு விஷயத்தை விளக்குகிறேன். முதலாவது 10,000 நபர்களுக்கு பாதிப்பு ஏற்பட்டால், இதில் 10% நபர்களுக்கு மட்டுமே அறிகுறிகள் தென்படு கின்றன. அதாவது 1,000 நபர்களுக்கு மட்டுமே பாதிப்பு ஏற்படுகிறது. சம்பந்தப்பட்ட இடத்தைப் பொறுத்து 10 முதல் 40 நபர்கள் வரை மரணம் அடைகிறார்கள். இவர்களைக் காப்பாற்றத்தான் ஒட்டுமொத்த மருத்துவ உலகமும் பணியாற்றி வருகிறது. ஒட்டுமொத்தமாகப் பாதிப்பு என்ன என்பதைப் புரிந்து கொண்டால்தான் கொரோனா குறித்த அச்சம் விலகும்.

மேலும், கடந்த ஆண்டு இந்த நோய் குறித்து பல விஷயங்கள் நம்மிடம் இல்லை. எப்படிப் பரவும், நோய் வந்தால் என்ன செய்வது, மருத்துவமனையை எப்படி அணுகுவது, தடுப்பூசி கிடைக்குமா எனப் பல விஷயங்கள் தெளிவில் லாமல் இருந்தன. ஆனால், தற்போது யாருக்கு வரும் என்பதை தவிர, மற்ற அனைத்துக் கேள்விகளுக்கும் விடை இருக்கிறது.

இரண்டாம் அலை வீசுகிறதா என்று கேட்டால், நிச்சயம் ஆம் என்றுதான் சொல்ல வேண்டும். கடந்த ஆண்டு வெட்டுக்கிளிகள் விவசாய நிலத்தை அழித்தன என நாம் படித்தோம். அப்படியானால் ஒட்டுமொத்தமாக அந்த இடத்தை அழித்திருக்குமா என்றால், அழித்திருக்காது. கூட்டமாக வரும், வந்த வேகத்தில் அப்படியே கிடைத்ததை அழித்துச் சென்று கொண்டிருக்கும். மீண்டும் சில காலம் கழித்து வரும். அதுபோலதான் இதுவும்.

எம்.எல்.எம் தொழில் ஒரு கட்டத்துக்கு மேல் வளர முடியாது. அதேபோல, கொரோனாவின் பரவல் வேகம் சுமார் 2 என்னும் அளவில் இருக்கிறது. (ஒரு நபர் மூலம் இருவருக்குப் பரவுகிறது) ஒரு கட்டத்துக்கு மேலும் பரவலுக்கு வாய்ப்பு இருக்காது. அதன் பிறகு அந்த வைரஸ் மாறுபட்டு புதிதாக வரும். இப்படித்தான் அடுத்த அலை உருவாகிறது.”

தடுப்பூசிகள் வந்திருக்கின்றன. இதனால் பரவல் குறையாதா?

“தடுப்பூசிகள் சந்தைக்கு வந்துவிட்டது என்பது சாதகமான விஷயம்தான். ஆனால், தடுப்பூசிகள் மட்டுமே 100% பாதுகாப்பைக் கொடுக்கவில்லை என்பதுதான் ஆய்வு முடிவுகள் தெரிவிக்கின்றன. இப்போதுதான் பொதுமக்கள் தடுப்பூசி எடுத்துக்கொள்ள தொடங்கியிருக் கிறார்கள். மேலும் அதிக நபர்கள் எடுத்துக்கொள்ளும்போது அந்த சங்கிலி விரைவில் அறுபட வாய்ப்பு இருக்கிறது. ஆனால், பாதிப்பு அடைபவர்களின் எண்ணிக்கை உயர்ந்துதான் சரியும்.

தற்போது 45 வயதுக்கு மேற்பட்ட வர்களுக்கு தடுப்பூசி வழங்கப்பட்டு வருகிறது. இந்த வயது வரம்பைக் குறைக்க வேண்டும் எனப் பலரும் கருதலாம். அது தேவையில்லாதது. இந்தியாவில் நடந்த மரணங்களில் 96% மரணங்கள் 45 வயதுக்கு மேலானவைதான். அதனால் 45 வயதுக்கு மேற்பட்டவர்களுக்கு முன்னுரிமை கொடுக்கும்பட்சத்தில் பெருமளவு சேதத்தை தடுக்க முடியும்.”

இதுபோல இரண்டாம் அலை, மூன்றாம் அலை என வீசிக்கொண்டிருந்தால் மக்கள் எப்படி நிம்மதியாக இருக்க முடியும். தொழில் அல்லது வேலையில் கவனம் செலுத்த முடியும்?

“பரவலின் தற்போதைய வேகத்தைப் பார்க்கும்போது கடந்த ஆண்டு ஜூன் மாத நிலையில் இருக்கிறோம். அப்படி யானால் இன்னும் 12 வாரங்களில் நாம் உச்சத்தை எட்டி எண்ணிக்கை மீண்டும் சரிவடையத் தொடங்கும். 2021-ம் ஆண்டுக்குள் கொரோனாவை மானுடம் வென்றுவிடும் என்றே கருதுகிறோம். அதன்பிறகு இதன் வீரியம் குறைந்து, சாதாரண வைரஸாக மாறும் வாய்ப்பு இருக்கிறது. அதற்குள் மருந்துகள், தடுப்பூசிகள் எனப் பல மாற்றங்கள் அனைவரிடத்திலும் சென்று சேர்ந்திருக்கும்.

அமெரிக்காவில் ஒரு மருத்துவ நிறுவனம் கொரோனாவை குணப்படுத்த முடியும் என ஆய்வுகளை வெளியிட்டிருக்கிறது. இவையும் சாதகமான அம்சங் களாகவே மருத்துவ உலகம் பார்க்கிறது. இதில் சில மருத்துவ நிறுவனங்களுடன் நாங்களும் இணைந்து ஆராய்ச்சி பணியில் இருக்கிறோம்.

தடுப்பூசி செலுத்தும் வேகம் மற்றும் தடுப்பூசியின் செயல் பாடுகளைப் பொறுத்து இதற்கு முன்பாககூட இதன் உச்சம் குறையலாம். இஸ்ரேல் நாட்டில் தடுப்பூசிகளைச் சரியாகப் பயன் படுத்தி பெருமளவுக்குப் பரவலைக் கட்டுப்படுத்தி இருக்கிறார்கள்.

இந்த ஆண்டுக்குள் பாதிப்பு குறைந்தாலும் இதன் தாக்கம் அடுத்த ஐந்தாண்டுகளுக்காவது இருக்கும். செல்போன், வாட்ச் போல, முகக் கவசமும் வாழ்வின் ஓர் அங்கமாகும். சாதாரண காய்ச்சல் வந்தாலே பதற்றம் அதிகரிக்கும்.”

கொரோனாவுக்குப் பிறகு பொது மருத்துவம் குறித்த விழிப்புணர்வு அதிகரித்திருக்கிறது. ஏன் டெங்குக்குத் தடுப்பூசி கண்டுபிடிக்கக் கூடாது என்னும் குரல்களும் எழுகின்றன? இதை எப்படி பார்க்கிறீர்கள்?

“டெங்குக்கு தடுப்பூசி கண்டுபிடிக்கும் பணிகளும் நடந்துவருகின்றன. ஏற்கெனவே சில தடுப்பூசிகளும் இருக்கின்றன. ஆனால், அரசு இதைக் கட்டாயத் தடுப்பூசி பட்டியலில் சேர்க்குமா என்பது தெரியவில்லை. தடுப்பூசியை அனைவருக்கும் கொண்டு வருவதற்கு முன்பு எவ்வளவு நபர்கள் பாதிக்கப்பட்டு இருக்கிறார்கள், எவ்வளவு இழப்பு என்பதைக் கண்டறிந்த பிறகே, அனுமதி வழங்குவார்கள். தவிர, நோயைக் குணப்படுத்த முடியும் என்னும்பட்சத்தில் அனைவருக்கும் தடுப்பூசி வழங்குவது என்பது தேவை யற்றது.

உதாரணத்துக்கு, இன்னும் சில ஆண்டுகளுக்குப் பிறகு கொரோனாவுக்கு இந்த மருந்து போதும் என்ற நிலை உருவானால், மக்கள் தடுப்பூசி போட்டுக் கொள்வார்களா? வந்தால் பார்த்துக்கொள்ளலாம் என நினைப்பார்கள். தடுத்தே ஆக வேண்டும் என்பது போன்ற நோய்களுக்கு மட்டுமே தடுப்பூசி அவசியம்.”

விரைவில் ஊரடங்கு என்னும் செய்திகள் வெளியாகின்றனவே..!

“நாங்கள் என்ன செய்தோம் என்பதைச் சொல்கிறேன். கடந்த ஆண்டு அரசு அறிவிக்கும் முன்பாக நாங்களாக முன்வந்து அலுவலகத்தை மூடினோம். வீட்டிலிருந்து வேலை செய்வதை ஊக்குவித்தோம்.

தற்போது கடந்த ஆண்டு கிடைத்த அனுபவத்தை வைத்து சில முடிவுகளை நாங்கள் எடுத்தோம். சென்னையில் எப்போது ஒரு நாளில் 700 நபர் களுக்கு பாதிப்பு ஏற்பட்டதோ, அப்போது பணியாளர்கள் ஒவ்வொருவரும் எங்கு செல்ல வேண்டும் என்பதை முடிவெடுத்துக் கிளம்புங்கள் என அறிவித்தோம். அதேபோல, ஒரு நாள் பாதிப்பு 1,300 நபர்களுக்கு மேல் சென்னையில் ஏற்பட்டபோது, தேவைப்பட்டால் மட்டுமே அலுவலகம் வர வேண்டும் என்பதைத் தெரிவித்தோம்.

ஆனால், இந்த முறை அரசாங்கம் மூட வேண்டும் எனச் சொன்னால் மட்டுமே அலுவலகத்தை மூட இருக்கிறோம். இல்லை எனில் வழக்கம்போல அலுவலகம் செயல்படும் என அறிவித்திருக்கிறோம். பொதுப் போக்குவரத்து இல்லாமல் சொந்த வாகனத்தில், முகக் கவசம், சானிடைசர் உள்ளிட்ட பாதுகாப்பு களுடன் அலுவலகத்துக்கு வருபவர்களுக்கு எந்தத் தடையும் நாங்கள் விதிக்கவில்லை. சிலருக்கு அலுவலகத்தில் இருந்து வேலை செய்வதுதான் வசதியாக இருக்கிறது. அதனால் அலுவலகம் வருவதைத் தடை செய்யவில்லை.

‘பாதிப்பு உயர்ந்து மீண்டும் சரிந்து 1,300-க்கு வரும். அப்போது ஒவ்வொரும் மீண்டும் அலுவலகம் வருவதற்கு தயாராகுங்கள்’ என அறிவுறுத்தி இருக்கிறோம். இதெல்லாம் கடந்த ஆண்டு கிடைத்த அனுபவத்தில் நாங்கள் எடுத்த முடிவு. ஒருவேளை, சாதகமாகவோ, பாதகமாக வேறு முடிவுகள் வந்தால் பிறகு நாங்கள் எடுத்துக்கொண்ட முடிவை மாற்றலாம். அதுவரை இதுதான் சூழல் என்பதைப் பணியாளர்களுக்கு விளக்கி இருக்கிறோம். எங்களின் கணிப்பு படி, ஜூலை முதல் வாரத்தில் மீண்டும் பரவல் குறையத்தொடங்கும் எனக் கணிக்கிறோம்.”

முகக்கவசம் பெரிதும் பாதுகாப்பானதா?

“இந்த வைரஸ் மூக்கு வழியாக நுரையீரலைத் தாக்குகிறது. குறைந்தபட்சம் முகக்கவசம் அணியும்போது வைரஸ் உடலுக்குள் செல்வது தடுக்கப்படுகிறது. மருத்துவ மாஸ்க்குகள் கிருமிகள் உள்ளே செல்வதைத் தடுப்பதில் பெரும் பங்கு வகிக்கின்றன. ஆனால், சாதாரண மாஸ்க்குகள்கூட பாதுகாப்பானவைதான்.காற்றில் அலைபாயுகிற வைரஸை முகக் கவசம் தடுக்கிறது. அதனால் தடுப்பூசி எடுத்துகொண்டால்கூட முகக்கவசம் அணிவதை மறக்காதீர்கள்.’’

நிறுவனங்கள் / அரசுகள் என்ன செய்ய வேண்டும்?

“பதற்றம் எப்போதுமே நிச்சயமற்ற சூழலில்தான் வருகிறது. அதனால் நிச்சயமற்ற சூழலைக் களைவதற்கான நடவடிக்கையை நிறுவனங்கள் மற்றும் அரசுகள் எடுக்க வேண்டும். விதிமுறைகள் என்னவாக வேண்டுமானலும் இருக்கலாம். ஆனால், அவை அறிவியல்பூர்வமானதாக இருக்க வேண்டும். தவிர முன்கூட்டியே, அது குறித்து முறையாக அறிவிக்கப்பட வேண்டும். இதனால் அனைவரும் தயாராக இருப்பார்கள். அப்போது பதற்றம் குறையும். தடுப்பூசி எடுத்துகொள்வது அவசியமானது. முகக்கவசம் அணிவதுதான் அதைவிட முக்கியமானது.”

பிட்ஸ்

ன்லைன் கல்வி நிறுவனமான பைஜு, போட்டித் தேர்வுகளுக்குப் பயிற்சி அளிக்கும் ஆகாஷ் எஜுகேஷனல் சர்வீசஸ் நிறுவனத்தை ஒரு பில்லியன் டாலர் தந்து வாங்கியதுடன், இந்த டீலை ஜூம் ஆன்லைன் மூலமே செய்து முடித்து இருக்கிறது!