Published:Updated:

நீலகிரியில் கொரோனா உறுதி செய்யப்பட்ட முதல் பெண்!- லாரி டிரைவரின் 24 வயது சகோதரிக்கும் தொற்று

corona
corona

கோயம்பேடு சென்று திரும்பிய ஊட்டி லாரி டிரைவரின் சகோதரிக்குக் கொரோனா தொற்று உறுதி செய்யப்பட்டிருக்கிறது. நீலகிரி மாவட்டத்தில் பெண் ஒருவருக்குப் பாதிப்பு ஏற்படுவது இதுவே முதல் முறை.

நீலகிரி மாவட்டத்தில் டெல்லி சென்று திரும்பிய 8 பேரில், 7 பேருக்கு மார்ச் மாதத்தில் கொரோனா தொற்று உறுதி செய்யப்பட்டது. பின், அவர்களது குடும்பத்தைச் சேர்ந்த இருவர் என மொத்தம் 9 பேருக்குக் கொரோனா வைரஸ் தொற்று உறுதி செய்யப்பட்டது. அவர்கள், கோவையில் உள்ள இ.எஸ்.ஐ மருத்துவமனையில் சிகிச்சை பெற்று குணமடைந்து வீடு திரும்பினர்.

ooty
ooty

இடைப்பட்ட காலத்தில் கொரோனா பாதிப்பு இல்லாத மாவட்டமாக நீலகிரி இருந்தது. இந்நிலையில், நீலகிரி மாவட்டத்திலிருந்து சென்னை கோயம்பேடு சென்று வந்த 4 பேருக்குக் கொரோனா தொற்று உறுதிசெய்யப்பட்டது.

ஊட்டி அருகில் உள்ள நஞ்சநாடு கோழிக்கரைப் பகுதியைச் சேர்ந்த இருவருக்கும், கக்கன்ஜி காலனி பகுதியைச் சேர்ந்த ஒருவருக்கும், குன்னூர் அருகில் உள்ள சேலாஸ் நேரு நகர்ப் பகுதியைச் சேர்ந்த ஒருவர் என மொத்தம் 4 பேருக்குத் தொற்று உறுதி செய்யப்பட்டிருக்கிறது. அவர்கள் கோவையில் உள்ள இ.எஸ்.ஐ மருத்துவமனையில் சிகிச்சைக்காக அனுமதிக்கப்பட்டுள்ளனர்.

ooty
ooty

அவர்களது உறவினர்கள் 21 பேருக்குப் பரிசோதனை செய்யப்பட்டது. இதில், தொற்று உறுதி செய்யப்பட்டு சிகிச்சை பெற்றுவரும் கோழிக்கரையைச் சேர்ந்த ஒருவரின் 24 வயதுடைய சகோதரிக்குத் தொற்று ஏற்பட்டிருப்பது, பரிசோதனையில் உறுதி செய்யப்பட்டுள்ளது.

அவர் உடனடியாக கோவை இ.எஸ்.ஐ மருத்துவமனைக்குக் கொண்டு செல்லப்பட்டார். அங்கு அவருக்கு சிகிச்சை அளிக்கப்பட்டு வருகிறது. நீலகிரி மாவட்டத்தில் கொரோனாவால் பாதிக்கப்பட்ட முதல் பெண் இவரே. இதன்மூலம் நீலகிரி மாவட்டத்தில் கொரோனா பாதித்தவர்களின் எண்ணிக்கை தற்போது வரை 14 ஆக உயர்ந்துள்ளது

ooty
ooty

மாவட்ட நிர்வாகம் வெளியிட்டுள்ள அறிக்கையில், ``பாதிக்கப்பட்ட பகுதிகளில் ஊராட்சிகள் மற்றும் பேரூராட்சிகளின் மூலம் நாள்தோறும் 3 முறை கிருமி நாசினியைக் கொண்டு சுத்தம் செய்யப்படுகிறது. அனைத்துக் குடும்பங்களுக்கும் முகக்கவசம், விட்டமின் சி மாத்திரைகள், ஜிங்க் மாத்திரைகள் மற்றும் கபசுரக் குடிநீர் வழங்கப்பட்டு வருகிறது. இப்பகுதிகளில் மருத்துவம், ஊரக வளர்ச்சி, வருவாய், காவல்துறை மற்றும் தன்னார்வலர்களைக் கொண்டு குழு அமைக்கப்பட்டு கண்காணிக்கப்படும்.

இப்பகுதிகளில் பொதுமக்களுக்குத் தேவையான அத்தியாவசியப் பொருள்கள் ரேஷன் கடைகள் மூலம் வீட்டிற்கே கொண்டுசென்று வழங்கப்படும். அதேபோல், காய்கறிகள் மற்றும் மளிகைப் பொருள்கள் வீடு வீடாகச் சென்று வழங்கவும் நடவடிக்கை எடுக்கப்பட்டுள்ளது.

கொரோனா வைரஸ்
கொரோனா வைரஸ்

இப்பகுதிகளில் உள்ள மக்கள் தேவையில்லாத காரணங்களுக்காக வீட்டைவிட்டு வெளியே வராமல் தங்களைப் பாதுகாத்துக்கொள்ள வேண்டும் எனக் குறிப்பிடப்பட்டுள்ளது.

அடுத்த கட்டுரைக்கு