Published:Updated:

மும்பை: பெண் ஒருவருக்கு 15 நிமிட இடைவெளியில் 3 டோஸ் கொரோனா தடுப்பூசிகள்! - அதிர்ச்சி சம்பவம்

தடுப்பூசி முகாம்
தடுப்பூசி முகாம் ( மாதிரிப் படம் )

மும்பையில் பெண் ஒருவருக்கு 15 நிமிட இடைவெளியில் மூன்று டோஸ் கொரோனா தடுப்பூசி போட்டது அதிர்ச்சியை ஏற்படுத்தியிருக்கிறது.

கொரோனா தடுப்பூசி போடும் பணி நாட்டில் முழுவேகத்தில் நடந்துவருகிறது. மூன்றாவது கொரோனா அலை அச்சுறுத்தல் காரணமாக மக்கள் தடுப்பூசி போட்டுக்கொள்வதில் ஆர்வம் காட்டிவருகின்றனர். கோவிஷீல்டு தடுப்பூசியைப் பொறுத்தவரை இரண்டு டோஸ் தடுப்பூசிக்கு இடையே முதலில் 45 நாள்கள் இருக்க வேண்டும் என்று முதலில் அறிவிக்கப்பட்டது. பிறகு மத்திய அரசு இரண்டு கொரோனா டோஸ் இடையே 84 நாள்களுக்கு இடைவெளி இருக்க வேண்டும் என்று தெரிவித்துள்ளது.

ஆனால், மும்பையில் கவனக்குறைவால் பெண் ஒருவருக்கு 15 நிமிட இடைவெளியில் மூன்று தடுப்பூசி போடப்பட்டுள்ளது. மும்பை அருகிலுள்ள தானேயில் காசர்வடாவ்லி ஆனந்த் நகரில் நடந்த தடுப்பூசி முகாமில் ரூபாலி (28) என்ற பெண் தடுப்பூசி போட்டுக்கொண்டார். அவர் தடுப்பூசி போட்டுக்கொண்ட பிறகு அங்கு காத்திருந்தபோது, அவருக்கு அடுத்த 15 நிமிட இடைவெளியில் மேலும் இரண்டு டோஸ் தடுப்பூசிகளை ஊழியர்கள் போட்டிருக்கிறார்கள்.

தடுப்பூசி
தடுப்பூசி

ரூபாலியின் கையில் மூன்று தடுப்பூசி போட்டதற்கான அடையாளம் இருக்கிறது. தடுப்பூசியின் நடைமுறைகள் எதுவும் தெரியாது என்பதால், மூன்று தடுப்பூசி போடுவது குறித்து அந்தப் பெண் எதுவும் கேட்கவில்லை. இது குறித்து அந்தப் பெண் தனது கணவரிடம் சென்று தெரிவித்தார். இதனால் அதிர்ச்சியடைந்த அவர், உள்ளூர் பா.ஜ.க கவுன்சிலர் மனோகரிடம் சென்று புகார் செய்தார். கவுன்சிலர் உடனே மாநகராட்சி கமிஷனர் சர்மாவை நேரில் சந்தித்து இது குறித்து விசாரிக்க வேண்டும் என்று கோரி எழுத்துபூர்வமாக மனுக்கொடுத்தார். மூன்று தடுப்பூசி போடப்பட்டுள்ள பெண்ணுக்கு முழுமையான உடல் பரிசோதனை செய்ய வேண்டும் என்றும், அவருக்கு ஏதாவது உடல் நலக்கோளாறு ஏற்பட்டால் அதற்கான முழுச் செலவையும் மாநகராட்சி ஏற்க வேண்டும் என்றும் அவர் புகாரில் தெரிவித்துள்ளார்.

இது குறித்து மனோகர் அளித்த பேட்டியில், ``மருத்துவ ஊழியர்களின் அலட்சியத்தால் இது போன்று நடந்திருக்கிறது. ஒரே நேரத்தில் மூன்று தடுப்பூசி போட்டு எப்படி மக்களின் உயிரோடு விளையாடலாம்?” என்று கேள்வி எழுப்பினார். ஆரம்பத்தில் இது போன்ற ஒரு சம்பவமே நடக்கவில்லை என்று மாநகராட்சி சுகாதாரத்துறை அதிகாரி டாக்டர் வைஷாலி தெரிவித்தார். ஆனால் மேயர் நரேஷ், இந்தச் சம்பவம் நடந்ததை உறுதிபடுத்தியதோடு, சம்பந்தப்பட்டவர்கள் மீது கடும் நடவடிக்கை எடுக்கப்படும் என்றும் தெரிவித்தார். இது குறித்து மாநகராட்சி மக்கள் தொடர்பு அதிகாரி சந்தீப்பிடம் கேட்டதற்கு, ``சம்பந்தப்பட்ட பெண்ணுக்கு எந்தவித பிரச்னையும் இல்லை. அவரை மருத்துவர்கள் தொடர்ந்து கண்காணித்துவருகின்றனர்” என்றார். ஒரே நேரத்தில் பெண்ணுக்கு மூன்று தடுப்பூசி போடப்பட்ட சம்பவம் மிகவும் அதிர்ச்சியை ஏற்படுத்தியுள்ளது.

சான்றிதழுடன் வேதாந்த்
சான்றிதழுடன் வேதாந்த்

இதற்கிடையே மத்தியப் பிரதேசத்தில் தடுப்பூசி போடாதவர்களுக்கும் தடுப்பூசி போடப்பட்டதாக சான்றிதழ் வந்துகொண்டிருப்பதாக குற்றச்சாட்டு எழுந்துள்ளது. போபாலில் வசிக்கும் வேதாந்த் என்ற 13 வயது சிறுவனுக்கும் தடுப்பூசி போடப்பட்டுள்ளதாக அவனது மொபைல்போனில் சான்றிதழ் வந்துள்ளது. ஆனால் அவனின் வயதை 53 என்று சான்றிதழில் குறிப்பிட்டுள்ளனர். இது போன்று அதிகமானோர் தங்களுக்கு தடுப்பூசி போடப்படும் முன்பாகவே சான்றிதழ் வந்துவிட்டதாகக் குற்றம்சாட்டியுள்ளனர். ஒரு சிலருக்கு தொடர்ச்சியாக வேறு வேறு பெயர்களில் தடுப்பூசி போடப்பட்டதாகவும் செய்திகள் வந்துகொண்டிருக்கின்றன. இதனால் மக்கள் மத்தியில் குழப்பம் ஏற்பட்டுள்ளது. ``அதிகம் பேருக்கு தடுப்பூசி போட்டுவிட்டோம் என்று சொல்வதற்காக இது போன்று ஊசி போடாதவர்களுக்கெல்லாம் தடுப்பூசி போட்டதாக அரசு கணக்கு காட்டிக்கொண்டிருக்கிறது” என்று காங்கிரஸ் கட்சி குற்றம்சாட்டியிருக்கிறது.

அடுத்த கட்டுரைக்கு