Published:Updated:

நீலகிரி: `பழங்குடியினருக்கு ஊட்டச்சத்து!’ - ஊருக்கே சென்று‌ சமைக்கும் ஆஷா பணியாளர்கள்

health food
health food

'கடந்த 100 ஆண்டுகளில் ஏற்பட்ட வளர்ச்சியின் தாக்கம் காரணமாக இவர்களின் உணவுப் பழக்கங்களிலும் கடுமையான மாற்றம் ஏற்பட்டுள்ளது. இதனால் சமீபகாலமாகப் போதிய ஊட்டச்சத்து இல்லாத உணவுகளை உட்கொள்ளும் நிலை நீடித்து வருகிறது.'

நீலகிரியில் வாழ்ந்துவரும் பழங்குடிகளில் பணியர், இருளர், குறும்பர் ஆகிய இந்த மூன்று இனக்குழுக்களும் மிகவும் பின்தங்கிய நிலையிலேயே இன்றளவும் வாழ்வதாக ஆய்வுகள் தெரிவிக்கின்றன.

அரசு சார்பில் பல வளர்ச்சிகள் தொடர்ந்து மேற்கொள்ளப்பட்டும் இவர்களின் வாழ்வாதாரத்தை மேம்படுத்த முடியாத நிலையே நீடிப்பதாகத் தன்னார்வலர்களும் தெரிவித்து வருகின்றனர்.

tribes village
tribes village

தற்போது கொரோனா பெருந்தொற்று பரவலைக் கட்டுப்படுத்த பொது முடக்கம் அமல்படுத்தப்பட்டது முதல், பழங்குடிகளும் தங்களது வாழ்வாதாரத்தை இழந்து தவித்து வருகின்றனர்.

இந்தச் சூழலில் நீலகிரி மாவட்டம் குன்னூர் அருகிலுள்ள சில பழங்குடியினர் கிராமங்களில் வசித்து வரக்கூடிய மக்கள் போதிய ஊட்டச்சத்து இல்லாமல் இருப்பதும், நோய் எதிர்ப்பு சக்தி குறைவாக இருப்பதும் கண்டறியப்பட்டது.

கொரோனாப் போன்ற வைரஸ் தொற்று பரவி வரும் வேளையில் அவர்களின் நோய் எதிர்ப்பு சக்தியை அதிகரித்து உடல் நலத்தை மேம்படுத்தி அவர்களைப் பாதுகாக்கும் நோக்கில், அவர்களுக்குக் குறிப்பிட்ட நாள்களுக்கு ஊட்டச்சத்து உணவு அளிக்கவும், அதன் பின்னர் ஊட்டச்சத்து மிக்க பொருள்களை உணவில் தினமும் சேர்த்துக்கொள்ள விழிப்புணர்வு ஏற்படுத்தவும் முடிவுசெய்து ஒரு மாதம் அவர்களுக்காக ஊட்டச்சத்து உணவு வழங்க மாவட்ட ஆட்சியர் தலைமையில் ஏற்பாடு செய்யப்பட்டு, கடந்த மாதம் 22-ம் தேதி சத்துணவுகள் வழங்கப்பட்டு வந்தது.

food prepration
food prepration

தொடர்ந்து ஒருமாதம் இவர்களுக்கு வழங்கப்பட்ட ஊட்டச்சத்து உணவின் மூலம் உடல் நலனில் நல்ல முன்னேற்றம் தெரிவதாக சுகாதாரத்துறையினர் தெரிவிக்கின்றனர்.

பழங்குடிகளுக்கு உணவு வழங்குவது குறித்து ஆஷா பணியாளர் ஒருவர், ``நீலகிரி காடுகளில் வாழ்ந்து வரக்கூடிய பழங்குடிகள் பழங்காலங்களில் மிகவும் ஊட்டச்சத்து மிக்க பாரம்பர்ய உணவுகளையே உண்டு வந்துள்ளனர். அந்த ஆரோக்கிய உணவுகளின் மூலமே நோய் பாதிப்புகள் இன்றி ஆரோக்கியமாக வாழ்ந்து வந்துள்ளனர். ஆனால், கடந்த நூறு ஆண்டுகளில் ஏற்பட்ட வளர்ச்சியின் தாக்கம் காரணமாக இவர்களின் உணவுப் பழக்கங்களிலும் கடுமையான மாற்றம் ஏற்பட்டுள்ளது.

tribe childrens
tribe childrens

இதனால் சமீபகாலமாகப் போதிய ஊட்டச்சத்து இல்லாத உணவுகளை உட்கொள்ளும் நிலை நீடித்து வருகிறது. பெரும்பாலான கிராமங்களில் ரத்த சோகை அதிகம் உள்ளவர்களைக் காண முடிந்தது. பெரும்பாலான பெண்கள் ஊட்டச்சத்து இல்லாமல் மிகவும் நலிவடைந்து காணப்பட்டனர். மாவட்ட ஆட்சியரின் முயற்சியின் பேரில் இவர்களுக்குக் கடந்த ஒரு மாதமாகச் சிறப்பு உணவுகளை வழங்கி தொடர்ந்து ஊட்டச்சத்து உணவுகளை வழங்கினோம். இதன் மூலம் 5 பழங்குடி கிராமங்களைச் சேர்ந்த மக்கள்  பயன்பெற்றுள்ளனர். மேலும், ஊட்டச்சத்து உட்கொள்ள வழிமுறைகளையும் அது குறித்த விழிப்புணர்வுகளை ஏற்படுத்தி உள்ளோம்" என்றார்.

இவர்களுக்கு வழங்கப்பட்ட சிறப்பு உணவுகள் குறித்து ஒருங்கிணைந்த குழந்தைகள் மேம்பாட்டு திட்ட அலுவலர் ஒருவர் ``தினமும் இவர்களுக்கு பொட்டுக்கடலை உருண்டை, சத்து மாவு உருண்டை, முட்டை, இறைச்சி, கலவைச் சாதம்‌ போன்றவற்றை இவர்களின் கிராமங்களுக்கே வந்து நாள்தோறும் சமைத்துக் கொடுத்தோம்.

food prepration
food prepration

இவர்களுக்குத் தேன், ராகி, கொத்தமல்லி போன்றவை அதிகம் கிடைத்தாலும் உணவில் சேர்த்துக்கொள்வதில்லை இவற்றை உணவில் சேர்ப்பதன் அவசியத்தையும் விளக்கியுள்ளோம். கடந்த மாதத்தைவிட தற்போது இவர்களின் உடல் எடை 1 முதல் 2 கிலோ வரை கூடியுள்ளது" என்றார்.

புதுக்காடு கிராமத்தைச் சேர்ந்த பழங்குடி முதியவர் ஒருவர் பேசுகையில் "புதுக்காடு , சின்ன குறும்பாடி, பெரிய குறும்பாடி  கிராமத்துல இருக்க எங்க மக்களுக்கு தினமும் இங்க வந்து சாப்பாடு சமைச்சு கொடுத்தாங்க.

health food
health food

இன்னமும் வறுமையில இருக்க கிராமங்களுக்கும் உதவி கெடச்சா நல்லது" என்றார்.

அடுத்த கட்டுரைக்கு