Published:Updated:

அமெரிக்கா: `ட்ரம்ப் மற்றும் கிம்மின் 25 கடிதங்கள்!' - புதிய தகவல்களுடன் வெளியாகும் புத்தகம்

ட்ரம்ப்
ட்ரம்ப்

``உண்மையில் அவர் எனக்கு மிகவும் அழகான மற்றும் சிறந்த கடிதங்களை எழுதியுள்ளார். நாங்கள் காதலிக்கிறோம்."

இருதுருவங்களில் எதிரெதிர் நின்று அடிக்கடி மோதிக்கொள்ளும் நாடுகளில் அமெரிக்காவும் வடகொரியாவும் முக்கியமானவை. அணு ஆயுதப் பிரச்னைகள் தொடங்கி சமீபத்தில் சீனா மற்றும் அமெரிக்கா மோதிக்கொண்டது வரை பெரும்பான்மையான பிரச்னைகளிலும் அமெரிக்காவின் மீது வடகொரியா, தனது விமர்சனத்தை வைத்து வருகிறது. எனினும், அவ்வபோது தங்களது அன்பையும் பறிமாறி வந்தனர். இந்த நிலையில், அமெரிக்க அதிபர் ட்ரம்ப் மற்றும் வடகொரிய அதிபர் கிம் ஜாங் உன் ஆகியோரின் தனிப்பட்ட 25 கடிதங்கள் அடங்கிய புத்தகம் வெளியாக இருக்கிறது. பாப் உட்வார்டின், அந்தப் புத்தகத்தின் மீதான எதிர்பார்ப்பு அதிகமாகியுள்ளது.

கிம் ஜாங் உன், ட்ரம்ப்
கிம் ஜாங் உன், ட்ரம்ப்

முன்னதாக, அமெரிக்காவின் முன்னாள் பாதுகாப்பு ஆலோசகர் ஜான் போல்டன் ட்ரம்ப்பின் ரகசிய விவாதங்கள், சர்ச்சையான நடவடிக்கைகள் ஆகியன குறித்து `The Room Where It Happened: A White House Memoir’ என்ற தலைப்பில் புத்தகம் ஒன்றை எழுதினார். இந்தப் புத்தகம் மிகப்பெரிய சர்ச்சையைச் சந்தித்தது. இந்தப் புத்தகம் தொடர்பான சர்ச்சைகளே ஓயாத நிலையில், அதிபர் ட்ரம்ப்பின் நெருங்கிய உறவுக்கார பெண் மேரி எல்.ட்ரம்ப், ட்ரம்பைப் பற்றிய `Too Much and Never Enough: How My Family Created the World's Most Dangerous Man' என்ற புத்தகத்தை எழுதி வெளியிட்டுள்ளார். இந்தப் புத்தகத்தில் அதிபர் ட்ரம்ப்பின் இளமைப் பருவம், வளார்ந்த சூழல், அவருடைய நடவடிக்கைகள் உள்ளிட்ட பல்வேறு விஷயங்கள் குறித்தும் எழுதப்பட்டிருந்தது.

ட்ரம்ப்: உலகின் மிகவும் ஆபத்தான மனிதன் உருவானது எப்படி?  - சர்ச்சையைக் கிளப்பும் புத்தகம்

மேரி எல்.ட்ரம்ப்பின் புத்தகத்தின் தலைப்பு முதல் உள்ளிருக்கும் தகவல்கள் வரை அனைத்தும் கடுமையான விவாதங்களை ஏற்படுத்தின. புத்தகம் வெளியாகி மிகப்பெரிய சாதனையையும் படைத்தது. இதையடுத்து, தற்போது பிரபல புலனாய்வு பத்திரிகையாளர் பாப் உட்வார்ட் (Bob Woodward) அமெரிக்கா மற்றும் வடகொரிய அதிபர்களின் கடிதங்கள் அடங்கிய `Rage' என்ற புத்தகத்தை எழுதியுள்ளார். இந்தப் புத்தகம் வரும் செப்டம்பர் மாதம் வெளியாகவுள்ளது. தனிப்பட்ட அவதூறுகள், போர் அச்சுறுத்தல்கள் முதல் பரஸ்பரம் இருந்த அன்பு வரை பல்வேறு தகவல்கள் இந்தப் புத்தகத்தில் இடம்பெறுவதாகக் கூறப்படுகிறது. புத்தகத்தைப் பதிப்பிக்கும் சைமன் & ஸ்கஸ்டர், இதுவரை பொதுவெளியில் இல்லாத இரு தலைவர்கள் பற்றிய தகவல்கள் இந்தப் புத்தகத்தில் இருப்பதாகத் தெரிவித்துள்ளனர். அதிபர் ட்ரம்ப், கொரோனா வைரஸ் நெருக்கடியைக் கையாண்ட விதம், இனரீதியிலான அமைதியின்மை மற்றும் பொருளாதார பேரழிவுகள் பற்றியும் பாப் உட்வார்ட், எக்ஸ்க்ளூசிவாக செய்த ட்ரம்ப்பின் நேர்காணல்களும் இந்தப் புத்தகத்தில் இடம்பெற்றுள்ளதாகக் கூறப்படுகிறது.

பாப் உட்வார்ட்
பாப் உட்வார்ட்

கடிதத்தில் இருக்கும் சில தகவல்களையும் பதிப்பகத்தார் பகிர்ந்துள்ளனர். வெளியான தகவலின்படி, இருதலைவர்களுக்கும் அசாத்தியமான/ கற்பனைக்கு எட்டாத ராஜதந்திர செயல்களில் ஈடுபடுவதால், அவர்கள் இடையில் இருந்த உறவை வடகொரிய அதிபர் கிம் ஜாங் உன் `ஃபேன்டஸி படங்களைவிட மேலானது' எனக் குறிப்பிடுகிறார். ட்ரம்ப், கிம் ஜாங் உன் மூன்று முறை நேரில் சந்தித்துப் பேசியுள்ளனர். சிங்கப்பூரில் 2018-ம் ஆண்டு ஜூன் மாதம் இருவரும் சந்தித்து பேசிய சில மாதங்கள் கழித்து அதிபர் ட்ரம்ப் தனது ஆதரவாளர்கள் மாநாட்டில் பேசும்போது, ``உண்மையில் அவர் எனக்கு மிகவும் அழகான மற்றும் சிறந்த கடிதங்களை எழுதியுள்ளார். நாங்கள் காதலிக்கிறோம்" என்று கூறினார். கடந்த ஆண்டும் வடகொரிய அதிபர் கிம்மிடம் இருந்து அழகான கடிதங்களைப் பெறுவதாகத் தெரிவித்தார்.

புத்தகம்
புத்தகம்

பாப் உட்வார்ட், 2018-ம் ஆண்டு ட்ரம்ப் குறித்து `Fear' என்ற புத்தகத்தை எழுதி வெளியிட்டார். வெள்ளை மாளிகையில் நடந்த குழப்பமான விஷயங்கள் குறித்து அந்தப் புத்தகம் பேசியது. புத்தகம் வெளியான சில வாரங்களிலேயே 1 மில்லியன் பிரதிகள் விற்றன. ட்ரம்ப், இந்தப் புத்தகத்தை `நகைச்சுவையான ஒன்று' என்றும் `மோசடி' என்றும் குறிப்பிட்டார். இதையடுத்து பாப் உட்வார்ட், அதிபர் ட்ரம்பை நேர்காணல் செய்துள்ளார். நேர்காணல் முடிந்ததும் அதிபர் ட்ரம்ப், ``சிறந்த எழுத்தாளர் மற்றும் பத்திரிகையாளர் என்னை நேர்காணல் செய்தார்" என்று கூறினார். அதிபர் தேர்தல் நெருங்கி வரும் சூழலில் ட்ரம்ப்பின் மீது விமர்சனங்களை வைக்கும் வகையில் தொடர்ந்து புத்தகங்கள் வெளியாவது அவருடைய ஆதரவாளர்கள் மத்தியில் தொடர்ந்து அதிருப்தியை ஏற்படுத்தி வருகிறது என்கிறார்கள்.

`இனவெறி போராட்டம் என்ற பெயரில் வன்முறை’ - சுதந்திரதின உரையில் ட்ரம்ப் ஆவேசம்
அடுத்த கட்டுரைக்கு