Published:Updated:

`உலக நாடுகளின் கேள்வி; ஒரேநாளில் அதிகரித்த எண்ணிக்கை!’ - சீனாவின் கணக்கும் ட்ரம்பின் கருத்தும்

சீன அதிபர் ஜி ஜின்பிங் மற்றும் ட்ரம்ப்
சீன அதிபர் ஜி ஜின்பிங் மற்றும் ட்ரம்ப் ( AP )

சீனாவில் ஒரே நாளில் உயிரிழப்புகளின் எண்ணிக்கை அதிகமாகியுள்ளது. அந்நாட்டுத் தரவுகளில் ஏற்பட்ட பிழையே இதற்குக் காரணம் என சீன அதிகாரிகள் கூறியுள்ளனர்.

சீனாவின் வுகான் நகரிலிருந்து கடந்த டிசம்பர் மாதம் இறுதியில் உருவானதாகக் கூறப்படும் கொரோனா வைரஸ் இன்று மொத்த உலகத்தையும் ஆட்டிப்படைத்துக் கொண்டிருக்கிறது. இந்த வைரஸ் தொற்றால் சர்வதேச அளவில் பாதிக்கப்பட்டவர்களின் எண்ணிக்கை 22,50,689 -ஆகவும் உயிரிழந்தவர்களின் எண்ணிக்கை 1,54,256 - ஆகவும் உள்ளன. சீனாவில் வைரஸ் உருவாகியிருந்தாலும் தற்போது அங்கு நிலைமை சீராகி மக்கள் இயல்பு நிலைக்குத் திரும்பிவிட்டனர்.

கொரோனா
கொரோனா

சீனாவில் மட்டும் வைரஸால் பாதிக்கப்பட்டவர்களின் எண்ணிக்கை 82,719-ஆகவும் உயிரிழந்தவர்களின் எண்ணிக்கை 3,342 - ஆகவும் இருந்தன. ஆனால் நேற்று இந்த மதிப்பில் 1,290 அதிகரித்து உயிரிழந்தவர்களின் எண்ணிக்கை 4,632 - ஆக உள்ளதாகக் கூறியுள்ளது சீன அரசு. இது நிச்சயமாக ஒரே நாளில் நிகழ்ந்த உயிரிழப்புகள் இல்லை, சீனாவில் கொரோனா தாக்கம் உச்சநிலையில் இருந்தபோது ஏற்பட்ட உயிரிழப்புகளாகவே இவை தெரிவிக்கப்பட்டுள்ளன.

2-வது அலையைத் தொடங்கிய கொரோனா... மீண்டும் மீளுமா சீனா?| China | Corona

கடந்த சில நாள்களாகவே தங்கள் நாட்டில் உயிரிழந்தவர்களின் எண்ணிக்கையை சீனா மறைப்பதாக சர்வதேச ஆர்வலர்கள், அமைப்புகள், வல்லுநர்கள் எனப் பலரும் குற்றம்சாட்டி வந்தனர். அமெரிக்க அதிபர் ட்ரம்ப்பும் சீனாவின் இறப்பு விவகாரத்தில் பல்வேறு சந்தேகங்கள் இருப்பதாகவும் விரைவில் அது கண்டுபிடிக்கப்படும் என்றும் கூறியிருந்தார்.

சீனா
சீனா
AP

இந்நிலையில் சீனா தங்கள் நாட்டின் உயிரிழப்பில் திடீரென 50% அதாவது 1,290 பேரை ஒரே நாளில் சேர்த்துள்ளது. இதற்கு விளக்கமளித்துள்ள அந்நாட்டு அதிகாரிகள் ‘கொரோனாவால் பாதிக்கப்பட்டு வெளியில் சொல்லாமல் வீட்டிலேயே இறந்தவர்களின் எண்ணிக்கை எங்களுக்குக் கிடைக்கவில்லை. மேலும் மருத்துவர்கள் அனைவரும் நோயாளிகளுக்கு சிகிச்சையளிக்கும் பணிகளில் இருந்ததால் உயிரிழப்புகள் சரியாகக் கணக்கிடப்படவில்லை. தற்போது அனைத்துத் தரவுகளும் முழுமையாகப் பெறப்பட்டுவிட்டதால் உயிரிழந்தவர்களின் எண்ணிக்கை அதிகமாகியுள்ளது’ எனக் குறிப்பிட்டுள்ளனர்.

‘3 நிமிடங்கள் முற்றிலும் உறைந்து போன சீனா’ - கொரோனாவால் இறந்தவர்களுக்கு மாபெரும் அஞ்சலி

ஆனால் இந்த எண்ணிக்கை உண்மையானது இல்லை. சீனாவில் பாதிக்கப்பட்டவர்கள் மற்றும் உயிரிழந்தவர்களின் மதிப்பு இன்னும் அதிகமாக இருக்கும் எனச் சந்தேகிப்பதாக அமெரிக்க அதிபர் ட்ரம்ப் தெரிவித்துள்ளார். இது தொடர்பாக ட்ரம்ப் நேற்று வெளியிட்டுள்ள ட்விட்டர் பதிவில், “ கொரோனாவால் உயிரிழந்தவர்களின் எண்ணிக்கையை சீனா இரட்டிப்பாக அறிவித்துள்ளது. இந்த மதிப்பு இன்னும் அதிகமாக அமெரிக்காவின் மதிப்பை விடவும் அதிகமாக இருக்கலாம் அல்லது அதற்கு சற்று அருகிலாவது இருக்கலாம்” எனத் தெரிவித்துள்ளார்

ட்ரம்ப்
ட்ரம்ப்

இதற்கு பதில் அளித்துள்ள சீனா, “ கொரோனாவால் உயிரிழந்தவர்களின் எண்ணிக்கையை நிச்சயமாகக் குறைக்கப்படவில்லை. அப்படி நடக்கவும் நாங்கள் விடமாட்டோம்’ என அந்நாட்டின் வெளியுறவுத்துறை அமைச்சகத்தின் செய்தி தொடர்பாளர் கூறியுள்ளார். சீனாவில் உயிரிழந்தவர்களின் எண்ணிக்கையிலும் அடக்கம் செய்யப்பட்டவர்களின் எண்ணிக்கையிலும் பல மாற்றங்கள் இருந்ததாகச் சமீபத்தில் ஒரு புகார் எழுந்தது. அதற்குப் பிறகே பலரும் இது தொடர்பாகக் கேள்வி எழுப்பத் தொடங்கினர்.

உலகறிந்த உண்மையை மறைக்கப்பார்க்கும் சீனா?! -கொரோனாவில் அடுத்த சர்ச்சை

இதற்கிடையில் சீனாவின் இறப்புத் தரவுகள் பற்றி ஜெனிவாவில் செய்தியாளர்களுக்குப் பேட்டியளித்துள்ள உலக சுகாதார அமைப்பின் கொரோனா தொழில்நுட்ப தலைவர் மரியா வான் கெர்கோவ், “ஒரு நாட்டில் கொரோனாவால் பாதிக்கப்பட்டவர்கள் மற்றும் உயிரிழந்தவர்களை அடையாளம் காண்பது பெரும் சவாலாக உள்ளது. பல நாடுகள் இதே போன்ற சூழ்நிலையில் இருக்கப் போகின்றன என நான் நினைக்கிறேன். அவர்கள் தங்கள் தரவுகளை மறு மதிப்பீடு செய்ய வேண்டும்” எனக் கூறியுள்ளார்.

WHO
WHO

இவரைத்தொடர்ந்து பேசியுள்ள உலக சுகாதார அமைப்பின் அவசரக் கால இயக்குநர் மைக்கேல் ரியான், ‘ எல்லா நாடுகளும் நிச்சயம் இந்தப் பிரச்னையை எதிர்கொள்ளும். ஆனால் அனைத்து நாடுகளும் தங்களின் துல்லிய தரவை விரைவில் தயாரிக்கும் படி கேட்டுக்கொள்கிறோம். பாதிப்பு என்பதையும் தாண்டி துல்லிய மதிப்பால் நாட்டின் நிலையை அறிவது அதிலிருந்து வெளியேற உதவும்” என்று பேசியுள்ளார்.

அடுத்த கட்டுரைக்கு