Published:Updated:

`மாஸ் காட்டும் ஜெய்சங்கர்!’ - காஷ்மீர் விவகாரத்தில் தனித்துவிடப்படும் பாகிஸ்தான்

பிரேம் குமார் எஸ்.கே.

மற்ற நாடுகளோ ஐ.நா பாதுகாப்பு கவுன்சிலோ காஷ்மீர் விவகாரத்தில் நம்மை பூச்செண்டு கொண்டு வரவேற்க தயாராக இல்லை என்பதை நாம் புரிந்துகொள்ள வேண்டும். இஸ்லாமிய நாடுகள் கூட இந்தியாவில் முதலீடு செய்திருப்பதால் நம் பக்கம் நிற்க தயங்குகிறார்கள்!

ஜெய்சங்கர்
ஜெய்சங்கர்

காஷ்மீர் விவகாரத்தில் இந்தியாவின் முடிவுக்கு பாகிஸ்தான் கடும் கண்டனம் தெரிவித்ததும் அதன் அடுத்தகட்டமாக, இந்தியாவுடனான பல்வேறு ஒப்பந்தங்களை ரத்து செய்தது. இந்தியாவுடனான ரயில் போக்குவரத்தையும் நிறுத்தியது. காஷ்மீர் விவகாரத்தை பொறுத்தவரை இருநாடுகளும் சேர்ந்து பேச்சுவார்த்தை மூலம்தான் தீர்வு காண வேண்டும் என்ற ஒப்பந்தத்தை இந்தியா மீறியதாக தொடர்ந்து பாகிஸ்தான் குற்றம்சாட்டி வருகிறது.

மோடி
மோடி

இந்தியா தொடர்ந்து தெரிவித்து வரும் ஒரு கருத்து, காஷ்மீர் எங்கள் உள்நாட்டு விவகாரம் என்பதுதான். ஆனால், இது வெறும் உள்நாட்டு விவகாரம் என்பது மட்டும் கிடையாது. காஷ்மீரை பொறுத்தவரை மற்ற நாடுகளுக்கான எல்லைப் பகுதியும் வருகிறது. அந்த எல்லைகளில் பல்வேறு சிக்கல்களும் பல ஆண்டு காலமாக இருந்து வருவது அனைவரும் அறிந்ததே. காஷ்மீருக்கு வழங்கப்பட்டு வந்த சிறப்பு அந்தஸ்து ரத்து மூலம் இந்தியா, ஆக்கிரமிப்பு செய்யப்பட்ட இடங்களை திரும்பப் பெற முடியும்.

இதன் காரணமாக பாகிஸ்தானுடன் தொடர்ச்சியாக நட்பு பாராட்டி வரும் சீனா, முதலில் இந்தியாவின் முடிவை கடுமையாக எதிர்த்தது. முக்கியமாக லடாக் பகுதியை யூனியன் பிரதேசமாக அறிவிக்கப்பட்டதுக்கு தன்னுடைய கடும் எதிர்ப்புகளைப் பதிவு செய்தது. மறுபுறம் பாகிஸ்தானும் தன் பங்குக்கு காஷ்மீர் விவகாரத்தில் தலையிட்டு பேச்சுவார்த்தை மூலம் தீர்வு காண வேண்டும் என்ற கோரிக்கையை அமெரிக்கா, சீனா உள்ளிட்ட உலகநாடுகளுக்கும் ஐ.நாவுக்கும் கடிதம் மூலம் வைத்தது. ஆனால் இந்த விவகாரத்தில் தங்களால் தலையிட முடியாது என அமெரிக்காவும், ஐ.நாவும் விலகிக் கொண்டன. நீங்கள் `இரு நாட்டு பேச்சுவார்த்தை’ மூலம் தீர்த்துக்கொள்ளுங்கள் எனத் திட்டவட்டமாக தெரிவித்துவிட்டது. இந்தியாவைப் பொறுத்தவரை பாகிஸ்தான் தீவிரவாதிகளுக்கு அடைக்கலம் கொடுப்பதை நிறுத்தும் வரை பேச்சுவார்த்தைக்கு வாய்பில்லை எனத் திட்டவட்டமாகக் கூறிவருகிறது.

ஐ.நா.
ஐ.நா.

தனது நட்பு நாடான சீனாவும் காஷ்மீர் விவகாரத்தில் பேசுவார்த்தை மூலம் தீர்வு காணும்படி கூறியுள்ளது. இதன் காரணமாக பாகிஸ்தான் தற்போது உலக அரங்கில் காஷ்மீர் விவகாரத்தில் தனித்து விடப்பட்டுள்ளது. பாகிஸ்தான் வெளியுறவுத்துறை அமைச்சர் குரோஷி, "பாகிஸ்தானில் இருக்கும் கட்சிகளுக்குள் பல்வேறு கருத்து வேறுபாடுகள் இருக்கலாம். ஆனால், காஷ்மீர் விவகாரத்தில் நாம் ஒன்றாக இருக்க வேண்டும். மற்ற நாடுகளோ, ஐ.நா பாதுகாப்பு கவுன்சிலோ காஷ்மீர் விவகாரத்தில் நாம்மை பூச்செண்டு கொண்டு வரவேற்க தயாராக இல்லை என்பதை நாம் புரிந்துகொள்ள வேண்டும். இஸ்லாமிய நாடுகள் கூட இந்தியாவில் முதலீடு செய்திருப்பதால் நம் பக்கம் நிற்க தயங்குகிறார்கள்” என்றார். காஷ்மீர் விவகாரத்தில் ரஷ்யா ஒருபடி மேலே சென்று இந்தியாவின் முடிவுக்கு வரவேற்பு தெரிவித்துள்ளது. இது பாகிஸ்தானுக்கு கூடுதல் நெருக்கடியை ஏற்படுத்தியுள்ளது.

Vikatan

இந்நிலையில்தான் இந்திய வெளியுறவுத் துறை அமைச்சர் ஜெய்சங்கர் சீனா பயணமானார். நேற்று அவர் சீனாவின் வெளியுறவுத்துறை அமைச்சர் வாங் யி-யைச் சந்தித்து பேசினார். இந்தச் சந்திப்பு காஷ்மீர் விவகாரத்துக்கு முன்னதாகவே முடிவு செய்யப்பட்டபோதும், இந்தச் சந்திப்பில் அதிக முக்கியத்துவம் கொடுத்துப் பேசப்பட்டது காஷ்மீர் விவகாரம்தான்.

இந்திய சீன வெளியுறவுத்துறை அமைச்சர்கள் செய்தியாளர்கள் சந்திப்பு
இந்திய சீன வெளியுறவுத்துறை அமைச்சர்கள் செய்தியாளர்கள் சந்திப்பு

லடாக் யூனியன் பிரதேசமாக மாற்றப்பட்டாலும் அதன் எல்லைகளில் மாற்றமிருக்காது என ஜெய்சங்கர் சீனாவுக்கு உறுதி அளித்ததாகக் கூறப்படுகிறது. மேலும் இந்தியா இந்திய அரசியலமைப்பு சட்டத்துக்கு உட்பட்டுதான் இந்த முடிவை எடுத்ததாகவும் சீனாவிடம் இந்தியாவின் நிலைப்பாட்டை விளக்கியுள்ளார். மேலும் "சீனா இந்தியா பாகிஸ்தான் விவகாரத்தில் கள நிலவரங்களின் எதார்த்தத்தைப் புரிந்து கொண்டு முடிவெடுக்க வேண்டும். இயற்கையாகவே இந்தியா மற்றும் சீனா நாடுகள் பொருளாதாரத்தின் அடிப்படையில் வளரும் நாடுகள். அதனால் நம் இரு நாடுகளுக்கு இடையே இருக்கும் உறவு என்பது மிக முக்கியமானது” என ஜெய்சங்கர் வலியுறுத்தினார்.

மேலும் இந்தியா சீனாவின் எதிர்கால உறவு முக்கியத்துவம் வாய்ந்தது எனவும் சில சர்ச்சைகள் இந்த உறவில் எந்தச் சிக்கலையும் ஏற்படுத்திவிடாதபடி இருநாடுகளும் கவனமாக இருக்க வேண்டியதன் அவசியம் குறித்தும் பேசப்பட்டது. இந்தச் சந்திப்பின் போது சீனாவின் சார்பில், இந்தியாவிடம் எல்லையில் இருக்கும் பதற்றத்தை தணிக்க வேண்டும் எனக் கோரிக்கை விடுக்கப்பட்டுள்ளது. மேலும், இந்தியா காஷ்மீரின் கட்டமைப்பு மற்றும் வளர்ச்சியில் கவனம் செலுத்த வேண்டும் என்றும் சீனா இந்தியாவின் வளர்ச்சிப் பணிகளை கவனிக்கும் என்றும் தெரித்தார்.

ஜெய்சங்கர்
ஜெய்சங்கர்

இந்த ஆண்டு சீன அதிபர் இந்தியா வருவது தொடர்பாகவும் தீவிர ஆலோசனைகள் நடைபெற்றது. ஏற்கெனவே இந்தியா சீனா நாடுகளுக்கு இடையே ஏற்பட்ட பிரச்னைகளை மோடி மற்றும் சீன அதிபர் ஷி ஜின்பிங் ஆகியோர் பேச்சுவார்த்தை மூலம் தீர்வு கண்டனர். அதன் பின்னர் இந்திய சீன உறவு மேம்பட்டதும் குறிப்பிடத்தக்கது. இந்த ஆண்டு இந்தியாவில் நடைபெறும் இந்தச் சந்திப்பில் காஷ்மீர் தொடர்பான முக்கிய முடிவுகள் எடுக்கப்படும் என்று தெரிகிறது.

இந்திய வெளியுறவுத் துறை அமைச்சராக இருக்கும் ஜெய்சங்கர் சீனாவுக்கான இந்தியத் தூதராக 2009 -ம் ஆண்டு முதல் 2013 வரை பணியாற்றியுள்ளார். மேலும் அமெரிக்கா, ரஷ்யா, இலங்கை உள்ளிட்ட பல நாடுகளில் இந்திய வெளியுறவுத்துறை சார்பாக பணியாற்றிய அனுபவம் கொண்டவர். சீனாவில் இந்திய தூதராக செயல்பட்ட போது இந்தியா சீனா இடையே ஏற்பட்ட எல்லைப் பிரச்னைகள் எல்லாவற்றையும் திறம்பட கையாண்டார்.

`சும்மா பேசக்கூடாது; விமானம் அனுப்புறேன், வந்து பாருங்க!’ - ராகுலைச் சாடிய காஷ்மீர் கவர்னர்

இதனால் சீனாவிலும் ஜெய்சங்கருக்கு நல்ல வரவேற்பு கிடைத்ததாகவும், காஷ்மீர் விவகாரத்தில் தலையிடப்போவதில்லை என சீனா எடுத்த முடிவுக்கும் ஜெய்சங்கரின் செயல்பாடு முக்கியமானதாகப் பார்க்கப்படுகிறது. அதுமட்டுல்லாமல் காஷ்மீர் விவகாரத்தில் உலக நாடுகளின் ஆதரவை இந்தியாவுக்குப் பெற்று தருவதில் வெளியுறவுத்துறையில் அனுபவம் கொண்ட ஜெய்சங்கரின் பங்களிப்பு என்பது நிச்சயம் முக்கியத்துவம் வாய்ந்ததே!