Published:Updated:

திருப்பி அனுப்பப்படுவாரா விஜய் மல்லையா?

போரிஸ் ஜான்சன்
பிரீமியம் ஸ்டோரி
போரிஸ் ஜான்சன்

‘ஐரோப்பிய யூனியனிலிருந்து வெளியில் வந்ததால்தான் இந்தியாவுடன் இப்படி ஓர் ஒப்பந்தம் போட்டு நம்மால் பயன்பெற முடிந்தது’

திருப்பி அனுப்பப்படுவாரா விஜய் மல்லையா?

‘ஐரோப்பிய யூனியனிலிருந்து வெளியில் வந்ததால்தான் இந்தியாவுடன் இப்படி ஓர் ஒப்பந்தம் போட்டு நம்மால் பயன்பெற முடிந்தது’

Published:Updated:
போரிஸ் ஜான்சன்
பிரீமியம் ஸ்டோரி
போரிஸ் ஜான்சன்

கோவிட் அச்சம் காரணமாக இந்தியப் பயணத்தை இரண்டாவது முறையாக ரத்து செய்தார் இங்கிலாந்துப் பிரதமர் போரிஸ் ஜான்சன். இப்போது இந்தியப் பிரதமர் நரேந்திர மோடியும் பிரிட்டன் பிரதமர் போரிஸ் ஜான்சனும் 100 கோடி பவுண்ட் (10,250 கோடி ரூபாய்) மதிப்பிலான பொருளாதார ஒப்பந்தத்தில் கையெழுத்திட்டிருக்கிறார்கள். விர்ச்சுவலாக நடைபெற்ற சந்திப்பில் கையெழுத்தான ஒப்பந்தம், இந்த அசாதாரண சூழலில் முக்கியமான ஒன்றாகப் பார்க்கப்படுகிறது. இதனால் இந்தியாவிற்கு என்ன நன்மை? பிரிட்டனுக்கு என்ன நன்மை? பார்க்கலாம்.

ஐரோப்பிய யூனியனிலிருந்து பிரெக்ஸிட் மூலம் பிரிட்டன் பிரிந்ததற்குப் பிறகான இந்த ஒப்பந்தம் பிரிட்டனுக்கு மிகவும் முக்கியத்துவம் வாய்ந்தது. ‘ஐரோப்பிய யூனியனிலிருந்து வெளியில் வந்ததால்தான் இந்தியாவுடன் இப்படி ஓர் ஒப்பந்தம் போட்டு நம்மால் பயன்பெற முடிந்தது’ என பிரிட்டிஷ் அரசு பெருமையாகச் சொல்கிறது.

திருப்பி அனுப்பப்படுவாரா விஜய் மல்லையா?

இந்திய நிறுவனங்கள் பலவும் பிரிட்டனில் வந்து தொழில் தொடங்குவதால், சுமார் 6,500 வேலைவாய்ப்புகளும் பிரிட்டனில் உருவாகும். பிரிட்டிஷ் விவசாய விளைபொருள்களுக்கு புதிய மார்க்கெட்டாக இந்தியா இருக்கும்.

மிக முக்கியமாக பிரிட்டன் - இந்தியா நாடுகள் தடுப்பூசித் தயாரிப்பில் இணைந்து செயல்படும். இந்த ஒப்பந்தத்தில் 533 மில்லியன் பவுண்டுகள் மதிப்பிலான இந்திய முதலீடுகள் பிரிட்டனில் செய்யப்படும் எனக் கையெழுத்திடப்பட்டுள்ளது. அதில், இந்தியாவின் தடுப்பூசித் தயாரிப்பு நிறுவனமான சீரம் இன்ஸ்டிட்யூட் 240 மில்லியன் பவுண்டுகள் பிரிட்டனில் முதலீடு செய்யும். தடுப்பூசி ஆராய்ச்சியிலும் இரு நாடுகள் இணைந்து பணியாற்ற ஒப்பந்தமாகியிருக்கிறது. பிரிட்டனில் சீரம் இன்ஸ்டிட்யூட்டின் புதிய விற்பனை அலுவலகமும் நிறுவப்படும். இதன்மூலம் சுமார் ஒரு பில்லியன் ரூபாய் மதிப்பிலான வர்த்தகம் உருவாகும் எனவும் எதிர்பார்க்கப்படுகிறது.

பிரிட்டனுக்குப் படிக்கச் செல்லும் இந்திய மாணவர்களுக்கு அங்கு சரியான வேலைவாய்ப்புகள் கிடைப்பதில்லை என்பது பெரிய புகாராக உள்ளது. இதனால், படிப்பை முடிக்கும் பலர் சட்டவிரோதமாக அங்கு தங்கிவிடுகின்றனர். இப்படி சுமார் ஒரு லட்சம் பேர் இருப்பதாக பிரிட்டன் புகார் செய்கிறது. அவ்வளவு பேர் இருக்காது என்கிறது இந்தியா. இப்போது பிரிட்டனில் இருக்கும் இந்தியர்களின் நிலையை ஆராய்ந்து, சட்டவிரோதமாக அங்கு இருப்பவர்களைத் திரும்பப் பெற இந்தியா ஒப்புக்கொண்டுள்ளது. இதற்குப் பிரதிபலனாக ஆண்டுக்கு 3,000 பேருக்கு பிரிட்டன் விசா வழங்கும். ஐ.டி உள்ளிட்ட துறைகளில் இளம் திறமைசாலிகள் பிரிட்டன் சென்று பணிபுரிய இந்த வசதி உதவும். பிரிட்டனில் பணியமர்த்தப்படும் இந்தியத் தொழில் வல்லுநர்கள், 2 ஆண்டுகள் வரை தளர்த்தப்பட்ட கட்டுப்பாடுகளுடன் பணி செய்யவும் வழிகிடைக்கும்.

பிரிட்டிஷ் மருத்துவச் சேவையின் ஆதாரமாக இந்திய செவிலியர்கள் இருக்கிறார்கள். ஆனால், அவர்களில் பலருக்குப் பயிற்சி குறைவாக இருக்கிறது. விருப்பமின்றியும் அங்கு பணி செய்கிறார்கள். செவிலியர்களுக்கு முறையான பயிற்சி தந்து பிரிட்டனுக்கு அனுப்ப இந்தியா ஒப்புக்கொண்டுள்ளது. இதன்மூலம் பல செவிலியர்களுக்கு வேலைவாய்ப்பு கிடைக்கும்.

இந்தியாவிலிருந்து மருத்துவ உபகரணங்களைப் பெற பிரிட்டனில் இதுவரை இருந்த கட்டுப்பாடுகளும் தளர்த்தப்பட்டுள்ளன. இந்தியா - மற்றும் பிரிட்டன் குடிமக்கள் இருநாடுகளிலும் கல்வி பயிலவும், வேலை செய்யவும் இருக்கும் தடைகள் களையப்பட்டு எளிதாக்கப்படும் எனவும் ஒப்புக் கொள்ளப்பட்டுள்ளது. ராணுவத் தளவாடங்கள் உற்பத்தியிலும் பிரிட்டன் இந்தியாவிற்கு உதவ இருக்கிறது. இப்படிப் பல விஷயங்களில், மொத்தம் 9 ஒப்பந்தங்களில் இரு நாடுகளும் கையெழுத்திட்டிருக்கின்றன.

பிரிட்டன் கொரோனாப் பரவலைக் கட்டுப்படுத்த இந்தியாவிற்குப் பெரிதாய் உதவிக்கரம் நீட்டியிருப்பதும் குறிப்பிடத்தக்கது. பிரிட்டிஷ் பிரதமர் இந்தியாவிற்கு வருவதாக இருந்த சுற்றுப்பயணம் இருமுறை கொரோனா அச்சுறுத்தல் காரணமாகத் தடைப்பட்டது.இருப்பினும், இருநாடுகளின் உறவு மேம்பாட்டை வலியுறுத்தி, காணொலிக் காட்சி மூலம் இந்தக் கொரோனாச் சூழலிலும் இந்த ஒப்பந்தங்கள் கையெழுத்தாகியிருக்கின்றன.

திருப்பி அனுப்பப்படுவாரா விஜய் மல்லையா?

சட்டவிரோதமாக பிரிட்டனில் தங்கியிருக்கும் இந்தியர்களைத் திரும்பப் பெறும் அதேநேரத்தில், இந்தியாவில் சட்டத்தின் பிடியிலிருந்து தப்பி அங்கு அடைக்கலம் புகுந்திருக்கும் விஜய் மல்லையா, நீரவ் மோடி ஆகியோரையும் திருப்பி அனுப்புமாறு பிரதமர் மோடி வலியுறுத்தி யிருக்கிறார். ஆனால், ‘சட்ட நடைமுறைகளால் அது தாமதமாகிறது’ என பிரிட்டிஷ் பிரதமர் போரிஸ் ஜான்சன் கூறியிருக்கிறார்.

இந்த ஒப்பந்தங்கள் பிரிட்டிஷ் அரசிற்கும் மக்களுக்கும் பெரும்பலன் அளிக்கும் வேளையில், இந்தியாவில் பெரு நிறுவனங்களுக்குத்தான் இந்த ஒப்பந்தம் அதிக பலனளிக்கும் எனக் கருதப்படுகிறது. இந்தியா அமெரிக்காவிற்கு அடுத்து தன் வலுவான நண்பனாக பிரிட்டனைக் கருதுகிறது.