Published:Updated:

ஜோ பைடனின் பொருளாதார கமிட்டித் தலைவராகும் இந்திய வம்சாவளிப் பெண்... யார் இந்த நீரா டாண்டன்?

Neera Tanden, president of Center for American Progress
Neera Tanden, president of Center for American Progress ( AP Photo / Mel Evans )

வெள்ளை மாளிகையில் இயங்கும் பொருளாதாரம் சார்ந்த அதிகாரம் மிக்க இந்தப் பிரிவில் ஒரு பெண் தலைமைப் பொறுப்பை ஏற்பது இதுவே முதல் தடவை.

இந்திய வம்சாவளியைச் சேர்ந்த கமலா ஹாரிஸ் அமெரிக்கத் துணை அதிபராகத் தேர்ந்தெடுக்கப்பட்டது அமெரிக்கவாழ் இந்தியர்களை மட்டுமல்லாமல் ஒட்டுமொத்த இந்தியர்களையும் மகிழ்ச்சிக்கு உள்ளாக்கியிருக்கிறது. இந்நிலையில் அமெரிக்க அதிபராகத் தேர்ந்தெடுக்கப்பட்டுள்ள ஜனநாயகக் கட்சியைச் சேர்ந்த ஜோ பைடன், பொருளாதாரத்தில் ஆட்டம் கண்டுள்ள அமெரிக்காவை பழையபடி நிமிர்ந்து எழச் செய்வதற்காகப் பொருளாதாரக் குழு ஒன்றை அமைத்திருக்கிறார். அதில் பட்ஜெட் மற்றும் அலுவலக மேலாண்மை பிரிவின் இயக்குநராக (Director of the Office of Management and Budget-OMB), இந்திய வம்சாவளியைச் சேர்ந்த நீரா டாண்டனை நியமிக்க முடிவு செய்திருப்பது இந்தியர்களை இன்னும் பெருமைப்பட வைத்திருக்கிறது.

kamala harris - joe biden
kamala harris - joe biden
Twitter/@JoeBiden

வெள்ளை மாளிகையில் இயங்கும் பொருளாதாரம் சார்ந்த அதிகாரம் மிக்க இந்தப் பிரிவில் ஒரு பெண் தலைமைப் பொறுப்பை ஏற்பது இதுவே முதல் முறை. 50 வயதாகும் நீரா டாண்டன் அமெரிக்காவின் மாசசூசெட்ஸ் மாகாணத்தில் பிறந்தவர். லாஸ் ஏஞ்செல்ஸ் நகரத்தில் உள்ள கலிபோர்னியா பல்கலைக்கழகத்தில் பட்டப்படிப்பை முடித்த இவர், யேல் பல்கலைக்கழகத்தில் சட்டம் பயின்றார். பொருளாதார மற்றும் சமூகப் பிரச்னைகள் குறித்த ஆய்வுகளை மேற்கொள்ளும் பல்வேறு நிறுவனங்களில் ஆலோசகராகப் பணிபுரிந்தார். குறிப்பாக, பொருளாதாரம் மற்றும் சமூகப் பிரச்னைகளுக்குக் குரல் கொடுப்பதோடு மட்டுமல்லாமல் அதற்கான செயல்திட்டங்களையும் முன்வைக்கும் `தி சென்டர் பார் அமெரிக்கன் புராகிரஸ் (The Center for American Progress)' என்கிற மக்களுக்காக இயங்கும் அமைப்பின் தலைவராகவும் தற்போது பணியாற்றி வருகிறார்.

கொரோனாவைக் கட்டுப்படுத்தும் முயற்சியில் தீவிரமாக இயங்கப் போவதாகச் சொல்கிறார் பைடன். அதுமட்டுமல்லாமல் கொரோனா பெருந்தொற்றால் உண்டான பொருளாதார நெருக்கடியில் சிக்கித் தவிக்கும் மக்களுக்கு உடனடியாக நிவாரணத்தை வழங்குவதோடு, அமெரிக்காவின் பொருளாதாரத்தை மீண்டும் கட்டமைக்க தான் நியமித்திருக்கும் பொருளாதாரக் கமிட்டி தீவிரமாகப் பணியாற்ற இருப்பதாகவும் அறிவித்திருக்கிறார்.

Neera Tanden, president of Center for American Progress
Neera Tanden, president of Center for American Progress
AP Photo / Mel Evans

நீரா டாண்டனைத் தவிர அமெரிக்கவாழ் இந்தியர்களான விவேக் மூர்த்தி மற்றும் அருண் மஜும்தார் ஆகியோரும் ஜோ பைடன் உருவாக்கிய பொருளாதாரக் குழுவில் இடம்பெறுவார்கள் என்று சொல்லப்படுகிறது.

தனக்குக் கிடைத்த இந்த அங்கீகாரம் குறித்து நீரா டாண்டன் மகிழ்ச்சி தெரிவித்திருக்கிறார். ``என்னுடைய சிறுவயதில் என் பெற்றோர் விவாகரத்து பெற்றனர். அதற்குப் பிறகு, அரசு அளிக்கும் உணவு மற்றும் தங்குமிடம் ஆகியவற்றை நம்பியே என்னுடைய தாய் இருந்தார். இப்போது, அதுபோன்ற திட்டங்களை எளிய மக்களிடம் சரியாகக் கொண்டுபோய்ச் சேர்க்கும் பொறுப்பு எனக்கு வழங்கப்பட்டதை நான் எனக்குக் கிடைத்த பெரும் அங்கீகாரமாகக் கருதுகிறேன். அவர்களை மகிழ்வுடனும் கண்ணியத்துடனும் வாழ வைக்க முயல்வேன். ஏனென்றால், அவர்களின் வலியை நான் நன்கு உணர்வேன்” என்று நெகிழ்கிறார் நீரா.

வாழ்த்துகள் நீரா!

அடுத்த கட்டுரைக்கு