Published:Updated:

உக்ரைனிலிருந்து இந்தியர்களை மீட்கும் `ஆபரேஷன் கங்கா'வின் செயல்பாடுகள் என்னென்ன? - ஒரு பார்வை!

ஆபரேஷன் கங்கா

தாயகம் திரும்புவதற்காக உக்ரைனில் தவித்துக்கொண்டிருக்கும் மாணவர்கள் உள்ளிட்ட இந்தியர்களை மீட்பதற்காக இந்திய அரசாங்கம் மேற்கொண்டுவரும் துரித நடவடிக்கைதான் `ஆபரேஷன் கங்கா!'

உக்ரைனிலிருந்து இந்தியர்களை மீட்கும் `ஆபரேஷன் கங்கா'வின் செயல்பாடுகள் என்னென்ன? - ஒரு பார்வை!

தாயகம் திரும்புவதற்காக உக்ரைனில் தவித்துக்கொண்டிருக்கும் மாணவர்கள் உள்ளிட்ட இந்தியர்களை மீட்பதற்காக இந்திய அரசாங்கம் மேற்கொண்டுவரும் துரித நடவடிக்கைதான் `ஆபரேஷன் கங்கா!'

Published:Updated:
ஆபரேஷன் கங்கா

கடந்த பிப்ரவரி 24-ம் தேதி தொடங்கிய உக்ரைன் - ரஷ்யா இடையேயான போர், 10 நாள்களைக் கடந்தும் தொடர்ந்து நீடித்துவருகிறது. இதனால் உக்ரேனிய மக்கள் மட்டுமல்லாமல், உக்ரைனில் தங்கியிருக்கும் பிறநாட்டு மக்களும் கடுமையாக பாதிக்கப்பட்டுவருகின்றனர். குறிப்பாக, கல்வி, வேலைவாய்ப்புகளுக்காக உக்ரைன் நாட்டுக்குச் சென்ற 20,000-க்கும் மேற்பட்ட இந்தியர்களும் போருக்கிடையே சிக்கிக்கொண்டனர். தாக்குதலிலிருந்து தப்பிக்க, மெட்ரோ சுரங்கங்கள், பதுங்கு குழிகள் எனக் கிடைக்கும் இடங்களிலெல்லாம் தஞ்சம் புகுந்து, உயிரைக் கையில்பிடித்துக்கொண்டு திண்டாடிவருகின்றனர்.

உக்ரைன் இந்திய மாணவர்கள்
உக்ரைன் இந்திய மாணவர்கள்

தாயகம் திரும்புவதற்காக உக்ரைனில் தவித்துக்கொண்டிருக்கும் மாணவர்கள் உள்ளிட்ட இந்தியர்களை மீட்பதற்காக இந்திய அரசாங்கம் மேற்கொண்டுவரும் துரித நடவடிக்கைதான் `ஆபரேஷன் கங்கா!' இதன் செயல்பாடுகள் பற்றிச் சுருக்கமாக இங்கே!

ஒட்டுமொத்த விகடனுக்கும் ஒரே ஷார்ட்கட்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

ஆபரேஷன் கங்கா:

போர் காரணமாக உக்ரைனின் வான்பகுதி மூடப்பட்டுவிட்டதால், தரைவழியாக உக்ரைனின் அண்டை நாடுகளுக்கு எல்லை கடந்து சென்று, அங்கிருந்து விமானம் மூலமாக இந்தியாவுக்கு மீட்டுவரும் செயல்திட்டத்தை இந்திய அரசாங்கம் வகுத்தது. அதன்படி, உக்ரைன் நாட்டின் அண்டை நாடுகளான ருமேனியா, ஹங்கேரி, போலந்து, ஸ்லோவாகியா உள்ளிட்ட நாடுகளின் எல்லைப் பகுதிகளில் இந்திய தூதரகம் சார்பில் சோதனை முகாம்கள் அமைக்கப்பட்டன. மேலும், எல்லை தாண்டி இந்திய தூதரக சோதனை முகாம்களை நோக்கிப் பயணம் மேற்கொள்ளும் அனைத்து இந்தியர்களும் பாஸ்போர்ட், கொரோனா தடுப்புச் சான்றிதழ், அமெரிக்க டாலர் பணம் உள்ளிட்ட அத்தியாவசியப் பொருள்களையும் உடன்வைத்திருக்க வேண்டுமென இந்திய அரசு சார்பில் அறிவுறுத்தப்பட்டது.

ஆபரேஷன் கங்கா
ஆபரேஷன் கங்கா

முதற்கட்ட நடவடிக்கை:

இந்திய அரசின் அறிவிப்பின்படி, உயர்கல்வி மாணவர்கள் உள்ளிட்ட உக்ரைன்வாழ் இந்திய நாட்டினர், சாலை மார்க்கமாக பேருந்துகள், கார்கள் எனக் கிடைக்கின்ற வாகனங்களில் பயணம் மேற்கொண்டு அண்டை நாடுகளின் எல்லை நோக்கிப் புறப்பட்டனர்.

பேருந்தில் புறப்படும் இந்திய மாணவர்கள்
பேருந்தில் புறப்படும் இந்திய மாணவர்கள்

முதற்கட்டமாக, உக்ரைன் நாட்டின் செர்னிவிஸ்டி நகரிலிருந்து, 400-க்கும் மேற்பட்ட இந்தியர்கள் பேருந்து மூலம் ருமேனியா நாட்டு எல்லைக்குச் சென்றனர். அங்குள்ள, இந்திய தூதரக சோதனை முகாம்களில் பதிவுசெய்த பின்னர், அங்கிருந்து ருமேனியா தலைநகர் புகாரெஸ்டுக்குக் கொண்டுசெல்லப்பட்டனர். அவர்களுக்காக, புகாரெஸ்ட் விமான நிலையத்தில், ஒரு ஏர்-இந்தியா விமானம் இந்தியர்களை பத்திரமாக மீட்டு, தாயகம் திரும்புவதற்காகத் தயார்நிலையில் நிறுத்திவைக்கப்பட்டிருந்தது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

`ஆபரேஷன் கங்கா’ செயல்திட்டத்தின் முதல் நடவடிக்கையாக, கடந்த பிப்ரவரி 26-ம் தேதி, மதியம் 1:55 மணியளவில் ருமேனியா நாட்டின் தலைநகர் புகாரெஸ்டிலிருந்து, 219 இந்தியர்களுடன் முதல் விமானம் இந்தியாவை நோக்கிப் பயணப்பட்டது. அன்றிரவு சரியாக 7:50 மணியளவில் மும்பை சத்ரபதி சிவாஜி விமான நிலையத்தை வெற்றிகரமாக வந்தடைந்தது.

மீட்பு விமானத்தில் இந்திய மாணவர்கள்
மீட்பு விமானத்தில் இந்திய மாணவர்கள்

பத்திரமாக மீட்கப்பட்ட (5 தமிழர்கள் உட்பட) 219 இந்தியர்களையும், மத்திய அமைச்சர் பியூஷ் கோயல் நேரடியாக விமான நிலையத்துக்கே சென்று வரவேற்றார். தாயகம் திரும்பிய மகிழ்ச்சியில் மாணவர்கள் `ஜெய் ஹிந்த்’ முழக்கமிட்டனர். இந்திய வெளியுறவுத்துறை அமைச்சர் ஜெய்சங்கர், ஆபரேஷன் கங்காவின் முதல் படி வெற்றிகரமாக முடிந்திருப்பதாக ட்விட்டரில் தெரிவித்தார்.

தாயகம் திரும்பிய இந்திய மாணவர்கள்
தாயகம் திரும்பிய இந்திய மாணவர்கள்

இரண்டாம் கட்ட நடவடிக்கை:

அதைத் தொடர்ந்து, மேலும் இரண்டு இந்திய விமானங்கள் ருமேனியா தலைநகர் புகாரெஸ்டுக்கும், ஹங்கேரி தலைநகர் புடாபெஸ்டுக்கும் அனுப்பிவைக்கப்பட்டன. மறுநாள் பிப்ரவரி 27-ம் தேதி, புகாரெஸ்டிலிருந்து மேலும் 250 மாணவர்களை இந்தியாவின் இரண்டாவது விமானம் பத்திரமாக மீட்டு, அதிகாலையில் தலைநகர் டெல்லிக்குக் கொண்டுவந்து சேர்த்தது. விமான நிலையத்தில் வந்திறங்கியவர்களை மத்திய விமானப் போக்குவரத்துத்துறை அமைச்சர் ஜோதிராதித்ய சிந்தியா வரவேற்றார்.

அடுத்த மூன்றாவது விமானம், ஹங்கேரி தலைநகர் புடாபெஸ்டிலிருந்து, 240 இந்தியர்களுடன் புறப்பட்டு, காலை 10 மணியளவில் இந்தியத் தலைநகர் டெல்லிக்கு வந்து சேர்ந்தது. அதேபோல், மாலை 6:30 மணியளவில் நான்காவது விமானமும் டெல்லியை வந்தடைந்தது.

இவ்வாறு இரண்டு நாள் தொடர் நடவடிக்கையின் விளைவாக, 4 விமானங்கள் மூலம் 21 தமிழக மாணவர்கள் உட்பட 907 இந்தியர்கள் மீட்கப்பட்டனர்.

விமான நிலையத்தில் இந்திய மாணவர்கள்
விமான நிலையத்தில் இந்திய மாணவர்கள்

மூன்றாம் கட்ட நடவடிக்கை:

மூன்றாம் கட்ட நடவடிக்கையாக, கடந்த பிப்ரவரி 28-ம் தேதி, உக்ரைனில் சிக்கியிருக்கும் இந்தியர்களை மீட்க மேலும் 7 சிறப்பு விமானங்களை இந்திய அரசாங்கம் அனுப்பியது. அதில், ருமேனியா தலைநகர் புகாரெஸ்டிலிருந்து 249 இந்தியர்களை மீட்ட ஐந்தாவது சிறப்பு விமானம், வெற்றிகரமாக டெல்லியை வந்தடைந்தது. அதன்படி, மொத்தம் 5 விமானங்கள் மூலம் உக்ரைனிலிருந்து சுமார் 1,156 இந்தியர்கள் தாயகம் திரும்பினர்.

விமானத்தில் இந்தியர்கள்
விமானத்தில் இந்தியர்கள்

நான்காம் கட்ட நடவடிக்கை:

அடுத்தடுத்து அனுப்பப்பட்ட இந்திய விமானங்கள் மூலம் ஆயிரக்கணக்கான மாணவர்கள் பாதுகாப்பாக நாடு திரும்பினர். இது குறித்துப் பேசிய இந்திய வெளியுறவுத்துறை அமைச்சர் ஜெய்சங்கர், கடந்த பிப்ரவரி 26-ந் தேதி முதல் நான்கு நாள்களில் 9 விமானங்கள் மூலம் சுமார் 2,000 இந்தியர்கள் மீட்கப்பட்டதாகவும், கடந்த 24 மணி நேரத்தில் மேலும் 1,377 இந்தியர்களுடன் 6 விமானங்கள் இந்தியா திரும்பியதாகவும் தகவல் தெரிவித்தார்.

அதைத் தொடர்ந்து, இந்திய அரசு மீட்புப் பணிகளை துரிதப்படுத்துவதற்காக, உக்ரைன் அண்டை நாடுகளுக்கு, மத்திய அமைச்சர்கள் ஹர்தீப் சிங் பூரி, ஜோதிராதித்ய சிந்தியா, கிரண் ரிஜிஜூ, வி.கே.சிங் உள்ளிட்டோரை அனுப்பிவைத்தது.

இந்தியக் கொடியுடன் மாணவர்கள்
இந்தியக் கொடியுடன் மாணவர்கள்

ஐந்தாம்கட்ட நடவடிக்கை:

கடந்த மார்ச் 3-ம் தேதி, ருமேனியா தலைநகர் புகாரெஸ்டிலிருந்து இந்திய விமானப்படையின் சி-17 ரக போர் விமானம் மூலம், 210 இந்தியர்கள் மீட்கப்பட்டனர். தலைநகர் டெல்லியை வந்தடைந்த அவர்களை இந்தியப் பாதுகாப்புத்துறை இணை அதிகாரி அஜய் பட் வரவேற்றார்.

ஆபரேஷன் கங்கா
ஆபரேஷன் கங்கா

அடுத்தடுத்து 10 சிவில் விமானங்கள் மூலம் ஒரே நாளில் சுமார் 2,185 இந்தியர்கள் தாயகம் திரும்பினர். அவர்கள், ருமேனியா தலைநகர் புகாரெஸ்ட்டிலிருந்து 5 விமானங்கள், ஹங்கேரி தலைநகர் புடாபெஸ்டிலிருந்து 2 விமானங்கள், போலந்து நாட்டின் ரிஸ்சோவிலிருந்து 2 விமானங்கள், இந்திய விமானப்படையின் 3 விமானங்கள் மூலம் இந்தியா கொண்டுவரப்பட்டனர்.

ஆபரேஷன் கங்கா செயல்திட்டத்தின் மூலம் கடந்த பிப்ரவரி 22 முதல் இன்றுவரை மொத்தம் 6,200-க்கும் அதிகமானோர் மீட்டு வரப்பட்டுள்ளதாக இந்திய அரசாங்கம் தெரிவித்தது.

அடுத்தகட்ட நடவடிக்கை:

இந்த நிலையில், அடுத்த இரண்டு நாள்களில் 7,400-க்கும் அதிகமான இந்தியர்கள் விமானம் மூலம் இந்தியா அழைத்துவரப்படுவார்கள் என எதிர்பார்ப்பதாக மத்திய அரசு தெரிவித்திருக்கிறது. மேலும், அவர்களை இந்திய விமானப் படையின் சி-17 விமானங்களுடன் ஏர் இந்தியா, இண்டிகோ, ஸ்பைஸ் ஜெட், கோ பர்ஸ்ட், கோ ஏர் உள்ளிட்ட வர்த்தக விமானங்கள் மூலமாகவும் மீட்கவுள்ளதாக மத்திய அரசு தெரிவித்திருக்கிறது.

ஆபரேஷன் கங்கா
ஆபரேஷன் கங்கா

அதைத் தொடர்ந்து, இன்று மத்திய வெளியுறவுத்துறை அமைச்சகம் வெளியிட்ட அறிக்கையில், உக்ரைனின் கார்கிவ் மற்றும் பிசோச்சின் பகுதியில் 900 முதல் 1,000 இந்தியர்கள் வரை சிக்கியிருப்பதாகவும், அவர்களை மீட்க தீவிர நடவடிக்கை எடுத்துவருவதாகவும், மேலும் உக்ரைனில் கடைசி இந்தியரை மீட்கும் வரை ஆபரேஷன் கங்கா திட்டம் தொடரும் எனவும் தெரிவிக்கப்பட்டிருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism