Published:Updated:

`இந்தியாவுக்கு நோ சொல்லுங்கள்’ - புதிய பிரசாரத்தைத் தொடங்கிய பாகிஸ்தான்

சத்யா கோபாலன்

இந்தியத் திரைப்படங்கள் பாகிஸ்தானில் அதிக வரவேற்பு பெற்றவை. அந்நாட்டின் மொத்த வருவாயில் 70% பாலிவுட் திரைப்படங்கள் மூலம் கிடைப்பது.

இம்ரான்கான்
இம்ரான்கான்

ஜம்மு-காஷ்மீர் மாநிலம் பிரிக்கப்பட்டு 2 யூனியன் பிரதேசங்களாக அறிவிக்கப்பட்டது முதல், இந்தியா-பாகிஸ்தான் எல்லையில் பதற்றம் நிலவிவருகிறது. இதனால் காஷ்மீர் பள்ளத்தாக்கு மற்றும் பாகிஸ்தான் எல்லையோரப் பகுதிகளில் அதிகமான பாதுகாப்புப் படை வீரர்கள் குவிக்கப்பட்டுள்ளனர்.

மோடி
மோடி

இதற்கிடையில் காஷ்மீர் சிறப்புச் சட்டப்பிரிவு 370 பற்றி நாட்டு மக்களிடம் உரையாடிய பிரதமர் மோடி, ``சிறப்புச் சட்டப்பிரிவு 370, 35A-வை ஆயுதமாகப் பயன்படுத்தி காஷ்மீரில் உள்ள மக்களின் மனதில் எதிர்ப்பை விதைக்கப் பாகிஸ்தான் முயற்சி செய்யும். சட்டப்பிரிவு நீக்கத்தினால் எதுவும் நடக்கப்போவதில்லை. ஆனால் பிரிவினைவாதம், பயங்கரவாதம், ஊழல் போன்றவை முற்றிலும் தடுக்கப்படும்” எனப் பேசியிருந்தார்.

இந்த நிலையில், `இந்தியாவுக்கு நோ சொல்லுங்கள்’ என்ற புதிய பிரசாரத்தை இன்று முதல் தொடங்கியுள்ளது பாகிஸ்தான் அரசு. இதனால் இந்தியாவுடன் எந்த கலாசார பரிமாற்றமும் இல்லை என்று அறிவிக்கப்பட்டு, இனி இந்தியப் படங்கள் பாகிஸ்தானில் திரையிடப்படாது எனவும் தெரிவிக்கப்பட்டுள்ளது.

இந்தியாவுக்கு எதிர்ப்பு தெரிவிக்கும் முழக்கத்தைப் பாகிஸ்தானின் தகவல் தொழில்நுட்பத் துறை வெளியிட்டுள்ளது. அந்நாட்டின் புதிய உத்தரவுகளின்படி அங்கு ஒளிபரப்பாகும் அனைத்து வகையான இந்திய ஊடகங்களும் நிறுத்தப்படவுள்ளது. ஜம்மு-காஷ்மீருக்கு வழங்கப்பட்ட சிறப்பு அந்தஸ்து ரத்து செய்யப்பட்டதால் இந்தத் தடை விதிக்கப்பட்டுள்ளதாக கூறப்படுகிறது.

பாகிஸ்தான்
பாகிஸ்தான்

இதேபோல் இந்தியா- பாகிஸ்தான் இடையில் சம்ஜவுதா எக்ஸ்பிரஸ் இயக்கப்பட்டு வருகிறது. சிறப்பு சட்டப்பிரிவு ரத்துக்குப் பிறகு இயக்கப்பட்ட ரயில், வாகா பகுதியிலேயே நிறுத்தியது பாகிஸ்தான். இனி இந்த ரயில் ரத்து செய்யப்படுவதாக அறிவிக்கப்பட்டது. ஆனால், பாகிஸ்தானின் அறிவிப்பை இந்திய ரயில்வே ஏற்க மறுத்தது. இருந்தும் பாகிஸ்தான் தங்களின் நிலைப்பாட்டிலிருந்து கீழே இறங்கவில்லை. இதையடுத்து, இந்தியாவிலிருந்து இன்ஜின் கொண்டுசென்ற பிறகு ரயில் இயக்கப்பட்டது. இதனால் ஐந்து மணிநேரம் காலதாமதமாக ரயில் டெல்லிக்கு வந்தடைந்தது.