Published:Updated:

`இந்தியாவுக்கு அஞ்சியே அபிநந்தன் விடுவிக்கப்பட்டார்!’- பாகிஸ்தான் நாடாளுமன்றத்தில் எம்.பி ஒப்புதல்

அபிநந்தன்
அபிநந்தன்

`அபிநந்தனை விடுவித்துவிடுங்கள். இல்லையேல் இந்தியா, பாகிஸ்தான் மீது 9 மணிக்கு போர் தொடுக்கும்’ என்று குரேஷி கூறியதாகவும் அயாஸ் தெரிவித்தார்.

கடந்த 2019, பிப்ரவரி 14-ம் தேதி ஜம்மு-காஷ்மீரிலுள்ள புல்வாமா பகுதியில் நடந்த தீவிரவாதிகளின் தற்கொலைப் படை தாக்குதலில் 44 சி.ஆர்.பி.எஃப் வீரர்கள் கொல்லப்பட்டனர். இதற்கு பதிலடி கொடுக்கும்விதமாக, பிப்ரவரி 26-ம் தேதி இந்திய விமானப்படை, பாகிஸ்தானின் பால்கோட் பகுதிக்குள் நுழைந்து அங்கிருந்த ஜெய்ஷ்-இ-முகமது அமைப்பின் முகாம்கள் மீது தாக்குதல் நடத்தியது.

இம்ரான் கான்
இம்ரான் கான்

இதையடுத்து பிப்ரவரி 27-ம் தேதி, இந்திய எல்லைக்குள் பாகிஸ்தான் விமானப்படையின் F16 போர் விமானம் அத்துமீறி நுழைந்தது. அதை இந்திய வீரர்கள் சுட்டு வீழ்த்தினர். அப்போது நடந்த சண்டையில் இந்திய விமானப்படையின் மிக்-21 ரக விமானம் பாகிஸ்தான் பகுதியின் எல்லையோர கிராமத்தில் கீழே விழுந்து நொறுங்கியது. அதிலிருந்த விமானி அபிநந்தனை பாகிஸ்தான் ராணுவம் சிறைப்பிடித்தது. அபிநந்தனை விடுவிக்குமாறு பல்வேறு உலக நாடுகள் அழுத்தம் கொடுத்த நிலையில், மார்ச் 1-ம் தேதி விடுவிக்கப்பட்ட அபிநந்தன், அட்டாரி - வாகா எல்லை வழியாக இந்தியா திரும்பினார்.

இந்த விவகாரம் குறித்து பாகிஸ்தான் நாடாளுமன்றத்தில் எதிர்க்கட்சி எம்.பி ஒருவர் பேசியிருப்பது பரபரப்பை ஏற்படுத்தியிருக்கிறது. நாடாளுமன்றத்தில் பேசிய பாகிஸ்தான் முஸ்லிம் லீக் (PML-N) கட்சி எம்.பி அயாஸ் சாதிக், `2019-ம் ஆண்டு இந்திய விமானப் படையின் விங் கமாண்டர் அபிநந்தன் பிடிபட்டபோது, பாகிஸ்தானில் உயர்மட்டக் கூட்டம் நடைபெற்றது. இம்ரான் கான் கலந்துகொள்ள மறுத்த அந்தக் கூட்டத்தில் பி.பி.பி., பி.எம்.எல் கட்சியின் தலைவர்கள், ராணுவத் தலைமை ஜெனரல் ஜாவேத் பஜ்வா ஆகியோர் கலந்துகொண்டு இந்திய விமானப்படை வீரர் அபிநந்தனை விடுவிக்கப் பரிந்துரை செய்தோம்.

அபிநந்தன்
அபிநந்தன்

அந்தக் கூட்டத்தில் பங்கேற்ற வெளியுறவுத்துறை அமைச்சர் ஷா மஹ்மூத் குரேஷி, `ஒருவேளை பாகிஸ்தான், விங் கமாண்டர் அபிநந்தன் வர்தமானை விடுவிக்காவிட்டால், இன்று இரவு 9 மணிக்கு இந்தியா, பாகிஸ்தான் மீது போர் தொடுக்கும்’ என்று கூறினார். அப்போது, பாகிஸ்தான் ராணுவத் தலைமை ஜெனரல் கமர் ஜாவேத் பஜ்வாவின் கால்கள் நடுங்கின’’ என்று நடந்த சம்பவத்தை நினைவுகூர்ந்தார்.

மேலும் அவர் கூறுகையில், ``எனக்கு அந்த நாள் நன்றாகவே நினைவில் இருக்கிறது. அந்தக் கூட்டத்தில் ஷா மஹ்மூத் குரேஷி பங்கேற்றிருந்தார். இம்ரான் கான் கூட்டத்தில் பங்கேற்கவில்லை. ராணுவத் தளபதி பஜ்வா அறைக்குள் நுழைந்தார். அப்போது அவரது கால்கள் நடுங்கின. வியர்வையில் நனைந்திருந்தார். `அபிநந்தனை விடுவித்துவிடுங்கள். இல்லையேல் இந்தியா, பாகிஸ்தான் மீது 9 மணிக்கு போர் தொடுக்கும்’ என்று குரேஷி கூறியதாகவும் அயாஸ் தெரிவித்தார்.

அடுத்த கட்டுரைக்கு