Published:Updated:

`அதிகாரம் கொடுத்த அதிபருக்கே செக்; ராணுவ ஆட்சி!' - தூக்குத்தண்டனைக் கைதியான பர்வேஸ் முஷாரப்

பாகிஸ்தானின் முன்னாள் அதிபர் பர்வேஸ் முஷாரப்புக்கு அந்நாட்டுச் சிறப்பு நீதிமன்றம் தூக்குத் தண்டனை விதித்து இன்று தீர்ப்பு வெளியிட்டுள்ளது.

முஷாரப்
முஷாரப்

பாகிஸ்தான் அரசியல் வரலாற்றில் நீக்க முடியாத ஒரு பெயர் பர்வேஸ் முஷாரப். சீரான முறையில் பயணித்துக்கொண்டிருந்த பாகிஸ்தானை ராணுவ ஆட்சிக்கு மடைமாற்றி சர்வதேச அரங்கை தன் பக்கம் திரும்பிப் பார்க்க வைத்தவர் இவர். இதன் காரணமாகவே தற்போது இவருக்குத் தூக்குத்தண்டனை விதிக்கப்பட்டுள்ளது.

முஷாரப்
முஷாரப்

பிரிட்டிஷ் ஆட்சிக்காலத்தில், அதாவது 1943-ம் ஆண்டு இந்தியாவின் டெல்லியில் பிறந்தார் முஷாரப். பின்னர் பாகிஸ்தானின் இஸ்தான்புல் மற்றும் கராச்சி பகுதிகளில் தன் இளமைக் காலத்தைக் கழித்தார். இவர் லாகூரில் உள்ள கிறிஸ்டியன் கல்லூரி மற்றும் லாகூர் கல்லூரியில் பாதுகாப்புத் துறையில் பட்டம் பெற்றார்.

தொடர்ந்து 1961-ம் ஆண்டு பாகிஸ்தானின் ராணுவத்தில் பணியாற்றினார். தொடர்ந்து 1964-ம் ஆண்டு நடந்த ஆப்கான் சிவில் போரில் முக்கியப் பங்காற்றினார். மேலும் 1965-ம் ஆண்டு நடந்த இந்தியா - பாகிஸ்தான் இடையேயான போரிலும் முன்னிலை வகித்தார். இப்படியே பலகாலம் இவரது வாழ்க்கை சென்றுகொண்டிருந்தது.

பின்னர் 1980-களில் பாகிஸ்தானின் பீரங்கிப்படை கமாண்டராக நியமிக்கப்பட்டு அதிலும் சிறந்து விளங்கினார். தொடர்ச்சியாக 1990-ம் ஆண்டு பாகிஸ்தான் ராணுவ தளபதியாகப் பதவி உயர்வு, துணை ராணுவச் செயலர் மற்றும் ராணுவ இயக்குநர் ஜெனரல் போன்ற பல்வேறு பதவிகளை வகித்துவந்தார்.

இந்நிலையில், 1999-ம் ஆண்டு நவாஸ் ஷெரீஃப் பாகிஸ்தானின் அதிபராக இருந்தபோது, முஷாரப்புக்கு அனைத்து சிறப்பு உரிமைகளையும் வழங்கி அப்போது நடந்த இந்தியா - பாகிஸ்தான் இடையேயான கார்கில் போருக்கு முஷாரப்பை தலைமை தாங்க அனுப்பி வைத்தார்.

முஷாரப்
முஷாரப்

அந்தப் போரின் தோல்விக்குப் பிறகு, நவாஸ் ஷெரீஃப்புக்கும் முஷாரப்புக்கும் இடையே கடுமையான மோதல் நிலவியது. இதைப் பயன்படுத்திக்கொண்ட முஷாரப், தன் கட்டுப்பாட்டிலிருந்த ராணுவத்தில் கிளர்ச்சி செய்து ஷெரீஃப்புக்கு எதிராகச் சதித்திட்டம் நடத்தி, 2001-ம் ஆண்டு அதிரடியாக அரசியலில் நுழைந்தார்.

அப்போது அதிபராக இருந்த ஷெரீஃப்பை சிறையில் அடைத்து பகிரங்கமாகத் தன்னை பாகிஸ்தானின் அதிபராக அறிவித்துக்கொண்டார். அந்தக் காலகட்டத்தின்போது சுமார் ஒரு மாதம் பாகிஸ்தான் முழுவதும் ராணுவக் கட்டுப்பாட்டில் இருந்தது.

முஷாரப் அதிபராகப் பதவியேற்ற பிறகும் தன் ராணுவ ஜெனரல் பதவியை ராஜினாமா செய்ய மறுத்துவிட்டார். பின்னர், பல வருடங்கள் பாகிஸ்தானை ஆட்சி செய்து வந்தார். 2007-ம் ஆண்டு அக்டோபர் மாதம் நடந்த அதிபர் தேர்தலில் மீண்டும் முஷாரப்பே அதிபராகத் தேர்ந்தெடுக்கப்பட்டார்.

மேலும், அவர் அப்போதும் தன் ராணுவ ஜெனரல் பதவியை ராஜினாமா செய்ய மறுத்துவிட்டார். இது பாகிஸ்தான் முழுவதும் பெரும் சர்ச்சையாக வெடித்தது. இதன் காரணமாகவே 2007-ம் ஆண்டு நவம்பர் 3-ம் தேதி பாகிஸ்தானின் அதிபராகவும் அந்நாட்டு ராணுவ ஜெனரலாகவும் அரசியலமைப்பை முடக்கி திடீரென அவசரநிலையைப் பிரகடனப்படுத்தினார்.

முஷாரப்
முஷாரப்

இதனால் உச்ச நீதிமன்ற நீதிபதிகளை சிறைபிடித்தல், பதவி நீக்கம் போன்ற பல்வேறு சம்பவங்கள் நடைபெற்றன. அவசரநிலையைக் கொண்டுவந்த அடுத்த 25-வது நாளில் தன் ராணுவ ஜெனரல் பதவியை ராஜினாமா செய்தார் முஷாரப்.

இவரின் செயலுக்கு அமெரிக்கா உள்ளிட்ட பல்வேறு நாடுகள் கடும் கண்டனம் தெரிவித்தன. தொடர் அரசியல் அழுத்தங்களால் 2008-ம் ஆண்டின் முற்பகுதியில் தன் பிரதமர் பதவியை ராஜினாமா செய்துவிட்டு, அனைத்து பாகிஸ்தான் முஸ்லீம் கட்சி சார்பில் ஜனநாயக முறைப்படி தேர்தலில் போட்டியிட்டுப் படுதோல்வியடைந்தார்.

அதன் பின்னர், அவர் பாகிஸ்தான் அரசியலிலிருந்து முற்றிலும் காணாமல்போனார். இதற்கிடையில் 2013-ம் ஆண்டு அவரது கட்சியே அவர் மீது தேசத்துரோக வழக்கு தொடர்ந்தது. மேலும், ஊழல், பெனாசிர் பூட்டோ போன்ற சில பாகிஸ்தான் தலைவர்கள் கொலை ஆகியவற்றில் முஷாரப்புக்கு தொடர்புள்ளது என்ற குற்றச்சாட்டும் அவர் மீது சுமத்தப்பட்டது.

தன் மீதான வழக்கிலிருந்து தப்பிக்க நீண்ட காலம் தலைமறைவான வாழ்க்கை வாழ்ந்து வந்தார். இறுதியில் 2014-ம் ஆண்டு முஷாரப் குற்றவாளி என உறுதி செய்யப்பட்டு அதற்கான அனைத்து ஆவணங்களும் முறையாகத் தாக்கல் செய்யப்பட்டன.

முஷாரப்
முஷாரப்

பின்னர் மீண்டும் பாகிஸ்தான் திரும்பிய இவர் வீட்டுச் சிறையில் அடைக்கப்பட்டு வெளிநாடு செல்ல தடை விதிக்கப்பட்டது. நீண்ட காலமாக நடைபெற்று வந்த இந்த வழக்கு விசாரணையில் தன் மீதான குற்றத்தை முற்றிலும் மறுத்துவந்தார் முஷாரப். இறுதியாக இந்த வழக்கு இஸ்லாமாபாத் சிறப்பு நீதிமன்றத்துக்கு மாற்றப்பட்டு மூன்று நீதிபதிகள் அடங்கிய அமர்வில் விசாரணை நடைபெற்று வந்தது.

இந்நிலையில், 2016-ம் ஆண்டு திடீரென முஷாரப்புக்கு உடல்நிலை சரியில்லாமல்போனது இதனால் வெளிநாடு செல்ல அனுமதி பெற்று துபாய் மருத்துவமனையில் சிகிச்சை பெற்றார். முஷாரப் மீதான தேசத்துரோக வழக்கின் விசாரணைகள் அனைத்தும் கடந்த நவம்பர் மாதம் 19-ம் தேதியுடன் முடிவடைந்தது. அவருக்கு அதே மாதம் 28-ம் தேதி இறுதித் தீர்ப்பு வழங்குவதாக இருந்தது. ஆனால், தனது தரப்பிலான வாதங்களை பதிவு செய்ய கால அவகாசம் கேட்டு இஸ்லாமாபாத் உயர் நீதிமன்றத்தில் மனுத்தாக்கல் செய்தார்.

முஷாரப்
முஷாரப்

இதையடுத்து அவர் மீதான வழக்கில் தீர்ப்பு வழங்க இடைக்கால தடை விதித்தது உயர் நீதிமன்றம். மேலும், முஷாரப் தன் தரப்பு வாதங்களை டிசம்பர் 5-ம் தேதிக்குள் வழங்கலாம் என அறிவித்தது. இந்நிலையில், பாகிஸ்தான் முன்னாள் அதிபர் முஷாரப் மீதான தேசத் துரோக வழக்கில் இன்று அவருக்குத் தூக்குத்தண்டனை விதித்து இறுதித் தீர்ப்பு வழங்கப்பட்டுள்ளது.