Published:Updated:

இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்

ஒட்டுமொத்த விகடனுக்கும் ஒரே ஷார்ட்கட்

Use App
இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்
இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்

இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்

பிரீமியம் ஸ்டோரி

மிழக மீனவர்களின் உயிரைப் பறித்து, உடல்களைச் சிதைத்து, உடைமைகளை அபகரித்துவந்த இலங்கை அரசு இப்போது, இவர்களின் வாழ்வாதாரத்தைச் சட்டபூர்வமாகப் பறிக்கத் தொடங்கியுள்ளது.

1983-க்கு முன்புவரை தொப்புள்கொடி உறவுகளாகவும் மாமன் மச்சான்களாகவும் உறவாடியபடி இந்திய-இலங்கை மீனவர்கள் மீன்பிடித் தொழிலில் ஈடுபட்டுவந்தனர். இலங்கையில் எழுந்த இனப்பிரச்னையைக் காரணம்காட்டி இரு நாட்டு மீனவர்களின் உறவுக்கு வெடிவைத்தது இலங்கை அரசு. இதுவரை, 600-க்கும் அதிகமான தமிழக மீனவர்கள் இலங்கைக் கடற்படையினரின் தாக்குதலில் உயிரிழந்துள்ளனர். ஆயிரத்துக்கும் மேற்பட்டோர் உடல் ஊனமடைந்தனர். மீனவர்களின் பல கோடி மதிப்புடைய உடைமைகள் நாசமாக்கப்பட்டன. இந்தச் சூழலில், இந்த ஜனவரியில் நிறைவேற்றப்பட்ட புதிய சட்டத்தின் மூலம் இந்திய மீனவர்களின் வாழ்வாதாரத்தை  இலங்கை அரசு முடக்க முயற்சி செய்கிறது.

இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்

இதுகுறித்து நிரபராதி மீனவர் விடுதலைக்கான கூட்டமைப்பின் பிரதிநிதி யு.அருளானந்தம், ‘‘இலங்கை அரசு, 1979-ம் ஆண்டு உருவாக்கிய ‘கடல் தொழில் வெளிநாட்டு மீன்பிடி வல்லங்கள் ஒழுங்குமுறைச் சட்டம்’, புதிய திருத்தங்களுடன் இந்த ஜனவரியில் நிறைவேற்றப்பட்டுள்ளது. இதன்படி, இலங்கை கடல் பகுதிக்குள் வரும் வெளிநாட்டுப் படகுகளுக்கு, அதன் நீளத்தின் அடிப்படையில் அபராதம் விதிக்கப்படும். 15 மீட்டர் நீளமுள்ள படகுக்கு இந்திய மதிப்பில் ரூ.21 லட்சத்து 18 ஆயிரமும், 15-24 மீட்டர் நீளம் கொண்ட படகுக்கு ரூ.85 லட்சமும் அபராதத் தொகையாக நிர்ணயிக்கப்பட்டுள்ளது. எல்லை தாண்டும் படகுகளில் வரும் மீனவர்களுக்கு  ஓர் ஆண்டு முதல் இரண்டு ஆண்டுகள்வரை தண்டனை விதிக்கவும், எல்லைதாண்டும் படகுகளின் உரிமையாளர்கள் இலங்கை நீதிமன்றத்தில் நேரில் ஆஜராகவும் இந்தச் சட்டத்தில் வகை செய்யப்பட்டுள்ளது.

இந்தச் சட்டம், சமீபத்தில் இலங்கை கடற்படையினரால் பிடித்துச்செல்லப்பட்ட ராமேஸ்வரம் மீனவர்கள்மீது பாய்ந்துள்ளது. பாக் நீரிணை பகுதியில் ஆண்டுக்கு 300 நாள்கள் மீன்பிடிக்கச் சென்றுவந்த மீனவர்கள், இப்போது 50 நாள்கள்கூட செல்ல முடியாத நிலை உள்ளது. இந்தச் சட்டத்தினால், இந்த 50 நாள் தொழிலுக்கும் வேட்டு வைக்கும் நிலை உருவாகியுள்ளது.

வரம்பு மீறிய மீன் பிடித்தல் முறையைத் தடுப்பதில் கவனம் செலுத்த வேண்டிய இலங்கை, மீனவர் அல்லாத சில அமைப்புகளின் பின்புலத்தால் இந்திய மீனவர்களை முற்றிலும் ஒழிக்கும் நடவடிக்கையில் இறங்கியுள்ளது. இதைத் தடுப்பதற்கு உரிய அழுத்தம் கொடுக்க வேண்டிய மத்திய அரசு, கண்டும் காணாததுபோல் உள்ளது’’ என்றார்.

தமிழ்நாடு மீன்பிடித் தொழிற்சங்கக் கூட்டமைப்பு (சி.ஐ.டி.யு) பொதுச்செயலாளர் செந்தில்வேல், ‘‘பாக் நீரிணைப் பகுதியை நம்பி தமிழகத்தின் ஆறு மாவட்ட மீனவர்கள் உள்ளனர். இப்பகுதியில், சுமார் ஆறாயிரம் விசைப்படகுகள் உள்ளன. இவற்றை நம்பியுள்ள இரண்டு லட்சத்துக்கும் அதிகமான மீனவர்கள் குறுகிய எல்லை, குறைந்துவரும் மீன்வளம் போன்றவற்றால் வருடத்தில் 50 நாள்களே கடலுக்குச் செல்கின்றனர். ஒவ்வொரு நாட்டுக்கும் கடல் எல்லைகள் வகுக்கப் பட்டிருந்தாலும், அதில் வளரும் மீன் இனங்கள் ஒரே இடத்தில் இருப்பதில்லை. எனவேதான், மீன்கள் இருக்கும் இடத்தைத் தேடி மீனவர்கள் செல்லும் நிலை உள்ளது.

இலங்கையிடம் பேசுவாரா பிரதமர் மோடி?! - தமிழக மீனவர்களை ஒழிக்கும் சட்டம்

இதில் ஏற்படும் பிரச்னைகளைத் தவிர்க்கும் வகையில், இந்திய அரசு மாற்றுத்தொழிலாக ஆழ்கடல் மீன்பிடிப்புத் திட்டத்தைத் தொடங்கியுள்ளது. இதன்படி, ஆண்டுக்கு 500 படகுகள் வீதம் நான்கு ஆண்டுகளில் இரண்டாயிரம் படகுகளை உருவாக்கத் திட்டமிட்டுள்ளது. ஆனால், இந்தத் திட்டம் தொடங்கி ஒரு வருடம் ஆன நிலையில், 16 படகுகளுக்கு மட்டுமே வேலை நடந்து வருகிறது. இதனால், நம் மீனவர்கள் பாரம்பர்யமாக மீன்பிடித்து வந்த இடங்களுக்குச் சென்று மீன்பிடிப்பது தவிர்க்க முடியாதது. இலங்கை அரசின் புதிய சட்டத்தால் மீன்பிடித் தொழிலே கேள்விக்குறியாகிவிடும். எனவே, இந்திய அரசு தலையிட்டு இலங்கை அரசின் இந்தச் சட்டத்தை நிறுத்திவைக்க வேண்டும்’’ என்றார்.

மீனவர் சங்கர், ‘‘இதுவரை இலங்கை கடற்படையினால் பிடித்துச் செல்லப்பட்டாலும் சில நாள்களிலோ, சில மாதங்களிலோ திரும்பி வந்துவிடுவோம் என்ற நம்பிக்கையில் எங்கள் குடும்பத்தினர் எங்களைக் கடலுக்கு அனுப்பிவைத்தனர். அதற்கும் ஆபத்து வந்துவிட்டது. படகு வைத்திருப்பவர்கள் எல்லாம் முதலாளிகள் கிடையாது. 90 சதவிகிதம் பேர் அன்றாடம் கடனுக்கு டீசல் வாங்கிக் கடலுக்குச் செல்பவர்கள். போதுமான மீன் கிடைத்தால்தான் கடனை அடைக்க முடியும். கடனைக் கட்ட முடியாததால், படகுகளைப் பலர் இழந்துள்ளனர். படகுக்கு டீசல் வாங்கவே கையேந்தும் நிலையில் உள்ள மீனவர்களால், பல லட்சம் ரூபாய் அபராதத்தை எப்படிக் கட்ட முடியும்? இந்த நெருக்கடிகளால் படகுகளை அடிமாட்டு விலைக்கு விற்றுவிட்டு வேறு தொழில் தேடிச்செல்லும் நிலைக்கு  படகு உரிமையாளர்கள் தள்ளப்படுவார்கள். அவர்களை நம்பியிருக்கும் நாங்கள் வேலை இழந்து பஞ்சம் பிழைக்க வெளி மாநிலங்களுக்குச் செல்லும் நிலை உருவாகும்’’ என்றார் கவலையுடன்.

மோடியின் செவிகளில் மீனவர்களின் ‘மான் கீ பாத்’ (மனதின் குரல்) கேட்குமா?

- இரா.மோகன்
படங்கள்: உ.பாண்டி
ஓவியம்: ஹாசிப்கான்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு