Published:Updated:

பாரத் நெட் டெண்டர் விவகாரம்: உயர் நீதிமன்றப் படியேறிய தி.மு.க...

ஆர்.பி.உதயகுமார் - எடப்பாடி பழனிசாமி
பிரீமியம் ஸ்டோரி
News
ஆர்.பி.உதயகுமார் - எடப்பாடி பழனிசாமி

குற்றச்சாட்டை மறுக்கும் ஆர்.பி.உதயகுமார்

‘தமிழகத்தில் செயல்படுத்தப்படவுள்ள மத்திய அரசின் பாரத் நெட் டெண்டர் விவகாரத்தில், முதலமைச்சர் எடப்பாடி பழனிசாமி மற்றும் தகவல் தொழில்நுட்பத்துறை அமைச்சர் ஆர்.பி.உதயகுமார்மீது லஞ்ச ஒழிப்புத்துறை வழக்கு பதிவு செய்து விசாரணை நடத்த உத்தரவிட வேண்டும்’ என்று உயர் நீதிமன்றத்தில் தி.மு.க வழக்கு தொடர்ந்து பரபரப்பை ஏற்படுத்தியுள்ளது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

இந்த டெண்டர் விவகாரத்தில் ஆட்சியாளர்களின் சிபாரிசுகளுக்கு ஒத்துழைக்க மறுத்த சந்தோஷ்பாபு ஐ.ஏ.எஸ் பணியிட மாற்றம் செய்யப்பட்டதில் ஆரம்பித்து, ‘இந்தத் திட்டத்தில் `மேக் இன் இந்தியா’ விதிகள் மீறப்பட்டுள்ளன’ என்று அறப்போர் இயக்கம் மத்திய அரசிடம் புகார் அளித்தது வரை அரசின் செயல்பாடுகள் கேள்விக்குள்ளாக்கப்பட்டன. தி.மு.க-வும் இது தொடர்பாக தொடர்ச்சியாகக் குற்றச்சாட்டை முன்வைத்து வந்தது.

ஆர்.எஸ்.பாரதி
ஆர்.எஸ்.பாரதி

இதைத் தொடர்ந்து, ‘‘புகாருக்குத் தமிழக அரசு விளக்கம் அளிக்க வேண்டும்’’ என்றதுடன், ‘‘மத்திய அரசின் மூன்று செயலாளர்களும், இரண்டு இணைச் செயலாளர்களும்கொண்ட ஒரு நிலைக்குழு இது தொடர்பாக விசாரணை மேற்கொள்ள வேண்டும். விசாரணை முடியும் வரை டெண்டரில் எந்த மேல் நடவடிக்கையும் எடுக்கக் கூடாது’’ என்று ஏப்ரல் 30-ம் தேதி உத்தரவிட்டது மத்திய அரசின் தொழில் மற்றும் உள்நாட்டு வர்த்தக மேம்பாட்டுத்துறை. இதையடுத்து, ‘‘அமைச்சர் ஆர்.பி.உதயகுமாரை பதவிநீக்கம் செய்ய வேண்டும்’’ என்று மு.க.ஸ்டாலின் வலியுறுத்தினார். தி.மு.க-வின் குற்றச்சாட்டுகளை மறுத்து விளக்கம் அளித்தார் ஆர்.பி.உதயகுமார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

இந்த நிலையில்தான் உயர் நீதிமன்றத்தில் தி.மு.க வழக்கு தொடர்ந்துள்ளது. தி.மு.க அமைப்புச் செயலாளர் ஆர்.எஸ்.பாரதி தாக்கல் செய்துள்ள மனுவில், ‘‘1,950 கோடி ரூபாய் மதிப்பிலான இந்த டெண்டரில் கலந்துகொண்ட பெரும்பாலான நிறுவனங்களை விலக்கிவிட்டு குறிப்பிட்ட இரண்டு நிறுவனங்களுக்கு மட்டும் டெண்டர் வழங்கப்பட்டுள்ளது. முதலமைச்சர், துறை அமைச்சர் ஆகியோரின் விருப்பத்துக்கிணங்க டெண்டர் ஒதுக்கும்படி சம்பந்தப்பட்ட துறைச் செயலாளர்கள் அறிவுறுத்தப்பட்டுள்ளனர். டெண்டர் முறைகேட்டில் ஈடுபட்ட முதலமைச்சர், தகவல் தொழில்நுட்ப துறை அமைச்சர்மீது நடவடிக்கை எடுக்க வேண்டும் என்று மே 11-ம் தேதி புகார் கொடுத்தேன். நடவடிக்கை எடுக்கப்படவில்லை. எனவே, எனது புகார்மீது வழக்குப் பதிவு செய்து விசாரணை நடத்துமாறு லஞ்ச ஒழிப்புத்துறைக்கு உத்தரவிட வேண்டும்’’ என்று கோரியுள்ளார்.

ஆர்.பி.உதயகுமார் - எடப்பாடி பழனிசாமி
ஆர்.பி.உதயகுமார் - எடப்பாடி பழனிசாமி

இது குறித்து அமைச்சர் ஆர்.பி.உதயகுமாரிடம் கேட்டோம். ‘‘இந்தத் திட்டம் நீண்டகாலம் மக்களுக்குப் பலனளிக்க வேண்டிய திட்டம். சிறு நிறுவனங்களிடமோ, புதிய நிறுவனங்களிடமோ கொடுத்துவிட முடியாது. நல்ல அனுபவம், உள்கட்டமைப்பு, டர்ன் ஓவர் சிறப்பாக இருக்க வேண்டும். இது முழுக்க ஆன்லைன் டெண்டர். தகுதியுள்ள நிறுவனங்கள் எவை வேண்டுமானாலும் கலந்துகொள்ளலாம். இதில் முறைகேட்டுக்கு எந்த வகையிலும் வழியில்லை. அரசுக்குக் கெட்ட பெயரை ஏற்படுத்த ஸ்டாலின் விரும்புகிறார். பாரத் நெட் டெண்டர் பற்றித் தொடர்ந்து விளக்கமளித்து வருகிறோம். ஆனால், தி.மு.க-வும், சில அமைப்புகளும் அவதூறுகளைப் பரப்பி வருகின்றன’’ என்றார்.