Published:Updated:

மதுரை மாநகராட்சியின் புது குளறுபடி - வழக்கு தொடர்ந்த எம்.எல்.ஏ!

மக்கள் தொகையைவிட வாக்காளர் எண்ணிக்கை அதிகம்!

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி

மொத்த மதிப்பெண்ணே 100தான். ஆனால், ரிசல்ட் 120 மதிப்பெண் என வந்தால் எப்படி இருக்கும்? அப்படி ஒரு விநோதமான வழக்கை, உயர் நீதிமன்ற மதுரை கிளையில் தாக்கல் செய்திருக்கிறார் மதுரை மத்திய தொகுதி சட்டமன்ற உறுப்பினர் மற்றும் தி.மு.க ஐ.டி விங் செயலாளர் பி.டி.ஆர்.பழனிவேல் தியாகராஜன். அதாவது, `மதுரை மாநகராட்சியில் 24 வார்டுகளில் மொத்த மக்கள்தொகையைவிட வாக்காளர்களின் எண்ணிக்கை அதிகமாக இருக்கிறது’ என்பதே இவர் தொடர்ந்துள்ள வழக்கின் சாராம்சம்!

பழனிவேல் தியாகராஜனிடம் பேசினோம். “ஆளுங்கட்சியினர் அவர்களுக்குச் சாதகமான சூழலை உருவாக்கி, மாநகராட்சித் தேர்தலில் வெற்றி பெற திட்டுமிட்டுள்ளனர். ஏற்கெனவே ஊரக உள்ளாட்சிகளில் நடந்த குளறுபடிகளைச் சுட்டிக்காட்டி நீதிமன்றம் சென்றதால்தான், ஊரக உள்ளாட்சித் தேர்தலில் முறைகேடுகளை ஓரளவு குறைக்க முடிந்தது. இதைத் தொடர்ந்து, மாநகராட்சி வார்டுகளில் மறுவரையறை செய்ததில் தேர்தல் ஆணையத்தின் விதிகள் மீறப்பட்டுள்ளன என்பதை ஆய்வுகள் மூலம் கண்டறிந்தோம். அதன் பிறகே இப்படியொரு வழக்கை தாக்கல் செய்திருக்கிறோம்.

பழனிவேல் தியாகராஜன்
பழனிவேல் தியாகராஜன்

எந்த ஒரு தொகுதியிலும் மக்கள்தொகையைவிட வாக்காளர்களின் எண்ணிக்கை கூடுதலாக இருக்க முடியாது. ஆனால், மதுரை மாநகராட்சியில் மொத்தம் உள்ள 100 வார்டுகளில் 24 வார்டுகளில் மட்டும் மறுவரையறை செய்த பிறகு மக்கள் தொகையைவிட வாக்காளர் எண்ணிக்கை அதிகரித்துள்ளது. மத்திய அரசின் மறுவரையறைச் சட்டம்-2003 மற்றும் மக்கள் பிரதிநிதித்துவச் சட்டம் ஆகியவற்றின்படி ஒரு சட்டமன்றத் தேர்தலில் வாக்களித்த வாக்காளர்களை அடுத்த சட்டமன்றத் தேர்தல் வரை வேறு தொகுதிக்கு மாற்றக் கூடாது. அதாவது சட்டமன்றத் தொகுதிகளின் எல்லையை மாற்றியமைக்கக் கூடாது. ஆனால், இந்தச் சட்டத்தைக் கண்டுகொள்ளாமல் இஷ்டத்துக்கு வார்டுகளை மாற்றி அமைத்திருக்கிறார்கள். மதுரை கிழக்கு சட்டமன்றத் தொகுதிக்குள் இருக்கும் 38 வார்டுகளைச் சேர்ந்த வாக்காளர்கள் பலர், தற்போது மதுரை வடக்கு சட்டமன்றத் தொகுதிக்கு மாற்றப் பட்டுள்ளார்கள்.

எந்த ஒரு வார்டும், சட்டமன்றத் தொகுதியின் எல்லைகள் மற்றும் இயற்கையான எல்லைகளைக் கடந்து அமைந்திருக்கக் கூடாது என தமிழ்நாடு நகராட்சி அமைப்புகள் விதி 7-ல் தெளிவாகக் குறிப்பிடப்பட்டுள்ளது. ஆனால், தற்போது நடைபெற்றுள்ள வார்டு மறுவரையறையில் பல புதிய வார்டுகள் இரண்டு சட்டமன்றத் தொகுதிகளுக்குள் அமைந்திருப்பது சட்டத்தை மீறும் செயல்.

அதேபோல், ‘ஒவ்வொரு வார்டுக்குமான மக்கள்தொகை வித்தியாசம் 10 சதவிகிதம் வரை மட்டும் இருக்கலாம்’ என தமிழ்நாடு மறுவரையறை வாரிய சட்டம் சொல்கிறது. ஆனால், மதுரை மாநகராட்சியில் 61 வார்டுகளில் அனுமதிக்கப்பட்ட அளவைவிட வாக்காளர் எண்ணிக்கை கூடுதலாக உள்ளது. பெண்கள் எண்ணிக்கை அதிகம் உள்ள வார்டுகளைத்தான் பெண்களுக்காக ஒதுக்க வேண்டும். ஆனால், பெண்களுக்காக ஒதுக்கப்பட்டுள்ள 34 வார்டுகளில் பெண்களின் எண்ணிக்கை குறைவாக உள்ளது. அதே நேரத்தில் பெண்கள் எண்ணிக்கை அதிகம் இருக்கும் 17 வார்டுகளை பொதுவார்டுகளாக வகைப்படுத்தி இருக்கிறார்கள். ஆளுங்கட்சிக்குச் சாதகமாக ஓட்டுகள் கிடைக்க வேண்டும் என்பதால்தான் இவ்வளவு குளறுபடிகளைச் செய்திருக்கிறார்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

அமைச்சர் செல்லூர் ராஜுவின் மேற்குத் தொகுதி 15 வார்டுகளைத்தான் கொண்டிருந்தது. மறுவரையறைக்குப் பிறகு அவரது தொகுதியில் 22 வார்டுகள் உள்ளன. அந்தத் தொகுதியில் உள்ள 55 சதவிகித வார்டுகளில் வாக்காளர் எண்ணிக்கை சராசரியைவிடக் குறைவாக உள்ளது. எனது மத்திய தொகுதியில் ஆறு வார்டுகளைக் குறைத்திருக்கிறார்கள். வார்டு மறுவரையறை கட்சிப் பாகுபாடின்றி நடுநிலையாக அமைய வேண்டும்” என்ற பழனிவேல் தியாகராஜன்,

“தேர்தலை நிறுத்துவதற்காகத்தான் தி.மு.க-வினர் வழக்கு போடுகிறார்கள் என்று அ.தி.மு.க-வினர் எங்களை விமர்சனம் செய்தாலும் எங்களுக்குக் கவலையில்லை. ஆளுங்கட்சியின் இந்த முறைகேட்டை தமிழக மக்கள் தெரிந்துகொள்ள வேண்டும் என்பதற்காகத்தான் இந்த வழக்கை தாக்கல் செய்திருக்கிறேன்” என்றார்.

மதுரை மாநகராட்சி
மதுரை மாநகராட்சி

பழனிவேல் தியாகராஜனின் வழக்கு, வரும் ஜனவரி 28-ம் தேதி மீண்டும் விசாரணைக்கு வரவிருக்கிறது. மதுரை கலெக்டர், மாநகராட்சி கமிஷனர் ஆகியோருடன் தமிழக தேர்தல் ஆணையமும் இந்த வழக்கில் பதில் அளிக்க வேண்டும் என்று உயர் நீதிமன்றக் கிளை உத்தரவிட்டுள்ளது.

இதுகுறித்து மாநகராட்சி கமிஷனர் விசாகனிடம் பேசினோம். “மாநகராட்சி வார்டுகளைப் பொறுத்தவரை, சரியான முறையில்தான் மறுவரையறை செய்யப்பட்டுள்ளது. தற்போது நீதிமன்ற விசாரணையில் இருப்பதால் அதுகுறித்து விரிவாகப் பேச முடியாது” என்றார்.

வழக்குகள் குறித்தெல்லாம் எந்தக் கவலையும் இல்லாமல், தேர்தலுக்கு உற்சாகமாகத் தயாராகி வருகிறார்கள் மதுரை அ.தி.மு.க-வினர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு