கரூர் கலாட்டா போராட்டம் அறிவித்த தி.மு.க... ஒரே இரவில் வேலையை முடித்த அ.தி.மு.க!

இது செந்தில்பாலாஜி அ.தி.மு.க-வில் இருந்த காலத்தில் இருந்து தொடரும் பிரச்னை. இப்்போது இருவரும் வெவ்வேறு கட்சிகளில் இருப்பதால், மோதல் உச்சத்தில் இருக்கிறது.

. தனது சொந்தத் தொகுதியான அரவக்குறிச்சி பகுதியில் இருக்கும் மூன்று ஏரிகளைச் சீரமைக்காததைக் கண்டிக்கும் வகையில் தூர்வாரும் போராட்டத்தை நடத்த இருப்பதாக அறிவித்தார் செந்தில் பாலாஜி. உடனே இரவோடு இரவாக, அந்த மூன்று ஏரிகளையும் தூர்வார ஏற்பாடு செய்துவிட்டார் விஜயபாஸ்கர். இதனால், செந்தில் பாலாஜி, விஜயபாஸ்கர் இடையிலான மோதலின் வேகம் அதிகரித்திருக்கிறது.

. இந்த விவகாரம் குறித்து தி.மு.க-வினர் சிலரிடம் பேசினோம். ‘‘அரவக்குறிச்சி தொகுதி யில் செந்தில் பாலாஜி சட்டமன்ற உறுப்பினராக இருப்பதால், அந்தத் தொகுதியில் தமிழக அரசு எந்த மேம்பாட்டையும் செய்வதில்லை. திட்டமிட்டு இப்படிப் புறக்கணிக்கப்படுவதாக செந்தில் பாலாஜி தொடர்ந்து குரல் கொடுத்து வந்தார்.

. கரூர் மாவட்டத்தில் பல பகுதிகளில் குடிமராமத்து திட்டம்மூலம் நீர்நிலைகள் சீரமைக்கப்பட்டு வருகின்றன. ஆனால், அரவக்குறிச்சியில் ஒரு நீர்நிலையைக்கூட இந்தத் திட்டத்தில் சேர்க்கவில்லை. இதற்கு முக்கியக் காரணம் அமைச்சர் விஜயபாஸ்கர்தான். அதனால் கோபமான செந்தில் பாலாஜி, அரவக்குறிச்சி தொகுதியில் அடங்கியுள்ள நெடுங்கூர், ஈசநத்தம், சுக்காம்பட்டி ஆகிய கிராமங்களில் உள்ள இரண்டு ஏரிகள், கிருஷ்ணராயபுரம் தொகுதியில் வரும் கஞ்சமனூரில் உள்ள ஓர் ஏரி என மூன்று ஏரிகளை தி.மு.க இளைஞரணி சார்பில் தூர்வாரப்போவதாக அறிவித்தார். தி.மு.க மாநில இளைஞரணி துணைச்செயலாளர் அன்பில் மகேஷ் தலைமையில், மக்களை இணைத்து, கடந்த செப்டம்பர் 11-ம் தேதி இந்தத் தூர்வாரும் போராட்டம் நடக்கவிருந்தது. ஆனால், அதற்கு முந்தைய நாளே, வருவாய்க் கோட்டாட்சியர் ரவீந்திரன் தலைமையில் பொதுப்பணித்துறை அதிகாரிகளை முடுக்கிவிட்டு அந்த மூன்று நீர்நிலைகளையும் அமைச்சர் விஜயபாஸ்கர் தூர்வாரிவிட்டார்’’ என்றனர்.

. திட்டமிட்டபடி செப்டம்பர் 11-ம் தேதி அன்பில் மகேஷை அழைத்துவந்தார் செந்தில் பாலாஜி. நெடுங்கூர் ஏரி தூர்வாரப்பட்டிருந்ததால், அருகில் உள்ள குளங்களில் தூர்வாரி போட்டோவுக்கு போஸ் கொடுத்துவிட்டு கிளம்பினர். அப்போது அங்கு திரண்ட சிலர், ‘செந்தில் பாலாஜி, மூன்று சென்ட் நிலம் எங்கே?’ என்ற வரிகள் அடங்கிய பதாகைகளுடன் செந்தில் பாலாஜியின் காரை மறித்தனர். காவல்துறையினர் அவர்களை அப்புறப்படுத்தியதால், அங்கு மோதல் தவிர்க்கப்பட்டது.

. போக்குவரத்துத் துறை அமைச்சர் விஜயபாஸ்கரிடம் பேசினோம். ‘‘கரூர் மாவட்டத்தில் 439 ஏரி, குளங்களைத் தூர்வார அனுமதி பெற்று, அதில் 75 சதவிகிதப் பணிகள் முடிந்துவிட்டன. அப்படி அனுமதி வாங்கியதில், தி.மு.க தூர்வார முயன்ற மூன்று ஏரிகளும் அடக்கம். ஆனால், ஏற்கெனவே அரசு தூர்வார இருந்த நீர்நிலைகளை செந்தில் பாலாஜி தூர்வார முயன்றது வேடிக்கையானது. அவர் தேர்தல் சமயத்தில் அறிவித்த ஏழை மக்களுக்கு மூன்று சென்ட் நிலம் அளிக்கும் வாக்குறுதியை நிறைவேற்ற முயற்சி செய்ய வேண்டும். அதை நிறைவேற்றிவிட்டுத்தான் எங்களைக் குறை சொல்ல வேண்டும்’’ என்றார்.

. செந்தில் பாலாஜியிடம் பேசியபோது, ‘‘சம்பந்தப்பட்ட மூன்று குளங்களும் தூர் வாரும் பட்டியலில் ஏற்கெனவே இருந்தன என்று விஜயபாஸ்கர் சொல்வது பொய். நாங்கள் அறிவித்தபடி செப்டம்பர் 11-ம் தேதி வேறு குளங்களைத் தூர் வாரியிருக்கிறோம். ஏழ்மையான மக்களுக்கு மூன்று சென்ட் நிலம் தரப்போவதாகச் சொன்ன வாக்குறுதியைக் கண்டிப்பாக நிறைவேற்றுவோம். ஆனால், விஜயபாஸ்கர் தனது ஆட்கள்மூலம் எங்கள் காரை மறித்துக் கலாட்டா செய்தார். உண்மையில் எங்கள் கட்சியின் செயல்பாடுகளைக் கண்டு ஆளுங்கட்சியினர் பயந்து கிடக் கிறார்கள். அதனால்தான் இப்படியெல்லாம் நடந்துகொள்கிறார்கள்’’ என்றார்.

எப்படியோ, இவர்களின் சண்டையில் ஒரே இரவில் மூன்று குளங்கள் தூர்வாரப்பட்டதில் பொதுமக்களுக்கு மகிழ்ச்சி!

கரூர் கலாட்டா போராட்டம் அறிவித்த தி.மு.க... ஒரே இரவில் வேலையை முடித்த அ.தி.மு.க!

துரை.வேம்பையன்

நா.ராஜமுருகன்