கழுகார் பதில்கள்!

@டி.ஜெய்சிங், கோயம்புத்தூர்.

‘ஸ்டாலினை பி.ஜே.பி அரசால் கைது செய்யமுடியாது’ என்று வி.சி.க தலைவர் திருமாவளவன் கூறுகிறாரே?

‘எங்க அண்ணன் மேல கை வெச்சுப் பாருங்கடா!’

. @சு.சேகர், ஆலப்பாக்கம், சென்னை.

மனநலம் பாதிக்கப்பட்ட ஒரு சிறுமி சீரழிக்கப்பட்டதில் தன் கட்சியைச் சேர்ந்த நபரும் சம்பந்தப்பட்டிருக்கும்போது, தி.மு.க-வின் தலைவர் ஒரு கண்டனம்கூட தெரிவிக்கவில்லையே. இந்த விஷயத்தில் அத்தனை அரசியல்கட்சிகளுமே மௌனம் சாதிப்பது சரியா?

தி.மு.க என்றில்லை, அனைத்துக் கட்சிகளிலுமே இப்படிப்பட்ட நபர்கள் இருக்கத்தான் செய்கிறார்கள். ஆனால், தமிழகம் எவ்வளவோ பரவாயில்லை. இங்கே விழிப்புஉணர்வு அதிகம் என்பதால், மௌனமாக இருப்பதுடன் நிறுத்திக்கொள்கின்றன அரசியல்கட்சிகள். தி.மு.க முன்னாள் எம்.எல்.ஏ ராஜ்குமார் (பெரம்பலூர் தொகுதி) கடந்த ஆண்டு சிறைக்கு அனுப்பப்பட்டதுதான் இதற்கு சமீபத்திய உதாரணம். ஆனால், வடக்கே நிலைமை படுமோசம். கிட்டத்தட்ட சினிமாவில் நாம் பார்க்கும் அநியாய அரசியல்வாதிகள் நிஜத்திலேயே திரிந்துகொண்டுள்ளனர். உ.பி-யில் ஆளும் பி.ஜே.பி-யின் எம்.எல்.ஏ, பாலியல் பலாத்காரம் செய்தது மட்டுமல்லாமல், அந்தப்பெண்ணின் குடும்பத்தினரையே கொலை செய்த குற்றச்சாட்டில் சிக்கியுள்ளார். உத்தரகாண்டில் பி.ஜே.பி-யின் முன்னாள் மத்திய அமைச்சர், ‘கல்வி வள்ளல்’ போர்வையில் தொடர் பாலியல் பலாத்காரங்களில் ஈடுபட்டுக்கொண்டிருந்தது வெளிச்சத்துக்கு வந்துள்ளது. இவையும் சமீபத்திய உதாரணங்களே! இதுபோல அங்கே அனைத்துக் கட்சிகளிலுமே அநியாய அரசியல்வாதிகள் நிரம்பியுள்ளனர். சம்பந்தப்பட்ட கட்சிகள் அவர்களை எல்லாம் காப்பாற்றும் வேலையைச் செய்வதுதான் கொடுமையிலும் கொடுமை.

. மு.மதிவாணன், செங்கல்பட்டு, காஞ்சிபுரம் மாவட்டம்.

மத்திய நிதியமைச்சர் நிர்மலா சீதாராமன், ‘ஓலா, உபர் போன்ற நிறுவனங்கள்தான் மோட்டார் வாகனத்துறை வீழ்ச்சிக்குக் காரணம்’ என்று கூறுகிறாரே?

இந்த ‘அரிய கண்டுபிடிப்பு’க்குத்தான் அம்மணிக்குப் பட்டங்க ளாக வாரி வழங்கிக்கொண்டிருக்கிறார்களே மீம்ஸ் பாய்ஸ்!

@மணிசங்கரன்.பா.ந., நெல்லிக்குப்பம், கடலூர் மாவட்டம்.

செப்டம்பர்-17, 1949 - செப்டம்பர்-7, 2019... தி.மு.கழகத்தின் இந்த 70 ஆண்டுகால அரசியல் பாதையில் அந்தக் கட்சியின் அடுத்த முன்னெடுப்பு எதை நோக்கியதாக இருக்க வேண்டும்?

கட்சி ஆரம்பிக்கப்பட்டதன் நோக்கம் நூறு சதவிகிதம் நிறைவேறவில்லை என்பதுதான் உண்மை. ஒரு சோறு பதம்... பலமுறை ஆட்சிக்கு வந்தும் சாதிப்பாகுபாடுகளை முழுமையாக அந்தக் கட்சியால் ஒழிக்க முடியவில்லை. மாறாக, சாதிக்கட்சிகள் பெருகுவதற்கும், அவற்றின்தோள் மீது பயணிப்பதற்கும் பாதை போட்டுக் கொடுத்த கட்சிகளில் ஒன்றாகத்தான் தானும் ஜொலிக்கிறது தி.மு.க. அடுத்தடுத்த தலைமுறைகள் வந்துவிட்ட தால், கொள்கைகள் எல்லாம் காற்றில்தான் பறக்கின்றன. இனி, அந்தக் கட்சி எதை முன்னெடுத்தாலும், அது நாடக வேஷமாகவே இருக்கும் என்பதே நிதர்சனம்.

@க.பூமிபாலன், மண்மாரி காட்டூர், கரூர் மாவட்டம்.

மக்களின் வரிப்பணத்தில் ஊதியம்பெறும் அரசு ஊழியர்கள், மக்களுக்கு உண்மையாக இருக்கிறார்களா?

கிட்டத்தட்ட 99.9 சதவிகிதம் பேர் உண்மையாக இருப்பதில்லை. எனவே, ‘அத்தனை பேருமே அப்படி இருப்பதில்லை’ என்று சொல்ல முடியாது.

@ஜுபைதூர் அகமது.

கடும் பொருளாதார நெருக்கடி பற்றி ரஜினி கருத்து தெரிவிப்பாரா?

உங்களுடைய பொருளாதார நெருக்கடிக்கு, அவருடைய கருத்தை எதிர்பார்ப்பது நன்றாகவா இருக்கிறது!

@பி.எஸ்.எ.ஜெய்லானி, கடையநல்லூர்.

அரசுக் கல்லூரிகளில், அரசுப் பணத்தில் டாக்டருக்குப் படிக்கிறார்கள். கடைசியில் மருத்துவ சேவை செய்யாமல் அரசியலைத் தேர்ந்தெடுப்பது ஏற்புடையதா?

டாக்டருக்குப் படித்தவர்கள்மீது மட்டும் உங்க ளுக்கு என்ன கோபம் ஜெய்லானி. அரசின் உதவியுடன் எல்லா துறைப் படிப்புகளைப் படித்தவர்களும்தான் அரசியலுக்கு வருகிறார்கள். வந்த பிறகு தவறு செய்யாமல் இருக்கிறார்களா... அல்லது, தவறு செய்வதற்காகவே வருகிறார்களா என்பதைத்தான் நாம் முக்கியமாகப் பார்க்க வேண்டும்.

. @ஆர்.வேணுகோபால், திருச்சி-4.

மத்திய அரசு, மானியத்தை ரத்துசெய்வதால் இனி வங்கிகளில் விவசாயத்துக்கான நகைக்கடன் கிடையாதாமே?

கொடிது கொடிது விவசாயி யாகப் பிறப்பது கொடிது. எனவே, எல்லோரும் ‘தொழிலதிபர்’களாக மாறுவதைத் தவிர வேறு வழியில்லை. அவர்களுக்குத் தான் ஆயிரமாயிரம் கோடிகளாக அள்ளி அள்ளிக் கொடுக்கிறார்கள். கடைசியில், ‘வாராக்கடன்’ என்று ரத்து வேறு செய்கிறார்கள். முடிந்தால், வெளிநாட்டுக்கு அனுப்பி வைத்து வெண் சாமரமும் வீசுகிறார்கள்.

. @செங்கை சாந்த ஷீலா, ஒதியடிக்காடு.

ஆண்டுதோறும், காவிரித் தண்ணீர் கடைமடையை எட்டாமல் கொள்ளிடம் வழியே கடலில்தான் கலக்கிறது. என்னதான் செய்கின்றது பொதுப்பணித்துறை?

பாவம், அங்கே இருப்பவர் களில் பெரும்பாலானவர் களுக்குத் துட்டு வாருவதற்கே நேரமிருப்பதில்லையே.

@ கருமாரி கணபதி, மடிப்பாக்கம்

தலைமை நிர்வாகப் பொறுப்பில் இருப்பவர்கள், எப்படிப்பட்ட எதிர்ப்புகள் வந்தாலும் எதிர் கொண்டு வெற்றிகாண்பதுதானே தலைமைப் பண்பை வெளிக்காட்டும். அதை விடுத்து ராஜினாமா முடிவுக்கு வருவது சரிதானா?

முயற்சிகள் அனைத்தும் விழலுக்கு இறைத்த நீராகப் போய்க்கொண்டிருக்கும் போது, அந்தப் பண்புக்கும் உழைப்புக்கும் அர்த்தமில் லாமல் போய்க்கொண்டிருக் கும்போது, அந்தப் பண்பை நிலைநாட்டுவதிலும் வெற்றி கொள்வதிலும் என்ன அர்த்தம் இருந்துவிடப்போகிறது. ‘தலை’யின் கஷ்டம், ‘தலைமை’க்குத்தானே தெரியும்.

. அண்ணா அன்பழகன், அந்தணப்பேட்டை.

ஹோட்டல்களில் ஒரு கரண்டி மாவில் இட்லி சுட்டு 20 ரூபாய் வரை விற்கிறார்கள். அதே ஒரு கரண்டி மாவில் தோசை சுட்டால் 100 ரூபாய் வரை விற்கிறார்கள். ஏன் இப்படி?

ஒரே நேரத்தில் முப்பது இட்லியைக்கூடச் சுட்டுவிட முடியும். அதேபோல, இட்லித் தட்டில் மாவை ஊற்றினால் மட்டும்போதும், இட்லியின் வடிவம் தானாகவே வந்துவிடும். தோசை அப்படியா? ஒரு நேரத்தில் ஒன்றுதான் சுடமுடியும். தோசைக்கல்லில் தண்ணீரைத் தெளித்து, துடைப்பத்தால் பெருக்கி, எண்ணெய் ஊற்றி, மாவை ஊற்றி, அதை சர்சர்ரென்று முட்டை வடிவமாகவே... வட்டவடிவமாகவே அழகாகத் தேய்த்து, கருகுவதற்குள்ளாக பொன்வறுவலாக எடுத்து, இப்படி ஒரு மடிப்பு... அப்படி ஒரு மடிப்பு என்று மடித்து அல்லது பாய்போல சுருட்டி... இப்படி நிறைய வேலை இருக்கிறதே! அதுசரி, உங்கள் கேள்வியில் இட்லி-சட்னி என உள்குத்து ஏதுமில்லைதானே

பெ.வேலுமணி, நாராயண பாளையம்.

திராவிடம், தேசியம் ஒன்றும் புரியமாட் டேங்குது. கொஞ்சம் தெளிவுபடுத்துங்களேன்!

தமிழகத்தில் மட்டும் கொள்ளை யடித்தால் ‘திராவிடம்’. இந்தியா முழுக்கக் கொள்ளையடித்தால், ‘தேசியம்’.

@வாசு குறிஞ்சிப்பாடி.

‘பெங்களூரு’ புகழேந்தியும் வீழ்ந்துவிடுவார் போலிருக்கிறதே?

‘கடைசி மீனும் பிடிபட்டுவிட்டதே’ என்பதுபோல கலங்குகிறீர்களே. டி.டி.வி தினகரனிடம் இன்னும் நிறைய ‘விலாங்கு மீன்கள்’கூட இருக்கின்றன.

. கேள்விகள் அனுப்ப வேண்டிய முகவரி:

கழுகார் பதில்கள், ஜூனியர் விகடன்,

757, அண்ணா சாலை, சென்னை- 600002

kalugu@vikatan.com என்ற இமெயிலுக்கும் அனுப்பலாம்!