Published:Updated:

பாரதி நினைவு நூற்றாண்டு| 'ஆனந்த விகடன்' சிறப்பிதழும், முதலமைச்சர் ஸ்டாலினின் சிறப்பு அறிவிப்புகளும்!

பாரதி நினைவு நூற்றாண்டு
பாரதி நினைவு நூற்றாண்டு

தமிழ்நாடு முதலமைச்சர் மு.க.ஸ்டாலின், பாரதி நினைவு நூற்றாண்டு நிறைவை முன்னிட்டு நேற்று (வெள்ளிக்கிழமை) வெளியிட்டிருக்கும் அறிவிப்புகள் மிகுந்த கவனம் பெறுகின்றன.

மகாகவி பாரதியாரின் நினைவு நூற்றாண்டு நாள் (செப்டம்பர் 11) நிறைவடைகிறது. முக்கியத்துவம் வாய்ந்த இந்த நிகழ்வை முன்னிட்டு அட்டைப் படத்தில் பாரதி மிளிர, எழுத்தாளர் சிவசங்கரி, வரலாற்றாய்வாளர் ஆ.இரா.வேங்கடாசலபதி ஆகியோரின் சிறப்பு நேர்காணல்கள் மற்றும் பாரதி ஆய்வாளர்கள் சீனி விசுவநாதன், சா. பாலுசாமி, கடற்கரய் மத்தவிலாச அங்கதம் ஆகியோரின் பாரதி ஆய்வுகள் குறித்த கருத்துகள் அடங்கிய சிறப்புப் பக்கங்களைத் தாங்கி கடந்த வியாழக்கிழமை வெளியாகியிருக்கிறது இந்த வார ‘ஆனந்த விகடன்’ இதழ்.
பாரதி நினைவு நூற்றாண்டு| 'ஆனந்த விகடன்' சிறப்பிதழும், முதலமைச்சர் ஸ்டாலினின் சிறப்பு அறிவிப்புகளும்!

இந்தப் பின்னணியில், தமிழ்நாடு முதலமைச்சர் மு.க.ஸ்டாலின், பாரதி நினைவு நூற்றாண்டு நிறைவை முன்னிட்டு நேற்று (வெள்ளிக்கிழமை) வெளியிட்டிருக்கும் அறிவிப்புகள் மிகுந்த கவனம் பெறுகின்றன. மகாகவி பாரதியாரின் நினைவு நாளான செப்டம்பர் 11-ம் தேதி, அரசு சார்பில் ஆண்டுதோறும் ‘மகாகவி நாளாக’க் கடைபிடிக்கப்படும். பள்ளி, கல்லூரி மாணவர்களுக்கு மாநில அளவில் கவிதை போட்டி நடத்தி ‘பாரதி இளம் கவிஞர் விருது’ வழங்கப்படும் என்பன உள்ளிட்ட பாரதி இயலை அடுத்த கட்டத்துக்கு எடுத்துச் செல்லும் முக்கியத்துவம் வாய்ந்த இந்த அறிவிப்புகள் பாரதி ஆய்வாளர்கள், பொதுமக்கள், இளைஞர்கள், மாணவர்கள் என அனைத்து தரப்பினரிடமும் மிகுந்த வரவேற்பைப் பெற்றிருக்கிறது.

“பாரதியை ஆங்கிலத்தில் எடுத்துச் செல்ல வேண்டும்!” என்ற தலைப்பில் ‘ஆனந்த விகடன்’ இதழில் வெளியாகியிருந்த வரலாற்றாய்வாளர் ஆ.இரா.வேங்கடாசலபதியின் நேர்காணல், பாரதி ஆய்வில் இன்னும் கண்டறியப்பட வேண்டியவை, பாரதியை ஆங்கிலத்துக்குக் கொண்டு செல்ல வேண்டியதன் முக்கியத்துவம் ஆகியவற்றைக் கவனப்படுத்தியிருந்தது. இந்நிலையில், முதலமைச்சர் வெளியிட்டுள்ள அறிவிப்புகளில், “பாரதியாரின் படைப்புகள் மற்றும் பாரதியார் குறித்த முக்கிய ஆய்வு நூல்களும் ஆங்கிலத்தில் மொழிபெயர்த்து வெளியிடப்படும்” என்ற அறிவிப்பு முக்கியத்துவம் பெறுகிறது.

ஆ.இரா.வேங்கடாசலபதி
ஆ.இரா.வேங்கடாசலபதி
“பாரதியை ஆங்கிலத்தில் எடுத்துச் செல்ல வேண்டும்!”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பாரதியைப் பரப்புவதற்குச் செய்யவேண்டியவை குறித்து “பாரதியைப் பரப்புவோம்!” என்ற தலைப்பில் வெளியாகியிருந்த கட்டுரையில், 60 ஆண்டுகளுக்கும் மேலாக பாரதி ஆய்வில் இயங்கிக் கொண்டிருக்கும் சீனி விசுவநாதன், பல்வேறு கோணங்களில் வைத்து பாரதி மதிப்பிடப்பட வேண்டியதன் அவசியத்தை வலியுறுத்தியிருந்தார். ''தம் வாழ்வையே பாரதி ஆய்வுக்காக அர்ப்பணித்த சீனி விசுவநாதனின் பணியைப் போற்றும் வகையில், தலா மூன்று லட்சம் ரூபாயும், விருதும், பாராட்டுச் சான்றிதழும் அரசால் வழங்கி கவுரவிக்கப்படும்'' என்று முதலமைச்சரின் அறிவிப்பில் தெரிவிக்கப்பட்டிருக்கிறது.

சீனி விசுவநாதன்
சீனி விசுவநாதன்

“பாரதியின் படைப்புகளை மிகக் குறைந்த விலையில் அரசாங்கமே வெளியிட வேண்டும், பாரதிக்குத் தனி ஆய்வு நூலகம் அமைக்கப்பட வேண்டும், பாரதி சார்ந்த தரவுகள் பாதுகாக்கப்பட வேண்டும்” என பாரதி இயலை அடுத்த கட்டத்துக்குக் கொண்டு செல்லும் நடவடிக்கைகள் குறித்துக் கவனப்படுத்தியிருந்தார் பாரதி ஆய்வாளர் கடற்கரய் மத்தவிலாச அங்கதம். இவற்றை உறுதி செய்யும் வகையில், “பாரதியின் கையெழுத்துப் பிரதிகள் தேடித் தொகுக்கப்பட்டு, அவை வடிவம் மாறாமல் செம்பதிப்பாக வெளியிடப்படும்; பாரதியாரின் நூல்கள் மற்றும் அவரைப் பற்றிய ஆய்வு நூல்கள் அனைத்தையும் தொகுத்து, ‘பாரதியியல்’ என்ற தனிப்பிரிவு ஏற்படுத்தப்படும்” என்று அறிவிக்கப்பட்டுள்ளது.

கடற்கரய் மத்தவிலாச அங்கதம்
கடற்கரய் மத்தவிலாச அங்கதம்

இந்த அறிவிப்புகள் குறித்துப் பேசிய கடற்கரய், “பாரதி இயலை அடுத்த கட்டத்துக்குக் கொண்டு செல்லும் தமிழ்நாடு அரசின் இந்த அறிவிப்புக்கள் மிகுந்த மகிழ்ச்சியளிக்கின்றன. பாரதியின் படைப்புகள் செம்பதிப்பாக வெளியிடப்படும் என்ற அறிவிப்பு மிகப் பெரிய விஷயம்; மிக முக்கியமான விஷயமும்கூட. பாரதி தான் வாழ்ந்த காலத்தில் தன்னுடைய பாடல்களுக்கு அமெரிக்க ஓவியர்களைக் கொண்டு படங்கள் வரைந்து வெளியிட வேண்டும் என்று ஆசைப்பட்டார். இந்த ஆசையை ‘தின மணி’ நாளிதழின் முதல் ஆசிரியராக விளங்கிய டி.எஸ்.சொக்கலிங்கத்திடம் வெளிப்படுத்தினார்; பின்னாளில் அவர் ஆசிரியரான பிறகு பாரதியின் இந்த ஆசையைச் சொக்கலிங்கம் நிறைவேற்றினார். அது இன்றைக்கு மிகப் பெரிய அளவில் நடக்கவிருக்கிறது” என்றார் மகிழ்ச்சி பொங்க.

“பாரதியைப் பரப்புவோம்!”

மேலும் பேசிய கடற்கரய், “‘பாரதி இயல்’ சார்ந்து நூலகம் அமைக்கப்படும் என்ற அறிவிப்பை முக்கியத்துவம் வாய்ந்த ஒன்றாகப் பார்க்கிறேன். ஆய்வுக்கான எல்லா படைப்புகளையும் திரட்டி அப்படி ஒரு நூலகம் அமையுமானால் அது மிகப் பெரிய முன்னெடுப்பாக இருக்கும். மேலும், முன்னோடி ஆய்வாளர்களான பெ.தூரன், ரா.அ. பத்மநாபன், தொ.மு.சி.ரகுநாதன், இளசை மணியன் ஆகியோரின் குடும்பத்தாருக்கு விருது, நல்கை அறிவித்திருப்பது மிகுந்த மகிழ்ச்சியைத் தருகிறது. இந்தப் பின்னணியில், மறக்கப்பட்ட பாரதி ஆய்வாளர் ஒருவர் குறித்துப் பதிவு செய்ய விரும்புகிறேன்.

பாரதி நினைவின் நூற்றாண்டு
பாரதி நினைவின் நூற்றாண்டு

ஏ.வி. சுப்பிரமணிய அய்யர், பாரதி வாழ்ந்த காலத்திலேயே பாரதி குறித்தும், அவரது படைப்புகள் குறித்தும் ஆங்கிலத்தில் கட்டுரை எழுதியவர்; அன்னி பெசன்ட் அம்மையார் நடத்திய ‘நியூ இண்டியா’ பத்திரிகையில் இந்தக் கட்டுரை வெளியானது. இந்தக் கட்டுரையை பாரதியே வியந்து பாராட்டியிருக்கிறார். பாரதி வாழ்ந்த காலத்தில், பாரதி படைப்புகள் பற்றி முதன்முதலாக எழுதப்பட்ட விமர்சனம் அதுதான். ஆனால், பாரதி ஆய்வாளர்கள் பட்டியலில் இதுவரை ஏ.வி.சுப்பிரமணிய அய்யர் சேர்க்கப்படவில்லை; பாரதி ஆய்வுலகத்தில் மிக முக்கியமான முன்னோடி. ஆக, வரும்காலத்தில் பாரதி ஆய்வாளர்கள் பட்டியலில் இவருடைய பெயர் சேர்க்கப்பட்டு அங்கீகரிக்கப்பட வேண்டும். இந்த அறிவிப்புகளை ஒட்டி இதுவும் கவனத்தில் கொள்ளப்படும் என்று நம்புகிறேன்” என்ற கோரிக்கையை முன்வைத்தார்.

பாரதியார்
பாரதியார்
பாரதி நினைவு நூற்றாண்டை முன்னிட்டு தமிழ்நாடு அரசு முன்னெடுக்கும் முக்கியத்துவம் வாய்ந்த இந்த நடவடிக்கைகள், “பார் மீது நான் சாகாதிருப்பேன், காண்பீர்” என்ற பாரதியின் வரியும், “தமிழ்த் தொண்டன் பாரதிதான் செத்ததுண்டோ” என்ற பாரதிதாசனின் முழக்கமும் நம் செவிகளில் ஒலிக்கின்றன!
அடுத்த கட்டுரைக்கு