Published:Updated:

உள்ளாட்சி என்னும் நல்லாட்சி!

உள்ளாட்சி என்னும் நல்லாட்சி!
பிரீமியம் ஸ்டோரி
News
உள்ளாட்சி என்னும் நல்லாட்சி!

எஸ்.நந்தகுமார், பொதுச் செயலாளர், தன்னாட்சி.

உள்ளாட்சி என்னும் நல்லாட்சி!

தேர்தல் நேரங்களில் தவிர தலைவர்களையே பார்த்திராத கிராமத்து வாசிகள்... கிராமங்களையே காணாத கட்சித் தலைவர்கள்... வெகு காலமாக தமிழ்நாடு இப்படித்தான் இருந்தது. இப்போது கிராமங்களை நோக்கிப் படையெடுக்கிறார்கள், அரசியல் தலைவர்கள். மக்களோடு மக்களாக உட்கார்ந்து ஊராட்சி சபைக் கூட்டங்களை நடத்துகிறார்கள். அவர்களைப் பின்பற்றி, ஊடகமும் உள்ளே நுழைய, இதுவரை பரவிடாத வெளிச்சம், கிராமங்களிலும், அங்குள்ள மக்களின் முகங்களிலும் பரவுகிறது. சமூக வலைத்தளங்களிலும் கிராமத்து அவலங்கள், விவாதமாகின்றன. இவை அனைத்தும் நல்லதொரு தொடக்கம் கிராம சபைக் கூட்டங்கள் என்றால், ஏதோ ஓர் அரசாங்கச் சடங்கு என்றிருந்த நிலை மாறி, கூட்டம் நடைபெறுவதற்குப் பல நாட்களுக்கு முன்பே, களம் இறங்கி, வேலை களைத் தொடங்கிவிடுகிறார்கள் சமூக ஆர்வலர்கள். வட்டார வளர்ச்சி அலுவலரை யும் மாவட்ட ஆட்சியரையும் சந்தித்து கிராம சபை முறையாக நடைபெற நடவடிக்கைகள் எடுக்க இளைஞர்கள் வலியுறுத்துகிறார்கள். மக்கள் பங்கேற்பை அதிகப்படுத்த துண்டுப் பிரசுரங்களை விநியோகிக்கிறார்கள். குறும்படங்கள் திரையிடுகிறார்கள்.

காஞ்சிபுரம் மாவட்ட கிராமப்புற இளைஞர்களைக் கண்டிப்பாய்ப் பாராட்ட வேண்டும். இங்குள்ள படுநெல்லி, புதுப்பாக்கம், கோவிந்தவாடி ஊராட்சிகளைச் சேர்ந்த இளைஞர்கள், கிராம சபையில் பங்கேற்கும் மக்களை வெறும் பார்வையாளராக  இல்லாமல், கேள்வி எழுப்புவோராக மாற்றி யிருக்கிறார்கள். கிராம சபை அஜெண்டா பற்றி, அந்த மக்களுக்கு அத்தனையும் தெரிந்திருக்கிறது. அதென்ன கிராமசபை அஜெண்டா? ஜனவரி 26, மே 1, ஆகஸ்ட் 15, அக்டோபர் 2 ஆகிய நான்கு நாள்களும், அனைத்து கிராம ஊராட்சிகளிலும் கிராம சபை நடக்க வேண்டும் என்பது கட்டாயம். இந்தக் கூட்டங்களில், விவாதிக்கவேண்டிய பொருட்களின் அதிகாரபூர்வப் பட்டியல்தான் அஜெண்டா. இதைக் கூட்டம் நடைபெறுவதற்கு சில நாள்களுக்கு முன்பே வெளியிடுகிறது ஊரக வளர்ச்சி இயக்குநரகம்.

உள்ளாட்சி என்னும் நல்லாட்சி!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

ஜனவரி 26-ம் தேதி நடக்கும் கிராமசபைக் கூட்டத்தில் விவாதிக்க வேண்டிய தலைப்புகளின் பட்டியல், ஜனவரி 20 அல்லது 21-ம் தேதியில் வெளியிடப்படும். அதைப் படித்துவிட்டு, கிராம சபைக் கூட்டத்தில் பங்கேற்றால், கேள்விகள் எழுப்பி நமது சந்தேகங்களைத் தீர்த்துக்கொள்ளலாம். ஊருக்குத் தேவையானவற்றையும் கேட்டு வாங்கலாம். உதாரணமாக, ஜனவரி 26 கிராமசபை அஜெண்டாவில் 14 விவாதத் தலைப்புகள் இருக்கின்றன. அதில், கிராம ஊராட்சி நிர்வாகம் மற்றும் பொதுவான செலவினங்கள் குறித்து முழுமையாக விவாதிக்க வேண்டும் என்பதே முதல் பொருள். நடப்பு நிதியாண்டில் மத்திய, மாநில அரசுகளின் நிதியில் நடைபெற்றுவரும் பல்வேறு வளர்ச்சித் திட்டப் பணிகளின் முன்னேற்றம் மற்றும் நிதி செலவினம் குறித்துப் பொதுமக்களுக்குத் தெரிவிக்க வேண்டுமென்பது எட்டாவது பொருள்.

இந்த இரு விஷயங்களைப் பேசினாலே, நமது ஊருக்கு என்னென்ன திட்டங்கள் வந்திருக்கின்றன, என்னென்ன வேலைகள் முடிந்திருக்கின்றன, வரவு என்ன, செலவு என்ன... என்பதை எல்லாம் தெரிந்து கொள்ளலாம். இதேபோல, நியாய விலைக்கடை பதிவேட்டை, ஆண்டுக்கு இரண்டு முறை (ஜனவரி 26 மற்றும் ஆகஸ்டு 15) கிராம சபைக் கூட்டங்களில் ஆய்வுக்கு வைக்க வேண்டும். வளர்ச்சிப் பணிகள் பற்றிய திட்டம் தயாரிக்கவும், யார் யாருக்கு வேலை கொடுப்பது என்பதை முடிவு செய்யவும் தனித்தனியாகத் தீர்மானங்கள் வைக்கப்படும்.

இந்தக் கூட்டங்களில் பங்கேற்கும் மக்கள், கேள்விகள் எழுப்புவதுடன், உரிய ஆவணங்களைக் காண்பிக்க வேண்டும் என்றும் வலியுறுத்த முடியும். ஆனால், பெரும்பாலான கூட்டங்களில் இது நடப்பதில்லை. சமீப காலமாகத்தான், கிராம சபைக் கூட்டத்தில் என்னென்ன விஷயங்களைப் பேசலாம், எந்தெந்த ஆவணங்களைக் கேட்கலாம் என்பதை எல்லாம் மக்களுக்குச் சமூக ஆர்வலர்கள் நன்றாகவே சொல்லிக் கொடுத்துக் கொண்டிருக்கிறார்கள். அதற்குரிய நல்ல மாற்றங்களும் தெரிய ஆரம்பித்துள்ளன.

உள்ளாட்சி என்னும் நல்லாட்சி!

உண்மையான மக்களாட்சி!

நாமக்கல் மாவட்டம் மல்லசமுத்திரத்தில் உள்ள மேல்முகம் மற்றும்  கருமனுார் ஆகிய ஊராட்சிகள், இந்த நல்ல மாற்றத்துக்கான வழி காட்டிகளாக விளங்குகின்றன. ஒரு கிராம சபைக் கூட்டம் எப்படி நடக்க வேண்டும் என்பதற்கு, மகத்தான உதாரணமாக இந்தக் கூட்டங்கள் நடக்கின்றன. இதனால், இந்த கிராமங்களுக்குக் கிடைத்துள்ள பலனும் பெரிது. இங்கு நடக்கும் கிராம சபைக் கூட்டங்களில், அந்த ஊராட்சிக்கு உட்பட்ட பகுதியில் பணியாற்றும் அனைத்து அரசு ஊழியர்களையும், கிராம சபை கூட்டத்துக்கு அழைத்துவந்து, அவர்களின் பணிகள் மற்றும் அவர்களின் துறை சார்ந்த அரசு திட்டங்கள் பற்றி மக்களிடம் விளக்கம் அளிக்க வைக்கிறார்கள். மக்கள் கேட்கும் கேள்வி, சந்தேகங்களுக்குப் பதில் தருகிறார்கள் அரசு ஊழியர்கள்.

கடந்த அக்டோபர் 2-ம் தேதி நடந்த கூட்டத்தில், கிராம நிர்வாக அலுவலர், வேளாண்மை விரிவாக்க அலுவலர், பள்ளித் தலைமை ஆசிரியர், பிற ஆசிரியர்கள், சுகாதார ஆய்வாளர், மகளிர் திட்ட அலுவலர், நியாய விலை கடை ஊழியர், அங்கன்வாடி பணியாளர்கள் அனைவரும் பங்கேற்றுப் பேசினர். அதிலும் கிராம நிர்வாக அலுவலர், “மக்கள் கேட்கும் ஆவணங்களைத் தாமதமின்றி தருவதற்கு நாங்கள் தயார். நான் இல்லை என்றாலும் என் உதவியாளரிடம் நீங்கள் பெற்றுக்‑கொள்ளலாம்... ஆவணங்கள் பெறுவதில் உங்களுக்கு எந்தச் சிரமமும் இருக்காது” என்று பொறுப்புடன் உறுதியளித்தார். இப்போதுவரையிலும் அதைக் கடைபிடித்தும் வருகிறார். கொண்டாடுகிறார்கள் மக்கள்.

ஊராட்சி பராமரிக்கும் அனைத்து வங்கி கணக்குகளின் பாஸ் புத்தகங்களையும் சரிபார்த்த மக்கள், கேள்விகளாகக் கேட்டுத் துளைத்தனர். அனைத்துக்கும் விளக்கம் கிடைத்தது. மகாத்மா காந்தி ஊரக வேலை உறுதித் திட்டத்தின் தணிக்கை அறிக்கையையும் படித்தார்கள். ஊழற்ற நிர்வாகத்துக்கு, இதுவே அடிப்படை. இந்த மாற்றத்தால், நூறு நாள் வேலையைச் சரியாகப் பயன்படுத்தி, நீர்நிலைகளைத் தூர் வாருதல், பனை விதைகளை நடுதல் போன்ற பணிகளை முன்னெடுத்திருக்கிறார்கள்.

இதேபோல, சேலம் மாவட்டம் வாழப்பாடி அருகிலுள்ள திருமனூர் ஊராட்சி, திருப்பூர் மாவட்டம் உடுமலைப்பேட்டை மானுப்பட்டி ஊராட்சி, திண்டுக்கல் மாவட்டம் ஒட்டன்சத்திரம் பொருளூர் ஊராட்சி ஆகிய ஊர்களிலும் சமூக ஆர்வலர்கள் மற்றும் இளைஞர்கள் பங்களிப்பால், ஊரின் வளர்ச்சிப் பணிகள் உத்வேகமாக நடக்கின்றன. உண்மையான மக்களாட்சி என்பது இதுதான்.

ஆனாலும், தமிழ்நாட்டின் பெரும்பாலான கிராம மக்கள், மக்கள் பிரதிநிதிகளும், அரசு அலுவலர்களும் நினைத்தால் மட்டுமே எல்லா வேலையும் நடக்கும் என்கிற எண்ணத்திலேயே மூழ்கிக்கிடக்கிறார்கள். நம் ஊரின் வளர்ச்சியை நாமே முன்னெடுக்கலாம் என்ற முனைப்பு இல்லை அல்லது அவர்களுக்கு தெரியவில்லை.

1996 முதல் தடையின்றி நடைபெற்ற உள்ளாட்சி தேர்தல், இரு ஆண்டுகளுக்கு மேலாகியும் நடக்கவில்லை. இதில் அதிகம் பாதிக்கப்பட்டிருப்பது, கிராம ஊராட்சிகள் தான். குடிநீர் தொட்டியைத் தூய்மை செய்வதற்கான ப்ளீச்சிங் பவுடரைக்கூட யாரிடமாவது கடன் கேட்கும் துயரம், இங்கே நடந்துகொண்டிருக்கிறது. கிருஷ்ணகிரி மாவட்டத்தில் உள்ள வட்டார வளர்ச்சி அலுவலர் ஒருவர் சொல்கிறார், ‘‘தயவு செய்து உள்ளாட்சி தேர்தலை உடனடியாக நடத்த வேண்டும் என்று வலியுறுத்துங்கள்... தற்போது எங்களால் வெறும் பராமரிப்புப் பணிகளைத்தான் செய்ய முடிகிறது. வளர்ச்சிப் பணிகள் எதுவுமே நடக்க வில்லை” என்கிறார். தமிழகம் முழுவதும் 12 ஆயிரத்துக்கும் அதிகமான கிராம ஊராட்சி களின் நிலை குறித்த ஒப்புதல் வாக்குமூலமே அவரது ஆதங்கம்.

உள்ளாட்சி என்னும் நல்லாட்சி!

முன்னோடியாக கேரளம்!

துப்புரவுப் பணிகள் முடங்கியுள்ளன; கொசுக்கள் பரவி, டெங்கு, மர்மக் காய்ச்சல் பரவுகிறது. கஜா புயல் போன்ற பேரிடர்களால் பல கிராமங்கள் சிதைந்துக்கிடக் கின்றன. அருகிலுள்ள கேரளத்தில், கடந்த ஆண்டில் ஏற்பட்ட பெருமழை, வெள்ளத்தின் பேரிடரிலிருந்து அந்த மாநிலத்தை மிக விரைவாக மீட்டது, அங்குள்ள அருமையான உள்ளாட்சிகளின் கட்டமைப்பே. ‘மீட்பு நடவடிக்கைகளை எடுக்கவும், பெரு வெள்ளத்துக்குப் பின் தேவைப்பட்ட மறு வாழ்வு பணிகளை மேற்கொள்ளவும், அங்கு  பல ஆண்டுகளாகக் கட்டமைக்கப்பட்ட வலுவான உள்ளாட்சி அமைப்புகளின் பணி மிகவும் முக்கியக் காரணியாக இருந்தது’ என்கிறது டெல்லியைச் சேர்ந்த என்.டி டி.வி நிறுவனத்தின் ஆய்வுக் குறிப்பு. கஜா புயல் மீட்புப் பணியாற்றிய பல நண்பர்களின் கோரிக்கை, தமிழகத்தில் உடனடியாக உள்ளாட்சி தேர்தலை நடத்தி முடிக்க வேண்டும் என்பதாகவே இருந்தது.

கேரளத்தில் உள்ளாட்சி அமைப்பு களுக்கான அதிகாரம், வலுவாகவுள்ளது. மக்களை உடனடியாகப் பாதிக்கும் பல விஷயங்களுக்குத் தமிழக உள்ளாட்சி அமைப்புகள் முடிவு எடுக்க முடியாத சூழலில் உள்ளன. இதனால்தான் இன்றைக்குச் சமூக ஆர்வலர்கள், தங்கள் ஊரை முன்னேற்றவும் பாதுகாக்கவும்  தங்களால் முயன்ற முயற்சி களை மேற்கொண்டு வருகிறார்கள். கோவை மாவட்டம் பொள்ளாச்சி பகுதியைச் சேர்ந்த வீரல்பட்டி ஊராட்சி மக்கள், பெரிய கோழிப் பண்ணை வந்தால், கிராமத்தின் சுற்றுச்சூழல் மாசுபடுமென்று, கிராம சபையில் பங்கெடுத்து, ஒருமனதாகத் தீர்மானம் நிறைவேற்றியுள்ளனர். விருதுநகர் மாவட்டம் சிவகாசி அருகிலுள்ள வெற்றிலையூரணி ஊராட்சி மக்கள், தங்கள் ஊரின் நீர் ஆதாரமான பெரிய ஏரிக்கு அருகே, பட்டாசு குடோன் அமையவுள்ளதை எதிர்த்துப் போராடி வருகி றார்கள். ஆனால், உள்ளாட்சித் தேர்தலை நடத்தாமல், ஆயிரம் காரணங்களை அடுக்கிக் கொண்டிருக்கிறது தமிழக அரசு. உயர்நீதி மன்ற மதுரை கிளையின் முன்னாள் நீதியரசர் நாகமுத்து தனது ஒரு தீர்ப்பில், “மக்களுக்கு ஏற்படும் பாதிப்புகள் பற்றி பக்கத்தில் உள்ள ஊராட்சி நிர்வாகத் துக்குத்தான் முழுமையாகத் தெரியும்!” என்றார். ‘வாழும் கிராமங்கள்’ எப்படி இருக்க வேண்டும் எனக் குறிப்பிட்ட நம்மாழ்வார், ‘பஞ்சாயத்துகள் வலுப்பெற, கிராம சபைகளை வலுப்படுத்த வேண்டும்’ எனத் தொடர்ந்து குறிப்பிட்டு வந்தார். இதெல்லாம் நடக்க வேண்டும் எனில், உள்ளாட்சித் தேர்தல் நடத்தப்பட வேண்டும்.
   
‘அஜெண்டா’ தயாரிக்கும் உரிமை!

சட்டப்படி கிராம சபையில் விவாதிக்க வேண்டிய அஜெண்டாவைத் தயாரிக்க வேண்டியது, சம்பந்தப்பட்ட ஊராட்சிதான்.. ஒவ்வோர் ஊராட்சியும், மக்களின் கோரிக்கைகளையும் ஊரின் தேவையையும் கருத்தில்கொண்டு, கடந்த கிராம சபையில் விவாதிக்கப்பட்டதைப் பரிசீலித்து, மத்திய, மாநில அரசுத் திட்டங்களை ஆய்வுசெய்து தங்கள் கிராம சபை கூட்டத்துக்கான விவாதப் பொருளைத் தயாரிக்க வேண்டும். தலைவர், துணைத் தலைவர் மற்றும் வார்டு உறுப்பினர்கள் ஆகியோர் இதற்கான சிறப்புக் கூட்டத்தைக் கூட்டிப் பொருளை முடிவு செய்யலாம் என்கிறது சட்டம். ஆனால், தமிழ்நாட்டில் ஊராட்சிக்கு உள்ள உரிமை மறுக்கப்பட்டு ஊரக வளர்ச்சி இயக்குநரகமே இதனைத் தயாரிக்கிறது. தமிழகத்தில் உள்ள 12,524 ஊராட்சிகளுக்கும் சேர்த்து ஒரே பொருள் தயாரிக்கப்படுகிறது. சென்னை சைதாப்பேட்டையில் உள்ள இயக்குநருக்கு, தமிழகத்தின் ஒட்டுமொத்த கிராமங்களின் நிலை எப்படித் தெரியும்?