Published:Updated:

சாயப் பட்டறைகளுக்கு மூடு விழா!

ஜூ.வி. அதிரடி ஆக்ஷன்

சாயப் பட்டறைகளுக்கு மூடு விழா!

ஜூ.வி. அதிரடி ஆக்ஷன்

Published:Updated:
##~##
சாயப் பட்டறைகளுக்கு மூடு விழா!

'திருப்பூரில் இழுத்து மூடப்பட்ட சாயப் பட்டறைகள், தேனி மாவட்டத்துக்கு இடம் பெயர்ந்து விட்டன. இங்குள்ள மறைவான மலைப்பகுதிகளைத் தேர்வுசெய்து சிலர் சாயப் பட்டறைகளை நடத்தி வருகிறார்கள். அதில் இருந்து வெளியாகும் சாயக் கழிவுநீர் ஆறு, ஓடைகளில் வழிகிறது. இதைத் தடுத்து நிறுத்த வேண்டிய அதிகாரிகள், பணத்துக்கு ஆசைப்பட்டு நடவடிக்கை எடுக்க மறுக்கிறார்கள்’ - என்று ஜூ.வி. ஆக்ஷன் செல்லுக்குத் (044-66808002) தகவல்கள் வந்த வண்ணம் இருந்தன. 

ஒட்டுமொத்த விகடனுக்கும் ஒரே ஷார்ட்கட்!

தகவல் தெரிவித்த வாசகர்கள் உதவி​யோடு தேடினோம். தேனி அருகே உள்ள தர்மாபுரி மலை அடிவாரத்தில் இரண்டு சாயப் பட்டறை​களும், ஆண்டிப்பட்டி வைகை ஆற்றங்கரையோரம் டி.வாடி ப்பட்டி அருகே இரண்டு சாயப் பட்​ட​றைகளும் இயங்குவதாக சொல்லப்​பட்டதை, மிகுந்த சிரமத்துக்கு இடையில் கண்டு​பிடித்தோம்.

சாயப் பட்டறைகளுக்கு மூடு விழா!
சாயப் பட்டறைகளுக்கு மூடு விழா!

தர்மாபுரி மலை அடிவாரத்தில் இயங்கும் சாயப் பட்டறை கண்ணுக்கு சிக்காமல் ரொம்பவே டிமிக்கி கொடுத்தது. கழிவு நீர் துர்நாற்றத்தை வைத்தே அது இயங்கிய இடத்தைக் கண்டுபிடித்தோம். சாயப் பட்டறையின் மூன்று பக்கமும் மலை சூழ்ந்திருக்க... ஒரு பக்கம் வனம். பட்டறையைச் சுற்றி முள்கம்பிகளால் ஆன வேலி. சாயப் பட்டறை தண்ணீர்த் தேவைக்காக புதிதாக ஒரு ஆழ்குழாய் கிணறு அமைக்கப்பட்டு இருந்தது. மின்சாரத்துக்காக இரண்டு மிகப்பெரிய ஜெனரேட்டர்கள் இயங்கிக்கொண்டு இருந்தன. ஒரு பக்கம் சலவை ஆலை. இன்னொரு பக்கம் சாய ஆலை. கிட்டத்தட்ட 10 தொழிலாளர்களுக்கும் மேல் வேலை செய்துகொண்டு இருந்தார்கள்.

நம்மை எதிர்பார்க்காத பணியாளர்கள் மிரண்டு போய் வனத்துக்குள் ஓடி ஒழிய... உள்ளே நுழைந்தோம். சற்று நேரத்தில் எட்டிப்பார்த்த ஒருவர், சாயப் பட்டறையின் பங்குதாரர் என்று தன்னை அறிமுகப்படுத்திக்கொண்டு பேச ஆரம்பித்தார். ''என் பேரு சிவஞானம். எங்களுக்கு அள்ளிக் கொடுத்து வாழவைத்த திருப்பூர், கைவிட்டு விட்டது. நீதிமன்றத் தீர்ப்பால் இரண்டு ஆண்டு காலமாக சாயப் பட்டறை வேலைகள் முடங்கி விட்டன. இந்தத் தொழிலில் ஈடுபட்டவர்கள் அனை வரும் கஞ்சிக்கு வழியில்லாமல் தவிக்கிறோம். வேறு வழி இல்லாமல்தான் சாயப் பட்டறையைத் திருட்டுத்தனமாக நடத்தி வருகிறோம். சாயப் பட்டறை நடத்த மாசுக்கட்டுப்பாடு வாரிய அனுமதி அவ்வளவு எளிதாகக் கிடைக்​காது. அப்படியே கிடைத்தாலும், பல லட்ச ரூபாய் செலவு செய்தால்தான் சாயக்கழிவுகளை சுத்திகரிக்க முடியும். முடிந்தவரை இந்தப் பகுதிக்கு எந்தப் பாதிப்பும் இல்லாமல் சாயப் பட்டறை​களை நடத்தி வருகிறோம்'' என்று சொன்​னார்.

சாயப் பட்டறைகளுக்கு மூடு விழா!

அந்த இடத்தை சுற்றிப் பார்த்தோம். ஓடைகளின் குறுக்கே வனத் துறையினர் கட்டி இருந்த தடுப்பு அணைகளில் சாயக்கழிவுகள் நிரம்பி அருகில் உள்ள தோட்டங்கள் வழியாகப் போனதை காண முடிந்தது. இந்தக் கழிவுகள் தேங்கிய இடங்களில் செடி, கொடிகள், புல் ஆகியவை கருகி இருந்தன.

இன்று, ஒன்றாகத் தொடங்கி இருக்கும் சாயப் பட்டறை மீது உடனடி நடவடிக்கை எடுக்கவில்லை என்றால், நாளையே பல்கிப் பெருகிவிடும் என்பதால் அங்கு இருந்தபடியே தேனி கலெக்டர் பழனிச்சாமியை தொடர்புகொண்டு விஷயத்தைச் சொன்னோம். ஒரு மணி நேரத்தில் நாம் இருந்த இடத்துக்கு அதிகாரிகள் புடைசூழ வந்தவர், சாயப் பட்டறையை சீல் வைக்க உத்தரவிட்டார். இதுபோலவே மலை அடிவாரத்தில் இயங்கி வந்த இன்னொரு சாயப் பட்டறையும் கலெக்டர் உத்தரவுபடி அப்புறப்படுத்தப்பட்டது. டி.வாடிப்பட்டியில் வைகை ஆற்றின் கரையோரம் இயங்கிவந்த சாயப் பட்டறையை பெரியகுளம் ஆர்.டி.ஓ. அனிதா பார்வையிட்டு, நடவடிக்கை எடுக்க உத்தரவிட்டார்.

அதனை அடுத்து கடந்த 15-ம் தேதி தேனி மாவட்டத்தில் உள்ள கிராம நிர்வாக அலுவலர்கள், பஞ்சாயத்து கிளார்க்குளை அழைத்து மீட்டிங் நடத்திய கலெக்டர், ''கிராமங்களில் உங்களுக்குத் தெரியாமல் சாயப் பட்டறைகளை யாரும் நடத்தவே முடியாது. அதனால், நீங்கள் விழிப்போடு கவனித்து, அனுமதி இல்லாமல் யாராவது சாயப் பட்டறை நடத்தினால் உடனே எனக்குத் தகவல் கொடுங்கள். உங்கள் மூலமாக அல்லாமல், எனக்கு வேறு வழியாகத் தகவல் கிடைத்தால், சாயப் பட்டறைகள் மீது நடவடிக்கை எடுப்பதற்கு முன்பாக உங்கள் மீது ஒழுங்கு நடவடிக்கை பாயும்'' என்று எச்சரித்தார்.

சாயப் பட்டறைகள் மீது நமக்கு தனிப்பட்ட விரோதம் எதுவும் இல்லை. ஆனால், விவ சாயத்தை அழிப்பது சரியல்ல என்பதை சாயப் பட்டறைத் தொழில் அதிபர்கள் உணர வேண்டும். கண்ணுக்குத் தெரியாமல் முறை கேடாக தொழில் நடத்துவதை விடுத்து, அரசு வழிகாட்டுதல்படி சாயப் பட்டறை அமைக்க வேண்டும் என்பதுதான் நம் விருப்பம்.

- இரா.முத்துநாகு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism