Published:Updated:

மூச்சைப் பறித்த நீச்சல் பயிற்சி!

அலட்சிய ஆசிரியர்களால் பலி!

மூச்சைப் பறித்த நீச்சல் பயிற்சி!

அலட்சிய ஆசிரியர்களால் பலி!

Published:Updated:
##~##
மூச்சைப் பறித்த நீச்சல் பயிற்சி!

து பள்ளி மாணவர்களுக்குப் போதாத காலம் போலும்! 

ஒட்டுமொத்த விகடனுக்கும் ஒரே ஷார்ட்கட்!

சில வாரங்களுக்கு முன், பள்ளிக்கூட பஸ்ஸில் இருந்த ஓட்டை வழியே விழுந்து உயிர் துறந்த ஸ்ருதி.. இன்று நிர்வாக அலட்சியத்துக்குப் பலியான 10 வயதுச் சிறுவன் ரஞ்சன். இன்னும் எத்தனை பேரை அலட்சியத்துக்கு பலி கொடுக்கப் போகிறோம் என்று தெரியவில்லை!

சென்னை கே.கே. நகரில் உள்ள பத்மா சேஷாத்திரி பாலபவன் சீனியர் பள்ளியில் 4-ம் வகுப்பு படிக்கிறான் ரஞ்சன். படிப்பில் மட்டு மின்றி விளையாட்டிலும் ஆர்வம் அதிகம். 16-ம் தேதி காலையில் முதல் பாட நேரமே நீச்சல் பயிற்சி என்பதால் வழக்கமாக 8.30-க்குக் கிளம்புபவன், உற்சாகமாய் ஒரு மணி நேரத்துக்கும் முன்பாகவே பள்ளிக்கு வந்து விட்டான். பள்ளி வளாகத்துக்கு உள்ளேயே இருக்கிறது நீச்சல் குளம்.

தன்னுடைய வகுப்பு மாணவர்கள் 24 பேருடன் உற்சாகமாகக் குளத்தில் இறங்கினான் ரஞ்சன். ஆனால், பயிற்சி முடித்துத் திரும்பும்போது அவன் மட்டும் மிஸ்ஸிங்.

மூச்சைப் பறித்த நீச்சல் பயிற்சி!

பரபரப்படைந்தது பள்ளிக்கூடம். உடற்பயிற்சி ஆசிரியர்கள் வேகமாக ஓடி நீச்சல்குளத்தில் அவனைத் தேடியபோது... நீருக்குள் மூழ்கிக் கிடந்தான் ரஞ்சன்.  உடனே, அவனை மருத்துவமனைக்குச் தூக்கிச் சென்றனர். ஆனால், அவன் ஏற்கெனவே இறந்து விட்டான். பெற் றோருக்குத் தகவல் தெரிவித்து, அவர்கள் பதறி யடித்து வந்து சேர்ந்தனர். ரஞ்சன் உடலை, ராயப் பேட்டை பொது மருத்துவமனைக்குப் பிரேதப் பரிசோதனைக்காக அனுப்பி வைத்தது பள்ளி நிர்வாகம்.

'மாசிலாமணி’, 'வேலூர் மாவட்டம்’, போன்ற திரைப் படங்களை இயக்கிய ஆர்.என்.ஆர் மனோகரின் ஒரே மகன் ரஞ்சன். இவருடைய மூத்த மகள் ஸ்நேகிதா, அதே பள்ளியில் 7-ம் வகுப்பு படிக்கிறார்.

மூச்சைப் பறித்த நீச்சல் பயிற்சி!

எப்படி நடந்தது என்று பள்ளி நிர்வாகத் தரப்பில் விசாரித்தபோது, ''நாங்கள் முறைப்படி நீச்சல் பயிற்சியாளர்களை வைத்துத்தான் மாணவர்களுக்குப் பயிற்சி அளிக்கிறோம். மாணவனுக்கு வலிப்பு நோய் ஏற்பட்டு நீருக்குள் மூழ்கிவிட்டதாகத் தெரிகிறது. பயிற்சி முடிந்து மாணவர்களைக் கணக்கெடுக்கும்போதுதான் ஒரு மாணவன் குறைவாக இருப்பது தெரியவந்தது'' என்றனர் மையமாக.

ஆனால் சிறுவனின் உறவினர்களோ, ''பள்ளி நிர்வாகம் சொல்வது போல் அவனுக்கு எந்தவிதமான உடல் குறைபாடும் இல்லை. நல்ல ஆரோக்கியத்துடன்தான் இருந்தான். கடந்த இரண்டு வருடங்களாக நீச்சல் பயிற்சி பெற்று வருகிறான். பள்ளி நிர்வாகத்தின் அலட்சியத்தால்தான் இறந்துள்ளான்'' என்று கலங்கி நிற்கின்றனர்.

மூச்சைப் பறித்த நீச்சல் பயிற்சி!

மற்ற மாணவர்களின் பெற்றோர்களிடம் பேசியபோது, ''நீச்சல் குளத்தைச் சரியாகப் பராமரிப்பது இல்லை என பெற்றோர்கள் பலமுறை புகார் செய்தும் அதைச் சரிசெய்ய பள்ளி நிர்வாகம் எந்த முயற்சியும் எடுக்கவில்லை. காலை உணவை முடித்து அப்போதுதான் பள்ளிக்கு வந்த மாணவர்களுக்கு உடனடியாக நீச்சல் பயிற்சியைத் தொடங்கி இருக்கிறார்கள். உணவு உட்கொண்ட உடனே நீச்சல் பயிற்சி அளிப்பது தவறு என்ற சிறிய விஷயம்கூட தெரியாத பயிற்சியாளர்கள் எப்படி முறையாகப் பயிற்சி அளிப்பதாகச் சொல்ல முடியும்? இந்தப் பள்ளியில் நீச்சல் பயிற்சிக்கு நான்கு ஆசிரியர்கள் இருக் கிறார்கள். அந்த நால்வரும் எங்கே?'' என்று கேட்கிறார்கள்.

சமூக ஆர்வலர் ஒருவரிடம் பேசியபோது, ''பிரகாஷ்ராஜ் நடித்த 'அபியும் நானும்’ படத்தில், ஐந்து வயது குழந்தையைப் பள்ளியில் சேர்க்கும் காட்சி வரும். பள்ளித் தலைமை ஆசிரியர், குழந்தைகளுக்குப் படிப்பு தவிர பாட்டு, ஓவியம், நடனம், நீச்சல் எல்லாம் கற்த் தருவதற்கான கட்டணத்தைச் சொல்வார். அதற்கு பிரகாஷ்ராஜ், 'குழந்தை இப்பத்தான் நடக்க ஆரம்பிச்சி இருக்கா’ என்பார். தியேட்டரே சிரித்தது. அதில் இருந்த உண்மையை உணர்ந்து இருந்தால் ரஞ்சனின் மரணத்தைத் தடுத்து இருக்கலாம். ஆனால் இன்று பெற்றோருக்கு வேண்டியது எல்லாம் தன் குழந்தைகள் பணக்காரப் பள்ளியில் படிக்க வேண்டும், பொதுத்தேர்வில் அதிக மதிப்பெண்கள் பெற வேண்டும் என்ற ஆசை மட்டும்தான். பள்ளியில் என்ன நடக்கிறது என்பதில் பெற் றோருக்கு அக்கறை கிடையாது. தன் சமூக அந்தஸ்துக்காக மட்டுமே குழந்தைகளின் மனநிலையை பொருட் படுத்தாமல்  பணத்தைக் குவிக்கும் பெற்றோர்தான் அதிகம். தனியார் பள்ளிகளின் கட்டணத்தை நிர்ணயித்த அரசு அதன் உள்கட்டமைப்புகளைப் பற்றி நிர்ணயிக்கத் தவறிவிட்டது. கல்வியை வியாபாரமாக்கி லாபம் பார்க்கும் ஆசையில் தொடங்கப்படும் தனியார் பள்ளிகள் அரசு நிர்ணயித்த கட்டணத்தை வாங்கிக்கொண்டு நடனம், ஓவியம், நீச்சல் கற்றுத் தருவதாகச் சொல்லி பணத்தை கொள்ளை அடிக்கின்றன'' என்றார்.

சென்னை மாநகர போலீஸ் தெற்கு இணைஆணையர் சண்முக ராஜேஸ்வரன், ''நீச்சல் பயிற்சியாளர்கள் ரங்கா ரெட்டி, ராஜசேகர், ரவி, அருண்குமார் ரவிச்சந்திரன் ஆகியோரை கைது செய்திருக்கிறோம். விபத்துக்குக் காரணம் என்ன என்று விசாரித்து வருகிறோம்'' என்றார்.

மற்ற விளையாட்டுகள் என்றால் வெளிப்படையாக நடக்கும், அனைத்தையும் பார்க்கலாம். நீச்சல் குளம் என்றால், தண்ணீருக்குள் நடப் பதை யார் அறிய முடியும்? அது மாதிரித்தான் சில பள்ளிகளுக்குள் நடப்பதையும் பெற்றோர்களால் உணர முடிய வில்லை!

- பி.செ.விஷ்ணு,

செ.நாகராஜன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism