Published:Updated:

சென்னையில் சரிந்த சீட்டுக்கட்டு வீடு!

வீடு வாங்குவோர் கவனத்துக்கு...

பிரீமியம் ஸ்டோரி
சென்னையில் சரிந்த சீட்டுக்கட்டு வீடு!

அடுக்குமாடிக் கட்டடங்கள் என்றாலே மக்கள் அதிருகிறார்கள். மவுலிவாக்கத்தில் நடந்த விபத்து, அடுக்குமாடி வீடுகளில் குடியேற ஆசைப்படும் எல்லோர் வயிற்றிலும் புளியைக் கரைத்திருக்கிறது.

அடுக்குமாடி வீட்டில் இருக்கும் பலருக்கும் தாங்கள் வசிக்கும் அடுக்குமாடி வீடு பாதுகாப்பானதா என்ற அச்சம். புதிதாக வாங்க இருந்தவர்கள், தங்கள் ஆசைகளை மறுபரிசீலனை செய்கின்றனர்.

இதற்கு என்னதான் தீர்வு?

அடுக்குமாடி வீடுகளில் குடியிருப்பவர்களும், இனி வீடு வாங்கப்போகிறவர்களும் என்ன செய்ய வேண்டும்?

சென்னையில் சரிந்த சீட்டுக்கட்டு வீடு!

'அடுக்குமாடி குடியிருப்பு கட்டட சட்டதிட்டங்கள் என்ன? வீடு வாங்குவோர் எதை எல்லாம் கவனிக்க வேண்டும்'' என்று வழக்கறிஞர் சுதா ராமகிருஷ்ணனிடம் கேட்டோம். ''சென்னையில் புற்றீசல்போல அடுக்குமாடி குடியிருப்புகள் முளைத்து வருகின்றன. அடுக்குமாடி குடியிருப்புகளைச் சிறப்பு கட்டடங்கள் என்று சொல்வார்கள். வீடு வாங்குவதற்கு முன், குடியிருப்பைக் கட்டித்தரும் கட்டுமான நிறுவனம் பற்றிய தகவல்களைத் தெரிந்துகொள்வது அவசியம். கட்டடம் கட்டித்தரும் நிறுவனம் சி.எம்.டி.ஏ-விடம் பெற்ற ப்ளான் அனுமதிகளைக் கேட்டுப் பெற வேண்டும். வீடு வாங்குபவர்களுக்குக் காட்டிய ப்ளானும், சி.எம்.டி.ஏ-விடம் வாங்கிய ப்ளான் அனுமதியும் சரியாக இருக்கிறதா என்பதைப் பார்க்க வேண்டும். இந்தக் கட்டடத்தை என்ன பிராண்ட் பொருட்களைக் கொண்டு கட்டுகிறார்? அது தரமானதா? இந்தக் கட்டடத்தை சி.எம்.டி.ஏ அதிகாரிகள் குறிப்பிட்ட கால இடைவெளியில் பரிசோதிக்கிறார்களா? இதையெல்லாம் அறிந்துகொள்வதும் அவசியம்.

அடுக்குமாடி குடியிருப்புகள் கட்டும்போது ஒவ்வொரு தளமும் கட்டி முடித்ததும் சி.எம்.டி.ஏ அதிகாரிகள் சோதனை செய்ய வேண்டும். மண் பரிசோதனையைக் கட்டட உரிமையாளர்கள்தான் பெரும்பாலும் செய்வார்கள். இந்த மண் பரிசோதனையை சி.எம்.டி.ஏ அதிகாரிகள் சோதனை செய்து பார்த்தார்களா? ஒரு ஏக்கர் நிலம் என்றால் மண் ஒவ்வொரு இடத்திலும் ஒவ்வொரு மாதிரி இருக்கும்.

சென்னையில் சரிந்த சீட்டுக்கட்டு வீடு!

அதனால், பல இடங்களிலும் மண்ணை எடுத்து பரிசோதனை செய்யப்பட்டதா? கட்டடத்துக்கு முறையான காப்பீடு செய்யப்பட்டு இருக்கிறதா? இதையெல்லாம் கவனத்தில் கொள்ள வேண்டும். கட்டடம் கட்டி முடித்த பிறகும் சி.எம்.டி.ஏ-விடம் இருந்து தரமானதாக இருப்பதாக சான்றிதழ் வாங்கப்பட்டுள்ளதா என்பதைப் பார்க்க வேண்டும்.

அடுக்குமாடி வீடுகளில் குடியிருப்பவர்கள் இப்போது போதிய கால இடைவெளியில் சி.எம்.டி.ஏ அதிகாரிகளிடமோ அல்லது கட்டடம் கட்டித் தந்தவரிடமோ சொல்லி மண் பரிசோதனை செய்வது அவசியம். கட்டடத்தில் ஏதாவது மாற்றங்கள் தெரிந்தால் அரசாங்க அதிகாரிகளிடம் தெரிவிப்பதும் அவசியம். கட்டடங்களில் இடிதாங்கி இருப்பது அவசியம். இதை அங்கு குடியிருப்பவர்கள் உறுதிப்படுத்த வேண்டும். சி.எம்.டி.ஏ அதிகாரிகளுக்கு, பில்டர்ஸ் சொன்னபடி கட்டாமல் போனாலோ அல்லது தரம் இல்லாத கட்டடம் என்றாலோ அவர்களைத் தடுத்து நிறுத்த எல்லா உரிமைகளும் இருக்கின்றன'' என்றார்.

இதுபற்றி சி.எம்.டி.ஏ அதிகாரிகளிடம் கேட்டபோது, ''மவுலிவாக்கம் சம்பவம் அனைவருக்கும் ஒரு பாடத்தை உணர்த்தி யிருக்கிறது. அடுக்குமாடி குடியிருப்பு கட்டட அனுமதி வாங்கும்போது, அனைத் தையும் சரிபார்த்துதான் சான்றிதழ் வழங்குகிறோம். சென்னையில் மட்டும் பல அடுக்குமாடி கட்டடங்கள் கட்டப்பட்டு வருகின்றன. அனைத்தையும் சோதனை நடத்திக்கொண்டுதான் இருக்கிறோம். ஆனால், போதிய அளவு ஊழியர்கள் சி.எம்.டி.ஏ-வில் இல்லை. சிலர் எங்களிடம் அனுமதி வாங்கிவிட்டு வேறு மாதிரி கட்டிவிடுகிறார்கள். அவர்கள் மீதும் நடவடிக்கை எடுத்து வருகிறோம். கட்டட நிறுவனங்களும் பொறுப்புடன் செயல்பட வேண்டும்'' என்றார்.  

கட்டடம் கட்டித்தரும் நிறுவனமும் பல நூறு உயிர்கள் பல ஆண்டுகள் இங்கு வாழப்போகிறார்கள் என்பதை மனதில் வைத்து கட்டுமானப்பணியை மேற்கொள்ள வேண்டும்.

- நா.சிபிச்சக்கரவர்த்தி

படங்கள்: எம்.உசேன், க.பாலாஜி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு