Published:Updated:

மணல் மாஃபியாக்களின் பிடியில் விழுப்புரம்

மணல் மாஃபியாக்களின் பிடியில் விழுப்புரம்

பிரீமியம் ஸ்டோரி

விழுப்புரம் மாவட்ட மணல் மாஃபியாக்களின் கொள்ளை எல்லை மீறிப் போய்க்கொண்டிருக்கிறது.

தென்பெண்ணை ஆற்றில் மணல் அள்ள இரண்டு குவாரிக்கு மட்டுமே அனுமதியுள்ளது. ஆனால், குவாரி உரிமையாளர்கள் ஆற்றில் 10 குவாரி அமைத்து மணல் அள்ளுவதுடன், அந்த குவாரிகளுக்கு இணைப்புச் சாலை போட்டு ஆற்றின் போக்கையே மாற்றிவிட்டதாகப் புலம்புகின்றனர் விழுப்புரம்வாசிகள்.

விழுப்புரம் மாவட்டத்தில் உள்ள பல்லாயிரம் ஏக்கர் விவசாய நிலத்துக்கும் பல்வேறு கூட்டுக் குடிநீர் திட்டத்துக்கும் நீர் ஆதாரமாக விளங்குவது தென் பெண்ணை ஆறு. சங்கராபுரத்தில் ஆரம்பித்து திருக்கோவிலூர், விழுப்புரம், உளுந்தூர்பேட்டை வழியாக கடலூர் மாவட்டத்தில் கடலில் கலக்கிறது. 15 ஆண்டுகளுக்கு முன் திருக்கோவிலூரில் முதல் மணல் குவாரி ஆரம்பிக்கப்பட்டது. அப்போதே மக்கள் இதற்கு பலத்த எதிர்ப்பு தெரிவித்தனர். ஆனால், மணல் குவாரிகளின் எண்ணிக்கை உயர்ந்துகொண்டே இருக்கின்றன. எந்த விதிமுறைகளையும் கடைப்பிடிக்காமல் லாபத்தை மட்டுமே குறியாகக் கொண்டு மணல் மாஃபியாக்கள் செயல்படுவதால் விழுப்புரம் மாவட்டமே பாலைவனமாகும் நிலை ஏற்பட்டுள்ளது.

மணல் மாஃபியாக்களின் பிடியில் விழுப்புரம்

மணல் கொள்ளையைத் தடுக்க தொடர்ந்து போராடிவரும் இந்திய கம்யூனிஸ்ட் கட்சியின் மாவட்டச் செயலாளர் ஏ.வி.சரவணன், ''காவிரி, பாலாறுக்கு அடுத்தபடியாக தமிழகத்தில் உள்ள பெரிய ஆறு தென்பெண்ணை. கிட்டத்தட்ட ஒரு லட்சம் ஏக்கர் விவசாய நிலத்துக்கு இந்த ஆற்றின் மூலம் நீர்ப்பாசனம் கிடைக்கிறது. இந்த ஆற்றை நம்பித்தான் பல கூட்டுக் குடிநீர் திட்டங்கள் உள்ளன. விழுப்புரம், திண்டிவனம், செஞ்சி என பல முக்கிய நகரங்களுக்கு இங்கிருந்துதான் குடிநீர் செல்கிறது. இந்த வளமான ஆறுதான் இப்போது பாலைவனமாகியிருக்கிறது.    

ஆறுகளில் ஒரு மீட்டர் ஆழத்துக்கு மேல் மணல் அள்ளக் கூடாது என்று சட்டம் உள்ளது. ஆனால், இங்குள்ள குவாரிகளில் 12 மீட்டர் ஆழத்துக்கு மணல் அள்ளியுள்ளார்கள். காவிரியைவிட பெரிய ஆறு கேரளாவில் உள்ள பெரியாறு. அங்கு மணல் அள்ள ஜே.சி.பி இயந்திரம் பயன்படுத்தக் கூடாது. ஆந்திராவில் உள்ள கோதாவரியிலும் கிருஷ்ணாவிலும் ஜே.சி.பி இயந்திரத்துக்கு அனுமதி இல்லை.

மணல் மாஃபியாக்களின் பிடியில் விழுப்புரம்

ஆனால் தமிழ்நாட்டில்தான், குவாரிக்கு இரண்டு ஜே.சி.பி இயந்திரம் வைத்து கொள்ளையடிக்கின்றனர். கூட்டுக் குடிநீர் திட்டம் இருக்கும் இடத்துக்கு 500 மீட்டர் சுற்றளவில் மணல் அள்ளக் கூடாது. ஆனால், இங்கோ எல்லாவிதத்திலும் மணல் கொள்ளையர்களுக்கு சட்டம் வளைந்துள்ளது. மணல் கொள்ளையால் ஆறுகள் வறண்டு, நகரத்தில் உள்ள மக்களுக்கு வாரத்துக்கு ஒரு முறைகூட தண்ணீர் கிடைக்காத அவலம் .

விழுப்புரம் மாவட்டத்தில் தென்குச்சிப் பாக்கம், திருப்பாச்சனுர் ஆகிய இடங் களில்தான் மணல் அள்ள அரசு அனுமதி வழங்கியுள்ளது. ஆனால் குவாரி உரிமையாளர்கள் இந்த இடங்களில் அள்ளுவதுடன், அனுமதி இல்லாமல் மேலும் 10 இடங்களில் குவாரி அமைத்து மணல் அள்ளி வருகின்றனர்.

லாரியில் ஒரு லோடு மணல் ஏற்றினால் இரண்டு யூனிட். அந்த இரண்டு யூனிட் மணல் 600 ரூபாய். அதற்கு வரியாக 26 ரூபாய் செலுத்த வேண்டும். 626 ரூபாய் கொடுத்து ஒரு லோடு மணல் ஏற்றிச் சென்று உள்ளூர் மக்களுக்கு 100 ரூபாய் கூடுதலாக லாபம் வைத்து விற்றால் பரவாயில்லை. ஆனால், மணலை எங்காவது சேமித்து வைத்து கேரளாவுக்கும் கர்நாடகத்துக்கும் சென்னைக்கும் கொண்டுசென்று விற்கிறார்கள். தினமும் விழுப்புரம் மாவட்டத்தில் இருந்து 2,000 லாரிகளில் மணல் செல்லுகிறது. 626 ரூபாய் கொடுத்து வாங்கப்படும் ஒரு லோடு மணல் 15,000 ரூபாய்க்கும் 20,000 ரூபாய்க்கும் விற்கப்படுவது கொள்ளையில்லாமல் வேறு என்ன?'' என்றார்.

இதுகுறித்து கனிமவளத் துறை அதிகாரி கிருஷ்ணமூர்த்தி, ''விழுப்புரத்தில் இரண்டு குவாரிக்கு மட்டுமே அனுமதி உள்ளது. 10-க்கும் மேற்பட்ட குவாரிகள் இயங்குகின்றன என்றால், உரிய நடவடிக்கை எடுக்கப்படும்'' என்றார்.

நடவடிக்கை எப்போது?

- ஆ.நந்தகுமார்

படங்கள்: தே.சிலம்பரசன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு