Published:Updated:

சித்ரவதைக் கூடமா மதுரை சிறை?

சிக்கியது கோவை... சிக்கலில் மதுரை!

பிரீமியம் ஸ்டோரி
சித்ரவதைக் கூடமா மதுரை சிறை?

''மதுரை மத்தியச் சிறைச்சாலைக்குள் கைதிகளை விலங்குகள்போல் வைத்திருக்கிறார்கள். தவறு செய்தவர்களை திருத்த வேண்டிய இடம் சித்ரவதைக் கூடமாக மாறிவருகிறது'' என்று மதுரை உயர் நீதிமன்றத்தில் மலைச்சாமி என்பவர் வழக்குத் தொடர்ந்துள்ளார்.

 ''கடந்த ஏப்ரல் 2-ம் தேதி, மத்தியச் சிறைக்குள் கஞ்சா வீசியதாக எனது சகோதரர் முத்துமணியை கரிமேடு போலீஸார் கைது செய்தனர். சிறைக்குள் என் தம்பியை கடுமையாக சித்ரவதை செய்து தனிமைச் சிறையில் வைத்துள்ளனர். இப்படி கைதியை மற்றவர்களுடன் சேரவிடாமல் தனிமைச் சிறையில் வைத்திருப்பது மனித உரிமை மீறலாகும். இது சம்பந்தமாக சிறை கண்காணிப்பாளரிடம் மனு கொடுத்தேன். அவர் எந்த நடவடிக்கையும் எடுக்கவில்லை. தனிமைச் சிறையில் இருப்பதால் என் தம்பியின் மனநலம் பாதிக்கப்படும் சூழல் உள்ளது. எனவே மற்ற கைதிகளுடன் வைத்திருக்க உத்தரவிட வேண்டும்'' என்று அவர் தனது மனுவில் குறிப்பிட்டுள்ளார்.  

புகாரை விசாரித்த நீதிபதிகள், ''மனுதாரரின் புகார் குறித்து தலைமை குற்றவியல் நீதிபதி, மத்தியச் சிறைக்கு சென்று ஆய்வு நடத்த வேண்டும். ஆய்வு அறிக்கையை நீதிமன்றத்தில் தாக்கல் செய்ய வேண்டும்'' என்று உத்தரவிட்டுள்ளனர்.

சித்ரவதைக் கூடமா மதுரை சிறை?

''இது மட்டுமல்ல... இதைவிடக் கொடுமையான விஷயங்கள் உள்ளே நடக்கின்றன. அந்தக் கொடுமைகளை நானே அனுபவித்திருக்கிறேன்'' என்று சில விஷயங்களை பகிர்ந்துகொண்டார் தமிழ் புலிகள் அமைப்பின் மதுரை மாவட்டச் செய்தித் தொடர்பாளரான முத்துக்குமார். ''துப்புரவுப் பணியாளர்களின் பிரச்னைகளுக்காகப் போராட்டம் நடத்தியதால் கைதுசெய்யப்பட்டு கடந்த வருடம் மதுரை சிறையில் அடைக்கப்பட்டேன். அங்கே பலர் மனநலம் பாதிக்கப்பட்டவர்களாக இருந்தனர். சிலர் அங்கேயே ஆடைகளைக் கழட்டி வீசுவதும், பயங்கரமாக சிரிப்பதும் அழுவதுமாக இருந்தனர். மனநலம் பாதிக்கப்பட்டவர்களை எப்படி இந்தச் சிறையில் அடைத்துள்ளனர் என்பதே புரியவில்லை.

சித்ரவதைக் கூடமா மதுரை சிறை?

கைதிகளுக்கு சாப்பாடு கொடுக்கும்போது அங்கிருப்பவர்கள், கைதிகள் கெஞ்ச வேண்டும் என்று எதிர்பார்க்கிறார்கள். கெஞ்சி கேட்கவில்லை என்றால், சாப்பாடு போடுவது இல்லை. போதைப் பொருட்கள் சர்வசாதாரணமாக சிறைக்குள் புழக்கத்தில் இருக்கின்றன. நான் வெளியில் வந்ததும் சிறையில் நடக்கும் கொடுமைகளையும், அங்கு எந்தவித சிகிச்சையும் இல்லாமல் மனநலம் பாதிக்கப்பட்டவர்கள் படும் அவஸ்தைகளையும் சிறைத் துறை உயர் அதிகாரிகளுக்குப் புகார் அனுப்பினேன். ஆனால் எந்த நடவடிக்கையும் இல்லை'' என்று சொன்னார்.

மதுரை சிறைக் கண்காணிப்பாளர் தரப்பிலோ, ''இது பொய்யான தகவல். யாரையும் நாங்கள் தனிமைச் சிறையில் அடைப்பது இல்லை. எனவே இந்த மனுவைத் தள்ளுபடி செய்ய வேண்டும்'' என்று நீதிமன்றத்தில் பதில் மனு தாக்கல் செய்யப்பட்டுள்ளது.

மதுரை கதை இப்படியிருக்க... கோவையில் மத்தியச் சிறைத் துறை டி.ஐ.ஜி கோவிந்தராஜ் சில தினங்களுக்கு முன்பு சஸ்பெண்ட் செய்யப்பட்டு இருக்கிறார். ''சிறையில் உள்ள கைதிகளிடம் பணம் வாங்கிக்கொண்டு செல்போன் கொடுக்கிறார்கள். ஜெயில் கைதிகளுக்கு உணவு வழங்குவதற்காக அரசு ஒதுக்கும் நிதியில் ஏராளமான முறைகேடுகள் நடந்துள்ளன. இதுபற்றி விசாரிக்க வேண்டும்'' என்று தொடர்ந்து கோவை சிறையை புகார்கள் மையம் கொள்ள ஆரம்பித்தன.

சி.பி.சி.ஐ.டி போலீஸார் இதுதொடர்பாக கோவை மத்தியச் சிறைக்குள் ஆய்வு நடத்தியது. அங்கிருக்கும் அதிகாரிகள், கைதிகள் என்று பல்வேறு தரப்பிலும் விசாரணை நடந்தது. அந்த விசாரணையின் முடிவில் சி.பி.சி.ஐ.டி போலீஸார் ஒரு ஆய்வறிக்கையை அனுப்பியது. அந்த அறிக்கையின் அடிப்படையில் சிறைத் துறை டி.ஐ.ஜி கோவிந்தராஜ் சஸ்பெண்ட் செய்யப்பட்டுள்ளார்.

மதுரை ஜெயிலிலும் விரைவில் அதிரடியை எதிர்பார்க்கலாம்!

- செ.சல்மான், ச.ஜெ.ரவி

படங்கள்: தி.விஜய், பா.காளிமுத்து

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு