Published:Updated:

விபசார மாஃபியாவிடம் சிக்கிய வங்காளப் பெண்கள்!

பெங்களூரு... மதுரை... நாகப்பட்டினம்... சென்னை பந்தாடப்பட்டப் பெண்ணின் சோகம்

விபசார மாஃபியாவிடம் சிக்கிய வங்காளப் பெண்கள்!

பெங்களூரு... மதுரை... நாகப்பட்டினம்... சென்னை பந்தாடப்பட்டப் பெண்ணின் சோகம்

Published:Updated:
விபசார மாஃபியாவிடம் சிக்கிய வங்காளப் பெண்கள்!

இந்தியாவில் வேலை வாங்கித் தருவதாக ஏமாற்றி, வங்காள தேசத்தைச் சேர்ந்த நான்கு இளம் பெண்களை பெங்களூருக்கு அழைத்துவந்து விபசாரத்தில் தள்ளியிருக்கிறார் பிரபல விபசார தாதா ராஜா ஷேக். அவரைக் கைதுசெய்ய இன்டர்போல் உதவியை நாடியிருக்கிறார்கள் சென்னை சி.பி.சி.ஐ.டி போலீஸார்.

வறுமையின் பிடியில் சிக்கியுள்ள வங்காள தேசத்தைச் சேர்ந்த நான்கு இளம் பெண்களை பிரபல விபசார தாதா ராஜா என்ற ராஜா ஷேக், நல்ல சம்பளத்துடன் வேலை வாங்கித் தருவதாக அழைத்துவந்து விபசாரத்தில் தள்ளியிருக்கிறார். பெங்களூரில் விபசார சாம்ராஜ்ஜியத்தை நடத்திவரும் மஞ்சு என்ற மஞ்சுநாத் மற்றும் அவரது மனைவி கஜோலி என்ற அஞ்சலியிடம் இந்த இளம் பெண்கள் தலா ஒரு லட்சம் ரூபாய்க்கு விற்கபட்டு, விபசாரத்துக்குத் தள்ளப்பட்டனர். மறுப்பு தெரிவித்த பெண்களுக்கு பல்வேறு கொடுமைகள் நடந்துள்ளன. உடலில் ஆங்காங்கே சிகரெட்டால் சூடு வைத்து சித்ரவதை செய்திருக்கிறது விபசார கும்பல்.

ஒட்டுமொத்த விகடனுக்கும் ஒரே ஷார்ட்கட்!

விபசார மாஃபியாவிடம் சிக்கிய வங்காளப் பெண்கள்!

நான்கு இளம் பெண்களில் ஒருவரை பெங்களூரிலிருந்து 15 நாட்களுக்கு மதுரையில் உள்ள விபசார தாதா வேல்ராஜிடம்

30 ஆயிரம் ரூபாய்க்கு விற்றுள்ளார் மஞ்சுநாத். வேல்ராஜ் அவரை 15 நாட்கள் விபசாரத்துக்குப் பயன்படுத்திவிட்டு மற்றொரு விபசார புரோக்கர் சதீஷிடம் விற்றுள்ளார். அடுத்த 15 நாட்கள் அங்கிருந்து காரைக்காலை சேர்ந்த இன்னொரு விபசார புரோக்கர் கஜிதா பீவியிடமும் நாகப்பட்டினத்தைச் சேர்ந்த நாகலிங்கத்திடம் விற்கப்பட்டுள்ளார். இப்படி விபசார கும்பல் வங்காள தேச பெண்ணைப் பந்தாடியிருக்கிறார்கள். இப்போது அந்தப் பெண் சி.பி.சி.ஐ.டி. போலீஸாரால் மீட்கப்பட்டுப் பத்திரமாக வங்காள தேசத்துக்கு அனுப்பி வைக்கப்பட்டு இருக்கிறார். இந்த வழக்கில் விபசார கும்பலை சேர்ந்த 6 பேரை போலீஸார் கைது செய்திருக்கிறார்கள்.

இந்த வழக்குத் தொடர்பாக சென்னை சி.பி.சி.ஐ.டி போலீஸ் டி.எஸ்.பி. ராஜா சீனிவாசனிடம் பேசினோம். ''கடந்த 2012-ல் வங்காள தேசத்தை சேர்ந்த பிரபல விபசார தாதா ராஜா ஷேக், அந்த நாட்டை சேர்ந்த நான்கு இளம் பெண்களை அழைத்துவந்து, பெங்களூரில் மஞ்சுநாத், கஜோலியிடம் விபசாரத்துக்காக விற்றுள்ளார். இதில் ஒரு பெண் மட்டும் தமிழகத்தில் பல பகுதியில் உள்ள விபசார கும்பலிடம் விற்கப்பட்டுள்ளார். அவர் மதுரையில் விபசாரத்தில் ஈடுபடுத்தியபோது கஸ்டமராக வந்த ஒருவர், அந்தப் பெண்ணின் அழகில் மயங்கி காதலித்துள்ளார். இந்தக் காதல், வங்காள தேச பெண் எங்கு சென்றாலும் தொடர்ந்திருக்கிறது. நாகப்பட்டினத்தில் இருந்தபோது அங்கு நடந்த கொடுமைகளை மதுரை காதலனிடம் கூறி, கதறியிருக்கிறார். விபசார கும்பலிடமிருந்து காதலியை மீட்டு வந்து மதுரையில் வீடு எடுத்து தங்க வைத்திருக்கிறார். இந்தத் தகவல் மதுரை காதலனின் குடும்பத்துக்குத் தெரியவர, அந்தப் பெண் அங்கிருந்து விரட்டியடிக்கப்பட்டார். மதுரை கோரிப்பாளையம் பஸ் நிலையத்தில் தவித்த அவரை போலீஸார் பிடித்து விசாரித்தனர். பாஸ்போர்ட் இல்லாமல் இருந்ததாக அந்தப் பெண் மீது வழக்குப்பதிவு செய்த போலீஸார் சிறையிலும் அடைத்திருக்கிறார்கள். இந்தத் தகவல் கிடைத்ததும் சி.பி.சி.ஐ.டி., ஏ.டி.ஜி.பி. கரன்சின்கா, ஐ.ஜி மகேஷ்குமார் அகர்வால், டி.ஐ.ஜி கணேசமூர்த்தி, எஸ்.பி பெருமாள் ஆகியோர் உத்தரவின்பேரில் பாதிக்கப்பட்ட வங்காள தேசப் பெண்ணிடம் சிறையிலேயே விசாரணை நடத்தினோம். விபசாரத்தில் தள்ளப்பட்ட பெண் மீது பாஸ்போர்ட் வழக்குப் பதிவுசெய்ய சட்டத்தில் இடம் இல்லை என்பதைச் சுட்டிக்காட்டி அவரை மீட்ட சி.பி.சி.ஐ.டி. போலீஸார், மயிலாப்பூர் பெண்கள் காப்பகத்தில் ஒப்படைத்தனர்.

அந்தப் பெண்ணை விபசாரத்தில் தள்ளிய பெங்களூரைச் சேர்ந்த மஞ்சுநாத், அவரது மனைவி கஜோலி, மதுரை வேல்ராஜ், சதீஷ், நாகை நாகலிங்கம், காரைக்கால் கஜிதா பீவி ஆகியோரை கைது செய்துள்ளோம். வங்காள தேசத்தை சேர்ந்த பிரபல விபசார தாதா ராஜா ஷேக்கை கைதுசெய்ய இன்டர்போல் போலீஸாரின் உதவியை நாடியிருக்கிறோம். இதற்கிடையில் மயிலாப்பூரில் இருந்த அந்தப் பெண்ணை அவரது குடும்பத்தினரிடமும் ஒப்படைத்திருக்கிறோம். பெங்களூரு விபசார தாதா மஞ்சுநாத் மீது ஏ.டி.எம். கொள்ளை வழக்கும் உள்ளது' என்றார். வங்காள தேசத்திலிருந்து வேலை வாங்கித் தருவதாக கூறி இந்தியாவில் பல மாநிலங்களில் உள்ள விபசார கும்பலிடம் பல இளம் பெண்கள் சிக்கியிருப்பதாக அதிர்ச்சி தகவலை கூறினார் போலீஸ் உயரதிகாரி ஒருவர்.

விபசார தாதாக்களை அடக்க வேண்டிய தருணம் இது!

- எஸ்.மகேஷ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism